文章佇公視PNN: https://goo.gl/9Q8GY3
Facebook專頁: www.facebook.com/sekaitai2015

【世界台】西歐新反猶現象ê複雜面貌 - 180410

文章佇公視PNN: https://pnn.pts.org.tw/app/type/detail/942/1
Facebook專頁: www.facebook.com/sekaitai2015

【世界台】Trump和Putin行傷倚 無人有伊法？ - 180722

文章佇公視PNN: https://pnn.pts.org.tw/type/detail/998
Facebook專頁: www.facebook.com/sekaitai2015

【世界台】Pakistan新總理佮「深國家」 - 180731

Text at: https://www.taiwanpost.tw/2019/09/common-e-sense-by-ingsing.html

《報臺》2019.09.27 新勢力反起反倒 選民會躊躇

Text at: https://www.taiwanpost.tw/2020/01/by-ingsing.html

《報臺》2020.01.25 亡國做制衡 較輸無制衡

Text at: https://www.facebook.com/sekaitai2015/photos/a.1697389657140937/2600929230120304/?type=3&theater

NSSS 2020.03.28

https://www.facebook.com/sekaitai2015/videos/623782301590738/

George Orwell ê 1984 台語版 - 1

https://www.facebook.com/sekaitai2015/photos/a.1697389657140937/2692992150914011/?type=3&theater

伊擋恬，透底ê無助感罩踮身驅頂。首先，伊並無確定tsit-má是1984年。拍算是這跤兜無毋著，起碼伊相信家己今年39歲，並且是1944抑1945年出世--ê。只不過現時欲佇一、兩年範圍內精確標定一个日期，根本無可能矣。

無張持一个疑問puh出來：伊寫這个日記，是為著啥人？為著未來、為著猶未出世ê人？伊ê心思佇紙頂彼个可疑ê日期頂頭踅一時仔，去碰著新話ê一个詞，號做「兩面想」(doublethink)。伊tsit-má才了解伊手頭這件代誌ê重聲。一个人欲按怎和未來溝通？生本做袂到。未來若是和這陣仝款，就無人會聽伊講話；若是和這陣無仝，伊ê困境就無意義。

伊坐leh戇戇仔相彼頁白紙。千里幕ê放送已經換做噪人耳ê軍樂。講來怪奇，伊毋但親像失去表達家己ê能力，連本來想欲寫啥mā袂記得矣。伊準備這个時刻已經幾若禮拜，想也毋捌想過除了勇氣敢koh有需要啥。寫字本身應該真簡單，只要共已經佇伊頭殼內流動幾若年hia-ê袂了盡、ngia̍uh-tshī-tshah ê心內話抾去紙頂就好，這時煞連彼心內話mā焦洘去矣。伊ê爛瘡koh癢起來，伊毋敢去抓，因為見抓就見發炎。時間一秒一秒過去，伊ê意識內煞kan-na面頭前紙頁ê空白、跤目頂皮膚ê癢，佮彼杯酒造成ê一屑仔茫。

雄雄伊煞寫起來，充滿驚惶，連家己teh寫啥都無kài清楚。伊彼細koh囡仔款ê字佇紙頂走來走去，潦草kah大寫字母先落去，落尾連標點mā挕sak矣。

「1984年，4月初4。昨暝去看電影。攏戰爭齣。有一齣誠讚ê是做一隻滿滿難民ê船佇地中海啥物所在hőng轟炸。觀眾看著一个大箍查埔人著銃ê時看kah暢kah，一隻直升機teh共逐，伊想欲旋，佇海裡拍翸若一隻海豬仔，下一幕伊出現佇直升機ê瞄準鏡內底，koh來伊就規身軀全銃子空，邊仔ê海水轉粉紅仔色，伊隨沉--leuh，袂輸uì hia-ê空進水，觀眾ná看伊沉ná笑ná大聲喝咻。Koh來是一隻救生艇，滿滿囡仔，頭頂有一隻直升機teh踅。一个若像是Iû-thài人ê中年婦女坐佇船頭手抱一个量約仔3歲ê查埔囡仔。囡仔著驚，吼kah足悽慘，共頭藏入去婦人人ê胸坎，親像想欲nǹg入去伊身軀內。婦人人共囡仔攬牢牢共安慰，雖然家己已經驚kah面仔青恂恂猶是盡全力保護囡仔，袂輸叫是家己ê手股通替伊擋銃子。Koh來直升機擲一粒20公斤ê炸彈落去這陣人中央驚人ê閃光規隻船隨碎做柴幼仔。然後是足厲害ê鏡頭彼个囡仔ê一枝手飛起來向空中愈飛愈懸愈懸愈懸，若像鬥佇直升機鼻頭ê攝影機綴咧共翕噗仔聲uì黨員席催出來佇普魯仔(prole)席ê一个查某人煞跳出來吵喝講無應該搬這無應該佇囡仔面頭前按呢毋著無應該予囡仔看這一直到警察共戽共戽出去我毋知影伊後來按怎無人要意普魯仔講啥典型普魯仔ê反應in從來毋捌……」

Winston寫kah糾筋，伊停筆，家己mā毋知影是按怎寫tsiah-nī規大捾ê五四三。毋過誠奇ê是：伊ná寫ê時，一段完全無仝款ê記持，意義煞佇心內顯明起來，明kah伊強欲感覺會當共寫落來。伊tsit-má了解，原來就是這件代誌，才予伊臨時決定欲走轉來厝裡，開始寫日記。

彼是今仔早起佇部裡發生--ê，是講tsiah-nī茫渺ê代誌敢uan-ná算有發生啥？
（待續）

第1集：https://www.facebook.com/watch/?v=623782301590738
原文通下載：https://www.planetebook.com/free-ebooks/1984.pdf 這集是對第10頁第3段頭"He sat back"到第13頁第2段尾"...said to happen."

George Orwell ê 1984 台語版 - 2

On Facebook: https://www.facebook.com/sekaitai2015/photos/a.1697389657140937/2698574590355767/?type=3&theater

彼是咧欲11點ê時，佇Winston上班ê紀錄司，逐家共椅仔uì各人辦公ê小隔間搬出來大廳，佇大台千里幕頭前排排做伙，準備欲進行「兩分鐘仇恨」ê活動。Winston佇中央排拄欲坐落來，小可仔意外看著兩个伊會認得、毋過毋捌講過話ê人行入來。一个查某囡仔伊不時會佇巷路拄著，毋知影名，kan-na知影是小說司--ê，大概是teh維修小說寫作機ê款，因為有時仔看見伊手bak kah油油，koh紮一枝扳仔。查某囡仔看起來真有膽，大約27歲，頭鬃烏koh濟，面有雀斑，跤手扭掠，敢若運動員。伊ê腰纏一條代表「青年反性事聯盟」ê大紅綵帶狹狹，佇作穡衫外口箍幾若輪，絚度拄仔好表現出伊ê翹尻川。Winston自第一擺看著伊就討厭，理由伊心內清楚，因為這个查某囡仔規身驅黨味，予人想著棍仔球場、冷水游泳池*、團體遠足佮清氣思想。Winston討厭女性，特別是少年koh媠--ê。自來攏是查某人，尤其查某囡仔，對黨上kài死忠、對口號上kài信篤、上愛做抓耙仔、上興四界檢查別人ê思想有問題--bô。這个查某囡仔予伊ê印象koh特別危險。有一改in佇巷路相閃身，對方斜目共影一下，彼眼神若像共伊看透透，予伊一時感覺足恐怖。伊甚至有想著伊檢采是思想警察ê密探。這實在講無啥可能。毋過只要伊佇附近，Winston就攏誠袂四序，礙虐內底koh透濫驚惶佮敵意。

另外是一个查埔人，號做O’Brien，是內黨部(Inner Party)ê成員，職位真重要，只是到底是teh做啥，對Winston這種基層來講傷過遙遠，知若毋知咧。眾人佇坐位邊仔看著有穿烏色作穡衫ê內黨部成員行過來，隨一个一个恬去。O’Brien漢草大欉koh勇，頷頸大箍，面粗皮、sîng歹人卻koh有寡詼諧款。雖然外型真強勢，伊ê行放煞有一種迷人ê氣質。伊共目鏡佇鼻仔頂扞予正ê手勢，毋知是按怎，足優雅斯文，會予人uì心內解除防衛。若是tann koh有人心思較古典--ê，甚至會聯想著18世紀ê貴族共鼻芳盒仔提出來請人用ê風度。Winston十捅年來mā tsiah看過O’Brien十捅改，誠予伊吸引，毋但是因為O’Brien斯文人ê氣質佮職業kûn手ê體格反差有夠大，koh-khah重要，是伊偷偷仔相信，或者講，只是希望，O’Brien ê意識型態mā並無hiah純。定著是按呢，看面就知。話講倒轉來，凡勢寫佇O’Brien面仔--ê mā毋是異端，只是聰明。不管按怎，看O’Brien ê外表，你會感覺這个人若是你有機會佇千里幕看袂著ê時和伊單獨做伙，會當和伊好好仔交談。這个料想敢著，Winston試也毋捌小試過，實際上mā無法度。這時，O’Brien看一下仔手錶，欲11點矣，顯明伊決定欲佇紀錄司度過兩分鐘仇恨。伊佇Winston這排揣位坐落來，離Winston無偌遠。兩人之間koh有一个細漢、頭毛沙仔色ê查某人坐--leh，伊是Winston小隔間ê厝邊。烏頭毛ê查某囡仔就坐佇Winston尻脊骿後。

Liâm-mi，一个若破雞筅ê歹聽人聲，uì壁頂ê大千里幕衝出來，袂輸超大台ê機器無食油teh紡，予人聽著喙齒痠，頷頸後ê 毛mā強欲徛起來。仇恨開始矣。
（待續）

原文通下載：https://www.planetebook.com/free-ebooks/1984.pdf 這集是對第13頁第3段頭"It was nearly eleven hundred"到第15頁第2段尾"The Hate had started."

*補充: "Cold baths"我本來想無是teh講啥，一時照翻"冷水浴"，錄好貼好才想著baths佇英國敢若有咧指游泳池，字典掀一下有影。我想佇tsia應該是游泳池，佮頂下文較合。字先改，錄音袂赴（pîn-tuānn）改矣。暫時按呢。

George Orwell ê 1984 台語版 - 3

和自來仝款，人民公敵Emmanuel Goldstein ê面閃現佇螢幕頂。規大廳ê觀眾攏共落風。彼个細粒子、沙仔色頭毛ê查某面色驚koh gê。Goldstein是一个反背者佮反動派，足久、無人會記得是偌久ê久以前，伊是黨ê頭人之一，倚欲和大兄哥平坐徛，煞去舞反革命，hőng掠著判死刑了後，koh真神秘來溜旋，失蹤去矣。兩分鐘仇恨ê節目逐日無仝，毋過無一擺Goldstein毋是主角。伊是頭名ê叛徒，頭一个共黨ê純潔性汙染ê人。自彼時起所有反黨ê罪、一切反背、破壞ê行為、任何異端佮偏差，攏是伊教出來--ê。伊猶koh活佇世界ê某乜所在teh策畫伊ê陰謀，可能佇海外，予外國金主保護，也可能像風聲講--ê，猶koh覕佇國內ê秘密巢窟。

Winston膈肉糾束。見若看著Goldstein ê面，伊就免不了感受著痛苦ê情緒攪濫。Goldstein ê面焦瘦無肉，Iû-thài人ê型，頭毛白kah若一个光箍，koh留一撮羊犅鬚。看起來真巧，煞也足卑鄙。長長狹狹ê鼻仔老番顛款，一支目鏡khuè佇倚鼻頭hia。規个面生kah若綿羊，連聲mā成。照例，螢幕頂 ê Goldstein tng-teh對黨ê主義發動惡毒ê攻擊，罵kah真超過，連囡仔mā聽會出來teh烏白講，煞koh若像有一寡歪理，拄拄通予人煩惱理性較輸家己ê人會予騙去。伊詈罵大兄哥、批判黨內獨裁，主張馬上佮歐亞國和談，koh鼓吹言論自由、出版自由、集會自由、思想自由，伊咻kah袂輸teh起痟，講革命予人出賣矣。伊講kah足緊，用躼躼長ê詞，模仿黨內ê演說家慣勢ê彼套，甚至使用新話ê詞彙，koh用袂少，較濟任何黨員日常生活中會使用--ê。同時，若像是恐驚有人猶是認袂清現實，予Goldstein以假亂真ê喙花迷去，影片內伊ê大頭後壁，是歐亞國ê大軍teh行進，一排koh一排，行袂煞。兵仔逐个漢草結實，亞洲面完全無表情，一排tshînn到螢幕表面消失，跤後隨koh綴一排一模一樣--ê。軍靴tsàm佇塗跤ê單調節奏，構成Goldstein彼羊仔聲ê背景。

仇恨開始未曾30秒，廳內過半ê人就已經風火壓袂牢，大聲嚷罵。螢幕頂頭彼个自認高明ê羊仔面，佮伊背後歐亞國大軍ê可怕武力，實在是予人袂堪得。其實，只要看著，抑是想著Goldstein，就夠通產生憤慨佮驚惶矣。比起歐亞國抑是東亞國，Goldstein是koh-khah固定ê仇恨對象，畢竟若當海洋國teh和其中一个強權相戰ê時，大體上和另外一个相安無事。毋過奇怪--ê是：雖然逐家攏iàm恨 Goldstein、共看無目地，雖然伊ê主張逐工、而且是逐工無數改，佇台仔頂、佇千里幕、報紙佮冊內底hőng駁斥、hőng修理、hőng譬相、hőng當做糞埽囥眾人目睭前現世，伊ê影響力煞敢若攏毋捌減弱。隨時攏有新ê戇囝準備欲予伊拐弄，每日攏有受伊指令ê透仔抑創空--ê去予思想警察tsang--著，毋捌一日無--ê。伊是一隊烏影大軍ê總司令，指揮一个地下ê陰謀網絡，目標是推翻國家。這个陰謀組織聽講號做兄弟會。Koh風聲講有一本傷天害理ê冊，正是Goldstein寫--ê，內底總結一切邪說，暗中teh四界流傳。這本冊無冊名，準若罕罕仔有人提起，也 kan-na稱呼「彼本書」。毋過tsia-ê代誌攏是透過霧霧ê謠言teh傳爾。不管是兄弟會抑是「彼本書」，一般黨員攏只要免講著就袂去講著。（待續）

原文通下載：https://www.planetebook.com/free-ebooks/1984.pdf 這集是對第15頁第3段頭"As usual"到第18頁第1段尾"...a way of avoiding it."
FB: https://www.facebook.com/sekaitai2015/videos/633732297522892/

George Orwell ê 1984 台語版 - 4

第二分鐘，仇恨開始起狂。眾人跳懸跳低，使死力喝，想欲共螢幕頂彼使人掠狂的咩咩聲壓落去，沙仔色頭毛ê查某面轉紅，喙開咧合咧，若魚仔上岸。連O’Brien mā規个面紅絳絳，伊佇椅仔頂坐thîng-thîng，勇壯ê胸坎膨起來，ná tsùn，敢若是teh出力抵抗大湧ê衝擊。Winston後壁彼个烏頭毛ê查某囡仔利聲叫：「精牲！精牲！精牲！」無張持共一本厚厚ê新語詞典khian對千里幕，拄好著Goldstein ê鼻仔，koh反彈去邊仔，話聲繼續，無受影響。有一睏仔Winston頭腦反醒，發見家己和眾人做伙teh喝咻，跤後蹬koh大力tsàm椅仔杆。兩分鐘仇恨恐怖ê所在，毋是你予人規定愛演出，拄好倒反，是你無欲投入mā做袂到。免kah 30秒，演也無需要演矣。驚惶參怨恨大爆發，到痴狂ê地步，想欲刣人、共人凌遲、用槓槌仔共人面hám予碎ê欲望若電流，眾人予電kah袂控制，一个一个變做橫肉面、吱袂停ê痟人。毋過in所感受ê這種憤怒只是抽象、無方向ê情緒，若點火銃ê火，會當燒這个物件，mā會當斡去燒彼个。一時仔Winston ê仇恨毋針對Goldstein，煞踅頭去對準大兄哥、黨佮思想警察。伊ê心走去和螢幕頂彼个予人恥笑ê孤單異議者仝國，這位才是白賊世界內底唯一teh保衛真理佮理智ê人啊。毋過Winston liâm-mi koh變矣，加入身軀邊ê眾人，接受一切反Goldstein ê宣傳。這時，藏佇伊心內對大兄哥ê恨又koh轉變做欽慕，大兄哥ê形象徛懸起來，成做一个無敵、無懼ê守護者，若石山，共亞洲大軍擋佇外口。Goldstein--leh，雖罔hiah-nī孤立、無助，甚至人有佇咧無都歹講，煞若像一个奸邪ê巫師，kan-na用伊ê聲音就夠通共文明毀滅掉。

有時仔，甚至有法度照家己願意，共仇恨徙來這爿抑踅去彼爿。Winston雄雄tńg念頭，敢若惡夢醒，大力uì枕頭頂gia̍h頭起來彼款，成功共伊ê恨uì螢幕頂ê大頭轉移到後壁彼个烏頭毛ê tsa-bóo囡仔。生動美妙ê幻覺一幕一幕跳上頭殼：伊欲gia̍h橡奶警棍共這个查某sut kah無氣；伊欲共褪光光縛佇柱仔頂，亂箭共射kah規身軀；伊欲共強，tng高潮 ê時共伊ê嚨喉割開。伊tsit-má比進前koh-khah清楚，到底是按怎家己tsiah-nī恨伊。因為這个查某少年、媠koh性冷感，因為家己想欲佮伊睏但是無望，因為伊彼甜軟ê腰引誘人去攬，煞予彼條討厭ê紅綵帶霸牢--leh，彼貞潔ê標誌若teh唱聲。

仇恨tshìng kah上懸頂。Goldstein ê聲變做真正ê羊仔ê聲，面mā一時仔變做綿羊ê面，隨koh溶去，化做一个歐亞國戰士，愈行愈近，大身koh惡，手裡ê短機關銃phng-phng吼，人敢若欲uì螢幕跳出來，頭前排ê人驚一下，正經佇椅仔頂倒退勼。佳哉就佇這時，敵兵koh消失矣，大兄哥ê面出現，眾人敨一口氣。大兄哥烏頭毛、烏喙鬚，充滿力量佮奇樣ê穩靜，面大kah強欲佔滿規个螢幕。伊喙講啥，無人知，彼只是一寡鼓舞ê話，佇吵鬧戰事中會講ê彼類，無法度一字一字聽予真，毋過單單是有講，就通予人重建信心矣。大兄哥ê面koh漸漸霧去，原地浮出彼三句黨標語，用粗體大寫：

TSIÀN-TSING TŌ SĪ HÔ-PÎNG
TSŪ-IÛ TŌ SĪ LÔO-I̍K
BÛ-TI TŌ SĪ LI̍K-LIŌNG

毋過大兄哥ê面若像koh維持幾若秒，大概是拄才ê影像鮮活 kah袂赴隨退出眾人ê目睭仁。沙仔色頭毛ê細漢查某大力覆uì頭前ê椅背，聲慄慄掣，若像teh nauh「我ê救主啊！」伊共雙手股ǹg螢幕伸長長，然後koh共面埋uì手面內底。聽會出來伊teh祈禱。（待續）

★FB：https://www.facebook.com/sekaitai2015/videos/346395493025341/
★規篇原文下載：https://www.planetebook.com/free-ebooks/1984.pdf 本集是對第18頁第2段頭"In its second minute..."到第21頁第3段尾"...she was uttering a prayer."

George Orwell ê 1984 台語版 - 5

這陣，規陣人開始和齊喝：「大—兄—哥！…大—兄—哥！」聲音低、慢、有節奏，一遍koh一遍，字佮字中間閬真長。彼是一種厚重ê nauh聲，毋知按怎koh帶蠻性，ná聽煞敢若背景有赤跤tsàm地面佮有人teh拍非洲手鼓ê聲。這進行欲kah 30秒。這款重覆ê吟唱，佇眾人情緒激動ê時真捷聽見，彼是teh呵咾大兄哥ê英明偉大，mā是teh自我催眠，刁工用節奏性ê噪音，共意識揤落去tū水。Winston臟腑冷起來。兩分鐘仇恨ê時，伊真自然就加入集體起痟，毋過tsit-má這種「大—兄—哥！…大—兄—哥！」ê非人叫聲，逐遍攏予伊感覺足恐怖。當然伊mā是綴teh喝，無可能毋。人佇這種情境，直接反應就是會共心內ê感受藏起來，共表情控制予好勢，別人做啥綴teh做就著矣。毋過有一兩秒，伊ê眼神敢若是無意中漏洩真心。彼件重要ê代誌，就佇這時發生，若是彼mā算發生。

一時，伊佮O’Brien目光去對著。O’Brien已經徛起來，用伊ê招牌手勢，共拄才提落來ê目鏡khuè倒轉去鼻仔頂。無張持in兩人對眼著，才無kah幾分之一秒，Winston隨知影O’Brien teh想--ê佮伊完全仝款，著，伊「知影」！一个絕對袂毋著ê訊息已經傳送完成，若像想法透過目睭，uì一个開開ê心傳去到另外一个。O’Brien敢若teh共伊講「我佮你仝款」，「你ê感受我完全了解，你袂癮、怨恨、倒彈，我攏了解，我攏知。毋過免煩惱，我佮你仝國！」這个訊息爍一下隨消失，O’Brien ê表情恢復和每一个人仝款，看袂出來啥矣。

按呢爾，伊tsit-má已經無確定彼敢正經發生過。這款小事從來袂koh有啥物紲後，只是通支持伊繼續相信、至少是希望伊毋是孤一个teh和黨做對頭。凡勢人teh講有足大ê地下陰謀是真--ê，凡勢兄弟會真正存在！雖然不斷有逮捕、認罪佮處決，世間有兄弟會無，猶是無法度確定。有時仔伊相信有，過幾工koh毋信矣。總是你看袂著證據，kan-na有一寡來隨去ê影跡，可能有代表啥意義，mā可能啥物都無。比論無細膩偷聽著ê幾句仔對話、便所壁頂袂明ê亂皂、甚至是兩个生份人相拄ê時ê一个小手勢，mā敢若是某種相認ê暗號。這一切攏是伊家己臆--ê抑是想像--ê。Winston無koh看O’Brien，行轉去家己ê小隔間。這一tiap仔久ê接觸了後著koh按怎，伊無啥共想。就準講伊知影按怎做，彼mā是危險kah想袂到。In兩人目光相拄一兩秒，意思也無講明，一切就結束矣。只是對一个活佇隔離之下ê寂寞心靈來講，這已經算真值得記牢牢ê事件矣。

Winston振作精神，坐予直。伊拍一个呃，tsín酒uì伊胃內tshìng--起來。

伊ê目睭koh再對焦佇紙頂。伊發現拄才伊失志恬恬坐--leh ê時陣，手mā那teh寫，敢若自動--ê，而且字已經無像進前ê uai-ko-tshi̍h-tshua̍h，伊ê筆佇光滑ê紙面趨溜，風姿迷人，整齊ê大字袂輸印--ê：

打倒大兄哥
打倒大兄哥
打倒大兄哥
打倒大兄哥
打倒大兄哥

一遍koh一遍，寫滿半頁。

伊袂禁得驚惶起來。這無啥道理，因為寫這幾字並無較危險動手寫日記本身。一時伊猶是足想欲共已經寫字ê彼幾頁lih掉，規氣放棄寫日記。

伊無按呢做，因為伊知影無效。不管伊有寫「打倒大兄哥」抑是忍--leh無寫，攏無差。日記欲koh寫，抑是停手，攏無差。思想警察攏會共伊掠著。伊已經犯下根本ê罪，所有其他ê罪行攏佇其中矣，就準伊毋捌落筆佇紙頂mā是仝款。彼就是所謂思想罪。思想罪是掩崁袂久--ê。準若你有法度覕幾日，甚至幾年，mā緊縒慢會hőng tsang著。

掠人攏是佇暗時。你uì睏眠中掣一下精神、一枝粗魯ê手搖你ê肩胛頭、手電ê光炤入你ê目睭、眠床邊仔圍規輾凊凊ê面。大部份ê案件攏無審判，mā無看見逮捕ê報導。人就按呢消失去矣，攏是佇暗時。你ê名uì人口登記簿仔頂抹掉，你所做代誌ê紀錄攏hőng拭掉，你捌佇世間ê事實hőng否認掉、hőng放袂記得。你hőng廢止矣、撤銷矣，通常ê講法，是「蒸發」矣。

Winston規个人起狂，走筆寫kah緊koh潦草：

In會共我銃殺無要緊in會uì我頷頸後共我開銃無要緊打倒大兄哥in攏是uì人頷頸後共人開銃打倒大兄哥……

伊佇椅子頂the向後，有寡仔見笑，筆囥落來。雄雄，伊趒一下足大下。有人挵門。

Tsiah緊！伊坐--leh毋敢振動，恬kah若鳥鼠，數想對方挵一遍若看無人應就會離開。無hiah好，猶koh teh挵。這種時陣iân-tshiân上毋通。伊ê心臟跳kah若teh摃鼓，只是面色凡勢因為長久ê習慣，無啥各樣。伊徛起來，跤步沉重，行向門。（待續）

★FB: https://www.facebook.com/sekaitai2015/videos/638997516724886/
★原文規篇通下載：https://www.planetebook.com/free-ebooks/1984.pdf 本集是對第21頁尾段頭"At this moment..."到第25頁結束。

George Orwell ê 1984 台語版 - 6

Facebook Page: www.facebook.com/sekaitai2015/

Older tracks at @infactnews @sekaitai

世界台 SKT 3

Popular tracks