true

كلمات \ ضياء الرحمن 
تسجيل \ عبد الرحمن خالد

كلمات القصيدة : 

البرد غربة  و الغربة برد
إحساس غريب لو تلقى نفسك
مش زى حد
أو تبقى واحد و الكل فرد
إحساس غريب

الفراغ
أوقات بتاكل فيك بمهل
و أفكار بتتكاتر عليك
و جدل يدور بينك و بينك
ع اللى كان  ومعدش فيك
و إزاى بقى كل الفرص
بتعدى سهل قصاد عنيك
وأنت يا دوب حتة خشب مربع ايديك

الزهق
مخلوق يحب الإنتظار
و مافيش زرار يعرف يحل المسألة
و المشكلة إن الحلول محتاجه وقت
و الوقت قال لك من دهب
و الجيب خروم
تدخل ثوانى العمر ف تتسرسبك
يوم بعد يوم
تلقى إجابتك تسألك تعرف تعوم
ف تشد أيامك عليك
تغطس ف نوم

الملل
مرسوم على و شوش
الساعات
ويا الحاجات مستنى تحصل معجزة
إن الثوانى اليابسة يتحركوا
ف الدنيا تمشى إن شا الله لو
على عكزات

القلق سكن القلوب
و الجيوب مقلوبه برة
و العيون مش مستقرة
و الجميع متلخبطين

الطريق
منحوت على نعل القدم
و آخر طرف ف البنطلون
لساة بيرسم شخبطة
و عينيا فوق متشعبطة
شفت القمر لمبة نيون
و الكهربا مستعبطة
دايماً بتيجى بالمزاج
و الفيشة أصلاً مش معاك
بتعوز حاجات ف تجيك حاجات
و كأن فعل الاختيار
رفاهية عالية مغمضة

الجسد شادد لتحت الروح
ساجنها ف واخدها فين مايروح
و هى مشتاقة الصفا لحظة سماحة و بوح
لكنها بتخاف تسيب لحسن تتوة

الروح
دى من أمره هو
تتعب دماغك ليه و تسأل
إزاى و لية قلبك هوي ؟!
القصة أصلاً مش بتاعتك
القصة بس
الله نوي

مخلوق و مكتوبلك كبد
قلبك كتير ياما اتهبد
و الراحة موت
يعنى المحبة والكراهة
بلا أى صوت
تختار سكوت
ولا يلفك خيط مسد
اخترت ايه ؟؟
!!!!!!!!!!!!


Dafayer _قصيدة ضفاير

و فضلت ادور .. ادور و الف
همزة بتستنى الف
مجرد حرف وحيد
ونفسي ابقى مؤتلف

الف نزلت من السطر
نزلت تشرب من البحر

كان خطي كتير بيميل
مستني اوصل للبر

هات حرفك جنب مني
تبقى كلمة تبقى جملة
نبقى سطر جديد

والسطر يبقى سكة
يبقى ضحكة يبقى ايد وانت مادد ايد

حرفي هيعيش لحرفك
هسند واداري ضعفك
عمرك ما هتبقى وحدك 
وانا عمري ما اكون وحيد

هات حرفك جنب مني
تبقى كلمة تبقى جملة
نبقى سطر جديد

والسطر يبقى سكة
يبقى ضحكة يبقى ايد وانت مادد ايد

الف نزلت من السطر
نزلت تشرب من البحر

كان خطي كتير بيميل
مستني اوصل لبر

كلمات: وليد عبد المنعم
الحان وغناء : هاني عادل
الفيلم إخراج : عمرو سلامة

Follow Hany Adel On :
Facebook Official Page : www.facebook.com/HanyAdelOfficial
Twitter Official Account : twitter.com/hanyadelartist
YouTube Official Channel : www.youtube.com/HanyAdelOfficial
Instagram Official Account : instagram.com/HanyAdelOfficial

true

Seif Elboughdady