عمار يا بيت ٍ شموخه ومبناه
يوصف على جال ٍ شمال الرياضي

متشهل ٍ يوضي على ماحوالاه
بأكباسه اللي في علاويه تاضي

الله يساعد مـن يوالي محاضاه
مايوم من كض الرياجيل غاضي

دايم يكض من الرياجيل بملاه
كض الضمايا اللي تكض الحياضي

راعيه حربياً دعانا وجيـنـاه
جانا وقد جيناه حاضر وماضي

الحربي اللي تفعل الطيـب يمناه
على دروب الطيب يلظاه لاظي

دايم يحاضي له مقلط ومقهاه
الله يعين اللي عليها يحاضي

ياما كلت صينيته من ولد شاه
وحيل ٍ على أشناق الشتاوي رباضـي

والطيب ضلع ٍ يتعب الرجل مرقاه
ما يعتليه اللي يحس بشواضي

و ابن زويبن يوم رامه وهاواه
زاد أنتهاضه في حجاه أنتهاضي

وجاء في محل محدً فيـه يشنـاه
عليه عن نقد الجميع أحتفاضي

واللي دعاني بالمديح أتنصاه
صاحب أبنا ماهوب صاحب قضاضي

ورد الثنا بيني وبينه مجازاه
ومن هاضه الفعل النبيل إستهاضي

حقه علـى أشهـر صفاتـه ومسعاه
وحقي عليه إعن القصـور التغاضـي

عدً قراح ومن ورد يمه اسقاه
ماهوب رسً ما به الا الرماضي

وإن قيل شاعر حرب قلناهو أياه
شاعر ولا لحدً عليه إعتراضي

شعر النبط من عام الألفين لولاه
قد بان فيه النقص والانقراضي

له منهج ٍ بالشعر يصعب مجاراه
يخوض بحر ٍ غبته ماتخاضي

ويجيب مرجان البحر من تحت ماه
من مظلمات ٍ مايجيها الخواضي

غرايبً مثل العقود المنقاه
اللي تعلق في رقاب الغضاضي

من حلو راحلته ومن حلو معناه
بيته يجي مليان ماهوب فاضي

ولاهيب تطلع مفرداته أمناياه
يصهر ذهبها لين تنجض نجاضي

يختار فالطيب ويأخذ من أعـلاه
ولاله بالاسواق الرخيصة مقاضي

ودي لو أملك قدرته واحلالاه
وأشرك لو كان ماهوب راضي

مير أعتلاء عني على متن لهلاه
ضلع ٍ ماشوف اعلاه غير متواضي

لاشك يقنعني نظام المباراه
ولازم يجي عندي مرونـة رياضـي

ولولا إختلاف الشعر في كل مقهاه
ماصنفت شعار نادي عكاظي

شعر ليا جاء دامي الجرح داواه
وشعر من المطروب فيه انخفاضي

وابن زويبن لو يطيع انتخبناه
في وسط شعر عكاظ لـ الشعر قاضي

شهادةً مابي عليها مكافـاه
لله خلاق السماء والأراضي

وهذي صفات الحربي اللي عرفناه
وباقي علومه من بياض البياضي

عبدالله بن عون - عمار يا بيت ٍ شموخه ومبناه

وكل أمرك للكريم ويسمح أمـرك
كل ما دكت علـى بالك روابـع

وافرد همومك على سجـاة صـدرك
لا تضيقها وحلم الله واسع

واعرف اسباب الردى والطيب وادرك
واحسب حسابك من الليلـه وطالـع

لا تطاول في قصير الشبر شبٌرك
ولا اتنازل عن شيمك ولا اتراجع

ولا تسمع باهتين الذوق شعرك
وانت شعرك من عروق البرق راضع

وزم روحك بين جنحانك ووكرك
كان ما عندك على النوماس مانع

ولا تواضع للوضيع يضيع قدرك
منت مجبور على بعض التواضع

مساعد الرشيدي - لا تواضع للوضيع يضيع قدرك

وقت راس في طرف برقا بطينه مواط ذيابه
أبيض ملموم مقلوز مرتكز مرتفع متعلي

مدهلٍ للذيب سرحان لياراد العشا قبل العشا عدابه
يقشعر الراس من جيلانه اللي بعضها للوطي منهلي

يبتدي واد الرمة ليا انحدر واصطفق من مفيض شعابه
وجنبه الغربي ليا سال سيله وانحدر والتوى للثمد ينحلي

قلت أبلقى بالجبل لأهله وسم والارسم والقى عليه كتابه
مادرست الكيميا والفيزياء لاشك عقلي قبل أعدي قلي

شفت للكفه بقايا مرمسه عن سؤالي ترد الجابه
تقل تعطيني تحيه وفيٌه يوم جيت تهلي

قلت عبسي قال عبسي جبل غطفان هو وأصحابه
خذ كلام ٍ من هرج فيه قدام العرب مازلي

قلت أبي برهان قال انحدر للقور والا اللابه
والرموز اللي تحصل تراها تستحيج الحلي

قلت تستاهل لحن مهجور مبطي محد غنى
الرعيل اللي يغني على البحر الطويل مولي

ياوجودي وجد من ضايقه بالطلب قدم العرب طلابه
في زمان شين وابن الحلال من الظروف مقلي

أو وجودي وجد من شاف غبنه واحتزم واعتزا واخذلوه اقرابه
ياحياة فيك ياهالضلع لين الروح من هالجسد تنسلي

ابغأ افارق ضجة المدن والعالم النصابه الكذابه
ورفع الاذان برض ً خليه خاليه باالدجا واصلي

واطلب اللي ماخبرته عن ضيوفه يسكر بابه
والله اعلم قبل نمشي كم خوياٍ ً يبي يمهلي

عيد بن مربح - وقت راس في طرف برقا بطينه مواط ذيابه

البارحة وأهل البلاد النائي 
آراءها ما تتفق وآرائي

وصديت عن صوتٍ يحس الخاطر
والله بغايات النفوس ادرائي

وعديت في راس الطويل النايف
بين المدينة والبلاد النائي

وذكرت قول الغيهبان المري
راع القنا والمهرة الصفرائي

بليت بابليسٍ ونفسي والهوى
كيف النجاة وكلهن اعدائي

و أخذت أمليها لنفسي كني
لم استبيح الشعر في ارجائي

و غنيت من بدعي على طاروقه
قصيدة ٍ من فكرتي وايحائي

الشعر شعري والبحور بحوره
والجد جدي والشيوخ ابائي

اني لمن قوم ٍ يعز عليهم
قتل الرعاة ودمعة الحسنائي

و ما أنا بالمدح رافع نافخ ٍ
مهما بلغت بصنعتي و أدائي

ومن منبر المجد التليد الخالد
ابدي ولا يبدي بريق اضوائي

وابدي بها فالمبتدى ذكر الله
قصيدة ٍ صنفتها عصرائي

يممتها للي عليه الشكوى
تبدا عليه ليامن كبرت البلوائي

الملتجى بعد الولي سبحانه
ريف الخوي لا ضاقت البيدائي

اللي ليا منه نوى له طرقه
له هونت به كلمة الجوزائي

تركي و إذا طاب القصيد لتركي
فهو بغر الغانيات أولائي

الساس راسي والمبادي عليا
والطيب فطره والكرم تلقائي

جده فهد والجد الآخر نايف
تبارك الرحمن فيما شائي

يا سيدي تركي وأنا مملوكك
اللي خذتني فالحياة أهوائي

الا عن ارضاك وارضى من حولك
لو مالمحت أحد ٍ يحب ارضائي

احد نفسي واجتلد واصرفها
لو حاول ابليس اللعين اغوائي

و ما لنفس ٍ عن هواها رادع
إلا بعزم ٍ كائد الأعبائي

فإن جنت نفسي علي خطيئة
فعفوكم أكبر من الأخطائي

وإن كان لا هاذي و لا هاذيه
وش عاد هو ذنب الوعود الهائي

وأنا الذي لـ إن عاش راسي لابقى
بدر الدجى فالليلة الظلمائي

و إن مت .. مني يارثون أصحابي
حبي .. ومني يارثون ابنائي

ديني و مرجلتي و حب بلادي
و حب الملك و الراية الخضرائي

طاعة ولي الأمر حق الطاعة
و لا طاعة الا الطاعة العميائي

اميرنا الشيخ الصحيح الواضح
لو جيت ادور عن خطائي اعفائي

أنا الوفاء و أنا الولاء و المحزم
و أنا الصديق الصادق الفدائي

أوثق الخوه بصدق الصادق
اللي أخلف الخوه رياء الرائي

فإن كنت تنظرني كأني غيري
رجوت إمعان نظرك إيزائي

فإن شئت تنظرني بماني أنا
فذاك هو مدحي و هو غطائي

وإن شئت تصرف شبح عينك مني
فإبداء من عينك دواء الدائي

يا سيدي عزيز قومٍ ذلي
حرمت معه فالحياة بقائي

و أنا وريث أهل الشداد و شاعر
يصعب على وجه الحياة اخفائي

أفنا و يبقى للورق قصيدي
هدية الأموات للأحيائي

ضيدان بن قضعان - البارحة وأهل البلاد النائي

ما يبرّد واهج الشوق و شعور الهيام
غير سردا تطوي البعـد بالسرعـة طوي

بديها من خلف ما هوب مثلـه مـن أمـام
مستوي في حال و بحال ما هـو مستـوي

خشمها عبرود طلقـه و موخرهـا ابهـام
رافعـه راعيـه باشـارة ٍ مـا تنـغـوي

لا بدو دعا السفر و اعلنوا ربـط الحـزام
و ارشادات الأمن لو ترتطـم و لا تهـوي

و استلمها و احد ٍ خبرتـه عشريـن عـام
كبتـن ٍ بالله و بكتابـه ايمـانـه قــوي

مسلم عنـده خبـر بالحـلال و بالحـرام
جابله ربي على الديـن و سلوكـه سـوي

و اصعدت مثل أشقر ٍ فوق جو الصيد حام
ال مراوحها مـع الجـو لجـه و حـدوي

مثل ما يدوي صدى صوت رعّـاد الغمـام
صوتها صداه عبـر الفضـا يـدوي دوي

صنعة اللي ما عرفوا لا صلاه و لا صيـام
شعب ٍ أكثرهم ما هو عارف ٍ منهـو ذوي

بالنهار إلـى تعلـت كبـر فـرخ الحمـام
دونهـا آلاف المسافـات تزويـهـا زوي

و ان تغطلس بينك و بين رؤيتهـا الظـلام
كن في روس اجنحتهـا مشاهيـب بـدوي

دوبهم دكّوا عـن دلالـه الربـع الحشـام
تحتها من وقدت السمـر جمـر ٍ مجثـوي

دايم وربعه علـى جلسـة ٍ عنـده احيـام
أبلـج ٍ ليـن جنابـه لربعـه و حـمـوي

ما لي إلا هي إليا جاء للأشـواق احتـدام
و قامت الذكرى على القلب تكويني كـوي

لي شهر و شوي عيني محاربهـا المنـام
و دي احضر جـوازي و ادور لـي خـوي

بيني و بينه مسافـات و حـدود و نظـام
واحـد ٍفرقـاه شاويـة ٍ فـؤادي شــوي

بس أبا زوره مثـل مـا يـزارون الكـرام
لين عيني مـن قبالـه و شوفـه ترتـوي

لو بغيت اصبر و اكابر و اقو ل اني تمـام
ذيب حبه بيـن جـرد المحاديـب يعـوي

كان ما لي في دروب الهوى شف و مـرام
لين شفته و اشهد انـه هـواة المهتـوي

يا سلام الله علـى السلهمـة و الابتسـام
و يا سلام الله على اللي ما بيله مطـروي

كن ما الله حط في منطقة خصـره عظـام
و كن غيره ما احتوى مثل ماهو محتـوي

لا قعد مـا ودي يقـوم و ليـا قـام قـام
تلوي أعناق البشـر قومتـه يمـه لـوي

تقل بين أعلى الجسم و اسفل الجسم انقسام
شي من جسمه مرتب و شـي ٍ فوضـوي

استلمنـي فـي جبروتـه أشـر استـلام
ليـن طيّـح معنويـات رأس المعـنـوي

الغرام إليا بطـش فيـك ملعـون الرسـام
ما يعـرف هـذا قبيلـي و هـذاك خلـوي

يكبـر الرجـال أمـام المهمـات الجسـام
و يصغر الرجال أمـام الجمـال الانثـوي

ما يتحمل نظرة العيـن و ارخـاي اللثـام
لو باسه بأس رحمة حيـاة ابـن جلـوي

لافي الغيداني - ما يبرّد واهج الشوق و شعور الهيام

أقبل يحرك خطوة الرجل برفوق
والقاع لمصافح خطاه يتشوّق

مخلوق لكنه مهوب اي مخلوق
على بنات آدم وحوا تفوّق

عليه لبس يجمع الوسع والضوق
موسّعٍ بعضه وبعضه مضوّق

مرّ وتعدى ما بدا منه منطوق
إلا إنه بجيش المفاتن مطوّق

خلانى أمشى وأقضب الدرب واتوق
مانيب تايق عقل لكن متوّق

تقول مرميٍّ على الأرض من فوق
وإلا من السم الصقطرى مذوّق

يغمى على شوي واشويٍّ آفوق
واقول لاستيقظت والبال روّق

مدام لامعوّق ولاصايبه عوق
وراه يمشي مثل مشي المعوّق

اللى على حاله خطر من هل السوق
مفروض يمنع مايروح يتسوّق

لافي الغيداني - أقبل يحرك خطوة الرجل برفوق

أيظن أني لعبة بيديه
أنا لا أفكر في الرجوع إليه

اليوم عاد كأن شيئا لم يكن
وبراءة الأطفال في عينيه

ليقول لي  إني رفيقة دربه
وبأنني الحب الوحيد لديه

حمل الزهور إلي كيف أرده
وصباي مرسوم على شفتيه

ما عدت أذكر والحرائق في دمي
كيف التجأت أنا إلى زنديه

خبأت رأسي عنده وكأنني
طفل أعادوه إلى أبويه

سامحته وسألت عن أخباره
وبكيت ساعات على كتفيه

حتى فساتيني التي أهملتها
فرحت به رقصت على قدميه

وبدون أن أدري تركت له يدي
لتنام كالعصفور بين يديه

ونسيت حقدي كله في لحظة
من قال إني قد حقدت عليه

كم قلت إني غير راجعة له
ورجعت ما أحلى الرجوع إليه

محمد المقحم - نزار قباني | أيظن أني لعبة بيديه

مشاركة الشاعر عمر الودعاني في فقرة الموهبة ببرنامج المعلقة:

الليل ذا ليل لا بعده ولا قبله
‏أضفى ظلامه علي ببشته الضافي

‏الروح متهالكة و الكبد مندبلة
‏أداري الجفن خوفي يبين الخافي

خايلت غيم الشعور وزارني وبله
‏لين استظليت عنه في نحا قافي

أقدّر الشعر وأحاتيه وأطرب له 
‏من عاد لعبي وطيشي بالغ أهدافي 

‏طاردت حلمي مومّل وأترقب له 
‏يا عنك الأحلام ما توفي مع الوافي 

‏إن قام حظي لعب في حالي السبلة
‏حمّل على أكتافي اللي يكسر أكتافي 

‏مجدب مداده خلا ما يجذب الربلة
‏ويمد رمضا الثرى لا مرّه الحافي

يا عمر مانيب لا ضايع ولا أبله 
‏ما غير أجرّ الخطى وأحلامي خلافي 

‏الانسان لا صار عايش في ذرى نبله 
‏ما الله مخليه في صحو البشر غافي 

‏وأنتي يا ملفى الشعر والملح والقبلة
‏أعاتب الحور ولا المبسم الصافي 

‏من بعد سيك المقام وعوده وطبله 
‏أجر صوتي صبا من فوق مشرافي

آمال ليلى وقيس وعنتر وعبلة
‏راحت مثل ريش طير في طرف سافي 

‏ما دام ما فيه لا مشلح ولا دبلة
‏سمحت واللي مضى من طيشنا كافي 

‏نحرك ساحة حرم وشفاهك القبلة
‏لكني آثرت دين آبائي وأسلافي

عمر الودعاني | الليل ذا ليل لا بعده ولا قبله

العنود اللي مساء البارح وانا سيد سهرها
اقبلت مثل البياض وودعت مثل بردية

المساء ضج بسوالف عطرها واشعل سفرها
والعروق اللي روت مسيرها خضر وندية

مانشدت اخت المهاه ليامتى حزة خدرها
حد علمي يوم امد لجيدها شرهة ايدية

عقدها المغرور تاة بعطرها ولا نحرها
ساعة اشرة علية وساعة يشرة علية

كل مالدت على البال والعقد يخزرها
قلت انا ماني خوي عادتة ينسى خوية

ليتها تدري وعقد الماس لويدري عذرها
اشهدان الجمرة اللي في الحشاء منى وفية

من سرت يمي وانا مالي خيار الا قدرها
كنها كل السنين المقبلة والأولية

من غدت همي وانا مالي ديار الا ديرها
جالها بين الظلوع الظامية روحة وجية

جادل كل الدروب المعشبة تنبت بثرها
جت تبي جرح وقصيد وخلت الثنتن لية

من يحدثني حديث الثلج للجمر بثغرها
والله اني كنت ناوي لي بهاك الجمر نية

من نشدهاك الوساع الخرس عن دنياحورها
وش جمع سحر الغموض بسودهاوالنرجسية

الوكاد اني بشط الكحل غنيت لبحرها
ماحلا هوسة هدبها والمساء والسامرية

من يعلم مستريح الريح عن فوضى شعرها
الحرير اللي كسى هاك المتون العسجدية

علموة ان مازح الغرى ونشد عن قمرها
لايخاف ان شاف ظلما وشاف الشمس حية

مساعد الرشيدي

مساعد الرشيدي | العنود الي مساء البارح وانا سيد سهرها

ذائقة مميزة بواسطة حساب غير أحترافي

ستة عشر

Popular tracks