شوية تشجيع لصاحبتي الي  اكتشفت صوتها قبل قليل من الوقت. 
رحمة نحبك برشا يا طفلة و نحبك تواصل  , صحيييييت.
:D

Stay(Rihanna)-Cover by Rahma Dridi

قعدت على شط البحر
 نسمع في الموج يحادث فيّا
 نشكيلو في همّي و هو يسمع فيّا
 قاعدة على حجرة
نتفكر في أيامات و ذكريات تعدّات عليّا
 و نلوم على الدّنيا لي غدرت بيّا
مخّي شارد و هايم ..
نسمع في الموج يحاكي فيّا 
نشكيلو في همّي و هو يسمع فيّا 
 
في لحظة تفكّرت حاجة عزيزة عليّا 
هزّتها الموجة و خلّات بلاصة كبيرة عليّا
 فقت بروحي نبكي و دموع سخونة نازلة من عينيّا 
اي... تفكّرتو ... 
تفكّرت "سْعيد"
الرّاجل لي حبني و خاف عليّا  
راجل زوّالي ظلموه لعباد ، لا عندو لا خدمة لا ڨدمة
 عندو كان قلب كان قبل  يحنّ عليّا 
"سْعيد" حرق !
  و حرق قلبي معاه 
و خلّى كبدت أمّو مشويّة
 "  لا ترقد لا ليل لا نهار ما تسمع منها كان " نحب وليدي يرجع ليّا
"سْعيد" مشا في طريق ظلام
 "  و آخر كلمة قالها لأمّو :" يا ميمتي تو نرجع فيسع,منحبّكش تبكي عليّا
 .. لكن "سْعيد" هجر و خلّا وراه دموع منسيّة
لا كنت حاشتي لا بذهب و لا بفلوس 
قلب راجل يحبّني يكفيني و بالنّسبة ليّا  اغلى من مال الدّنيا و الكنوز
 
 قعدت على شط البحر نسمع في الموج يناجي فيّا  
و النّسمة قربت منّي تواسي فيّا
 تذكّرت ضحكت سْعيد و كلامو 
حتّى نزلت دموع غزيرة من عينيّا 
قلبي مقهور يلوم الف مرّة على الدّنيا لي غرّت بيه و بيّا
 
 حاذيت البحر و حطيط يدّي على خدّي  
نسمع في الموج يكّلم فيّا 
انا نحكيلو في همّي و هو يسمع فيّا 
نتسائل...
علاش على جال المال نرميو رواحنا في البحر ياكلنا الحوت ؟
 و علاش لي ضيق بيه الحال في ها الدّنيا مصيرو الموت ؟ 


همس الموج - سيرين رحومة

" لنـــــــا الفن حتّى لا تــــــميتنا الحــقيـــقـــــــة"  

Sereen Rhuma سيرين رحومة

Popular tracks