وێرسی ١ :

دا زار
بدرکێنە شار چۆنە بێ من؟
بترەکێنە گەردن بە گڕ
سەر و بەندی سەر هەڵدانە
سەرهەڵدانی بێ بنی سەردەم چۆنە بێ من؟
چەندە هێمن
کۆڵبەری ئەوینی پڕ بە تینم 
ساحەب باری پڕ بە دڵ گەشینم چۆنە بێ من؟
چۆن دێنن
کڕنۆش لە دوای لەش لە گۆڕ کەوت 
دێنە دەر لە پاشی نەتەوەت و دێنە دەر لە بنەوەت 
چەندە هێدی
لەبەر بەستەڵەکی پڕوپاگاندای بەر دمم نەمردم
هەر دەمێک لەبەر بەژنم وەڕین و بەر دمم نەگرتن 
ئەگەر بێت و گرمەی دەنگم ڕێ بەدەر نەبێ لە ڕەپ و
گەرمی قەڵەمم بشڵەژینێ بنەمای مێشکت بە شەق 
چەندە حەقە؟
دەق بە دەقی چەندە ڕەقە؟
بۆ دوو دەقە شل بە ورد بە
ئەوە گرمە پێی شاسواری کوردە 
یانی فەرهاد
حەزرەتێکی پڕ لە باوەڕ
زمان پارێزی جەماوەر
پڕ بە باوەش
چەندەت کوردی لە زار جوانە داک
چەندە پاکت بە خاک داوە خاک
ژیان بۆ من یانی ئازادی لە بناری شاران بە هەڵمەتی چەک چیا هەڤاڵ کاک.


وێرسی ٢ :

بەله باریکەی لە مەلان بملاوێنەوە
گڕووم گرتووە بمحاوێنەوە
کەوتومە هەست کەوتوومە جێی خۆم
هەوری نەوساڵم بمبارێنەوە
جا هەرچی برینە بە ملمەوە
دەستەو یەخە نەبم لەگەڵ گەلی خوێڕی
خوێنی بە پلمەوە کەر کوڕی کە خۆت بە شێر دەبینی 
توڵە کتکە کوێری بێ کلکی بە کردەوە 
لێم لادە باش؟
ڕەشنووسم قەڵغانە قەڵەمم قامچی
پەڕتووکم پەلامارە لەبەری بە خەم چی
ڕێی دوورم بڕی
کەسک و سوورم سڕی بوو بە ئاڵا
لە دزەی دوژمن کە دەر دەچووم دەرو ژوورم دڕی بوو بە باڵا
هەمووی خاوێن خاوێن
لە بناری لاوێن داوێن
دەی لە بەهاری بهاوێن داوێن.


وێرسی ٣ :

نەرمە نەرمە هێدی هێدی ورد ورد
هەست جووت بوو دەست ڕووت بوو
پێ ڵەگەڵ چیا
بەندی لەپ لە بەندی پەلەپیتکەی کەڵاشی ڕووس بوو
داماننا
کاتێک ئەو دەدۆڕا من لەگەڵی نەدۆڕام
کاتێک ئەو دەگۆڕا من لەگەڵی نەگۆڕام 
بووم بە ماتریالیسم
بووم بە دژی ئامپریال
دژی ئاپاڕتایدی عەرەب و تورک و فارسی بێ خیاڵ
سۆسیالی بێ ڕیا
بوو بە ناسنامە
گوو بە ناسنامە
لەسەر یاسا بازدانم ئاسانە
ها زانا
لەسەر دەستم هەستە
ئەگەر بۆ ئازادی بازاڕ گەرمە ڕاسانە
جا 
پیرەڵۆکی خوێنە ژینم
چەند  قسە بۆ وەتەنم
چەند قسە لە زاری زەوی بۆ دەراوسێکانی گوڵە گەنم
دەم تەمەنی گرتم
تەم دەمەنی بردم
کەم کەمەری ورد نەکردم
دوژمنی چوار دەور و بەرم
تۆبە کاری بەد نەزەرم
خۆ لە من مەدە
دەراوی ڕوونی من هەرێمی زۆنگ و زەلە
ئاشەوانی باشە حاکم
چونکە کوردم
تەراتێنی سەر و لاق و دەست و پەلە
جا پێم بڵێ بزانم 
ببم بە چی؟
ببم بە چی؟
ببم بە قاڕن و قەڵاتی برسی؟
ببم بە شێخ سەعیدی پیران سەید ڕەزای دەرسیم؟ ها؟
ببم بە کەرکووک؟
بببم بە ئارەقی ڕەشی ڕەقی جەبینی باباگووڕگووڕ؟
ها ببم بە عەفرین؟ 
ئاخ بۆ عەفرین...
ئاخ بۆ کۆڵەواری دوژمنانی بەر دەمت 
ئاخ بۆ بەرخۆدانی سەردەمت
عەفرین ژ رۆژهەڵێ ژی خورتێ ئاخێ تە مە 
برسیوا ئازادی
نها لە رێ تەمە
جا پێم بڵێ با بزانم دیسان ببم بە چی؟
ببم بە دەرد؟
ببم بە دەرد...


وێرسی ٤ :

ها هەوە ناوچەی ئازادی
گەڕەکی شێرە پیاوەکان
چوارەمین شەقامی چوارەمین ستێرکی بێ ئاسمان
«ڕۆژ» هەڵات بە سام
خوێن ڕابەرە
خوێن ڕا درا
پێم بڵێ پێت وایە پێت قورسە لە سەر زەوی؟ یان پێت قورسە پێی وەسەر کەوی؟
یان نا پێت قورسە
ئەو کەلەمانە؟
کە لە مانا دا چەکی بەندی لە کەلەکەمانە
مانی هەڵە مان لە گەلەکەمانە
دۆڕاندمان داماننا چ نێ
دوای دۆڕان پەلەمانە
لەو دەور و بەرانە
سەر هەڵ دەدەینەوە لەو کێڵگەیە لەو گڵە وێرانە 
لەو دەردە بێ ئامانە لەو دەردە بێ دەرمانە

ڕۆڵەی کورد لەگەڵم بە...
لەگەڵم تا واتەی ئازادی
لەگەڵم ساکار بدوێ
لەیگەڕێ با شار بنوێ
باشارمان ناکەن لەیگەڕێ با جاش بمرێ
ئەو چوار پەلە پانە
بە قەولی کاکم زۆرداری زەمانە
چ نین دێن دەڕۆن ئەو بێ کەلکانە
ئازادی لە پەنامانە
لە پەنامانە...

ئاوترۆ :

قڕمان دەکەن؟
قوڕتان بەسەر
دوای مردنیش لێ ناگەڕێین نیشتمانمان بکەن بە ماڵ
لێ ناگەڕێین گۆشتمان بخۆن وەک قەل و داڵ
(دەنگ و شێعری عەبدوڵڵا پەشێو)

smko hamzeh

Popular tracks