أنا لسه يا رب بنام ع الأرض .. فِ عز البرد 
و بعيط لو أحس إن أنا مشتاق .. 
أنا لسه بخاف م الضلمة 
و أخاف م الكلمَّة .. لو فيها فُراق !

أنا لسه بصدق أي وعود
 و بدمَّع على صوت العود 
و أستنَّي الفجر يأذن و أدعي 
إن أنسي حاجات وجعاني .. 
أنا لسه بعاني من الموت و الفُرقة
و بحوِّش أوقات الضحك 
أنا عاين ليها 200 ذكري 
و شايلهم فِ مكان فِ الدرج 
أنا باعت من آخر مرة جواب يمكن ما نفِعش أقراه 
لكن محفوظ
 أنا كل محاولة ف إني أشوفها تملِّي تبوظ 
ف عموماً
 أنا فعلا آسف إني بكيت 
علشان ضاعت روحي ف روحها 
أنا غصبن عني لضمت جروحها فِ شوقي و تهت 
أنا سيبت بيبان روحي مواربة على ضحكتها 
فَ خدتني و مُتْ

أنا شُفت ليالي كانت بتفوت .. تستني خيالها من الشباك
 أنا روحت هناك استنيتها 
بصيت على آخر رُكن فـِ روحي
 فـَ لاقيتها بـرغم البُعد .. ما فارقتنيش

أنا تُهت و تاهت مني الدُنيا 
فـَ حضنت الذكري فـِ ضمتهَا 
لو كنت أعرف بس إنهـا مش جاية
 ماكنتش مـِ الأول حبتها

كلمات و القاء : شيماء عبدالله
مونتاج : ضياء صبري


Shimaa-Abduallah Makontesh 7abetaha

و إنتي طالعة سلِّمي ع الناس هناك ..
و سيبي فيا روحك هنـا .. يمكن أعيش
ماتزعليش ..
و أنا يا حببتي مش زعلان
و إطمني .. الجنة مخلوقة عشان
تستقبل الورد في عينيكي 

\

لحظة الموت و الوجع
أنا كنت في عينيها الجدع
خطفوها مني 
بقيت حُطام
تراتيش كلام .. حاضنة في وريدها بواقي دم !
كانت هنا
و كان الهتاف " أنا عندي حلم " \

\
يا اللي طلعتي لـِ السما
ماهمنيش غير الوداع
و إزاي هجيب حقك و أنا
حضني اتكسر .. مابقاش يساع
غير العياط
غير الحاجات اللي أترمت برصاص كلابهم فـِ الشوارع
صوت الآذان مالي الجوامع
صوت الكنيسة .. اترفَع
أنا فاكر إني قولتلِّك
الموت في حضن الحق طاعة 
و الساعة مسيرها تدُقلِّك

\
اطلعي 
و احضني السماوات .. شهادة
و اسمعي 
ب قلبِك صوت البيوت
النهاردة مافيش .. سواد
النهاردة مافيش فُراق
النهاردة ما فيش موت
النهاردة بتبتدي بيكي الحياة
و هتنتهي مافيهاش سكوت .

كلمات : شيماء عبدالله
مونتاج : ضياء صبري

Mafesh Mout - Shimaa Abduallah

هي كُل دول ..
و الكلام وقت إما أقول ..
ندي : ))
كُل سنة و إنتي بنتي و صاحبتي و حببتي
كُل سنة و إنتي اللي باقية من كُل السنين

كُل سنة و إنتي الوقت
و الدفا
و الأمان

ربنا يخليكي ليا 
الكلام ده عنها
و ليها
و مزيكته من أول أغنية سمعناها و حبناها إحنا الاتنين سوا

يا وردة مغسولة بـِ ندى : ))

بحبك <3
____
كلمات :- شيماء عبدالله
مونتاج :- ضياء صبري
مزيكا :- ياسر عبدالرحمن - هو إنتي ليه بعيدة كده من فيلم هي فوضي .


Entii El Banat Kolohm-shimaa abduallah

كلمات و أداء : شيماء عبدالله
studio : Proxi Company
Mix : Karim Taiko
Design : Mahmoud Sadon

shimaa abduallah || حاصل ضرب

الله يرحمه 

كلمات و القاء : شيماء عبدالله
mix : karim taiko
recorded At Proxi Events


الله يرحمه||شيماء عبدالله

#عنها
حلم ياما حلمت إني أنفذه , فضلت سنة كاملة بكتب فيها حوالي 12 قصيدة , كل قصيدة بتحكي عن وجع و عياط و ضلمة و خوف و قلق عنها ..

كلمات و القاء : شيماء عبدالله
كلمات الراب : شيماء عبدالله & كريم تايكو
غناء الراب : كريم المعداوي ( تايكو ) 
مزيكا و ميكس : الكويتي
تصميم البوستر : أحمد دولا
تم التسجيل ب زحمة ستور .

Lyrics : shimaa abduallah
Rap Lyrics : Shimaa abduallah & Kareem Taiko
Rap : Kareem El Ma`dawy ( Taiko )
Mazzika & mix By : El kwetty
poster Design : Ahmed Dola
Recorded At Za7ma Store Mansoura

Shimaa Abduallah account : https://www.facebook.com/Sh.H.Abduallah

Kareem Taiko account :
https://www.facebook.com/K.Taikoo
https://soundcloud.com/tai-ko-2

#عنها Shimaa Abduallah FT Taiko Prod.By:Elkwety

كلمات و أداء : شيماء عبدالله
إنتاج صوتي : Eleven studio
موسيقي : هشام مصطفي
مدير تصوير : خالد مختار 
مونتاج و إخراج : عادل سامي
تمثيل : شروق سلامة و ياسر حسن 

كلمات أوفردوز :

زي النهاردة من سنة
انا قلبي كان بيدِقلِّك ورد و حياة
دلوقتي بدعي ربنا ..
أمُر فوق صراط رمشك .. بدون تجريح
بقيتي ازاي كده ! ورقة ف مهب الريح
تروحي مع كل تيار وجع
و ترجعيلي بدون ما اكون واحد صحيح !
زي النهاردة من سنة
ماكنش قلبي ف احتياج علاج ل ..مرضك
كنتي قادرة تكسبيني جوّه أرضك 
كنت قادر احتويكي جوّه أرضي 
كنا قادرين نرسم الملكوت ب روحنا
كنا لسه صغيرين نوصف جروحنا
زي النهاردة من سنة
كنت قادر اكتبِك بين قصايدي .. حببتي
كنت بندهلّك ب اسمي
كنت باشتاقلك .. اضمك
كات مسافة بعدنا .. يادوب كام سنتي
كات مسافة قربنا ،، حضن متشعلق ف حضني 
زي النهاردة من سنة 
انا كنت مش محتاج أخف 
كان بيني و بينك خطوتين و جدار و سقف
دلوقتي شوفي بنا كام سما
زي النهاردة من سنة
انا كنت بعرف اعيش و احس ..
دلوقتي ناقص كل شيء .. ناقصِك
بلمسك ف روايح الذكري ف هدومي .. و رغم بعدك برضه لامسك !
زي النهاردة من سنين
انا كنت عارف .. اوْلّك
كنت عايزك .. روحتلّك 
كنت خايف .. آمنتلك
و آمنت انك اخر الحكايات .. و خوفها
كنتي آخر بنت أشوفها .. 
وكنتي أول حد سابني ..

زي النهاردة من سنة ..
انا كنت مدمن  ضحكتِك ..
بتشربيني ف قهوتك ..
و بشربِك دخان بيدخلق ف الرئة و الاوردة
و بوزعك انوار تقيد الاعمدة
ازاي كده !
بتختفّي من كل ذرة اتبنّت جوايا و تسيبي روحي معتمّة
عشتيني ليه وقت ما عوزتي
سبتيني ليه وقت اما اعوز ؟
اديني عشتك وقت ما مُتي
و مُت فيكي over dose

Shimaa Abdullah || Overdose ||عنها2

أنا آخر مرة فاكرها ..
كُنا بنضحك ضحكة خوف
و بقولك هنكون مع بعض
وهـنفضل نحلم لـِ الآخر
ونا بيني و بين نفسي بقول
هنفارِق كـالعادة
و هقولِّك " معلش . ظروف ! "
أنـا فـاكر من آخـر مرَة
لمسة إيدك على إيدي
و النـظرة الحلوة اللي تملِّي
كات تـاخد قلبي و تسافر
أنا عارف مهمـا أحلِفلِك إني عشانك
كٌنت بعافر
مش هيقدم ولا هيأّخَر !
أنـا أكتر واحد كـان متأثر ..
الضحكَة اللي اترسمت على وشي
ونا ماشي و بقولّك " ماشي "
ماكنتش من القلب بتطلع
أنـا كُنت بحـاول مُش أكتر .. مايكونش فـُراقنـا حببتي دموع
هتصدقي لو قولتلِك كُنت مستني الرجوع ؟
طب فـاكرة آخر مرة قولتلِك إني من غيرك بموت ؟
طب يعني إنتي مصدقة إني بعيش ؟
ماتجاوبيش ..
انا أصلاً مُضطر إني أمشي
و هفارِق قلبِك كـاالعادة
و إن كان لَسة فـِ قلبي كلام ..
فـَ كفاية " سلام "
لـِ شيماء عبد الله
https://www.facebook.com/Sh.Abduallah

سلام - شيماء عبدالله

مـا بين أربع حيطــان عايش
على الهــامش
مـاليش فـِ الدُنيـا أي طمُوح
بيبـان مقفولة بالترباس
وقلب إزاز
يادوب يصحى ..
ينــام مجروح

فـِ قلب الصورة .. روح مكسورة
و إنســان من جوَّه الحيـاة .. مــطروح

فـِ دوشة نفسي متنكَّــر
و مستكتَّــر بـ همي أبوح

ملامحي ضايعة فـ الزحمَّة
ومُش سامحة لـ توهتي تروح


عشاني الضحك مش مسموح !
ولا مفتوح عروض ليَّ فـِ سوق أحلام
أنـا خنقة فـ وسط كلام
أنـا مليت أعيش نفسي
و نفسي فـِ ضعف و استسلام


أنـا مطحون فـِ ليل ضلمَّة .. ولا بيبــان
و مليون كلمَّة .. مش باينة .. ولا هتبان
أنـا على أمـري مش مغلوب .. لكن مضروب !

أنـا إنسـان ماهوش عايش
لكن بيحاول إنه يعيش !
أنــا أصلاً مــاهوش موجود
فـ ماتلومنيش : )


لـِ شيماء عبد الله
https://www.facebook.com/Sh.Abduallah

ماتلومونيش - شيماء عبد الله

بسيب الحب لـِ الصدفَة
عشان عارف مافيش أحلام بتتحقق
و سايب قلبي مش مفتوح
مـانا خايف أسيبه لـِ حد
و كـالعادة نتفارق
فـَ أعيش مجروح

أنـا أضعف حاجة بتكسرني .. و تملِّي بخـاف إني أتفارق
بتعلَّق جداً بـ الحاجة .. و بموت ميت مرَة إما بسيبهـا
و بـرغم إن أنـا بضحك على طوول 
إلا إن الضحكة بتتعبني
علشان عُمري ما كُنت حاسسهــا ..

فـِ عالم تاني غير الناس
كئيب جداً لكن حساس

كلامي ما بين " تمام " أو " عادي "
برغم إني بكون موجوع
مابوجعش الدماغ ع الفاضي
هتفدني إية كُتر الدموع ؟

و حلوة الوحدَة مش وحشة
ما فيش حاجة بتوحشني
وانادي عليها ماتجيش
ولا أستنى معاد حاجة
و ألاقي ما فيش
عموماً عادي مش فارقة
مامتُش يعني
أديني بعيش
لـِ شيماء عبدالله
https://www.facebook.com/Sh.Abduallah

Shimaa Abduallah - a`deny ba3esh new

أنا فاكرك من آخر مرة
و كأن اليوم ده كـان امبارح
تفاصيلك ونتي بتحكيلي
حكاياتك عن بكرة الجاي
عن صوت الناي
عن وصف عينيكي اللي بتخطف
عن حب السُكَر لـِ الشاي !
عن ذكرى و صورة و روح بتطير
عن إني معاكي بحس بخير
عن آخر مرة بقولك فيها
بلاش تمشي !
و مشيتي ..
عن آخر حُضن
و آخر دقة
و آخر ضحكة
و آخر عُمْر
عن ليل من يومها ما فارقنيش
عن أجمل حاجة بتحصل مرة ..
عن حلم اتعاشلك ميت مرة .. لكن ليه انتي ما عشتيش ؟!
كان نفسي الحلم ده يكمل بيكي
كان نفسي بجد ماتسبنيش
كان أبسط حلم لـِ كل اتنين .. اتقابلوا فـِ يوم
أب .. و أم .. و بيت
عن إحساس إنك بتعيش
عن إنك أصلاً حبيت
عن إنك مستني تجيلك
لكن غصبن عنها .. ماتجيش !

لـِ شيماء عبد الله
https://www.facebook.com/Sh.Abduallah?ref=hl


Shimaa abduallah - matgeesh

This my Official And Only Page on Soundcloud I hope to Enjoy My Tracks .
دي الصفحة الرسمية و الوحيدة علي الساوند كلاود أتمني أن تنال أعمالي إعجابكم
شيماء عبدلله :)


Shimaa Abduallah

Popular tracks