Hii leo jaridani tunaangazia siku ya kimataifa ya makazi, na simulizi ya wakimbizi wa Armania kutoka Karabakh. Makala tunakupeleka nchini Tanzania na mashinani nchini Kenya, kulikoni

1.	Mipango ya jamii kudhibiti taka katika maeneo yao inaunga mkono uundaji wa mzunguko wa uchumi, anasema Katibu Mkuu wa Umoja wa Mataifa Antonio Guterres katika ujumbe wake mahususi kwa ajili ya Siku ya leo ya Kimataifa ya Makazi na anaongeza kuwa “juhudi za umma za kupanua maeneo safi ya kijani yanasaidia kupoza maeneo ya mijini nyakati za mawimbi ya joto.”
2.	Nchini Armenia, shirika la Umoja wa Mataifa la kuhudumia wakimbizi UNHCR, linahaha kusaidia wakimbizi wanaoendelea kumiminika nchini humo kutoka eneo la Karabakh linalogombewa kati ya Armenia na Azerbaijan ambako sasa idadi ya wakimbizi waliowasili katika kipindi kisichozidi wiki moja ni zaidi ya laki moja na wako taabani.
3.	Makala makala inatupeleka Kenya ambako Stella Vuzo afisa habari wa kituo cha habari cha Umoja wa Mataifa, Nairobi Kenya UNIS amezungumza na mmoja wa wazee wastaafu wa Umoja wa Mataifa katika maadhimisho maalum yaliyofanyika leo kuadhimisha siku ya wazee duniani ambayo huadhimishwa kila mwaka Oktoba Mosi.
4.	Katika mashinani Benedicto Kapaya, mfanyakazi wa kujitolea kutoka Tanzania ambaye ameitikia wito wa Shirika la Umoja wa Mataifa la Afya ulimwenguni, WHO wa kuhamasisha wenyeji wa vijiji vya Muzee na Kalakala kuhakikisha watoto wote wamepatiwa chanjo ya polio katika kampeni ya chanjo inayoendelea nchini humo.

Mwenyeji wako ni Leah Mushi, karibu!

JARIDA LA HABARI ZA UN 02 OKTOBA 2023 NA LEAH MUSHI

Hii leo jaridani tunakuletea mada kwa kina na inatupeleka Kibokoni, Kaunti ya Kilifi nchini Kenya ambako mabwawa ya samaki yamebadili kabisa maisha ya wavuvi wa eneo hilo walioathirika na mabadiliko ya tabianchi yaliyosabisha samaki kutoweka baharini na kuwakatisha tamaa ya Maisha. Lakini sasa kupitia mradi wa ufugaji samaki ulio chini ya mwamvuli wa Umoja Self-Help Group jamii hiyo ina mabwawa 17 ya samaki yanayozalisha samaki aina ya milkfish, kamba, kaa, sandfish, rabbitfish na perege au tilapia. Mshiani tanakuletea ujumbe kusu afya ya uzazi na uswa wa kijinsia.

1.	Shirika la Umoja wa Mataifa la Mpango wa Chakula Duniani (WFP) leo limeonya kwamba hali ya njaa inaibuka kwenye mpaka kati ya Sudan Kusini na Sudan huku familia zinazokimbia mapigano nchini Sudan zikiendelea kuvuka mpaka kila siku. Takwimu mpya zilizokusanywa na WFP zinaonesha kuwa kati ya karibu watu 300,000 ambao wamewasili Sudan Kusini katika miezi mitano iliyopita, mtoto mmoja kati ya watano ana utapiamlo na asilimia 90 ya familia wanasema wanakaa siku nyingi bila kula.
2.	Leo imetimia miaka 10 kamili tangu ajali ya meli iliyokuwa imebeba wahamiaji zaidi ya 500 kutoka Libya barani Afrika kuelekea nchini Italia ilipozama kwenye eneo la Lampedusa.  Katika taarifa ya pamoja ya Mkurugenzi Mkuu wa Shirika la Umoja wa Mataifa la Uhamiaji, Amy E. Pope, na Kamishna Mkuu wa Shirika la Umoja wa Mataifa la Kuhudumia Wakimbizi,(UNHCR) Filippo Grandi wamesema tukio hilo baya lilipotokea dunia iliahidi, “isitokee tena” lakini hilo halijatekelezeka.  Mwaka huu pekee kufikia jana Oktoba pili tayari watu 2,517 wameshahesabiwa kuwa wamefariki dunia au kupotea katika bahari ya Mediterania.
3.	Na Shirika la Umoja wa Mataifa la Afya Ulimwenguni (WHO) limesema leo kuwa Armenia inakabiliwa na changamoto za kiafya kutokana na wimbi la wakimbizi ambalo halijawahi kushuhudiwa. Lakini wakati huo huo mashirika ya Umoja wa Mataifa kama la Afya ya Uzazi na Idadi ya watu duniani UNFPA limepeleka vifaa vya afya ya uzazi na la Kuhudumia Watoto UNICEF limeanzisha eneo salama huko Goris, kusini mwa Armenia.
4.	Katika mashinani Dk. Natalia Kanem, Mkurugenzi Mtendaji wa Shirika la Umoja wa Mataifa la idadi ya watu na afya ya uzazi UNFPA anatoa ujumbe kuhusu upatikanaji wa afya Uzazi kwa wote, na usawa wa kijinsia.

Mwenyeji wako ni Anold Kayanda, karibu!

JARIDA LA HABARI ZA UN 03 OKTOBA 2023 NA ANOLD KAYANDA

Hii leo jaridani tunakuletea mada kwa kina na ukulima wa kisasa hususani mijini umeelezwa kuchangia si tu upatikanaji wa chakula bali pia unatumia maji kidogo hivyo unapigiwa chepuo hususan wakati huu dunia ikikabiliana na athari za mabadiliko ya tabianchi. Taasisi ya Malembo Farm iliyofanya kazi nchini Tanzania na Kenya inatoa mafunzo ya kilimo cha kisasa mijini ambapo tumezungumza na wanufaika wa mafunzo hayo pamoja na Mkurugenzi Mtendaji wake Lucas Elias Malembo akiwa nchini Tanzania anayeanza kwa kueleza namna wanavyoienzi kauli mbiu ya mwaka huu. Pia tunakuletea habari kwa ufupi na mashinani, zinahusu nini? Salía papo hapo tafadhali!

1.	Huko Mashariki ya Kati mashirika mbalimbali ya Umoja wa Mataifa kwa mara nyingine yameelezea wasiwasi mkubwa kuhusu hatma raia huko Gaza na Ukingo wa Magaribi yakisistiza fursa ya kufikisha misaada kwa wenye uhitaji likiwemo shirika la msaada kwa wakimbizi wa Kipalestina UNRWA linalohifadhi wakimbizi wa ndani takribani 400,000 kati ya laki sita sasa katika vituo vyake.
2.	Katika taarifa nyingine leo UNHCR, shirika la Umoja wa Mataifa la kuhudumia wakimbizi limetoa tahadhari kuhusu kukithiri kwa ghasia na ukiukwaji mkubwa wa haki za binadamu katika majimbo ya mashariki mwa Jamhuri ya Kidemokrasia ya Congo (DRC) ambazo zimesababisha wimbi jipya la watu kukimbia makazi yao, ndani na nje ya nchi. Licha ya makubaliano ya hivi karibuni ya kusitisha mapigano katika jimbo la Kivu Kaskazini, UNHCR imeripoti kuwa zaidi ya watu 90,000 katika maeneo ya Rutshuru na Masisi wamelazimika kukimbia makazi yao katika wiki za kwanza za Oktoba. 
3.	Nchini Sudan kwa mujibu wa shirika la Umoja wa Mataifa la kuhudumia wakimbizi UNHCR, Takriban watu 4,000 wameuawa huku mali na miundombinu ya raia  vikiharibiwa vibaya katika vita inavyoendelea Darfurna watu wengine 8,400 wamejeruhiwa, kati ya Aprili 15 na mwisho wa Agosti, huku wengi wao wakilengwa kutokana na sababu za kikabila, hasa eneo la Darfur Magharibi.
4.	Na mashinani tunakupeleka katika ukanda wa Gaza nchini Palestina kushuhudia jinsi ambavyo watoto na jamii zao wanavyoathirika kufuatia vita kati ya Hamas na Israeli.

Mwenyeji wako ni Leah Mushi, karibu!

JARIDA LA HABARI ZA UN 17 OKTOBA 2023 NA LEAH MUSHI - KILIMO CHA MJINI; GAZA; DRC; SUDAN

Hii leo jaridani tunaangazia hali ya kibinadamu Gaza na wakimbizi wa Ukraine. Makala tunakupeleka nchini DRC na mashini tuanarejea huko Gaza kusikia ushuhuda wa waathirika, salía papo hapo tafadhali!

1.	Hali Mashariki ya Kati inaendelea kuwa mbayá hasa baada ya shambulio dhidi ya Hospitali ya Al-Ahli lililokatili maisha ya zaidi ya watu 500. Katibu Mkuu wa Umoja wa Mataifa Antonio Guterres amelazimika kukatisha ziara yake nchini China na kuelekea Cairo Misri atakakozungumza na wadau kuhusu jinsi ya kupunguza madhila kwa waathirika wa mzozo wa Israel na Hamas huko Gaza, lakini kabla ya kuondoka ametoa wito wa kusitishwa mara moja mapigano kwa ajili ya masuala ya kibinadamu, huku mratibu wa masuala ya kibinadamu wa Umoja wa Mataifa Martin Griffiths tayari ameshawasili Cairo ili kuhakikisha misaada ya kibinadamu inaruhusiwa kuingia Gaza.
2.	Uvamizi wa Urusi nchini Ukraine umefurusha makwao mamilioni ya watu kwenda kusaka hifadhi maeneo ya mikoani na hata nchi jirani. Katika Mkoa wa Donetsk asilimia 90 ya wananchi walikimbia tu vita ilipoanza, na zaidi ya wananchi 1,000 walioamua kusalia hawana huduma za maji, umeme na gesi na Umoja wa Mataifa umekuwa ukifanya kila juhudi kuhakikisha wanapata huduma hizo muhimu. 
3.	Makala inatupeleka Jamhuri ya Kidemokrasia ya Congo, DRC ambako walinda amani wa Umoja wa Mataifa kutoka Tanzania, kikosi cha 10, TANZBATT 10 kinachohudumu kwenye ujumbe wa UN wa kulinda amani nchini humo, MONUSCO, hususan kile cha kujibu mashambulizi, FIB wamefika shule ya msingi Ushindi mjini Beni, jimboni Kivu Kaskazini na kutoa msaada wa vifaa vya shule. Afisa Habari wa kikosi hicho  Luteni Abubakari Muna ameandaa makala hii kutoka na ziara hiyo, ikianza na Meja Neema Neligwa mwakilishi wa Kamanda kikosi cha TANZBATT 10, Luteni Kanali John Peter Kalabaka akifafanua walengwa kwa msaada huo.
4.	Na mashinani tuaelekea katika ukanda wa Gaza, eneo linalokaliwa la Palestina huko Mashariki ya Kati, kusikia ushuhuda wa waathirika wa mapigano yanayoendelea kati ya wanamgambo wa Hamas wa kipalestina na jeshi la Israel  kati ya Hamas na Israeli.

Mwenyeji wako ni Assumpta, karibu!

Jarida LA HABARI ZA UN 18 OKTOBA  2023 NA ASSUMPTA MASSOI

Hii leojaridani tunakuletea mada kwa kina na leo tunabisha hodi jijini Nairobi nchini Kenya ambako wiki hii kikundi cha wanaharakati wa mazingira cha Mikoko Pamoja kutoka Pwani ya Kenya kimeibuka kidedea na kutwaa tuzo ya Umoja wa Mataifa ya “mtu mahiri wa mwaka.” Pia tunakuletea habari kwa ufupi, na katika kujifunza lugha ya Kiswahili na hii leo Dkt Mwanahija Ali Juma, Katibu Mkuu wa Baraza la Kiswahili, Zanzibar nchini Tanzania, BAKIZA anachambua methali MTEGEMEA NUNDU HAACHI KUNONA.

1.	Gaza ambako kipindi cha saa 24 cha siku ya 19 ya mapigano kati ya Israeli na kundi la wanamgambo wa Kipalestina la Hamas kimekuwa kibaya zaidi kwani watu 756 wameuawa Gaza wakiwemo watoto 344 na kufanya idadi ya waliouawa tangu Oktoba 7 kufikia 6,547 kwenye eneo hilo linalokaliwa la wapalestina, imesema Wizara ya Afya inayoongozwa na Hamas. Nalo shirika la Umoja wa Mataifa la Afya ulimwenguni ,WHO lenyewe linawataka Hamas kutoa hakikisho la hali ya mateka wa kiisraeli wanaoshikiliwa na kundi hilo ikiwemo afya zao na iwapo wanapatiwa huduma za msingi. 
2.	Hali ya sintofahamu ikiendelea Gaza, hapa Makao Makuu ya Umoja wa Mataifa kumefanyika kikao cha dharura cha Baraza Kuu la Umoja wa Mataifa kufuatia ombi la nchi wanachama baada ya harakati za kusaka kupitisha maazimio Baraza la Usalama kuhusu mzozo Mashariki ya Kati kugonga mwamba. 
3.	Na kwingineko, hii leo huko Tbilisi [TIBLIS], Georgia, shirika la Umoja wa Mataifa la mazingira, UNEP na Mfuko wa Tabianchi duniani, GCF wametangaza mradi wa dola milioni 19 utakaotekelezwa mkoani Kigoma nchini Tanzania kwa ajili ya kurejesha mazingira na kujengea mnepo wenyeji na wakimbizi. Mradi utatekelezwa kwa ushirikiano na shirika la Umoja wa Mataifa la kuhudumia wakimbizi, UNHCR nchini Tanzania.
4.	Katika kujifunza lugha ya Kiswahili na hii leo Dkt Mwanahija Ali Juma, Katibu Mkuu wa Baraza la Kiswahili, Zanzibar nchini Tanzania, BAKIZA anachambua methali MTEGEMEA NUNDU HAACHI KUNONA.

Mwenyeji wako ni Leah Mushi, karibu!

JARIDA LA HABARI ZA UN 26 OKTOBA 2023 NA LEAH MUSHI

Hii leojaridani tunaangazia hali ya msaada wa kibinadamu katika eneo linalokaliwa na wapaestina Gaza, na wakimbizi wa Sudan. Makala tunamulika huduma za posta katika nchi zinazoendelea hususan barani Afrika hasa wakati huu wa maendeleo ya kidijitali na mashinani tunakupeleka nchini Kenya kusikia ni kwa jinsi gani Umoja wa Mataifa umewasaidia wakulima kuimarisha uhakika wa chakula na kujikwamua kimaisha.

1.	Hali Mashariki ya Kati inazidi kuwa mbayá. Mkuu wa haki za binadamu wa Umoja wa Mataifa leo amezisihi pande zote katika mzozo kusitisha uhasana , huku mashirika ya misaada yakionya kuhusu janga kubwa zaidi la kibinadamu, wakati hapa Makao Makuu kikao cha 10 cha dharura kuhusu mzozo huo wa Mashariki ya Kati kikiendelea leo. 
2.	Wakati maelfu ya wananchi wakikimbia machafuko nchini Sudan mashirika ya Umoja wa Mataifa nayo yana haha huku na kule kuhakikisha wanatoa usaidizi kwa wakimbizi hao. 
3.	Katika makala Assumpta Massoi anazungumza na Mutua Muthusi, Mkurugenzi wa Maendeleo ya Ushirikiano kutoka shirika la posta duniani, UPU kuhusu changamoto na fursa za huduma za posta katika nchi zinazoendelea hususan barani Afrika hasa wakati huu wa maendeleo ya kidijitali.
4.	Na mashinani tunakuletea ujumbe wa Everlyne Lagat kutoka Baringo Kaunti nchini Kenya, mmoja wa wakulima wadogo ambao wameweza kuondokana na hatari ya majanga ya njaa na umasikini kwa kuwa Shirika la Umoja Wa Mataifa la Mpango wa Chakula Duniani, WFP linanunua chakula cha msaada kutoka kwao 

Mwenyeji wako ni Leah Mushi, karibu!

JARIDA LA HABARI ZA UN 27 OKTOBA 2023 NA LEAH MUSHI

Hii leo jaridani tunaangazia machafuko Gaza na mafuriko nchini Libya. Makala tunakupeleka nchini Kenya na mashinani nchini Tanzania, kulikoni? 
   
1.	Umoja wa Mataifa leo umekaribisha uamuzi wa Misri wa kukubali kupokea baadhi ya wagonjwa kutoka eneo la wapalestina la Gaza linalokaliwa na Israeli, kwa ajili ya kuwapatia matibabu, huku mashirika mengine ya Umoja huo yakiendelea kuzungumzia adha inayowakabili maelfu ya watu wa Gaza wakiwemo watoto, uhaba wa mahitaji muhimu, ukosefu wa matfta, kufurika kwa makazi ya dharura na Israeli kuendelea na operesheni ya kijeshi ardhini. 
2.	Mashirika ya Umoja wa Mataifa na wadau wake yakiwemo mashirika yasiyo ya kiserikali yanaendelea kusaidia kuwafikishia misaada watu katika maeneo ya Libya yaliyoathiriwa na mafuriko makubwa yaliyoipiga taifa hilo la Afrika Kaskazini tarehe 10 na 11 mwezi Septemba mwaka huu, hasa wakati huu msimu wa baridi Kali unapojongea. 
3.	Makala leo tunaelekea Kaunti ya Turkana, nchini Kenya, ambako tunakutana msichana mwenye umri wa miaka 23 kutoka Jamhuri ya Kidemokrasia ya Congo, DRC, ambaye alikimbia machafuko nchini humo na sasa yeye na mama yake na wadogo zake wawili wenye ulemavu, wanaishi katika kambi ya wakimbizi ya Kalobeyei.
4.	Mashinani tunakupeleka nchini Tanzania kusikiliza ujumbe kuhusu afya ya akili na haki za binadamu. 

Mwenyeji wako ni Assumpta Massoi, karibu!

JARIDA LA HABARI ZA UN 01 NOVEMBA 2023 NA ASSUMPTA MASSOI

Migogoro ya miongo na miongo nchini Jamhuri ya kidemocrasia ya Congo, DRC imefurusha watu wengi kutoka makazi yao, wengine kubaki wakimbizi wa ndani na wengnine kukimbilia nchi Jirani. Kenya ni mojawapo wa nchi ambazo zinawahifadhi wakimbizi hao na katika Kaunti ya Turkana, tunakutana na Armen Gakani, msichana mwenye umri wa miaka 23 kutoka Jamhuri ya Kidemokrasia ya Congo, DRC, ambaye alikimbia machafuko nchini humo na sasa yeye, akiwa na mama yake na wadogo wake wawili wenye ulemavu wanaishi katika kambi ya wakimbizi ya Kalibeyei. Je, ni kwa jinsi gani wameweza kujimudu kimaisha? Tuungane na Pamela Awuori wa idhaa ya Kiswahili ya Umoja wa Mataifa ili kufahamu zaidi.

Nawapenda dada zangu na siwezi kuwaacha nyuma kamwe - Simulizi ya Armen

Hii leo jaridani tunaangazia haki za binadamu katika ukanda wa Gaza na wakimbizi wa Afghanistan wanaorejea nyumbani kutoka Pakistan. Makala tunaelekea nchini Kenya na Mashinani nchini Tanzania, kulikoni?    
1.	Umoja wa Mataifa leo umesisitiza kwa mara nyingine kwamba kinachoendelea Gaza ni ukiukwaji mkubwa wa haki za binadamu huku kukiwa na ripoti kwamba vikosi vya Israel vimevamia Hospitali ya Al-Shifa jana usiku ambako mbali ya wagonjwa kuna maelfu ya raia waliotawanywa wanapata hifadhi na umeonya kwamba hospital sio uwanja wa vita na madhila hayo kwa raia wakiwemo watoto lazima yakome kwa kutekeleza mambo 10 ya muhimu. 
2.	Tangu katikati ya mwezi Septemba mwaka huu kumekuwa na ongezeko kubwa la idadi ya wananchi wa Afghanistan wanaorejea nchini mwao wakitokea Pakistan ambako wamelazimika kuondoka kutokana na kutokuwa na vibali vya kuishi nchini humo. Ongezeko hilo kubwa la watu limeleta changamoto kwa mashirika ya Umoja wa Mataifa yanayotoa misaada ya kibinadamu.
3.	Makala tunakupeleka nchini Kenya kuangazia mradi ambao unaungwa mkono na mashirika mbalimbali ya Umoja wa Mataifa kupitia shirika la kimataifa la Triggerise linalotumia huduma ya simu inayofahamika kama Tiko kwa lengo kuu la kuunguza mimba za utotoni na maambuki ya VVU miongoni mwa wasichana wenye umri wa kati ya miaka 15 hadi 19. Evarist Mapesa anasimulia makala hii iliyoratibiwa na Mfuko wa Umoja wa Mataifa wa Pamoja wa Malengo ya Maendeleo Endelevu (SDG).
4.	Mashinani tunaelekea Mkoani Kigoma-magharibi mwa Tanzania kumsikia ujumbe kutoka kwa mhudumu wa afya mkoani humo kuhusu kampeini ya chanjo ya polio awamu ya pili, lakini kwanza ni makala. 

Mwenyeji wako ni Anold Kayanda, karibu!

JARIDA LA HABARI ZA UN 14 NOVEMBA 2023 NA ANOLD KAYANDA

Hii leo jaridani tunaangazia amani na usalama katika ukanda wa Gaza na msaada wa kibinadamu nchini Chad. Makala tunakupeleka nchini Tanzania, na mashinani tunamulika Ibara ya 13 ya Tamko la Haki za Binadamu.  
 
1.	Katibu Mkuu wa Umoja wa Mataifa Antonio Guterres ambaye yuko ziarani katika eneo la ncha ya kusini mwa dunia, Antarctica amesema eneo hilo limekuwa likijulikana kama eneo lenye manufaa makubwa lakini lililosahaulika, lakini sasa limeamshwa na madhara ya mabadiliko ya tabianchi. 
2.	Chad ni mwenyeji wa wakimbizi zaidi ya milioni ambao sasa umekuwa mgogoro mkubwa zaidi wa wakimbizi na unaokuwa kwa kasi barani Afrika kwa mujibu wa shirika la Umoja wa Mataifa la mpango wa chakula duniani WFP. Shirika hilo linasema na vita inayoendelea katika nchi jirani ya Sudan imeongeza shinikizo la rasilimali na mahitaji ya kibinadamu kwani maelfu kwa maelfu ya watu zaidi wanavuka mpaka na kusaka usalama Chad.
3.	Katika makala John Kabambala wa redio washirika wetu KidsTime FM ya Morogogo Tanzania anatujuza kuhusu Mradi wa Shirika la Umoja wa Mataifa la Chakula na Kilimo (FAO) Tanzania unaokusudia kuhamasisha wafugaji wa kuku kupunguza matumizi ya dawa, mathalani za viuavijiumbemaradhi wakati wa ufugaji wa kuku wa nyama nchini humo.
4.	Na mashinani leo katika mfululizo wetu wa uchambuzi wa Ibara za Tamko la Haki za Binadamu kuelekea Siku ya Haki za Binadamu itakayoadhimishwa hapo Desemba 10 leo tunamulika Ibara ya 13. 

Mwenyeji wako ni Assumpta Massoi, karibu!

JARIDA LA HABARI ZA UN 24 NOVEMBA 2023 NA LEAH MUSHI

Idhaa ya Kiswahili ya Umoja wa Mataifa inatangaza habari kila siku kwa lugha ya Kiswahili, Kiarabu, Kichina, Kiingereza, Kifaransa, Kireno, Kirusi na Kihispania. Na mara moja kwa wiki inakuwa na vipindi vya lugha ya French Creole, Kibengal, Kihindi, Urdu na kiindonesia.
Radio ya UM inabadilisha taarifa zake kutokan na habari mpya zinavyokuja kila mara kwa siku. Pia inaandaa makala na kufanya uchambuzi wa mada mbalimbali za kijamii, kisiasa, kiuchumi, maendeleo na masuala yanayohusu tamaduni yanyohusisha Umoja wa Mataifa na kazi zake. Vipindi vya Idhaa ya Kiswahili ya Umoja wa Mataifa au UNNews  viko vingi na ni kuanzia habari,  makala, vipindi maalumu na taarifa za habari za kila siku na zile za kila wiki.
Na vipindi vyote hivyo vinaweza kutumiwa na vyombo vingine vya habari au watangazaji, na vinaweza kutumiwa kama chanzo cha habari kwa waandishi.  binafsi.Na kwa kuongezea tuu ni kwamba vipindi vyote hivyo na sauti zingine kwenye tovuti yetu vinatolewa bure bila malipo yoyote. Unaweza pia kujisajli kwenye ukurasa wetu ili upokee taarifa kila wakati zinapochapishwa.
Kwa uchaguzi zaidi wa ushirikiano usisite kuwasilina nasi.

New tracks tagged #Wakimbizi