لو العالم على ذوقي يعجب مين
https://vimeo.com/670166431
كتابة واداء ولحن سلام يسري
إنتاج موسيقى سلام يسري وأحمد مصطفى إكس
ميكس وماستر أحمد مصطفى إكس
Written, composed and performed by Salam Yousry
Music produced by Ahmed Mostafa X and Salam Yousry
Mixing and Mastering by Ahmed Mostafa X

wa'awa'a وأوأة

كتابة وتلحين وتوزيع وغناء وإنتاج وتحريك سلام يسري
ميكساج وماستر أدهم زيدان
ترجمة كاتيا هولز
Written, performed، produced and animated by Salam Yousry
Mixing and mastering by Adham Zidan
Translated by Katia Halls

Bronze - برونز

سهرة أصدقاء
(إيه اللي حتبقى مني)
قصيدة واداء سلام يسري
ارتجال عود حازم شاهين
ارتجال غناء محمد السواح

إيه اللي حيتبقى مني؟

كلمات واداء وموسيقى سلام يسري
٢٠١٦

وانا اللي لقيت شغلتي في الحياة 
وكشفت سر النبض ليه مش منتظم
وعرفت ان الوظيفة الأم
إني أضايف القلوب لما تحب تلاقي بيت عندي
وتمشي لما تحب
أضايف قلوب تانية
واسافر...
تضايفني قلوب
وانا اللي لقيت شغلتي في الحياة
باضايف الأشواق بتاعة ناس زايرين
زوار لشوق جوايا
شوق قلقان
على الوش رايق
وجوة موج طايش
ونفسه الطيش يسود

وانا اللي لقيت شغلتي في الحياة الترحال
ما بين بيتي هنا وبيتي هناك
وبين عبور وعبور
عِبَر بتملا العين
وتملا الراس
وتملا النبض
وباغرق في كل مرة باسافر
وباطلع من غرقتي
بإني أسيب أيدي
رضا وقبول

وباستسلم
بقوة الاختيار
وقوة لحظة مابتتعادش
ونفسي اللي دخل..خرج ولا بيرجعش
وغلطة عملتها وباطلب منها ما تعاودش
ولمحة مالحقتش آخد لها صورة..ماتتعوّضش
وصمت..كان واجب في لحظة..مليته كلام
فخبّيت سحر بقى مابيسحرش
وطلب سألت وجالي الردّ لأ..
فنسيت ولا ألحّتش
ولغة ألّفتها في الحلم بحروف وصوت
ونسيتها..ما اتسجّلتش
وسطور كتير قريتها..ذاكرتها..اتعلّمتها
فدابت جوّة أفكار غامضة ما تفسّرش
وأسئلة كنت اسألها زمان ونفسي الاقي لها إجابة
ونسيتهم ونسيت اني كان نفسي اجاوبهم

وشكل عينيّ وانا أصغر اتبقّى منه كام صورة
لكنه خلاص نحته اترسم بالشيب
وخطي اللي من كُتْر ما شغلني رسمه نسيت أصله
وصوتي اللي من الدخان بقى صوت غميق مجروح
بينبَح حكمة ما تعلّمش

وباستسلم
بقوة جهلي وسذاجتي
وبراءة طفل معايا وانا مولود مااتولدتش
وباستسلم بقوة الألحان على إنها تبكّي
على إنها ترقّص
وباستسلم بإن أول قصة الحب
أصبح إدمان
وخلّى خيالي ما يكبرش
أبعد من الأوائل ولا يغطسش
غير وهو لامس أرض
يخاف م البحر
يخاف م السرعة
يخاف لو ما سلّمش
لكني خلاص باعلن سلامي باستسلامي
ولزام عليّ 
عشان السطور دي ماتكون بس كتابة شعرية
لزام أمسك في معانيها
ولو فترة
عشان بس اعرف اقول اني لقيت شغلتي
لقيت شغلتي في الحياة

جينيف ٢٠١٦

Salam Yousry's Album

شغلتي في الحياة

نتاج ورشة عمل مع أطفال كورال جمعية الصعيد بإدارة سلام يسري وبمشاركة صدقي صخر وشادي الحسيني في عام ٢٠١٩

أسئلة-كورال جمعية الصعيد

نتاج ورشة يوم واحد لمشروع كورال في ساحة روابط للفنون بالقاهرة في يوم ٢٣ أكتوبر ٢٠٢٣
كانت الورشة للتأليف والتلحين الجماعي بمشاركة ٨٠ شخص

الصوت الجماعي

فاكرة  
امّا كانت المظاهرة في الشارع وانتي في بيتي  
وجايبة أكل وشرب وناوية نسهر
وانا وافقتك
وماعرفناش نركز نظرة بيننا
الحب تاه في هتاف طايش

فاكرة 
لما كان الشغل ناقص 
وماكنتش عارف حادفع الإيجار منين
جيتي تقوليلي حتتعدل ومعلشي ماتقلقشي
وانا سمعتك
لكن غابت نظرة مابيننا في مستقبل مافيهوش أمل
والحب ضاع في حاجة اليوم وأسئلتك

فاكرة
لما كان بيننا سفر ومدينتي بعيدة عن حضنك 
واستنيتك واستنيتيني؛ لكنّ الوقت ما استناش 
و بعِدْت خالص كل امّا كان يمر يوم ورا التاني وخسرتك
وقابلتي صدفة قريبة خدت مني حضوري فغبت

أكيد انا لسة بافتكرك وبافتكر الذكرى ساعات
واني خسرت الحب في المسافات
 
فاكرة 
لما الحرب قامت 
واحنا بنشوف ألم صاحي
ونتنهد ونبكي نخاف على اللي جاي
نسينا كل اللي جاي بيننا
وضاع الحب في خندق خايف مستخبي 
لتيجي الحرب تقتله
فمات برضو بفعل الخوف
و ضِعت وراه بفعل الفقد
و ضعتي انتي في أشواقي
فبقيت ادوّر في الوشوش على وشّك
وبقيت احلم ألاقيكي تدقي الباب تفاجئيني  وتبتسمي وتيجي لحضني تتخبي وتحميني 
من الحزن اللي ماليني على بكاكي
 
فاكرة
اما كنت باناديكي فالاقيكي في نفس اللحظة بتنادي
ولاقيتك قدام بيتي و طالعالي وانا نازللك 
بلا اتفاق كان الوفاق
 
وفاكرة
لما قلتيلي ان انا وحشتك وقربتي وكبر حضنك 
وخدتيني على القوضة وعينينا كانت مغمضة لكن شايفين 
بأشواق لهفة البعد اللي كان أسبوع
سبوع واحد وعيد ميلاد ودورة في كل شهر تزورنا نتلخبط
ونتعشم الشهر الجاي مانتلخبطش
 
فاكرة
اما وصلتيني المحطة وانا مسافر
وقلتي انك حتستقبليني لما ارجع
ورحت وجيت وقفت استنى صوتك 
لا جالي الندا و لا جيتي
وعرفت ان الظروف مانعة
والشغل والعيلة والأصحاب مشاغلينك
ومش سايبين جواكي مساحة تلاقيني 
وتديني مساحة أقعد ولا اتربع 
شربت سيجارة وانا واقف وطفّيتها 
وصل مسافرين بالآلاف
وخلصت علبة السجاير كاملة  
ونمت مكاني م الوجع اللي بقى في الدم
 
فاكرة 
امّا دخلتك في قلب كل فكرة جاية تزورني

فاكرة  
اما كنت اكتب سطر وبعده السطر
واملا بين السطور سطور ليكي 
فدخلتي في دم حكاياتي
وكل الصور وريحة بيتي
 
فاكرة
قلتيلي مرة حاجيب شمعة واقعد جنبك ونتونّس
ولا جيتي
قلتيلي مرة مشغولة مش قادرة أدَخَّلَك يومي
بعدين لقيت الباب خبّط وطليتي
ومرة زعقتي بس عشان سألت عليكي
ومرة فضلتي ترغي لساعة الفجر من غير فصلة
لحد ما زهّقك صوتك
ومرة عملنا أغنية وكات بتقول كلمة وحيدة 
وكنا مبسوطين بيها
وغلطنا فتحنا نتفرج على فيلم واحنا سوا
قلب القعدة قعدة نكد وفكرنا بعيوب الكون
ظروف طارئة
لحظة وراها فيه لحظة
بظرف جديد
وخنقة كتير
وبلخبطة
والأسهل اقول خلاص بلاش
دا شيء يتعب 
كفاية عليّ لخبطتي وانا لوحدي
كفاية أدادي مشكلتي
واقوم غايب
لكني لسة مكمّل غُنا
لسة البيبان مفتوحين واحنا سوا
يدخل هوا
ولو دخل ويّاه تراب نفضل سوا
فعلى الأقل نكون سوا

فاكرة
وانا في الكشف عند دكتور الحكاية
قاللي ان المظاهرة حتعدّي قدامي كل سنة فحتلخبط
وان الأخبار حتنقللي صور للحرب طول اليوم
وان العالم مكان مزعج ومش حيخفّ
والناس مليانين بالكركبة ومش ترتيب
وان اللحظة سريعة زيادة مابتهداش
وظرف وظرف
وراهم ظرف
وظرف جديد
لكني باخد نفس كامل
مليت صدري
مليت قلبي
ومستَبْيَع ومش بايِع
ومتساهِل لكني أكيد ما باستسهلش
ومتسامح وآه مسامح 
وجاهل أكتر كل يوم عن يوم قبله
وتايه توهة اللي فجأة نسي العنوان
 
حتفتكري؟
يضيع الحب لما نضيع
يخاف الحب لما نخاف
وانا وانتي مالينا الحب
لكن كل اللي حوالينا بيخرقنا
يشرّخ بيت حكاياتنا لبعضينا
ونفسي أخبّي دوشة الشارع اللي داخلة الصالة 
ونفسي أطفّي صوت جاري اللي بيزعّق
ونفسي أداري همّ المدينة عن عينِك 
 وغيمها ماشي فوق راسنا ولا يفارق
ونفسي أبطل اتسابق أو اتخانق
نفسي النفس يروح خالص

كفاية اليوم اتعاد بترتيب والسنين كاملين  
وعدّوا كمان الأربعين
يمكن مش لازم استحمل سنين جايين
ولا أيام تسابقني
ما تسبقني
ودي اللعبة
نحاول نسبق اللحظة 
لكن اللحظة على ما المحها تكون فاتت
خلاص ماتت  
وجات لحظة سكنت مكانها 
وانا مش مزنوق في لحظة مش عايشة
أنا فاكر
حتفتكري؟
 
سلام يسري
١ نوفمبر ٢٠٢٣

ظروف طارئة - الحب في زمان العنف

الإنتاج الصوتي:
أحمد مصطفى إكس/ولد و سلام يسري

١

ربيع الفكرة

أوّل ما الفكرة بتصحصَح في الذهن

بتبرُق حيّة وعفيّة

وشابّة قادرة تروح عشان تِوْصَل

وييجي معاها حُريّة

أمل تغيير وجاي يِحْصَل



٢

وصيف الفكرة

تِكون تِقْلِت بعد امّا يِهضِمْها كيان العقل

وتاخُد جنبها أفكار ويندِمجوا

وتِعجِنهم نسيج حاضِر

فتتعذّب

وييجي معاها حَرّ شديد

والمُخ يلِف في دواير

ع النوم والراحة مش قادر

بيتقلّب



٣

خريف الفكرة

لما الفكرة تتألّم بعد امّا خدِت مكان كامل

وصفصفِت

وبقالها روح جُوّة نسيج روح الأفكار اللي سبقِتْها

بقِت جُوّة تمام زيّ الخليّة مش مِتشافة لِوَحِدْها

لكن باقية بشكل جديد 

جُوّة العروق

وييجي معاها بعض الحُزن 

وشيء م الشوق



٤

شتا الفكرة

أمّا نحاول نِفتكرها لكن بحنين

كانت فكرة وكات حيّة

دلوقتي خلاص بقى منها سلام الفكرة وسكينة

ونسيان الافتقاد لشخص ان كان ولمدينة

الشِتا يحضِر

وييجي معاه صور تجريد ألوان حُرّة

وييجي معاه فكرة جديدة عن بكرة

الفكرة والفصول

العيشة بالأمل

مضيعة للوقت

ولكن طبطبة 

ع القلب 

شفا للروح

الأمل في الانتظار 

مش عدْل

لكنّه من غيرُه انهيار

العدْل في الحياة 

جايز 

أول ما نآمن بالقدر

وانّه اللي مكتوب 

ومتعرّف 

من غير كلام

وللأحسن 

كل اللي حاصل 

للأحسن

وحتى الحُزن

واهو القدر خطوة بخطوة

وجنبه ضلي

والكلّ إلى زوال

حتى الحنان زايل

وانا زايل

وعايش كل لحظة على إنها الآخرة

ما باسيبش في جُهدي 

جُهد

ما باسيبش ابتسامة تعدي قدامي 

ولا احسّهاش

ما باسيبش ضحكة 

ما اضحكهاش

وبالعب زي طفل ع الشط 

مع أطفال تانيين

معنديش وقت للألم

معنديش طاقة للبُكا

معنديش دافع للخلاف

أنا موافق

أنا قابل

أنا راضي

باداوي الغيرة 

بإني أقول 

أنا اللي بارفُض المنافسة

والغيرة مَقْلَب للضمير 

وسؤال غَلَط

وسؤال تاني جنبه غلط: 

لو باسأل نفسي اذا كان في إيديّ شيء

مافيش خاطر على بالي ولا قلتوش

والخاطر في الخيال 

ومش في الإيد

ولافيش معلومة خبّيتها

وعرّيت نفسي بكامل جلدي 

واقف في الطَلّ 

مش زهقان

وجاهز للنهاية

زي امّا بابدأ الحواديت

صدّقت كل اللي اتقاللي 

وذاكرته

وحتى نظرتي اللي بتخزَق زي نار

وراها بس حنيّة

وانا الحِلم اللي جالي 

جميل

ونوره 

جايّ يزُقّ ويّايا

شايلني 

وشال معايا الحِمْل

وبيزوّد الحِمْل حمل غير الِحمل 

ويتأمّل

ودا الأمل يضيّع وقت

لكنّه يطبطب على القلوب

ويشفي الروح

وتنقضي الأيام بأمل

وفيه بُكرة جايّ حصحالُه

وحاعمل فيه اللي كان ناقص 

من امبارح

حكلّم كل اللي وحشوني

حاخد بالي على نفسي

وحاخد بالي من غيري

وييجي بُكرة ويعدّي 

ومن غير أمل مايجيش بُكرة

ما نستنّاش 

من غير أمل

ما نتأنّاش

ما نتمرنش

ولانصبرش

ما نتعلّمش

الوقت عايش بالأمل

ساعات بتعدّ 

تضيع لحظة ورا لحظة

ومن غيره مفيش لحظة 

مفيش رغبة

مفيش الوقت.

لو عايز اقتل الساعة ما كسّرش العقارب 

لكني حاقتل الأمل

ويبقى مافيش غير العدم

وبارجع تاني للتجريد

لمّا الأرض اللي تحتي ترقّ

ولما اليوم يغرَق في فكرة

في الدماغ

الخطة بالدماغ في الراس بالعقل والمعقول

لكنّ الحياة في الحركة في الإحساس في الحسّي في المتعاش 

في الحدس 

حدس اللي بيخللي اختيار وقتي 

ومش بنظام كتبه القلم جوّة الورق 

الفوضى في الحياة أساس الصدفة

مافيش ترتيب غير المفاجأة

مافيش لحظة يناسب فيها الوقت رغبة

أنا باكتب ع الورق كلام خايب ومش خطة

وبارتّب راسي فكرة جنبها فكرة 

عشان مايخيبش مخي م الدوشة

لكنّ الخطة مش مكتوبة 

ولا معروفة 

ولا عايزها

مفيش خطة

واليوم بيوم

والساعة ساعة 

ولا حتزيد ولا بتنقص

واللحظة سريعة فوق الفكرة فوق الخيال

اللحظة فيها ألفين صورة

جمّعتهم في مخي وبكلمة

لُغة

ونقشتها حروف مرسومة

وبعد ما خلصت الورقة 

حرقتها

وقبل ما احرقها قريتها لصاحبي 

قال: الله!

وكمّل يومه ونسيها

وجه بُكرة 

فسألني نفس السؤال بتاع امبارح

وانا مش فاكر ردّيت بإيه

ما دا امبارح

وانا في الآن 

حاردّ الآن ولازم ردّي يتجدد

باحرق ورقي بعد اما باملاه بالخطوط

خطوطي بكرة تتمكن 

تصير أوضح

ودا الأمل

ولو حتى ما جاش بكرة

كتبت خيالي وحرقته ولا استنيتش

وعشت لآخر نفس كإن مافيش نفس بعدُه

وانا زايل

ولو ما بقاش مني ولا ذكرى

ولا صورة

ولا امتداد خِلْفَة وخلَف

ما تفرقشي 

قضيت أيام 

وحاولت اكون فيها أمين 

وحاولت أكون لغيري أمان

ومش كل المحاولات كانت ناجحة

ومش بإيديّ اني تقيل

وضغط الحمل خلّا صوتي متحشرج

وبارغي كتير

عندي حكايات تملا خيال غيري

لكن باسمع 

ولسة عندي فَضَا في ذاكرتي

بتيجي الفكرة تلحق كلمة فباكتبها وبانساها

حتنسوني

وانا قلقان من النسيان

وباتمرّن على النسيان

في كل لحظة قبل ما انام

وقبل اما يشيلني الحلم

جايز أقبل اكون منسي

واكون نسّاي

أنا زايل

أنا منسي

أنا نسّاي

سلام يسري
 ١٥ أغسطس ٢٠٢٣

الأمل

تلحين: آية متولي
كلمات و غناء: سلام يسري
غناء مصاحب: يسرا الهواري
جيتار: محمد درويش
ميلوديكا: شادي الحسيني
ريكوردر: صدقي صخر

من عرض "مد و جزر" لفرقة الطمي المسرحية من إنتاج ٢٠١٠ - 
--

روحة 
رجعة
سُكْنى
كيان
رحلة
مدّ و جارف 
الكيان
الرحلة
جزرها يمحي الآثار
لكن بيسيب وراه تلال
مش متساوية
و دي جُزُر
مشاعر مجروحين لآخر بصَر

روحة 
رجعة
سُكنى
و الضفّة التانية كون تاني
هناك.. وجود تاني
و فيها مدّ 
و منها جَزْر
و ليها نَدْر
و مين عارف
يمكن في ساعة فَجْريّة
يزيد الجَزْر
تبان جُزُر
يوصل ما بين أرضين و متباعدين
جزرين و مادّين الإيدين
و جارحاهم سنين فُرْقة 
و لا ناسيين


روحة رجعة - الطمي

لحن وكلام: سلام يسري
عود: مايكل عماد
غناء: سلام يسري وفريدة خيرت

إحنا سوا

الحر لما يقابل هوا 
لا هو بارد ولا جاي سخن
بيفضل حر
والهوا آه م الهوا 
بيلاعبوا ويلف عليه
ولا يتأثر باللي جاي يحن إليه
و الحلوة لما قابلتها
 وهي لما حكيتلها
لفت ودارت حواليّ
ولا كلمة وجعان قلبي
وفضلت أنا زي ما انا
وفضل الصيف رغم الشتا
جوايا حرّ
والحر لما يقابل هوا
بيفضل حر

من قعدة مع علي عيسى ٢٠٢١

جعان قلبي

قالتلي نرجع في الزمن ونشوف نهاية للقصة

نهاية للقصة

ديسمبر 2017 - مش مسموح

الشك

El 3awda - Al Tamye Live at Geneina 2Nov2012
من عرض "مد و جزر" من إنتاج يناير ٢٠١٢ 
كلمات: سلام يسري
تلحين محمد درويش
غناء: يسرا الهواري و سلام يسري
جيتار: محمد درويش
ريكوردر: صدقي صخر
بيانو و ميلوديكا: شادي الحسيني
أكورديون: يسرا الهواري
إيقاع: أيمن مبروك
--
العودة دايماً فيها نفس العاطفة
كل اما اسافر وارجع باحب القاهرة أكتر
و باستحمل أنواع الفوضى برضا أكبر
وكإني باكتشف حاجة عايز اكتشفها
و كإن أسرار مغطية و في كل خطوة باكشفها
لسة شارع بيتي القديم حاضر ومستني
و انا لسة ما وافقتش على الهجران و متأني
و رغم الفوضى دفا مدينتي بيرضيني 
و رغم القسوة دا نوع قسوة مغذيني
ما هيّ القسوة في كل طريق


العودة

El Sama - Al Tamye Live at Geneina 2Nov2012
من عرض "مد و جزر" من إنتاج يناير ٢٠١٢
كلمات: سلام يسري
تلحين محمد درويش
غناء: سلام يسري
جيتار: محمد درويش
ريكوردر: صدقي صخر
بيانو و ميلوديكا: شادي الحسيني
أكورديون: يسرا الهواري
إيقاع: أيمن مبروك


السما بتبكي عشان خاطري

من عرض فنتازيا اللجنة - من إنتاج ٢٠٠٩

كلمات و غناء: سلام يسري
ألحان: سلام يسري
إبتهال الصريطي
محمد درويش
بيانو: شادي الحسيني
إيقاع: شهير نبيل
عود: محمد درويش
ساكسفون: شادي أحمد
ريكوردر: صدقي صخر

مكان جديد
مزار مشاعر
مفتوجين ع الحب.. ع الدهشة
مكان جديد و الغربة قفل
الحيطان مرسومة بلون رمادي مش حبوب
معلوم
مش راح أكون المكان
و لا يحبسني زمان
طيّاف
دبيت هنا
زي ما دبيت هناك
لقيت بسمات
و صحيح السما صافية و الهوا هفهاف
لكن لا انا للحبيبة
و لا للمدينة
أنا وحيد
و بس الخوف حبيب قريب
باسمع مزيكتي بكا محبوس
أنا كلي حب
أنا كلي حب
مكان جديد مزار مشاعر
مفتوحين ع الحب ع الدهشة
و ألم جديد

Makaan gedid مكان جديد

ضل اللُقا

Salam Yousri is a multidisciplinary artist born in 1982, based in Cairo. He founded Al-Tamye Theater Group in 2002 and the Combo Independent Festival in 2012.  After his graduation in 2004, from the Painting Department in The Faculty of Fine Arts, Helwan University, Salam worked as a Teaching Assistant in the same department and as a professional illustrator for major advertising companies. He also worked as a curator for Fonoon Art Gallery and Bookshop in 2005.  In 2009, Salam managed the “eka3 for Independent Music Production and Distribution” office in Cairo. In 2010, Salam founded The Choir Project, an initiative that invites members of the public and professional artists to participate in workshops of collective creation, during which texts are collectively written and turned into songs or live performances. Salam has since led community-based workshops in songwriting and performance across the Middle East, Europe and the United States. He has also produced and directed several music videos, ads, documentaries and short films. 


سلام يسري هو فنان متعدد التخصصات من القاهرة، ومن مواليد ١٩٨٢. أسس فرقة الطمي المسرحية في عام  ٢٠٠٢ ومهرجان "كومبو مستقل" في ٢٠١٢. منذ عام ٢٠٠٤ وبعد تخرجه في كلية الفنون الجميلة بجامعة حلوان، عمل كمعيد بقسم التصوير. كما عمل كمدير لقاعة عرض ومكتبة فنون في ٢٠٠٥. وفي ٢٠٠٩ عمل كمدير لعمليات مكتب شركة إيقاع للتوزيع والإنتاج الموسيقي بالقاهرة.
أسس مشروع كورال في مايو  ٢٠١٠، وهي مبادرة تدعو بشكل مفتوح الأفراد من المحترفين والهواة للمشاركة في ورش عمل للكتابة والتلحين الجماعي. وقد قام منذ ذلك الوقت بإدارة ورش عمل للإبداع الجماعي في مصر وفي الشرق الأوسط وأوروبا والولايات المتحدة الأمريكية.
عمل أيضاً بمجال الدعاية والإعلان كرسام ومصمم ومخرج وله تجارب عِدّة في الأفلام التسجيلية والروائية القصيرة والأغاني المصورة.

Salam Yousry

Popular tracks