دخلة ابريل
الشتا بيعافر في الصيف
والصيف بيعافر في الخلق
والخلق بتغرق في الزيف
والكلمة بتخنق في الحلق
وشوية تمطر على غفلة
وشوية عواصف وتراب
وشوية الحر بيتمكن
كروان بيخانق في غراب
وشوية نمل اللي قريب
وشوية نحب الأغراب
وتملي بحن
وبفتكرِك
وبروح على صورتِك
بالعافية
( الجو عيا )
على رأي أمي
باين من صوتي اني بعافية
دور برد شديد
المرادي
مانفعش معاه
مشاريب دافية
على فكرة أنا لسه عبيط جدا
وبحب أتفلسف ع البرد
ومصدق انه بيغسلنا
وبيغري الساكت بالسرد
وبيسحب من خنقة روحنا
فبتظهر خنقة على الصوت
لولا بس مضاد بينيمني
كان ممكن أقول لِك مبسوط
انشاله تكوني أحسن مني
يا شبيهة الشاي المظبوط
وحشتني عيونِك بزيادة
يا اللي انتي عيونِك كات ليا
فتشت خيوط السجادة 
 مالقتش مُسكِن غير هيَ
كان نفسي أحكيلِك كالعادة
وأوان الحكي
خلاص عَدى
أه صحيح بخصوص نتيجتي
شلت مادة
وسبت مادة



دور برد شديد

قطر الصعيد - إسكندريلا

"آدى أيّام العجب والموت
جات بسرعة زى غمضة عين
ليه ماقلتش زىّ لمح البصر
كنت باتقلّب على الجنبين
والكابوس من كل جنب يجيبني
زىّ أعمى يحسّ لمّا يجسّ
ألقى نفسي واللا اشوف نفسي
بالتفت من آخر الدنيا
الحمير بتجرجر العَربَات
السما اللى تحت منها حابات
عند كوبرى أبو العلا بتشتي
أنكمش فى جتّتى من البرد
لسّه حارجع طفل تحت المطر
وأنحنى ع الأرض وافضل عجوز
اتوهمت الخوف دهسنى الخطر
كل شيء إلا الخيانه يجوز
ألبس التوب اللى مش توبى
أعمل الممكن مع المستحيل
أمشى زي الخنفسة وألبَد
جنب حيطة فى رُكن ع السلّم
الحجر الاصفر بيتألّم
فيه أثر للعشرة مهما تهون
أقبل الظلم اللى في الأشياء
والليالي بخدّها المدهون
والحياة والناس وحتى في نفسي
واقرا في الجرنال كلام تاني
وانتقل في الماضى واستغرب
وابكى ع المستقبل الفاني
واحمل الضلمة على عينيّا
وانتبه من نومي واسمع نعي
الزميل جودة سعيد الديب"

أيام العجب والموت - فؤاد حدّاد

فؤاد حداد - مفتتح أيام العجب والموت

قصائد قصيرة شعر وإلقاء أمين حداد - موسيقى وعزف حازم شاهين
من أمسية شعرية بساقية الصاوي يوم 7 جيسمبر 2018

(♫♫♪)
الدنيا ماشية بموتور واللعب بنزينها
والحب لو يختفى حتميل موازينها
والحب لعبة وأمل وحياة بحق وحقيق
ما تيجى نبنى الحياة اللى احنا عايزينها.
(♫♫♪)

زىّ ما قلبك زايد دقّة
زىّ الفول بالزيت والدَقّة
زىّ العيش اللى بيتبقّى
ويبقى زبالة رمتها بيوت
فيه أحلام بتموت.
(♫♫♪)

عمر التاريخ ما اختلف
ولا شعب صابه التلف
ولا ديكتاتور اعترف
بخطأه .. 
إلا وفات الأوان
ولا ربيع أوفى 
بوعده إلا وكان
فصل الشتا استوفى
لو قلت كان ياما كان
تعرف تقول .. سَوْفَ.
 (♫♫♪)

البحر .. مش مهتم باللى بيجرى
ولسّه زرقته مالياه
وبيرمى موجه وهواه
على بنت نايمة بتقرا
أبسط معانى الحياة
(♫♫♪)
أنا لازم اصحى أروح شغلى
غيرت ريقى بشاى وحليب
و نزلت أجرى بجزمة كاوتش
نسيت قصايد غنيتها
	ليلة امبارح
	والاّ مانسيتش
أنا أصلى شاعر و مهندس
	فى دماغى سويتش
لتحت .. أقعد على مكتب
لفوق .. أغنّى و أدندن
لتحت .. تلاقينى مؤدب
لفوق .. أبرق و اتجنّن
و احط إيدى فى عبّى واجيب
شعر البارودى فى سرنديب
وسلسلة كان فيها صليب
	تحت بلوزة
وعسكرى لابس خوذة
	يلعب تحطيب
و اروح مع شوية مجاذيب
فى حوش قدم يشربوا جوزة
	فى الجلوكوزة
ويغنوا مصر بشوق و نحيب
و الشمس على شط العجمى
	مش عايزة تغيب
	عمّالة تزنّ
	أفرد كفّى
تنام عليه لحد ما تطفى
و ارجع لكم أبكى و أئنّ
على كومبيوتر آى بى إم
كل الجروح تفتح وتلمّ
و انا لازم اصحى أروح شغلى
غيرت ريقى بشاى سادة
كان المنبه صوته كئيب
	زى العادة
	و الديك يدّن
بشكل متطور جداً
	أو متخلّف
أنا أصلى أصبحت مخرّف
باكتب برامج و بألِّف
و انا لازم اصحى أروح شغلى


(♫♫♪)

يابنى انت عايش جوّة دولة نَفْسك
صوتك بيخبط فى الحيطان ويعود
ندهت ياما وانقطع نَفَسَك
يابنى انت عايش .. بس مش موجود.

قصائد قصيرة - أمين حداد - حازم شاهين

اتوب ازاي - تقى طارق

اسكندريلا - أغنية لشهداء محمد محمود.mp3

صاحبى يا غريب فى الزمن

الليل مش على قد كتافى.. والصبح بعيد
اجعلنى سعيد !!

نعناعة فى كوباية شاى

اكتب وقول عن غضبتي ع الحرس
ساعة حبيبي ما اتحبس في العين
وملامحه نشفت م الهوا البارد
فارق بخفة ريحه في هدومي

عصفور ما طلش م الشباك - ضياء فريد - إلقاء صفاء أبو صبيحة

تسجيل من برنامج آخر كلام - يسري فودة و فرقة اسكندريلا

اسكندريلا - نعناعة في كوباية شاي

كلمات الشاعر الكبير بهاء جاهين
الحان وغناء شادي مؤنس

اتوب ازاي - تقى طارق

Sara Rafek

Recent comments

eman

Mohamed Ahmed

Related tracks