DEMO & UNEDITED VERSION OF WOKAWT. This is an original song written and composed by the members of Tanghalang Bayan ng Kabataan sa Baguio. Do not out link, this is just a demo. A more clear version will be uploaded soon.

"WOKAWT" - DEMO

Launching Date: Ika-27 ng Enero taong 2005.
Titik at Musika ni: Peachy de Vera

Koro: 
Bayan, bayan ko
Gumising ka
ang kalayaa'y mo'y inagaw na.
Taong bayan,
kumilos ka at sama-sama sa pag-alsa

Walang magbubulag-bulagan
Walang magbibingi-bingihan
Sa problema ng bayan, pagkilos ang kailangan
Sa daming pinagsasamantalahan
Sa 'ting lipunan, walang tanging paraan kundi
Pag-aklas ng sambayanan.

Repeat Koro

Mag-aalab ang paglaban
Mula sa kanayunan patungong kalunsuran,
Ng nagkaisang mamamayan.
Lulupigin ang kaaway,
Dudurugin ang mapang-aping hanay
Ng ganid na dayuhan at mga taksil sa bayan

Repeat Koro

Mula sa pangunahing puwersa
Hanggang sa pambansang burgesya,
Magluluwal ng paglaya
Ang bayang nagdurusa.
Angkinin ang tagumpay,
Kakamtin ang pagkakapantay-pantay
Habang buhay, sa patnubay
ng Dakilang Gabay

Repeat Koro twice

Bayan Bayan Ko

Launching Date: Ika-27 ng Enero taong 2005.
Titik ni: Angelo Guison
Musika ni: Jayvee Robias

Tunog, indayog
Titik at guhit ng pinaglilingkurang masa
Mula sa masa, Tungo sa masa
Ang ating tanghalan

I.
Binuklod ng pagmamahal sa masa
Pinag-isa ng mithiing magsilbi
Pinanday ng panahon at galing
Alay sa karamihang api.

II.
Tunog at tono ay iaalay ko
Titik at pluma ng pagbabago
Sayaw at galaw kulay at ilaw
Patuloy na magtatanghal.

Koro:
Pagtatanghal na nagmula sa masa
Tutungo rin sa kanila
Puso't isipin ng tanghalan
Ang laging panghahawakan
Sining para sa masa

Repeat first two lines of I
Repeat II
Repeat Koro

Samahan man ay 'di matatawaran
Higit sa kaibigan, turinga'y magkasama
Ang tuwa, luha, galit at pangamba
Pinagsasaluhan para sa kalayaan.

Magsilbi, magmulat at kumilos
Sining sa ganap na kalayaan
Sa malayang kinabukasan
Aming handog, sining ng masa

Repeat II
Repeat Koro

Puso't isipan ng tanghalan
Ang laging panghahawakan
Sining para sa masa.

Sining para sa masa...

Tanghalan

Launching Date: Ika-27 ng Enero taong 2005.
Titik at Musika ni: Bong Ramilo

Luray na ang sulat na ito
Sa kabubuklat-tiklop ko
At inip na ako
Sa kahihintay
Sa trak na pauwi sa amin.

Lugkot at galit ba ang dama ko
O nanghihinayang ba ako?
Isang taon na lang
At sana'y tapos na
May iuuwi na'ng diploma.

Kahapo'y dumating ang sulat ni Ama,
"Anak," sabi n'ya, "ika'y umuwi na."
"Ikinalulungkot ko, walang padala
'Pagkat ang ani'y kulang pa sa upa."

"At 'di na natin kayang bayaran
(ang) dagdag na singil ng eskwelahan,
Ako'y tulungang magsaka na lang."

Ay, sa wakas,
dumating na.
Sana'y may upuang matira.
Maraming naiinip sa kahihintay
sa trak na pauwi sa amin.

Pauwi Sa Amin

Launching Date: Ika-27 ng Enero taong 2005.
Titik ni: Bernadette Neri
Musika ni*: Bong Ramilo

Ama ng kasaysayan
Ina naming lumikha
Masdan ang mga anak ninyong pinagpala.

Mga esksperto sa paggawa'y sumisilong sa dampa
Ang mga magsasaka'y walang maangking lupa
Mga katutubo'y ninakawan ng kultura
Ang mga kababaiha'y kinulong sa pagluha,

Ama ng kasaysayan
Ina naming lumikha
Kami ang mga dukhang pinagpala
Wala ng kapayapaan sa lupa at sumibol na yaring kaguluhan

Hahayaan niyo ba kaming manghina sa katahimikan
O pagkakasala ba ang ngayo'y kami'y lumalaban 
(Ulitin nang apat na beses)

Ama ng kasaysayan
Ina naming lumikha
Gabayan niyo po kaming mga dukhang pinagpala
Sa paglikha ng aming kasaysayan
Ang muling pag-angkin sa aming paglaya
At kalayaan

Panalangin ng mga Dukhang Pinagpala (Sa Kamay ng mga Kaaway*)

Launching Date: Ika-27 ng Enero taong 2005.
Titik at Musika nina: Blou-Jean Melegrito at TABAK-Lupon ng Musika

I.
Hampas ng batuta, gapos ng tanikala
Pamahalaang manhid
Mamamayan hiyaw ayimpit
Pagsunod ng tuta, sa among Imperyalista
Pakikibaka'y paigtingin
Lakas ay pagsama-samahin

Koro: 
Tayo na, mga kasama
Magkaisa sa pakikibaka
Lumaban na

Repeat I
Repeat Koro

Bridge:
Lumabas sa kalsada
Hinaing ay ihiyaw na
Bawiin ang kapangyarihan
Sa mapanupil na pamahalaan
Makibaka, magbarikada
Patungo sa demokrasya

Ulitin ang Koro

Koro II.
Tayo na, mga kasama
Makikibaka, magbarikada
Lumaban na (Repeat thrice)
Lumaban na.

Pakikibaka '70

Launching Date: Ika-27 ng Enero taong 2005.
Titik at Musika ni: Bong Ramilo

Anak:
Magandang umaga, Ka Ramon
Madilim pa'y pabukid ka na
Ikaw ba'y sapat na ang tulog
Sa magdamag na maginaw,
Ka Ramon...

Ka Ramon:
Magandang umaga rin, anak
Pagod ma'y kailangang bumangon
Ng maaga't lupa'y naghihintay
At sabik sa araro't kalabaw, ay anak.

Koro 1.
Ang pawis at hamog ay nagsasama
Sa pagbubungkal ng lupang 'di kanya
At sa tag-ani'y babahagian siya
Kahit na katiting, gagawan ng paraan na magkasya.

Anak:
Magandang tanghali, Ka Ramon
Kay init na'y patuloy ka pa
Ikaw ba'y sapat nang pagkabusog
Sa ilang subo ng bahaw, Ka Ramon

Ka Ramon:
Magandang tanghali rin, anak.
Gutom ma'y kailangang umahon
Sa pahinga't lupa ay naghihintay ng dilig
At sa ulan ay uhaw, ay anak.

Koro 2.
Ang pawis at luha ay nagsasama
sa pagbubungkal ng lupang 'di kanya.
Sa kanyang parte hindi na makaasa
Tiyak na kulang sa pambayad pa lamang ng utang.

Anak:
Magandang gabi, Ka Ramon
Padilim na'y nasa bukid ka pa
Ikaw ba'y 'di uuwi at paubos
Na ngayon ang ilaw, Ka Ramon

Ka Ramon:
Magandang gabi sa iyo, anak.
Hapo ma'y kailangang tumuon
Sa araro't lupa ay mahihintay
Ng  punla sa susunod na araw, ay anak.

Koro 3.
Ang pawis at dugo ay nagsasama
Sa pagbubungkal ng lupang 'di kanya
Bunga ng lakas ay inaagaw ng iba

Coda.
Ba't 'di ka bumangon, umahon sa hirap
Ba't 'di mo ituon 
Ang lakas sa paglikha
ng malayang bukas, Ka Ramon

Ka Ramon

Launching Date: Ika-27 ng Enero taong 2005.
Titik at Musika ni: Bong Ramilo


Hinihintay ang pagtatapos
Ng isa pang araw ng paggawa
Nagmamadali sa pag-uwi
Dala ang gamot ng panganay

Iduduyan niya hanggang mahimbing
Tuwing uubo ay hahaplusin
Ihehele niya 'pag magigising
Nagtataka 'di gumagaling

Hinihintay umiksi ang pila
Ng nag-aabang sa ospital
Nagmamadali sa pag-uwi
Walang pambayad kaya itinaboy


Iduduyan niya hanggang mahimbing
Tuwing uubo ay hahaplusin
Ihehele niya 'pag magigising
Nagtataka 'di gumagaling

Hinihintay dumaan ang oras
Nag-aalala sa naiwang anak
Nagmamadali sa pag-uwi
Kahit 'di pa tapos ang paggawa

Maduduyan pa ba hanggang mahimbing?
Mahahaplos pa ba niya tuwing uubuhin?
Mahehele pa ba 'pag nagigising?
Magtataka pa ba?

Hihintay masaid ang luha
Ang panganay, ayaw ng umubo.

Hinihintay

Launching Date: Ika-27 ng Enero taong 2005.
Titik at Musika ni: Bong Ramilo

Hanap ko'y ligaya't kaunting tahimik
Sa luwag at sagana kay sabik
Pagod na ako sa daang matinik
Pagod na ako sa kahihibik

Hanap ko'y pirasong lupain sa bundol
Tanaw sa malayo ay look
Pagod na ako sa daang magabok
Pagod na ako sa mga pagsubok

Sa init ng digma ako'y nanlamig
Nanlumo ang diwa't nanlambot ang bisig
Tila kay daling naiwan na lang ang pinagsimulan

Pinagmumultuhan ng alaala ng kinabukasan
Saan man mapunta'y 'di matakasan
Ang taghoy ng bayan na kalayaan

Hanap ko'y inahon sa gitna ng unos
Na liwanag sa dilim ay lumagos
Pagod na sa kahihinto sa daan
Pagod na ako sa kaalangan

Hanap ko'y lakas at kaunting tahimik
na dati'y tibay ng loob ay dumating
Pagod man ako'y 'di mananahimik
Pagod man ako'y muling iimik

Hanap ko sa daan patungong kalayaan
Na bawat hakbang ko'y mabagwisan

Hanap Ko (Pagod)

Launching Date: Ika-27 ng Enero taong 2005.
Titik at Musika ni: Toto Colongon

I. 

Sabi nila, h'wag masanay sa pagmamahal
Pagkat ikaw ay masasaktan lang
Minsan tuloy nagugulhan at 'di maintindihan
Kung pa'no nga ba'ng magmahal

II.

Akala ko ay sapat na'ng nag-iisa
Nakakamit ang luho't malaya
Ngunit nagising, daigdig ko'y nangungulila
Ganito pala ang mag-isa

Koro:

Pag-ibig na inaasam-asam dumating na sana
Umaasang titibok-tibok din itong aking puso
Sino man'g dumating upang maging kasuyo
Paglalaanan ng pag-ibig ko.

Repeat II
Repeat Koro except last line

Paglalaanan ng pag-ibig ko...

Repeat Koro

Awit ni Concepcion

Launching Date: Ika-27 ng Enero taong 2005.
Titik at Musika ni Bong Ramilo

Buhay na nagisnan
Puno ng ginhawa
Buhay na kumupkop
'Di yata makakayang iwan

Buhay na kay hirap
Bagay na 'di gagap
Bukas o nakaraan
Saan nga ba ang patutunguhan

Naguguluhan na ako ngayon
Naghihintay na sila roon

Koro:
May panahong magduda't magtanong
Ngayon ay panahon ng pagharap at pagsulong
Patatanong ay huwag lubayan
Tunggalian ay walang katapusan

Aking mga mata
Malinaw ang nakita
Luha ng kapatid
Dusa na 'di napapatid

Diwa ay natahos
Humayo at kumilos
Tawag ng pangangailang
'Di na matatalikuran

At ang bisig ko'y handa na ngayon
At makakayang iwan ang noon

Repeat Koro

Counterpoint: 
May buhay na sa baya'y nilaan
Kalayaan ay bigyan ng daan
Tanging hangad ko'y mulat na isipan
Dito sa ating kinagisnang
bayan...

Awit Ng Petiburges (May Panahon)

Launching Date: ika-27 ng Enero taong 2005
Titik at Musika nina Jayvee Robias, Angelo Guison at Blou-Jean Melegrito
Areglo nina Hanna Krishna Callora at John Voltaire Dalangin

Pawis at dugong inalay sa paggawa
Sapat na sahod hindi makamtan
Lupa ng magsasaka'y hindi naman kanya
Isulong tunay na agraryong reporma
Katutubo'y ninakawan ng kultura
Kababaiha'y gapos ng tanikala

Koro:
Makibaka
Lumaban at magkapit bisig
Ngayong panahon ng ligalig
Kabataan
Paigtingin ang pagkakaisa
Mararating din natin ang paglaya

Musmos na kaisipa'y may bahid ng banyaga
Husay at talino, pananamantala
Mamulat ka, kumilos ka
Buhay mo'y ialay sa pakikibaka

Repeat Koro

Makibaka
Lumaban at magkapit bisig
Mararating din natin ang paglaya

Hanggang sa malayang bukas

Himig ng Alyansa

Patuloy na nagsusulong ng sining na mula, tungo at para sa masa.

Tanghalang Bayan ng Kabataan sa Baguio

Popular tracks