amr hassn

قصيدة نوع العشق فوتوغرافي - جوزيف عزت

نوع العشق فوتوغرافي - فيا ذكرياتي صحي النوم
أصل حياة الواحد صورة - صورة تقلب باقي اليوم
صورة تضحك صورة تبكي صورة تخلي الفرح يدوم
وأنتي يا غالية جوه حياتي عايزالك وحدك البوم

اللي كان يربطنا صورة - قلبي في ايدها ما ياخد غلوة
تفاصيل في صورة بقت محفورة-  لراديو مشغل للست غنوة
فبروزيني في حياتك صورة- و يا عشاق يلا بينا ننوي  
حتي لو مكنتش في الصورة - أضحك لاجل ما تطلع حلوة

صورة يونيو 
20 من يونيو و عالية الحرارة
الصورة لحبيبتي ماسكة صنارة
الشمس خلتها شوكلاطة سمارة
وبورنيطة وردي و عالضحكة متقدروش
يا رافعة في قلبي رايات الجهاد-و واخده لوحدك قرار البعاد-حتبقي مراتي وأم الولاد-بحبك حبيبتي بكل الوشوش
بحبك حبيبتي ولو سايباني - بحبك حتي و لو كارهاني -أنا عايزك في ايه تاني- لسه حبيبتي معملتوش
بكتب رسايل بحر لعينكي -وأأمنها توصل محطة ايديكي - وأحلف عليها ما تبقي الا ليكي - يا عروسة بحر في شواطئ باجوش

حبيبتي يا أطهر ملك - البحر عايزك عروس
أنا حبيبتي سمك -في مية حبي تغوص
أنا اللي كفي شبك -أنا اللي كتفي بوص
أنا اللي صدري أتخلق عشان يحضنها مخصوص

رسمتني المرايا صورة و سألتني بعين مكسورة هو انا ايه فيا ناقص علشان ميحبونيش
أنا طقم صيني قديم مدهب و فيه فضه لكنه ملهوش لزوم مرمي سنين في النيش
أنا كومبارس فيلمك نفسي أكون بطله و نفسي أشوف وشي مرسوم علي الأفيش
أنا سهم في البورصة طالع و نازل جري جمدتي أرصدتي في وديعة  فوايدها مفيش
أنا طاربيزة عانس في فرح كله عشاق و عيون الناس قتلتني فين حبيبتك معيش
أنا بقال غرامك متنزليلي سبتك قلبي علي باب المولي في عشقك بياكل عيش
أنا كهارب نور -معلوق في بلكونتك -مفضوح لكل الحارة لكن انتي قافلة الشيش

صورة في الحسين 
قصاد الفيشاوي و لابسة طاربوش 
و من معجبينها عليها بحوش
و خارج لسانها و احمر يا روج 
و عود لونه بني و ماسكاه ايديكي 
يا عود شرقي بمقام الحجاز 
يا هارمونيكا مفيهاش نشاذ 
يا اوكورديون خشبه ازاز
شفاف فشفت منه اللي فيكي 
بحبك حبيبتي بدون اي لكن
و سامعك و شايفك في كل الاماكن 
و تحرم يا قلبي لغيرك مساكن 
ده جدراني جوا بتنده عليكي 
تقيل بيشاورلي و هو في مكانه 
صوابع حبيبتي بتشبه بيانو 
بيعزف يليل فينده كمانه 
فالاقيها فيا قايدة النور 
و بعد مكالمات المصالحة
يعلي ضغطي من الفرحة 
تكتم ضحكتها في طرحة 
يا خصامنا امشي و غور
يا ضحكة متيسرة 
يا رؤيا متفسرة 
تحت عنيها المسكرة 
رباني من غير ايكلادور
فنان في رسمه حواجبه 
خطين و الكل عاجبه
و في قلبي راسية مراكبة 
رايداها كل البحور
قلبي ده قصر قديم 
حبك قرار ترميم 
زيلي كل الحريم 
وابني باسمك دور 

و الضحكة بتاعتك مكتوبة بأسمي تحرم عليكي لو طلعت لغيري وإن طلعت لغيري هسيبك هناك  ولو حطا بنا باب هملاه عيون سحرية ماانا مقدرش أعدي اليوم بدون رؤياك
أنا كل فيلم أو أغنية بيفكروني بيوم معين بطلة كانت تشبهك غنوة كانت تعجبك حركة كانت تقلبك كعصفورة من الشباك
وأول ضحكة ليها علي أبوخ نكتة ليا في أول خروجة لينا و وجع خدودنا شاهد علي ضحكة الارتباك

وأما كنت بوصلها 
كانت بتشخلل مفاتيحها
 قال يعني بتدور عليها 
حركات بنات أونطة
وتدور تاني و تاني
 عشان تفضل واقفالي 
ما هي حالها أكيد من حالي 
لكني عامل من طنطا
لو كانت عايزة تسبني
 كانت دخلت من بدري 
مفاتيحها أصلا في جيبها 
و بتدور قال في الشنطة 

صورة المكتبة
صورة لحبيبتي في المكتبة لابسة نضارة و الكتب صفوف
أتعلمت القراية عشانها لكن لسالي 4 حروف
معرفش أقول حروف بحبك محروق يا خدي بحمار الكسوف
وأما قولتها معرفتش أنطق حروفي القديمة بسبب الخوف

لغة الحب ملهاش حروف بس الكتب عن سيادته ياما 
بقراهم في جدي بقراهم في لعبي بقدراهم لوحدي و شاهدة البيجامة
فاعلمها كتابة الشعر و تعلمني أقوله بأيامة
فيصير اسلوب كلامنا واحد في الألش و الهزار وحتي الابتسامة 

حب بدون لكن واشتاق
لظرف مكان لو كانت فين
 لو في الحب دي نصب عشاق
لام الامر دي جزم السنين
حب يجر في كل زقاق
واو العطف علي العاشقين
وأفتكر ان الوحدة دي داء
وأفتكر انك نص اتنين

حبيبتي بتقعد في المكتبة
كتبها صحابها وراكي وراكي
صبحت صابح بدون اصحابي
صاحبت الكتب اللي مصحباكي
سألت عنك كتبك حبايبك يا ريتني كنت كتاب  وياكي
أهو يبقي اسمك يوم مسكتيني لأجل تحضنيني وأرقص معاكي

وحروفي تملي جوز عيونك
واملا بمبادئي  عقلك جنونك
فأصونك وألغي إختيار إني أخونك
وأدوب في ايدك كصفحة قديمة
فتكتبيني تاني بخطك
وفي فهرس كتاب قلبي أحطلك
 فتلزقيني في جدران أودتك
زي الصور لنجوم السيما

يا جامعة عشق وأحنا طلاب
انا طالب في سكشن حبك
دخلتي قلبي بدون خبط باب و ملكيش في قلبي صحبة تنوبلك
انا في الجنة ليكي ثواب
وفي حسناتك أنا مكتوبلك
لو حبي ذنب يبقي اغلطيني وأنا موافق يا ستي أتوبلك

خشي قلبي و دخليني
وزغزغيني و ضحكني
و أعزفيني و أرقصيني
علي صوت حليم علي جد الشوج
وأخر بنساية في شعرها
تنزل فيحضن في ضهرها
كل القصايد دول مهرها
خلي حنانك فيا يسوج
تبوس ايديها بشفتيني وتشوف الدنيا ربيع من عيني
و في كل فسحة حبيبتي اذكريني
يا فراولة تياترو وقت الخروج

وخروجة يوم الخميس
و شوكولاطة مالية الكيس
وسطر الأتشات عالفيس
حبيتها يوم ما عرفت أعد عدد صوابع ايدي كام
في حضنك كنت كالقديس
في بعدك صرت ولا ابليس
يا واخده الملك بالتوريث
أنا شعبك وعمري ما هطلب في يوم ابدا اسقاط النظام
انا شعري لف بنات الدفعة
 علي واحدة واحدة وعلي كل دفعة
وملقتش فيهم ولا قلب شفعة
يعجبهم شعري و أخر الحكاية يقولوا حححح ويقولوا سلام

يا عادة مش بتروح
يا سر صار مفضوح
يا عقاب و مش ممسوح 
بالجاف في سطر الثواب
يا ذنب مش مغفور
يا ضلمة حبلت نور
سيافي يا مسرور
إزاي عن عينك غاب
جوايا في شهريار
لو جاني حبيب في الدار
ليلة و بكتيره نهار
يدبح فيا الاحباب
و جوايا جحا بحمار
وبعكس اللي كان من المرار
لافف قلوب محتار
شحتان حبيب عالباب

صورة في دار المسنين
يا شابة في دار مسنيني
و زارعة الجنة في وسط المكان
و أغمزلك فترعش عيني
ما أنا أصلي مسن و عجوز تعبان
انا شيخ و عمري 80  جيتيني
رجعت 12  كما الصبيان
فأعاكسها رايحة وأعاكسها جاية
وأضحك يبان طقم السنان
و قول للزمان ارجع يا زمان

صورة في مظاهرة
كل الثورات دايما حقيقة الا الثورة عالعشاق
 بيتحول شريك ألحياة لقائد أعلي طالب جلاء
رغم إن أساسها إشتراكية بيملي العسكر في قلوبنا كل زقاق
فلو علي حبكوا ثايرين خليكو صابرين و مكملين و أمسكوا في بعض ليوم الدين
واللي يتساب رغم انه ماسك مكتوبله الشهادة في ميدان الفراق

كل السلوك علي سور قلوبنا بقت مرفوعة و متكهربة
أسرار العشق بنا أتذاعت في الراديوهات متسربة
كل الجرايد شايفني ميدان يا سايبة معركتي ومتهربة
الناس بالجملة فاكرني عريسك و انتي رفضانة و مستغربة

واللي فاكرها يا قلبي موسي
 أهي صارت ولا ميت فرعون
لكني عبد وببني هرمها في قلبي وعمري ما اقدر أخون
ولاجل ما يفضل العشق فيا عايش ولا يشوفش التوابيت
أنا وصيت توت عنخ أمون
عشان يعلمني التحنيط

صورة حمضت متحمضتش
صورة سودا بدون الوان بدون اشخاص و من غير فلاش
غريب في كل الصور اللي فاتت حبيبتي وحدها وأنا معهاش
أتاريني مصوراتي بعينيا و العدسة لصورها ملقطتهاش
وأتاري الكاميرا بايظة يا قلبي و الفيلم اللي كان فيها مفيهاش

جميع صور البوم حبيبتي مش حقيقة و بتخيلها
لكنها فعلا حصلت قصادي لكن لغيري نسيت أكملها
مليش ولا صورة و وقت الصورة
أخري يادوب كان أني أبوصلها

كراكيب العشق مرمية في قلبي كراكيب يمين كراكيب شمال
كل حبيبة كانت تنسي حاجة لما تفارق وقت العزال
اللي سابت في قلبي صورتها
واللي نسيت تأخد شنطتها
واللي خلتني ضحكة شلتها
تستاهل يا قلبي مدام ميال
انا قلبي كان نوفي في كرتونة
يحفظ بعيدا عن ايدي العيال 
بقيت مستعمل روبابيكيا قديمة
في سوق المحبة ما تسوي ريال

أنا قاصدك في أشعاري و قاصدك أنتي في كل الكلام
مليش عاشق فصرت يتيم في دنيا التبني فيها حرام
علي هامش روايتكوا مشعبط اسمي عالجلاد
أهو يبقي أسمي شوفت حبايب و كل يوم حبايب جداد
وأنا لسه يتيم وحدي و صحابي صاحبوا بالأرقام
فلو عارفين ملاجئ عشق دلوني يا أهل الغرام

وأهو معادشي معايا صورها فمش محتاج ليها البوم
و نوع العشق اللي كان فوتوغرافي معادشي لسيادته في قلبي لزوم
 


قصيدة نوع العشق فوتوغرافي - جوزيف عزت

" القهوة ، 
من كُتر الكتابة عنّها / باخت 
فيه حاجات زيادة مَدْحها لعنة 
يارب هَبنا قهوة تشبه حُزننا 
واوهبنا شخص أصمّ يسمعنا 
وادينا قلب نبوحله مايخونناش 
وادينا حضن نروحله ، فيساعنا "
....................
صدرك شوارع ذكريات تايهين 
والحزن شاعر له هدوءه وحكمته
سألوا الكمان ياهل ترى بتحب مين ؟
ضاق - المكان - مافضلش غيرها ف رنِّته 
اتنين ف حرب وخرجوا الاتنين مقتولين 
وحضنها هربت منه ،، رجعت حضنته !
مين اللي سلِّم للشتا المفتاح 
طعم الحاجات الدافية ف الليل والمطر 
زُهدك ف كل الهربانين من جنّتك 
البنت كانت حبِّتك ياعبيط 
حبِّتها ليه ساعة ماكانت كرهتك !؟
وازاي بتعمل من سجايرك بالونات 
بتسيبها تطلع للسما دخان 
البنت مشيّت وانت مُتّ عشان 
دخّنت نفسك ف الصحاب سرطان 
وعطشت من شُرب السما ف البحر 
والبحر من كتر الغرق عطشان 
فبلاش تفكّر كل ماء يرويك 
وبلاش تفكّر كل حضن شاريك 
فكّرت يومياً ف كل الناس 
ونسيت تفكّر ف اللي فكّر فيك

القهوه. الجندى

بقيت عادي/الشاعر:محمود-حسن

بغيت و ياما حسيت يتخلى عليه مناش ولا تانية في غيابه
حيت معاه بالحب وقلبي بغاه وارتاح لقلبه
بغيت و ياما حسيت يتخلى عليه مناش ولا تانية في غيابه
حيت معاه بالحب وقلبي بغاه وارتاح لقلبه
مستنى اليوم تكوني فيه حلالي
بغيت وياما حيت هزيت راسي ومشيت
دام بحار هواك في عيونك انا سهيت
النهار كان اعيشه لك لتكوني مراتي وام ولدي
يا غالي لتكوني حلالي بين يدي
انا كنت بك ما نعيش انا قلبي ومتخذلنيش
بغيت  وياما حسيت هزيت راسي ومشيت بعيونك انا سهيت
دام بحار هواك في عيونك انا سهيت

amr hassn

Shorouk Hussien