Music for Transit (ಟ್ರಾನ್ಸಿಟ್)

ಕಾಲದ ಕಾರ್ನಾಡ

ನಿಮ್ಮೊಳಗೊಂದು ಗೋಪುರ-
ಸೂಕ್ತವೋ, ವಿಕ್ಷಿಪ್ತವೋ
ಮಣ್ಣಿನದೋ, ಕಲ್ಲಿನದೋ
ತೂಫಾನಿಗಂತೂ ಅಲುಗಲಿಲ್ಲ.
ಅದರೊಳಗಿಂದ ಹುಟ್ಟಿ ಬಂದ
ಅಂಕದ ಕರಿಪರದೆಯ ಹಿಂದೆ ಕುದಿಯುವ
ಪಾತ್ರಗಳ ನೆರಳಿನ ಹುರುಳೂ ಕೂಡ
"ನಮ್ಮ ನೆಲದ ಮಣ್ಣಲ್ಲ, ನಮ್ಮ ಕೋಟೆಯ ಕಲ್ಲಲ್ಲ, ಬಿಳಿಯ ದಂತದ್ದೇ ಸಂದೇಹವಿಲ್ಲ!"
ಎಂದು ಕೂಗಿ ಕಾಡಿದವರೇ ಬಹುಪಾಲು;
ಬಹುಪಾಲರಿಗೂ ನಿಮ್ಮ
ಪ್ರತಿ ಪ್ರತಿಕೃತಿ ಕೃತಿ ಆಕೃತಿಯಲ್ಲೂ
ಅಶಾಂತ ಪ್ರಶ್ನೆಗಳು
ಯಯಾತಿಯಿಂದ ರಾಕ್ಷಸ-ತಂಗಡಿಯವರೆಗೂ.

ಹಂತಕರ ಕಾಯ್ವ ಸಂತರ ಮೇಲೆ
ಕಿಡಿಕಾರುತ್ತಾ ಹೊರಬಂದು ಬೀದಿಗಿಳಿದು
ನಳಿಗೆಯ ಉಸಿರಾಟದಲ್ಲೇ ಗುರುಗುಟ್ಟಿದಾಗ
ಕಂಗೆಟ್ಟು ಬಹುಪಾಲರು ಉರಿಗಣ್ಣು ಬಿಟ್ಟು ಹೊಂಚಿದರು.
ನಿಮ್ಮೆದೆಗೆ ಹಾರಲು ಕಾದಿದ್ದ, ಹಾರದೇ ಉಳಿದ ಗುಂಡೀಗ
ಸಾವಿರ ಹೊಸ ಎದೆಗಳತ್ತ ನುಗ್ಗಲು ಕಾದಿವೆ.

ಕಾಯಬೇಕು
ನಿಮ್ಮ ನೆಲದ ಮಣ್ಣು
ನಿಮ್ಮ ಕೋಟೆಯ ಕಲ್ಲು
ಹಾಗೂ
ನಿಮ್ಮ ಪುರಾಣದ ಸೊಲ್ಲು.

Music for Transit (ಟ್ರಾನ್ಸಿಟ್)

Suda Narayana

Related tracks