Composed by Shri Vijaya dasaru & sung by Smt.Nandini Sripad , Blore... Rangoli by Kum.Deepika Tamraparni....

ಶ್ರೀವಿಜಯದಾಸಾರ್ಯ ವಿರಚಿತ ಶ್ರೀನಾರಸಿಂಹದೇವರ ಸುಳಾದಿ 
 ರಾಗ: ರೇವತಿ 
 ಧ್ರುವತಾಳ 
ಜಯ ಜಯ ಜಯಾವೆಂದು ಜಗದೋತ್ಪಾದಕ ವಾಯು
ವಯನಾಯಕಾದ್ಯರು ತುತಿಸೆ ಮಾತಾಡದಿಪ್ಪೆ
ಭಯ ಬಟ್ಟವನಂದದಿ ಘನ್ನತನವನ್ನೆ ಬಿಟ್ಟು
ತ್ರಯಲೋಕ ನಗುವಂತೆ ಬಾಯಿದೆರೆದೆಯೋ
ನಯನಂಗಳು ನೋಡಿದರೆ ವಿಶಾಲಾಯತ ಸೀತಳಾ
ದಯಾರಸ ಪೂರ್ಣವಾಗಿ ನಿತ್ಯ ವೊಪ್ಪುತಲಿವೆ
ವ್ಯಯರಹಿತ ವಿದೇನೆಂಬೆನೊ ಅಖಿಳರ ಓಡಿಸುವ
ಲಯಕಾರಿಯಂತೆ ಕಿಡಿ ಉದುರಿಪ ಬಗೆ ಏನು
ನಯವಾಗಿ ನಿನ್ನ ಪಾದಾ ಗಾಯನ ಗತಿಗೆ ನಿ -
ರ್ಣಯ ಮಾಡಲಾರದೆ ಸುರರು ಮರುಳಾಹುತಿಹ್ಯರು
ಅಯುತಾಯುತಾ ನಿಯತಾ ಸಿಡಿಲು ಗರ್ಜನೆ ಮಿಗಿಲು
ಸಯವಾಗಿ ಭೋ ಎಂದು ಕೂಗಿ ಕೆಂಗೆಡಿಪದೇನು
ಹುಯಲಿಟ್ಟು ಜಗವೆಲ್ಲ ಒಂದಾಗಿ ಕರೆದರೆ
ಪಯೋಬಿಂದಿನಷ್ಟು ದೂರ ಪೀಠಾ ಬಿಡದ ಮಹಿಮಾ
ಪಯಣಗತಿ ಇಲ್ಲದಲೆ ಒಮ್ಮಿಂದೊಮ್ಮೆ ಬಂದು ವು -
ದಯವಾದೆ ಸ್ತಂಭದಿಂದ ವಿಚಿತ್ರವೇನು
ಬಯಸಿದವರಾಪತ್ತು ಎಲ್ಲಿದ್ದರೂ ನಿಲ್ಲದೆ
ಬಯಲಾಗಿ ಪೋಪವೆಂದು ಸುರರು ಕೊಂಡಾಡೆ ನಿತ್ಯ
ಪ್ರಾಯಕೆ ಸಿಕ್ಕಿದಂತೆ ಬಾಲನ ಮೊರೆಗೆ ವಿ -
ಜಯವನೀವಗೋಸುಗ ನೀನೆ ವದಗಿದ್ದೇನೊ
ಪಯೋನಿಧಿಸುತೆ ನಿನ್ನ ಲಕ್ಷಣೋಪೇತ ಚಲುವಿ -
ಕಿಯ ನೋಡಿ ಹಿಗ್ಗಿ ಹಿಗ್ಗಿ ಹಿಗ್ಗಿ ಹಾರೈಸುತಿರೆ
ಪ್ರಿಯನೆ ಪರಮಾನಂದ ಸಂಪೂರ್ಣೈಶ್ವರ್ಯ ಚಿ -
ನ್ಮಯ ಮೂರುತಿಯೇ ಇಂಥ ಅಂಗವಿಕಾರವೇನು
ಜಯದೇವಿನಾಥ ದೀನನಾಥ ದುರ್ಜಯ ವಿ - 
 ಜಯವಿಟ್ಠಲ ನರಸಿಂಹ ನಿನ್ನ ಲೀಲೆಗೆ ನಮೋ ॥ 1 ॥ 

 ಮಟ್ಟತಾಳ 

ಅರಿ ದರ ಮೊದಲಾದ ನಾನಾ ಕೈದುಗಳಿರಲು
ಅರಿಯ ಉದರ ನಖದಿ ಸೀಳಿದ ಪರಿ ಏನೋ
ಸರುವ ಕಾಲ ರೂಪ ನಿನಗೆ ಮೀರಿದವಿಲ್ಲಾ
ಅರಿಸಿದೆ ಸಮಯಾನುಸಾರ ಸಾಕಲ್ಯವೇನೋ
ಇರಳು ಹಗಲು ದೇವಿ ಸಾರುವ ತೊಡಿಮ್ಯಾಲೆ
ದುರುಳಾ ನಿರ್ಜೀವಿಯ ಇಟ್ಟ ಸಂಭ್ರಮವೇನೋ
ಶರಣಾಗತ ವತ್ಸಲ ವಿಜಯವಿಟ್ಠಲರೇಯಾ 
ನರಕೇಸರಿ ನಿನ್ನ ಚರಿತೆಗೆ ಸೋಜಿಗವೋ ॥ 2 ॥ 

 ತ್ರಿವಿಡಿತಾಳ 

ಪರದೇವತಿ ನಿನ್ನ ಗುಣರೂಪ ಕ್ರಿಯಗಳು
ಪರಮ ಶಾಂತವೆಂದು ಸಮಸ್ತರೊಲಿಸೆ
ಭರದಿಂದ ಘುಡಿಘುಡಿಸುತ ಬಂದ ಕಾಲಕ್ಕೆ
ಉರಿ ಮಾರಿ ದೈವವೆಂದೆಲ್ಲರೊಡನಿದ್ದದ್ದೇನೋ
ವರಮಣಿ ನಾನಾ ಹಾರಗಳಿರೆ ಕೊರಳಲ್ಲಿ
ಸುರಿವ ಶೋಣಿತ ಹಸಿಗರಳಾ ಹಾಕಿದುದೇನು
ಶಿರೋರಹ ಮಿಗಿಲಾದ ಅವಯವಂಗಳು ಮೃದು -
ತರವಾಗಿದ್ದರೆ ಮಹಾಕಠಿಣ ತೋರಿದುದ್ದೇನೊ
ನರವಲ್ಲ ಮೃಗವಲ್ಲ ಜಗದ್ವಿಲಕ್ಷಣವಾದ
ಶರೀರವ ತೆತ್ತು ಅದ್ಬುತ ಬಿರಿದಾದ್ದೇನೊ
ಪರಮೇಷ್ಠಿ ಶಿವ ಪುರಂದರ ಸುರರಾದ್ಯರು
ನಿರುತ ನಿನಗೆ ನಿಜ ಕಿಂಕರರಾಗಿರೆ
ಸುರವೈರಿಗಳಿಗೆ ಒಂದೊಂದು ಪರಿಪರಿ
ವರ ಪಾಲಿಸಿದ್ದು ಮನ್ನಿಸಿದಾ ಘನವೇನೊ
ದುರಿತಕುಠಾರಿ ವಿಜಯವಿಟ್ಠಲ ಘೋರ -
ತರ ರೂಪವತಾಳಿದೆ ಸೌಮ್ಯತನವೆ ತೊರದೂ ॥ 3 ॥ 

 ಅಟ್ಟತಾಳ 
ಸಂತತ ನಿನ್ನ ಪಾದೈಕಾಶ್ರಯಾ ಏ -
ಕಾಂತಿಗಳಿಗೆ ಮೆಚ್ಚಿ ಸುಮ್ಮನಾಗದ ದೈವ
ಎಂತು ಪೇಳಲಿ, ನೋಡಿ ತರಳ ಪ್ರಹ್ಲಾದ
ಮುಂತೆ ನಿಲ್ಲಲು ಸೋತ ಮುಗುಳ ನಗಿಯೇನು
ಕಿಂತುಯಿಲ್ಲದ ಸ್ವಾಮಿ ಶುದ್ಧಾತ್ಮಾ ಶ್ರೀಲಕುಮಿ -
ಕಾಂತ ಸರ್ವಾಂತರ್ಯಾಮಿ ಕರುಣಾಳೆ
ಚಿಂತಿತ ಫಲದಾಯಾ ದೈತ್ಯಾವಳಿಗೆ ಮಹಾ
ಭ್ರಾಂತೆಗೊಳಿಪ ನಮ್ಮಾ ವಿಜಯವಿಟ್ಠಲ ಸ್ವಾ -
ತಂತ್ರ ಸರ್ವೋತ್ತಮಾ ನಿನ್ನಾ ಮರಿಯಾದೆ ಎಂತೊ ॥ 4 ॥ 

 ಆದಿತಾಳ 

ಕುಟಿಲ ನಿಟಿಲ ಲೋಚನ ಕರುಳವಕ್ತ್ರ 
ಕರವಾಳಪಾಣಿ ಕಠಿಣ ಕೋಪಾಟೋಪಪಾಗ್ನಿ 
ಛಟ ಛಟ ರಭಸ ಚಂಡಪ್ರತಾಪ
ಕಠೋರ ಶಬ್ದ ಹಾಹಾಕಾರ ತೀಕ್ಷಣನಖ 
ವಜ್ರನಾಗೋಪವೀತ ಝಟ ಶಠ ರೋಮ ಕುಚಿತ
ಕರ್ನ ದಂತೋಷ್ಟ್ರ ಮಿಳಿತ ವುತ್ಕಟ ಶ್ವಾಸೋಛ್ವಾಸ ನಾಶಿಕ 
ಪುಟ ಹುಂಕಾರ ಜ್ವಾಲಾಮಾಲಾ ಕಣಕಣ ಪ್ರವಾಹ ಭೃಕುಟಿ ತಟಿ
ತಟಿ ತಟಿತ್ಕಾಂತಿ ವೀರಾವೇಶ ಕೋಲಾಹಾ ಸಿಂಹ
ಪಟುತರ ಲಂಘಣೆ ಭುಜ ತೊಡೆ ತಟಕೆ
ಲಟಲಟ ಜಿಹ್ವಾಗ್ರ ಉಗ್ರಾಧಿಟ ಅಧಟ ಅ -
ಚ್ಚಟ ನಿಚ್ಚಟ ವುತ್ಕೃಷ್ಟ ಅಟ್ಟಹಾಸಾ ಮಿಟಿ ಮಿಟಿ 
ಮಿಟಿ ಮಿಟಿ ಮಿಟಿ ನೋಟ ನಟ ನಟ ನಟಣೆ 
ಅಬ್ಬರ ಉಲ್ಬಣ ನಿಬ್ಬರ ಅರ್ಭಾಟ ಬೊಬ್ಬಾಟ
ಕಟ ಕಟ ಕಾರ್ಬೊಗೆ ಹಬ್ಬಿಗೆ ಮೊಬ್ಬಿಗೆ ಉಬ್ಬಿಗೆ
ಇದರ ತಬ್ಬಿಬ್ಬಿಗೆ ಜಬ್ಬಿಗೆ ಲುಬ್ದ
ಭಟರೆದೆ ಇಬ್ಬಗೆ ಇಬ್ಬಗೆ ಆರಾಟಾ
ತುಟಿ ಕದಪು ಭುಜ ಕಂಧರ ಉರ ಬಾಹು
ಜಠರ ನಾಭಿ ಜಘನಾ ಕಟಿ ಊರು ಜಾನುಜಂಘೆ
ಗುಲ್ಫಾಂಗುಟ ಪದ ಕುಣಿಯೇ ಅನುಕಂಪ
ಪುಟ ಪುಟದಾಡುವ ಅಡಿಗಳು ಬೊಮ್ಮಾಂಡ
ಕಟಹ ದಲ್ಲಣವು ಭಟ ಸುರಮುನಿ ಕಟಕ 
ನೆರೆದುಘೇ ಉಘೇ ಭಳಿರೆ ಪೂತುರೆ ಭಲ್ಲ ಭಲ್ಲರೆ ಸಿಂಗಾ
ಘಟಿತಾಘಟಿತ ಸಮರ್ಥ ನಿಜೈಶ್ವರ್ಯ ಗುಣಪೂರ್ಣ
ಚಟುಲ ನಿರ್ಜರರ ಕಟಕ ಪೂಜಿತ ಸಕಲ ಕ್ರಿಯಾನಂದ
ಹಟ ನಾನಾ ಚಿತ್ರ ವಿಚಿತ್ರ ಅದ್ಬುತ ಐಶ್ವರ್ಯಾಣು ಮಹತ್ತು -
ತ್ಕಟ ಗುರು ಲಘು ಪರಿಮಿತ ವ್ಯಕ್ತಾವ್ಯಕ್ತಾ ಉ -
ದ್ಧಟ ಅಗೋಚರ ಘೋರ ಯುಗಪದಿ ಪೂರ್ಣ
ನಿರ್ಭೇದ ದುರ್ಲಭ ಸುಲಭಾ ಅಲೋಭಾ ಅವಿರುದ್ಧಾ
ಸುವಿರುದ್ಧಾ ಕರ್ಮವಿಕರ್ಮ ವಿದೂರನೆ
ಸಟಿಯಲ್ಲ ಅನಾದಿಸಿದ್ಧ ಇಬ್ಬಗೆ ಅಸುರಾರಿ
ವಟಪತ್ರಶಾಯಿ ಸಿರಿ  ವಿಜಯವಿಟ್ಠಲ 
ಕಂಠೀರವ ಪಠಿಸಿ ಪುಟಾಂಜುಳಿಯಾದವಗೆ
ತೃಟಿಯೊಳು ಪೊಳೆವ, ಪತಿತ ಪಾವನನೇ ॥ 5 ॥ 

 ಜತೆ 
ಭೃತ್ಯವತ್ಸಲ ನಿನ್ನ ರೂಪಕ್ಕೆ ನಮೋ ನಮೋ
ದೈತ್ಯಮರ್ದನ ವಿಜಯವಿಟ್ಠಲ ಕಟಿ ತರುವಾಯಾ ॥

Narasimha Suladi - Jaya Jaya - Raga:Revati

By Smt.Nandini Sripad, Blore..
ಶ್ರೀವಿಜಯದಾಸಾರ್ಯ ವಿರಚಿತ  ಶ್ರೀಹರಿ ಸ್ವಾತಂತ್ರ ಅಧ್ಯಾತ್ಮ ಪ್ರಮೇಯ ಸುಳಾದಿ 
(ಪುಣ್ಯಪಾಪಗಳು ಹರಿ ಮಾಡಿಸಿದಂತೆ ಆಗುವದು. ಕಣ್ಣೆವೆ ಇಕ್ಕುವದೂ ಜೀವರ ಸ್ವತಂತ್ರವಲ್ಲ. ಹರಿ ಮಾಡಿಸದಿರೆ ಬ್ರಹ್ಮಾದಿಗಳು ನಿಶ್ಚೇಷ್ಟರು. ಲಿಂಗ ಉಪಚಯವಾರಂಭಿಸಿ ಶ್ರೀಹರಿ ಚೇಷ್ಟೆ ಮಾಡಿಸುವನು. ಸರ್ವ ಸ್ವತಂತ್ರನು. ಹರಿ ಪ್ರಯೋಜನ ಮಾಡಿದ ಮೇಲೆ ತಿಳಿವಂಥ ಪರಿ ಜೀವನಿಗುಂಟು. ಇದೇ ಮಾತ್ರ ಜೀವಗಿತ್ತ ದತ್ತ ಸ್ವಾತಂತ್ರ.)

 ರಾಗ ಭೂಪಾಳಿ 

 ಧ್ರುವತಾಳ 

ಪುಣ್ಯಪಾಪಗಳೆರೆಡು ಹರಿ ಮಾಡಿದಂತೆ ಜೀವ
ಗಣ್ಯರು ಮಾಡುವರು ಜನುಮ ಜನುಮ
ಅನ್ಯಾಯವೆನ್ನದಿರಿ ಗ್ರಂಥ ಸಮ್ಮತವಿದಕೆ
ಅನ್ಯಥ ನುಡಿಸಲ್ಲ ಎಂದೆಂದಿಗೆ
ಧನ್ಯರಾದವರಿಗೆ ಮನೋವಾಕ್ಕಾಯ
ಅನುಗುಣ್ಯವಾಗಿಪ್ಪದೊ ಹರಿಯ ಶಕ್ತಿ
ಕಣ್ಣೆವೆ ಇಕ್ಕುವದು ಜೀವರ ಸ್ವತಂತ್ರವೆ
ಸನ್ಯ್ಯಾಯವಲ್ಲವಲ್ಲ ಯವೆ ಇಡದಿರಲಿ ಕಾಲಮೀರಿ
ಕನ್ಯಾರತುನ ಲಕುಮಿ ಜೀವಕೋಟೀಶ ಹಿ -
ರಣ್ಯ ಗರ್ಭಾದಿಗಳು ನಿಶ್ಚೇಷ್ಟರೊ
ಅನ್ಯರೊಬ್ಬರ ಕಾಣೆ ಬಹಿರಂತರದಿ ಕಾ -
ರುಣ್ಯ ಮೂರುತಿ ಹರಿ ನಿಯಾಮಕ
ಸನ್ಯಾಸ ಮೊದಲಾದ ಆಶ್ರಮಧರರಾಗೆ ಅ -
ರಣ್ಯ ರೋದನ ಕಾಣೊ ತಿಳಿಯದಿರಲು
ಮನ್ಯು ಮಾಡುವನ್ಯಾರು ಕಾಲಕಾಲಕೆ
ದೈನ್ಯಬಿಡವರಾರೊ ಜೀವಿಗಳೆ
ಗಣ್ಯವೆ ಶ್ರೀಹರಿಯ ಅಚಿಂತ್ಯಾದ್ಭುತ ಕಾರ್ಯ
ಅನ್ಯೋನ್ಯಭಾವದಿಂದ ನಡಿಸುವನು
ಶೂನ್ಯ ಗುಣನಲ್ಲ ಸತತ ವ್ಯಕ್ತನು ಲಾ -
ವಣ್ಯನಂತಾನಂತ ರೂಪಾತ್ಮಕ
ಹನ್ನೆರಡು ಎರಡು ಭುವನದೊಳಗೆ ಅಗ್ರ -
ಗಣ್ಯನಾಗಿ ಮೆರೆವ ನಿರ್ದುಃಖದಿ
ಜನ್ಯದಿಂದಲಿ ಜನ್ಯವಾಗುವ ವಸ್ತ ಪ -
ರ್ಜನ್ಯ ಮಿಕ್ಕಾದಲ್ಲಿ ಹರಿಸಂಗಡ
ಮನುಗಳಲಿಪ್ಪ ತತ್ತತ್ಕಾಲಕ್ಕೆ ಸೌ -
ಜನ್ಯರಾ ದುರ್ಜನರ ಕುಣಿಸುವನು
ಪಾಂಚಜನ್ಯ ಪಾಣಿ ನಮ್ಮ ವಿಜಯವಿಟ್ಠಲ ನಿ -
ರ್ವಿಣ್ಯನಲ್ಲವೊ ಬಲು ವಿಚಿತ್ರ ಸಮರ್ಥ ॥ 1 ॥

 ಮಟ್ಟತಾಳ 

ಜೀವಕ್ಕೆ ಆವರಣ ಲಿಂಗ ಶರೀರವು
ಆವಾವಕಾಲಕ್ಕೆ ಇದ್ದದ್ದೇ ಸರಿ ಇದ್ದರೆ
ನೋವಿದ್ದಿಲ್ಲವೊ ಭವಿಷ್ಯೋತ್ತರದಲ್ಲಿ ತಾ
ವ್ಯವಧಾನದಲಿ ತಗಲಿಸುತಿಪ್ಪದು
ಆವ್ಯಾಳ್ಯದಲಿ ಜ್ಞಾನೇಚ್ಛಾ ಪ್ರಯತ್ನ
ಜೀವಕೆ ಸ್ವರೂಪಭೂತವಾದರು ಸ್ವಸ್ವ -
ಭಾವಾಚರಣೆ ಮಾಡದೆ ಸಮ್ಮನಿದ್ದದ್ದೇನು
ದೇವದೇವೇಶನ್ನ ಉತ್ತಮ ಕ್ರೀಡೆಗೆ 
ಆವನನು ತುತಿಸಿ ನೆಲೆಗಂಡವನಾರು
ಕೋವಿದರರಸ ವಿಜಯವಿಟ್ಠಲರೇಯ 
ಜೀವರ ವಿಭಕ್ತವ ಮಾಡುವ ಬಗೆ ನೋಡೊ ॥ 2 ॥

 ತ್ರಿವಿಡಿತಾಳ 

ಒಣಗಿದ ಗಜುಗಿನ ಕಾಯೊಳದರ ಬೀಜ
ಅನುಸರಿಸಿ ಇದ್ದಂತಾನಾದಿಯಿಂದ
ಗುಣತ್ರಯಾತ್ಮಕವಾದ ಲಿಂಗದೊಳಗೆ ಚೇ -
ತನ ಪೊಂದಿಪ್ಪದೊ ಅಸಂಬಂಧದಲ್ಲಿ
ಮಿನಗುವ ಕರ್ಮವ ಪ್ರಕೃತಿ ಕಾಲವೆಲ್ಲ ಸಾ -
ಧನ ಮಾಡಲಿಲ್ಲೇಕೆ ಅಂದಿನಲ್ಲಿ
ಗುಣವಂತನಾದವ ಕರ್ಮಾದಿಗಾಧಿಕ್ಯ -
ವೇನು ಪೇಳುವನೆ ಶ್ರೀ ಹರಿಯ ತೊರದು
ವನಜನಾಭನು ಸೃಷ್ಟಿ ಪ್ರಾರಂಭದಲಿ ಜೀವ -
ರನ್ನೆ ಪುಟ್ಟಿಸುವ ಲಿಂಗ ದೇಹದಿಂದ
ಘನವಾಗಿ ಜೀವಕೆ ಬಿಡದಂತೆ ತೋದ ವಾ -
ಸನ ದೋಷಾದಿಯಲ್ಲಿ ಪಚ್ಛಿಸುವ
ತನುವಿನ ನೆಳಲಂತೆ ಹರಿಯಾಡಲು ಜೀ -
ವನ ಪ್ರವರ್ತಿಸುವದು ದ್ವಿವಿಧ ಕರ್ಮ
ವನಜಾಸನನಿಗೆ ಮುಖ್ಯ ವೊಳಗೆ ಹೊರಗೆ ತಾನೆ
ಅನುದಿನ ವ್ಯಾಪಾರ ಮಾಳ್ಪ ಮಿಕ್ಕ
ಅನಿಮಿಷಾದಿಗಳಿಗೆ ತತ್ತದ್ವಾರರಿಂದ
ತಾನೆ ಚೇಷ್ಟಪ್ರದನಾಗಿ ಕರ್ತೃನೆನಿಪಾ
ಮನುಜನೊಬ್ಬನು ನೋಡು ಬಲು ವಿಧವಾದ ರಸ -
ವನು ಕುಡಿಸಿ ಪಾನ ಪ್ರಭೇದವ
ಅನುವಾಗಿ ಮಾಡಿ ತಂದು ಹಚ್ಚಿ ವಸ್ತ್ರಕ್ಕೆ ದೀಪ -
ವನೆ ಮುಟ್ಟಿಸಿದರದು ವಸನ ಸುಡದು
ಎಣೆಗಾಣೆ ಒಂದು ರಸ ವಿಶೇಷದಲಿ ಇಂಥ
ಗುಣ ಉಂಟಾಗಿದೆ ನೋಡು ಪ್ರತ್ಯಕ್ಷವು
ಗುಣಗಣಾಂಬುಧಿ ನಿತ್ಯ ನಿರ್ದೋಷ ಪ್ರಬಲ ಲ -
ಕ್ಷಣ ಪೂರ್ಣ ವಿಜ್ಞಾನ ನಿರ್ವಿಕಾರ
ತನಗೆ ತಾನೆ ಕುಣಿದು ಜೀವಿಗಳ ಕುಣಿಸುವ
ಅನಿಮಿತ್ತ ಬಾಂಧವ ಸರ್ವ ವ್ಯಾಪ್ತ
ಜನನ ಮರಣ ರಹಿತ ವಿಜಯವಿಟ್ಠಲರೇಯ 
ಚಿನುಮಯ ಮೂರುತಿ ಚೇತನಾಚೇತನ ಸ್ವಾಮಿ ॥ 3 ॥

 ಅಟ್ಟತಾಳ 

ದೇಶ ಆಕಾಶ ವ್ಯಾಪಿಸಿಕೊಂಡು ಇದ್ದಂತೆ
ಶ್ರೀಶ ಜೀವನದೊಳು ವ್ಯಾಪ್ತನಾಗಿದ್ದು ಸಂ -
ತೋಷ ಪೂರ್ಣನು ಪ್ರಕೃತಿಯನು ಮನೆ ಮಾಡಿ
ಆ ಸೂಕ್ಷ್ಮ ದೇಹಕೆ ಲಿಂಗವ್ಯಾಜದಿಂದ
ಮೋಸವಗೊಳಿಸುವ ಮಾಯವ ಕಲ್ಪಿಸಿ
ತಾ ಸುಮ್ಮನಿರಲೊಲ್ಲ ಒಂದು ಕ್ಷಣವಾದರು
ಲೇಶ ಬಿಡದೆ ಬಹುಚರ್ಯ ಮಾಡುವನು
ವಾಸವವಂದಿತ ನಮ್ಮ ವಿಜಯವಿಟ್ಠಲ ಸ್ವಪ್ರ -
ಕಾಶಕೆ ಪ್ರತಿಕೂಲ ಉಂಟೇನೊ ಮರುಳೆ ॥ 4 ॥

 ಆದಿತಾಳ 

ವಾಙ್ಮನೊಗೋಚರ ಜ್ಞಾನಿಗಳಿಗೆ ಇದು
ರಾಗ ತೊರೆಯದವಗೆ ಮನಸಿಗೆ ಹತ್ತದು
ಹೀಗೆ ಹಾಗ್ಯಾಕೆಂದು ತಂದು ವಾದಿಸಿದರೆ
ಆಗುವದೇನಯ್ಯ ಅದರಿಂದ ಫಲಿತಾರ್ಥ
ಭಾಗೀರಥಿ ಜನಕ ಪುಣ್ಯ ಪಾಪಕೆ ಕರ್ತ -
ನಾಗಿಪ್ಪನು ನಿತ್ಯ ಸರ್ವಜ್ಞ ಶಿಖಾಮಣಿ
ಆಗಮ ಶ್ರುತಿಯಲ್ಲಿ ವರದೊರದು ಪೇಳಿದೆ
ಭೋಗಿಸಬೇಕು ಜೀವ ಹರಿ ಇತ್ತ ದ್ವಿವಿಧ ಕರ್ಮ
ಜಾಗು ಮಾಡದೆ ತಳಿ ಪರಮಾತ್ಮ ಪಾಪ ದೂರ
ಭೂಗೋಳದೊಳಗೆ ವಿವರಿಸಿ ಪೇಳುವದಕ್ಕೆ
ಸಾಗಿ ಸಾಗದು ಬುದ್ಧಿ ಸುಳಿಯಂತೆ ಸುತ್ತುತಿದೆ
ವೇಗದಿಂದಲಿ ಇನಿತು ಪೇಳಿದ ಕೃತಿ ಎಲ್ಲ
ಯೋಗೇಶ್ವರ ಹರಿ ಒಳಗಿದ್ದು ನುಡಿದದ್ದೆ
ಈಗಾಗ ಎನಸಲ್ಲ ವೈದಿಕ ಲೌಕಿಕ ಸರ್ವ -
ಥಾ ಗುಣದಲ್ಲಿ ಗುಣಿಸಿ ಮೌನ ಪಿಡಿಯಬೇಕು
ನಾಗವೈರಿವಾಹನ ವಿಜಯವಿಟ್ಠಲ ಸುಮ್ಮ -
ನಾಗಗೊಡನು ಸುಮ್ಮನಿಡುವನು ಇಚ್ಛೆ ಬೆರಿಸಿ ॥ 5 ॥

 ಜತೆ 

ಹರಿಯೆ ಪ್ರಯೋಜನ ಮಾಡಿದ ಮೇಲೆ ತಿಳಿವಂಥ
ಪರಿಯುಂಟು ವಿಜಯವಿಟ್ಠಲನ ಕರುಣದಿಂದ ॥

Srihari Swatantra Adhyatma Prameya Suladi - Raga:Bhupali

TADIPATRI GURUKULA

Related tracks