Saltillo - I Hate You

أيا تحبني؟ حبني بهبالي و دلالي و ببكايا و غنايا.
حبني ما قتلكش هيا نعرسوا. شبيك خايف؟ تي حبني بركة. ما تعرش كيفاش تحبني؟ لا لا ما تحبنيش كيف حب فروخ البوماضة صبلي لايت و ابعثلي فلوس و اصرف عليا. و ما تحبنيش كي روميو و جوليات كان الهم و المآسي. نقُلك كيفاه تحبني؟
حبني و خاف عليا، اي اي خاف عليا، خاف عليا مالنسمة و الهوا و خاف عليا مالعباد، مش قتلك راني نخاف مالناس؟ خاف عليا من جهل العباد و تخلفهم، ماهم قالو الجهل ولا مرض معدي...
خاف عليا من كلمة ايه و علمني ما نقول كان لا، لا للجهل، لا للظلم، لا لقمع صوتي و لا لتسكير الافام و لا لذبحان الكلمة و شنقانها.
حبني و غار عليا، اي غار عليا، ما قالولكش راني نحب الراجل المغيار؟ اي نحبك تغار عليا من الأرض إلي نمشي علاها و الهوا إلي نتنفسو. غار عليا مالخزرة متاع طفل متعدي و من صحابي و من أحبابي. غار من لماتي و خرجاتي. غار من كسكروت كفتاجي نتبننو. غار من مكتبتي و قهوتي و كتبتي و ورقتي و ستيلويا. غار من موسيقتي و فني... غار مني أنا خاتر أنا نحب أنا، غار مني و عليا.
أيا تحبني و تحكيلي؟
أي أحكيلي، ما تعرش شتحكيلي؟ لا ما تحكيليش عالعباد، ما تحكيليش على حكايات حب المسلسلات و الأفلام و الكتب، أحكيلي علينا و على حكاياتنا، أحكيلي على ظحكتي و تبسيمتي و دمعتي و تنهيدتي. و زيد أحكيلي على آخر مانيف خرجت فيها و كيفاه صحت و شاح ريقك و ساقيك تعبو و انت ماكش حاسس بالتعب، يهون التعب لمصلحة البلاد. و روحلي تاعب مدڨدڨ و أقعد أحكيلي على الثورة و الحكومة و السياسة. و أحكيلي على البلاد و أنا نسمع و نفرح و نغار مالبلاد و حبك لها.
حبني و احكيلي على  عليسة و حنبعل و الكاهنة و عقبة و خالد ابن الوليد و ماجلان. و احكيلي على لينين و ستالين و ماوتسيتونڨ و ڨيفارا
حبني و أقرالي، اي أقرالي و أقراني. أقرالي هيڨل و ماركس و جون پول سارتر و سيمون دي بوڢوار و زيد أقرالي شارلز ديكنز و شيكاسپير و موليار و شاتو بريان و موساي و بالزاك و فلوبار و بعد ما نفدو زيد أقرالي، أقرالي محمود درويش و غسان كنفاني و الماغوط و نجيب محفوظ و المنفلوطي و طه حسين و توفيق الحكيم... فديت؟ مالا أقرالي المتنبي و بديع الزمان الهمذاني و المعري. و زيد أقراني...
أيا تحبني؟
حبني و ثور ليا و ثور عليا. حبني و اسقيني الدنيا علم و ثقافة و تاريخ. حبني و حببني في الدنيا و علمني. اي نعم علمني: علمني كيفاش نعيش و نحب و نتحب و نخمم و نحلم و نخدم و نتعب و علمني كيفاه نموت و ما نموتش. حبني و علمني كيفاش نولي خالدة، نولي كي أفروديت والا أثينا...
أيا نجي نحبك؟

أيا تحبني؟

https://www.facebook.com/notes/scarlet-eve/%D8%A3%D9%8A%D8%A7-%D8%AA%D8%AD%D8%A8%D9%86%D9%8A/221295261328565

أيا تحبني؟ version 2

https://www.facebook.com/notes/scarlet-eve/%D8%B7%D8%A7%D9%84%D8%A8-%D8%A8%D9%83%D9%84%D9%8A%D8%A9-%D8%A7%D9%84%D8%B7%D8%A8/217577768366981

souha jaouadi

Popular tracks