*बगर पल्ट्यो खोली*
----------------–––
बगर पल्ट्यो खोली
सुख्खा पल्ट्यो हिउँचुली 
तर, साहुले बेच्यो बिजुली !

खानी र खोला बाँडेर
वन खायौ पूरै फाँडेर
ज्यामीलाई छलेर, डाँडेर !
¬¬
चौतारी, पोखरी मिचेर
ढुङ्गो र माटै बेचेर
कहाँ जान्छौ मान्छे किचेर ?

मनपरीमाथि मनपरी झन्
हैजामा पनि ‘फैदा’मै छन् 
यी ओरलोकी हुन् कि पोरलोकीजन् !

को हो धरती बेचुवा
बोल न मुआ, बोल न बुवा
हामी त ह्वैनौं बँधुवा !
–––––––––––––––––
(२०७८ जेठ ३१)

स्वरः सङ्गीत र अन्जान
शब्द/लयः सङ्गीत

बगर पल्ट्यो खोली

दुःख गैरो...
–विनोदविक्रम केसी
---
डाह हुन्छ, नदी रुन्छ, खुनको आँशु झारेर
मन पोल्छ, रूख बोल्छ, आराको चोट नारेर 
बाढी–पैरो, दुःख गैरो, हामीलाई वज्रपात-2
आफू नाच्ने, आफू हाँस्ने, को हो त्यो धर्ती मारेर -2

ढुंगे छाती, बानी घाती, लुटेराले अति ग-यो 
पालुवा खायो, बालुवा खायो, गर्नुसम्म खती ग-यो 
डोजर गुड्यो, कता मुड्यो, हरियो डाँडो खारेर
आफू नाच्ने, आफू हाँस्ने, को हो त्यो धर्ती मारेर -2

ट्याम छैन, याम छैन, ठेगान् छैन पानी पर्ने 
वाता–वरण, भयो हरण, दुन्याँलाई हानि गर्ने 
यति विधि, क्रूर थिति, खान्छ याँ’ मान्छे दारेर  
आफू नाच्ने, आफू हाँस्ने, को हो त्यो धर्ती मारेर -2

दुःख गैरो

रेलबाइ टेसन छेउछाउ... (भरिया गीत)
..........

हजारौं वर्ष लामो यो नाम्लो
लाखौं वर्ष नाघेको यो थाप्लो
त्यो भन्दा नि पुरानो एउटा भारी–
यो पिर्थिवी !
बस बिसाउनी छेउछाउ
छ कि बेथा बिसाउने ठाउँ


निधारै जेठो हो कि पसिना यी धारा
यो पिठिम पुरानो कि यो भारी सहारा
नरोऊ न भन्छु, सउर झन् रुन्छ चम्धारा
रेलबाइ टेसन छेउछाउ
छ कि दुःख लुकाउने ठाउँ


जोर गोडा तीँ–देखिन्, जाँ–देखिन् यो बाटो
दोबाटो बोल्छ सधैं– जाऊ सखी मूलबाटो
फेर परोस् बाटै बरु, नपरोस् मनफाटो
जहाज गिरान छेउछाउ
छ कि जुनी कटाउने ठाउँ

__________________
(२०७०–२०७७ भदौ १५)
__________________
गीत: रेलबाइ टेसन छेउछाउ
शब्द/लय: सङ्गीत
तालवाद्यः विश्व र वन्दना

रेलबाइ टेसन छेउछाउ

(प्रतिरोध सांस्कृतिक यात्राका लागि सुसेला संगीत समूहले गरिरहेको रिहर्सलबाट रफ रेकर्ड)

हामी कोही होइनौं

म त बाटैमा छु
---
जुगौं भो, आँसु यो अल्झियो आँखैमा
रुमाल रोप्यौ कि रोपेनौ पाखैमा
साथी हो, म त बाटैमा छु !

देश वारि, देश पारि
थिति उस्ता उस्तै हो
दुःखै साथी, दिनै राति
यस्तो कहिलेसम्म हो

पारिजाऊँला कि डुबिजाऊँला,
जाम बैदाम तालैमा
बन्दुक रोप्यौ कि 
पारि-वन-पालेमा
साथी हो, म त बाटैमा छु !

हिँडिसक्यौं, अब हिँड्नेछौं
हिँडुँला खुन हुन्जेल
भेट हुँला अनि गाउँला
यो सउरै थर्कुन्जेल !

नाचुँला भैंछोड–भैं झामरे र चुड्कामा
मादल रोपिदेऊ स्वाँराका सुर्कामा
साथी हो, म त बाटैमा छु !

जुगौं भो, आँसु यो अल्झियो आँखैमा
रुमाल रोप्यौ कि रोपेनौ पाखैमा
साथी हो, म त बाटैमा छु !
---
(सुसेला सङ्गीत समूहको शनिबारे जमघटबाट, मोबाइल रफ रेकर्डिङ २०७८ असोज २३)

साथी हो, म त बाटैमा छु !

विश्वप्रसिद्ध गायक पल रब्सनको ‘द ओल्ड म्यान रिभर’ र भारतीय गायक भूपेन हजारिकाको ‘बूढा लुइत’ गीतको नेपाली संस्करण– ओ, बागमती खोली !

ओ, बागमती खोली !

सुबेलाले सुत्ने बेलामा गुनगुनाएको गीत

खरायोको फोन आयो

सडक बढार्ने केटी 
---------------
सडक बढार्ने केटी साह्रै राम्री थिई 
सडक बढार्ने केटी साँच्चै राम्री थिई 
शहर सफा सुग्घर राख्थी 
भाइ पढाउँथी, आमा पाल्थी 
साँच्चै राम्री थिई !

मान्छे साह्रै फोहोरी छन् भन्ने गर्थी सधैँ 
संसार सफा राख्ने उसकै जिम्मा छझैँ 
मैलो नियत देखेपछि रिसले आगो बाल्थी 
भाइ पढाउँथी, आमा पाल्थी 
साँच्चै राम्री थिई !  

जाडो गर्मी, सफाइकर्मी खट्थी चोखो काममा 
च्वाफिले गीत गाउँथ्यो आशमईको नाममा 
कसैसँग दब्दिनथी, मान्छे अलग खालकी 
भाइ पढाउँथी, आमा पाल्थी
साँच्चै राम्री थिई !

अचेल हुँदो देखिन्न त्यो, खाडी पो पसी कि 
दुनियाँ घाती, हदै नजाती, चंगुलमा फसी कि 
दुःख टिप्थी, दुःख बढार्थी, कन्टेनरमा हाल्थी 
भाइ पढाउँथी, आमा पाल्थी 
साँच्चै राम्री थिई ! 
--------
गीत : विनोदविक्रम केसी
लय/स्वर : सङ्गीत
हारमोनियम : विश्व

बगर पल्ट्यो खोली

Sangeet

Recent comments

Bhumiraj

Rk Romas

मुसाफिर

Related tracks