ياما قلنا .. ياما حكينا ــ
 نص : خالد الحمروني (أبو شادي) والطيب بوعلاق 
ــــــــــــــــــــــــــــــــــــــــــــــــــــــــ
ياما ڨلنا .. ياما حكينا
ياما طْرَزْنا في لْيالينا
لا الطّرز تْهرَّى لا بادْ
لا باد الضَّـيْ بْعينينـا
***
ياما ڨلنا فُكُّوا الڨمرة
من جَرح اللّيل وْخَبّوها
عالنّاس إلِّي ما يْحِبّوها ،
وْياما ڨُلنا خبُّوا الجَمْرة
طَيِّ الغُنَّايَة وْغَنُّوها
يْجِي نْهار وْلازم تلڨُوها ،
تلڨُوهـــا في ڨلب الميناء
وِالملح مْعَرّڨْ في سْفينة
تلڨُوهـــا في الحقل الغافي
في هَبِّةْ فلّاحُه الحافي
في مَنْجَمْ .. مَصْنَعْ بَاكْتَافِي
وَاكْتاف أسْلافي بانِينَــــه
وْياما ڨُلنا .. ياما حْكينا
***
ياما ڨُلنا فُكُّوا الحِلْمَة
من كلمة وْسَمُّوها بْلادْ
وَامْلُوها بْضحكِةْ لُولادْ
ياما ڨُلنا حُطُّوا النَّجْمَة
حِذْوِ النَّجْمَة وْعَدُّوا الوادْ
للخَضْرا غَضِّةْ الَأنْهادْ
مازالتْ تُمْشُطْ في فكرة
تنسج وِتْفَتّڨْ في ذكرى
مازالت تزرع في نخلة
في الْبَرّ وْتِحلِفْ ما يَخْلَى
تحلم بالشَّمس وْلا أحْلَى
مِنْ شَمْسَة في ڨَبْضْ يْدِينا
وْياما ڨُلنا .. ياما حْكِينا
***
وْيا طَرْزِ الكلمة وِالمَعْنَى
يا فكر وْساعِدْ عَرَّاڨْ
ما تْخاف اللّيل الوَهّاڨْ
وْحتَّى لُو الْوَحْشَة تُوجَعْنا
وْجايَعْنا منبع دَفّاڨْ
بالوَعْيْ الهادر ، وِرْفاڨْ
تْحِلِّ العُڨدة .. تْمِد شْراعْ
وِتْجيب الحق إلّي ضاعْ
تْمِدِّ الخَطوة .. تْفِيضْ خْضارْ
وِتْجيب مْنِ اللّيل نْهارْ
تِحْمِلْ ، تِتْحَمِّلْ لَوْزارْ
ولا تْڨُول تعبنا وْلا عْيِينا
وْيا خضرا
لا طَرْزِكْ بادْ
وْلا باد الضَّيْ بْعِينينا
وْياما ڨلنا ... ياما ڨلنا

ياما ڨلنا ياما حكينا ـ نص للطيب بوعلاق وخالد الحمروني أبو شادي

نص كتب سنة 2008 ، مهدى إلى سجناء الحوض المنجمي

في السِّجْنْ .. مِنْ بَرَّا

يا عْيُونْ 
يا مْوَاعيدْ
وِرْدِي .. رْوَايا .. وْ زادِي
جَمْرات ضِدِّ اللّيلْ
وِالبارْداتْ أصْفادِي

جَمْرات
ضِدِّ السّاعة
ضِدِّ الزَّمَنْ واڨِفْ
يْلُوكْ أوْجاعَهْ
عَدِّيتْها
لا اِدِّيتْ فرضِ الطَّاعَة
وْ لا غْمِدْتْ صُوتي في صْڨِيعْ رْمادِي

جَمْرات
ضِدِّ سْلاسِلْ
وِ سْياطْ
تِرْسِمْ خَط عُمْري النّاسِلْ
دَمِّي عَلَى الڨُضْبانْ
دَمِّي فاصِلْ
بِـينْ ما كَتَبْتْ وْما كَتَبْ جَلّادِي

جَمْرَة فْإيدِي
وْجَمرَة فْڨَلْبي
وِالصَّدَأْ في ڨِيدِي
لا ڨُلْتْ للسَّجّانْ حاضِر سِيدِي
وْ لا في الصّراعْ 
لْبِسْتْ لُونْ حْيادِي

مِالْمِتلَوِّي
لْأبْعَدْ مَدى في الجَرْحْ
صرخة تْدَوِّي
عْلَى أمِّ الْعَرايِسْ
يا رْدَيِّفْ ضَوِّي
وْعَلَى صُوتْ في الڨَصْرينْ
حِينْ يْنادِي
ما بـِينْ عِڨْدْ وْ جِيدْ :
يا حُرِّيّة .. 
يا حِلْمْ ضِدِّ اللّيلْ وِ الڨُطْعِيَّة
عْيُونِكْ مْشاعِلْ
وِ المَسِيرَة ثْنِيَّة 
وْ ڨَلْبْ إنْكَسَرْ عَالدَّرْبْ 
صـــــاحْ : بْلادِي .. يا عْيون ... يا مْواعيدْ

في السجن من برّه ـ الطيب بوعلاق

أنِّكْ تِكتِبْ عامّية موش معناها تُلقي حْرُوفك وتڨول اللي يجي على بالك . 
أنك تكتب عامّية يعني تَجْرَحْلِكْ ثْنِيّة للكلمة اللي تحت لْسانكْ ، 
تَدمَى حد اللحمة الحيّة باش تُوصل لِخْيالِك ، 
يخفّفها من حِمل العادي والمِتواتِر والِمتْهالِكْ ، 
ويعانيها بمعنى جديد يْليق بمستقبل إنسانِكْ . 
هذا يعني فيما يعني أنِّكْ موش إنت اِللي تِكتِب ، 
الْمُستقبَل اِللي تمثّلتُه في خْيالِك هو اللي يِكتب . 
وإذا عْجِزْ وما كْتِبْهاشْ .. 
زايد تِكتب ، 
زايد تِتعب ، 
زايد .. ماثمّاش عْلاشْ .
وأنِّكْ تِكتب عامّية موش معناها تڨول الكلمة على عْواهِنْها . 
الكلمة على عْواهِنْها دار بْناها اللي ڨبلك وسْكِنها ، 
لكن غادر وِتْرَكْهالِكْ ، 
خلّالِك فيها رَغْباتُه وحْكاياتُه ، 
خُوفُه ، وبْدايات حْياتُه ، ونْهاياتُه ... 
وعْلِيكْ أنّك ما تُدخُلها حتى تْخلخِل دْوَاخِلها وِتهِد اِلْ لازم يِتهَد . 
ما تبني الشيء اللي مِبني ، ما تُوجِدْ إللي تُوْجِدْ . 
وَسَّعْ للمعنى في الكلمة ياتِيك المعنى بِمْعِينُه أصفى مالأصفَى وْأَجَدّ .
وأُعْرُكْ من صلصال يْديك وجْواجِيك .. تُوجِد اِلْ ما وِجْدُه حد . 
وإذا صلصالك ما عْطاشْ .. 
زايد تكتب ، 
زايد تتعب ، 
زايد .. ماثمّاش علاش .
وأنِّكْ تِكتب عامّية موش معناها تڨول اللحظة في لحظتها . 
اللَّحظة تِتْجاوِز وَمْضِتها ، 
اِللحظة مْداد التاريخ ، والكلمة وَعَّاتُه بذاتُه حِينْ وِصْلِتْ أقصى يَقظِتها 
وعامت فوڨ الوقت وتحتُه ، 
الوقت اِللي حْزِنْتُه وفْرَحْتُه ، 
الوقت إللي تكدّس في ذاتك برزخ حتى حد ما نحتُه ، 
وفْتَحتُه على إنسانية تِتهجّى في احلام الناس ، 
من إنسان الكهف/الحِيرَة لإنسان الفكرة والفاس ، 
ومن فكرة أنُّه يِتملّك لْأنُّه يِڨسِمْ مْعَ الناس ، ويكره/ويحب/ويتحب/ويتكب/ويتڨعّد يمشي/وْيمشي وْجِيعَة فوڨ تْعَبْ . 
هالوقت إللي تڨولُه الكلمة وعالصّفحَة البيضا يِتْصَبْ .. 
لاهُو بحبرك لاهُو بدمّك ، بْدَمِّ الإنسانِي اللي يعاني في معنى وْجُودُه تِكْتِبْ .
وإذا دَمُّه ما كْتِبهاش .. 
زايد تكتب ، 
زايد تتعب ، 
زايد .. ماثمّاش علاشْ .
وأنّكْ تِكتب عامّية موش معناها تڨول المَحكي كيف ما تحكي كُل يُومْ ، 
والّا تڨول مَوقف بالكلمة ويِكْفي تِتنفِّسْ الهْمُومْ . 
أنك تكتب عامّية يعني عندك خط ، ثنيّة ، موقف مالكِلمة وفي الكِلمة 
وعندك للكلمة مفهومْ يْحَدِّد ذاتك في كلماتك ، 
يطبعها بإيقاع حْياتك ، 
وتڨول العالم من جِهَة وْمن جِهَة كَانِّكْ أُقنُومْ : 
وَاحِدْ ، أَحَدْ ، ولا حد يْحِدّكْ بْحَد ، وتِتْعَد ، تْصير فْتِعدادك وِالعَدّ 
وَاحِدْ مِتوحّد في ذاتك ، 
مُطلَق في النّسبي وفي حْياتك ، 
كاينّك صُوت الأبَدِّ الباقي حين لا شي يْدومْ . 
وإذا صوته ما ڨلهاش .. 
زايد تكتب ، 
زايد تتعب ، 
زايد .. ماثمّاش علاش .
وأنّك تكتب عامّية 
يعني تكتب بجْواجيك حاجة تْكِتْبِتْ في جْواجيَّ .. 
وحين فْتحت كْتاب الدِّنيا هبّت ريح وصاحت فيَّ 
ومسحتني بيدِّ الْخْطُوبْ .. نَسِّتْني فِاللي مكتوبْ ... 
ذَكِّرني .. 
ذَكِّرني فيَّ .. 
وفي اللحظة اللي دِيمَا حيّة ..
ذكّرني اللي آنا إنتِ 
بالكلمة اللي إنتِ هيَّ .
وإذا ما تِتذكّرهاشْ .. 
زايد تكتب ، 
زايد تتعب ، 
زايد .. ماثماش علاشْ  .
....................................................................... آما .. إكتب .. ديما إكتب

أنّك تكتب عامّية

ورد ڤبلنا

هِياجَةْ ضَيْ ـــــــــــــــ 🌹

عِينيها اللّي عَلَى بْعيد

الغامض المسافر في شْعَرْها

الجيد المصڨول تْناهيدْ

ويْدِيها اللّي على خْواصرها

الثُوب اِللّي جْنَى نوّار

النهد اِلْ عُمرُه ما صار

مرمر يتمنّى لو طار

وحاجة شدّتُّه لِصْدِرها

والرَّجفة الْ شَدّت في ضْلوعِكْ

طَلْعِتْ حتى شْواشي فْروعِكْ

وانت مِن خُوفك .. مِن رُوعِك

ـ خوفك عاللحظة تَخسِرها ـ

تقدّمت لهالمشهد عاري

إلا من تشبيه مْوَارِي

رميت الحرف شْراع وْصاري

في الحِبر ، وڨُلتلُه : صَوِّرْها

والحِبر كْما البَحر شْغوفْ

سِرُّه كامن خلف الشُوفْ

بين الغامض والمكشوفْ

حَرَّرها لحظِةْ ما أْسَرْها

وما كْتِبْ على الصفحة شيْ

..................................

ما اسْهَلْهَا هِـيـاجةْ الضَيْ

ـ الـمِـهـتـاجَـة في كَايِنْ حَيْ ـ

حتى البياضْ يْحاصِرها

الطيب بوعلاق ـ هِياجةْ ضَيْ

سْكات اللّيل
وْعِشْڨَة 
ومْدينة
ولحظة تِكْفينا
باش تَلْڨَى الدِّنْيا
ضُحكتها فينا
وْفي سكات اللّيل

سكات الليل
وْعِشْڨَة 
وْغْناية
وْخَطوة بْلا غاية
تكفينا .. وْتِكفي
باش تِبدَى حْكاية
في سكات اللّيل

سكات اللّيل
وْعِشْڨَة
وِثْنِيّة
بعيدة منسيّة
تكفينا .. وْتِكفي
باش تُسكن فيَّ
وْفي سكات الليل

سكات الليل
وْعِشْڨَة 
وِمْسافة
من غير مْخافة
تكفينا نْفِيضُوا 
وَادْ عْلَى حافة
في سكات اللّيلْ


لكن هَاللِّيلْ الكامِنْ في ضْلُوعي
وْماسك بِفْرُوعِي
صارخْ من جُوعي لْأشْهَى ما فيكْ
وِسْكاتُه شارِڨْ مِنْ مِلْحْ دْمُوعِي
وْمِنْ رَجْفْ ضْلُوعِي
ينسى وْيِتْذَكَّرْ لَمْساتْ يْدِيكْ
ويْديكْ مْوَانِي
وِالْوَقْتْ شْراعْ
وْلِدْني عْلَى مُوجَة
وْسَمَّانِي ضْيَاعْ 
لَوَّحْلِي بْآخِرْ مَنْدِيلْ وْدَاعْ
وْنَسَّانِي ثْنايا تْرجَّعني ليكْ ...
نسّاني معنى عِشْڨَة وْ مْدينَة
وْلحظَة تِكفينا
باش تَلْڨَى الدّنْيا
ضحكِتْها فينا
وْفي سْكات اللِّيلْ
وْنَسَّاني المعنَى
مْنِ سْكات اللِّيل

الطيب بوعلاق-سكات الليل

الطيب بوعلاق-أنخـــاب

هاجس سيزيف ـــــــــــــــــ

وْيُنضُبْ فيك الحِلْمْ وْتُسكُتْ

تِذْوِي مِثْلِ الشَّمعة .. تْمُوتْ

كْما صُوتْ وْفارغْ مِالدِّنيـا

كْما دِنْيا فرغت مِالصُّوتْ ،

سْكاتِكْ صار بْلادْ بْعِيدة ،

وْهَالتَّنْهيدَة

هاجس سِيزِيفْ المنحوتْ

في صَخرِ الحكمة وِالمَعْنَى

وإنتِ وَحدِكْ في هَاللَّعْنَة

لا تحيا فيها لا تْمُوتْ ،

لا ساكن غُدْوَة لا البارحْ

لا ليك بْيُوت وْلا مْطارحْ

ماشي في مُوجعْ وِمْجَارَحْ

لا ثُوبْ وْلا وَرْقةْ تُوتْ ،

جَاي الدِّنيا

ڨَبْلْ الدِّنيا

وْعايشْ

مِثْلْ اِلْ فَاتُه الْفُوتْ ...

هاجس سيزيف .. المنحوت

الطيب بوعلاق-هاجس سيزيف

الطيب بوعلاق-بِيض الشّهاوي

الطيب بوعلاق-أغنية للمواطن مختار

إلى الفتاة فلسطين (بنت العرب) ــــــــــــــــــــــــــــ
يا بِنْتْ ناسِكْ عَرَبْ
لا تْخافِي
أُسُودِ الفْيافِي
يْخَاوُوا الأَعادي
وِيْعادُوا الْقَوَافِي
***
يا بِنْتْ ناسِكْ عَرَبْ في الشّدايِدْ
يْفِزُّوا رَعَايِدْ
يْخَلُّوا الفَرَسْ .. يِرْكَبُوا عَالْوْسَايِدْ
يِسِلُّوا سُيُوفِ الخَشَبْ مِالْغْمَايِدْ
وْمِثْلِ الْعَوَايِدْ
يْعُودُوا .. يْجُرُّوا الهَزايِمْ صْنافِي
يا بِنْتْ .. يا بِنْتْ
***
يا بِنْتْ ناسِكْ عَرَبْ في النَّوَازِلْ
يْكِيدُوا العَواذِلْ
في مَطْرَحِ الجَدّْ يَاتُوا الْمَهازِلْ
يْخُطُّوا بَيانِ الْقِمَمْ الْهَوَازِلْ
وِالمُوتْ نازِلْ
عَلَى رُوسْ الأشْهادْ ماهُو بْخَافِي
يا بِنْتْ .. يا بِنْتْ
***
يا بِنْتْ ناسِكْ عَرَبْ حِينْ وَطُّوا
بْعَراهُمْ تْغَطُّوا
يْرُوحُوا مَعَ النُّومْ حَتَّى يْغُطُّوا
يْهِزُّوا مِنِ الذِّل ما لا يْحُطُّوا
وْعَلِينا يْنُطُّوا
وْإذَا ڨُلْتْ (لا) تِنْفَتَحْلِكْ مْنافِي
يا بِنْتْ .. يا بِنْتْ
***
يا بِنْتْ ناسِكْ عَرَبْ عَالْكَراسِي
جِبالِ الرَّوَاسِي
جَلالِةْ .. فَخامِةْ .. سُمُوِّ المَآسِي
سَهَرْ عُودْ ، وِقْدُودْ ، وْكاسِكْ وْكاسِي
وِالهَمْ مَراسِي
وْما هَمْ إذَا ماتْ مَلْيُونْ حافي
يا بِنْتْ .. يا بِنْتْ
***
يا بِنْتْ جِنِينْ كانِتْ وْضِيحَة
وْبَيْرُوتْ جْرِيحَة
وْبَغْدَادْ سَفِّتْ تْرابِ الفضِيحَة
وِالْيُومْ صِيحَة وَرَاء ألف صِيحَة
غَزَّة الذّبِيحَة
نادِتْ علَى الأهْلْ لا مِنْ يْوَافِي
وْيا بِنْتْ .. ناسِكْ عَرَبْ
لا تْخافِي ...
***
وْخَافِي
مِنِ إلِّي حَفَرْ لِيلْ دامِسْ
وْضَوَّى المْڨَابِسْ
وْعَدَّى عَلَى جْرُوحْ غَزَّة
وْلَامِسْ
حَسَّسْ عَلَى حِلْمْ في رْغِيفْ يابِسْ
وْفي سْلاحْ رابِصْ
يُحْضُنْ فِلَسْطِينْ وِيْباتْ دافِي
***
خافِي
مِنِ إلّي تْحَزِّمْ زُنارِكْ
وْكَسَّرْ حِصاركْ
وْباعِ المَدَى لْأجْلْ يِشْرِي خْضَارِكْ
خافي مِنِ إلِّي وَهَبْلِكْ نَهارِكْ
وْسَوَّى مَسارِكْ
وْأعادِ القَضِيَّة لْحُضْنِ المَرافِي
***
خافي
مِنِ إلِّي حَلَفْ بِالْوِجِيعَة
الْوَطَنْ ما يْبِيعَهْ
وَلَا يْبِيعْ في الرَّمْلْ حَبَّة وْضِيعَة
خافي مِنِ إلِّي رَفَضْ مِالطّبِيعَة
إشْتِقاقِ الفْجِيعَة
رَفَضْ كُلّْ تَطْبِيعْ
بايِنْ وْخَافِي ...
***
هذا بَيانِ الْعَقَلْ وِالرَّصانَة
وْهذي الأمانَة
بِيعِةْ فِلَسْطِينْ ماهي مَهانَة
وْياريتْ ما تِحْسِبُوها خْيانَة
إحْسِبُوها ضَمانَة
وَاعْطُوا لْشُيوخِ العَرَبْ وَقْتْ كافي
حتَّى يْصِيغُوا بَيانِ النِّهايَة
بْنَفْطِ العِنايَة :
بإسمِ الحَجَرْ
وِالشَّجَرْ
وِالرَّعايا
بإسْمِ الحَجَرْ
وِالشَّجَرْ
وِالضَّحايا
بإسْمِ التَّسامحْ
وْحُسْنِ النَّوايا
تفنَى القَضايا
وْتَحْيا عُرُوشِ العَرَبْ
وَقتْ كافي
يا بِنْتْ .. مِالعُرْبْ إحِذْرِي وْخافي
يا بِنْتْ ..
مِالعُرْبْ 
إحِذْرِي وْخافي  

قصيدة بنت العرب - الطيب بوعلاق

الأيّام مَاعِزْ جاليَة 
لْياليكْ ثُوبْ جْبالْ 
يا بْلادْ نَسْجْ خْيالْ 
غنّيتلِكْ يا غاليَة
تْلعثَمتْ في الموّالْ 

غنّيتلِك في الشَّاردَة وِالواردَة يا سَمحَة 
وْ شَدِّيتْ بِإيدِي الباردة 
عالڨلب .. ما أسخن جَرْحَهْ !
اللّفظ نارَهْ هامْدَة  
وْمعناه يِكْوِي شَرْحَهْ 
وَآنا صْغير وعاشڨكْ 
وِالعِشڨْ بَحْرْ أهوالْ 
يا بْلاد 
نَسْجْ خْيالْ


غَنّيتلِك في الطَّالْعَة وِالنَّازلَة بِثْبُوتْ 
وْصَفّيتلِكْ طَلِّ العَرَڨْ 
حبّات من يَاڨُوتْ 
وْما كادني طُول الشّڨا  
ما كاد عمري يفوت 
إلّي كاد إنّي عاشڨِكْ 
وْمَا جِيتلِكْ عالبالْ 
يا بْــلادْ .. نَسْجْ خْيــالْ 

وْمازال تَعْبي مْلوّنِكْ 
مازال فيكِ خْضارْ 
وْمازلتْ نابتْ في مَدَى لْيالِيكْ 
مِثْلْ نْهارْ ، 
وْمازال نُولِي يِنسِجِكْ مَوَّالْ 
مَالِي خْيارْ ..
حتّى تْوافي عاشْڨِكْ 
عاشِڨْ وْحَالُه حالْ  
يا بْــــــــــلادْ .. نَسْجْ خْيـــــالْ 

الأيّام مَاعِزْ جاليَة 
لْياليكْ ثُوبْ جْبالْ 
يا بْلادْ نَسْجْ خْيالْ 
غنّيتلِكْ يا غاليَة
تْلعثَمتْ في الموّالْ 
ـــــ الطيب بوعلاق

شعر ـ نسج خيال ـ الطيب بوعلاق

غياب

كِ سْكُنْتْ إسمي

كانْ إسمي الماءْ

وْكُنْتْ الماءْ ،

لا احْتَجْتْ أرضْ

وْلا احْتَجْتْ سْماءْ ،

اغْتَرّيتْ ..

ڨُلْتْ نْمِدْ .. حتى يْطُولْ هَالبِنْيانْ

عَلّيتْ فيه الذّاكْرَة

وْفِيَّ عَلا النِّسيانْ ...

وِاصْبَحْتْ

عَبْدْ لْحاجْتي لِلماءْ

وْلاِسمِ الماءْ

وِلْكُلْ ما يْذكِّرْني

إنّي أنا اللِّي كُنْتِكْ

وَاخْطِيتْ لمّا خُنْتِكْ

يا ذاكْرِةْ لَشْياءْ .

... 

كِ سْكُنْتْ إسمي

كانْ إسمي النَّارْ

وْكُنْتْ النارْ ،

أوّل شَغَفْ ينْزَعْ ثْيابُه

وْتَتْبْعُه لَسْرارْ ،

وِالكُونْ كانْ سْريرْ

وِالوقتْ شِيخْ ضْريرْ

تْمَنَّى بْسَمَاعُه يْشُوفْنا

دَلُّه الصَّدَى عْلَى لْهَاثنَا

عْلَى مُوضْعِةْ شَهْوَاتْنَا  

عْلَى وِينْ يِنْبِتْ خُوفْنَا ،

وْحِينْ اِنْتْبَهْنا دَارْ

وْطاح فوڨ كُومْ اَحْجَارْ ...

طْفِينَا حْنَا لِثْنينْ ،

وْهُوَّ انْكَسَرْ في الحِينْ

نِصْفِينْ :

لِيلْ  / نْهارْ .

 ... 

كِ سْكُنْتْ إسمي

كانْ إسمي هْوَاءْ

وْكُنْتْ هْوَاءْ

جْرَحْتِ الْحَياةْ .. أحْيِيتْها

كِ مْشيتْها من ألِفْها للياءْ

وأوْدَعْتْ سرّي الناي ،

والنايْ روح الْـڨافلة

وشُوڨ المسافة الجافلة

يْجُوسِ الثّنايا الغافلة

وْيِسْنِدْ عَلَى الْغَنَّايْ ،

وْكُلْمَا انْكَسَرْ غْناهْ

تْناسى التّعب وَعْنَاهْ

أَوْدَعْ أَنَاهْ مْعَ الصَّدَى

وْغنّى وَجَعْ أنايْ .

 ...

كِ سْكُنتْ إسمي

كان إسمي ترابْ

وْكنت تْرابْ

تكّيتني عالوقت

صِرْتْ آنا وْظِلّي أغرابْ

إنسان في إله / إله في إنسان

بِنيانْ إسمه كْيانْ

وِكْيانْ كُلُّه خْرابْ ،

يا مْلامْحِي يا سْنينْ

يا مْشَڨّڨَة في الطِّينْ

مازلت فيَّ تْنِينْ

وْمِحْتاجة ألف غْرابْ

حتّى تْواري يْديكْ

ما أْتِيتْ مِنْ أخْطابْ

... 

كِ سْكُنتْ إسمي

كان إسمي ،

وْكُنتْ .. خِيط سْرابْ

أبد مؤقّت

وِانْتِ .. ماشيَة لْأبْعَدْ ما فيكْ

شُوفْ تَلْڨَانِيش ، صُدْفَة ، في ثْنِيتِكْ

غَمْضَة في لحْظِةْ نُـــــــومْ مْجافيكْ

صَحْوَة مِنْ هَمْسَة تْڨُلّكْ حَبّيتِكْ ،

وْلَوْ ما لْڨِيتْنِيشْ

أنساني وْعِيشْ

يِكْفِينِي بْكُلِّي عِشْتِكْ وَحْيِيتِكْ

كَايِنِّكْ عُمْرِي .. وْعُمْرِي في يْديكْ

وِانْتِ ماشية لْأَبْعَدْ مَا فِيكْ .


شوف تلڨانيشْ عَلَى اطْرافِ اللِّيلْ

سَارِجْلِكْ خِيلْ

وْرَابِطْلِكْ مَجْرْدَة باوْصال النِّيلْ

وماشي في هْواكْ الميل وراء الميلْ

بعضي في يسارك ..

بعضي في يْمينِكْ ..

والباقي ڨَطرِةْ طَلْ عَلَى جْبينِكْ

وْلَوْ ما لْڨِيتْنِيشْ

أنساني وْعِيشْ

يكفيني بْكُلِّي عِشْتِكْ وَحْيِيتِكْ

كاينِّكْ عُمري .. وْعُمري في يْديكْ

وِانْتِ ماشية لأبعدْ ما فيكْ .


شوف تلڨانيشْ في حلم بعيدْ

أبعدْ من عيدْ

ومن لحظة فَاتْڨة ثُوبِ التنهيدْ

سمّيتُه غُدْوَة ولبّستُه جْدِيدْ

ووَصّيتُه يْنامْ خارجْ لِكْلامْ

وْيَصْحَى وْيَبْدَاكْ مْنِينْ وْفِيتِكْ

وْلَوْ ما لْڨِيتْنِيشْ

أنساني وْعِيشْ

يِكْفِينِي بْكُلِّي عِشْتِكْ وَحْيِيتِكْ

كَايِنِّكْ عُمْرِي .. وْعُمْرِي في يْديكْ

وِانْتِ ماشية لْأَبْعَدْ مَا فِيكْ

أبعد ما فيــك

الباهية

حلمي على قدّي

ڨـاع الخابية ــ الطيب بوعلاق

موّال أوّل ـــــــــــــــــــ

بْلُونِ التَّعَبْ
وِبْضَيْ نَجْمة بْعيدة
بْطَعمِ الوَجَعْ
وِبْمُرّ كِلْمِةْ آهْ
تِمْشي الخَطاوي
عَالدُّروبْ شْريدة
وِتْطُولْ سُور اللِّيلْ .. تِتْحَدّاهْ
يَلِّي بْنِيتْ السُّورْ
عَلِّي وْزِيدَهْ
ما زاد شَيْ إِلاّ فْڨِدْ مَعْنَاهْ
وِالحُرّ ، حتّى وِالسّلاسِلْ فْإيدَهْ
بْإِيدَهْ يْهِدّ السُّورْ
وْيِتْعَدّاهْ

وْغُدْوَة وَلَدْ .. غُدْوَة بَلَدْ
غُدْوَة .. وَلَدْ مَفْطُومْ عَالتَّنْهيدَة
غُدْوَة .. بَلَدْ يا مَجْمِلَهْ مَحلاَهْ
يَمْطِرْ عَليهْ الْوَعدْ .. يِنْبِتْ عِيدَهْ
فُوڨ التَّعَبْ
بِين الْوَجَع وِالْآهْ ،
لاَ تِرتْعِشْ مِالْخُوفْ مَدِّةْ إِيدَهْ
ذَا مَدَّها في الْجَمْر يُومْ شْتَاهْ
وِيْمِدّهَا في ڨلب نار شْدِيدَة
وْلُو تِنْڨطَعْ ما يْمِدّها لأعْدَاهْ
لَنَّهْ وَلَدْ
مَفْطومْ عَالتّنْهيدة
لَنَّهْ بَلَدْ
يا مَجْملَهْ ... مَحلاَهْ

موّال ثاني ـــــــــــــــــــــ

موّال ثاني
يا وْجاعنا
يا طالعة في العالي
وْياحلامْنا
يا نازْلة للڨاع
وْيا جْراحنا
يافارعة يا دْوالي
عْناڨيدها تِبْكي مَعَ الجَمّاع
وْيا صَبر
يا صَبّار نَبْتِكْ جالِي
يا طَعْمْ واحِد .. ما عَرَفْنا انْواع
وْيا ذِلّ
آش تْفيدْ فيك مْشالي
لا ظْهُورْ تِحمِلْ..لا صْدُور تْساعْ

ڨالِت صُروف الدَّهر :
هذا حالي
وْنَا..عْيِيت مِالنّخّاس وِالبَيّاع
إذا شْهيلي الرِّيح
صار جْبالي
وْإذا رْخيص السُّوم
صار الغالي
وْصار الصّبر عالجوع دِينْ الوالي
.......
.......
.......
دِينُوا بْدين الكفر يا جِيّاعْ

موّالان  ـ الشاعر الطيب بوعلاق

أليف الوطن ـ الطيب بوعلاق

شَيءْ .. اِشْتْهِيتْ نْجَسّدُه بْكِلْمَاتْ
 لَكِنْ حينْ ڨُلْتُه مَاتْ ، 
 دْفِنْتُه كْما الأسْرارْ 
 وْرَاء الأسْوارْ  
 وْرَاء الأمْرارْ وِاللَّذَّاتْ 
 وِبْكيتْ ، 
بَعْدْ ضْحكتْ ، 
بَعْدْ نْسيتْ  ... 
حتى فات 
مِالوقتْ كلِّ الوقتْ  
حتى المْسافَة وْفاتْ ... 
تْسَاءِلْتْ : 
هَالْحَياةْ .. 
ثمّاشْ فيها شيْ ، 
تَفْنَى ، وْيبقَى حيْ ؟! 
ڨالتْ : 
هُوَ اللَّاشَيْءْ 
وِاذا تْسَمَّى .. مَاتْ . 
ما أكْبْرِكْ .. 
ما أوْسْعِكْ .. 
ما أعْظْمِكْ .. 
يا سْكاتْ !!!

سكات ـ الطيب بوعلاق

لا تِسْألِ النوّار :
في مِزْهَرِيّة أحلى..
وَلَّا في كَاسْ بِلّار ؟
لا تْحيّرُه بأسئلتكْ
لا تُوجعُه بَاحلامكْ
ولا تْورّطُه في معنى 
موجود كان في كْلامكْ 
وْلا تْخَيّرُه في مْشاغْلِكْ وِتْلَزّمُه يِخْتَارْ ... 
إنتِ لْـ في لحظةْ جُوعْ
جوعْ  ڨْدِيمْ عايش فيك ،
مفجوعْ .. 
فاجعْ كل شيء حُولِكْ وْدايرْ بيكْ ،
وَحْدِكْ اخْترْتِ المزهرية 
وْبَعْدْ ڨُلت الكاسْ ،
وْوَحْدِكْ وْضَعْتِ الْحَادْ في السِّكِّينْ عالأنفاسْ ،
وْوَحْدِكْ 
عَلَى 
وَحْدِكْ
مَعَ 
وَحْدِكْ 
بْنيت أسوارْ ..
بِينِكْ وْبِينِكْ ، حِينْمَا 
وْجَعْت الحَيَاة في حْيَاتْهَا
وِفْصَلْتها على ذاتها
كِ فْصَلْتْ بين الطينْ 
وْبِين السِّحْرْ في النوّارْ

واقعية ـ الطيب بوعلاق

لو كنت شاعر

لَعْيُونْها الّي سَاهْرَة وْما نامِتْ
وِلْريحْ ريحِةْ شُونْها 
وِلْكُل آهَة عَاللِّيالي عَامِتْ
وْما فاضت بْمَكْنُونْها 
وِلْصَبْرَها عَالصَّبْرْ ، وْياما انْضامِتْ
وْما حْكاتْ يُوم مْحُونْها ...
لَوْ  كُنْتْ وحدي عَالهَيُولَى الصّامِتْ 
وْلا ڨَبْلْ ڨَبْلِي حِينْها 
كُنت اِحْتَمَلْت وْجُودْ .. 
مْزِجْتُه بْطِينْها 
وْوْصِفْتْ لُه كَمِّ الفَراغْ الشّامِتْ
في وحدتي مِنْ دُونْها 
حتى مْتَى هَالُه العَدَمْ ، وِظْلامِتْ 
	حْدُودِ العَدَمْ بْلا عْيونْها
وَشْوَشْتْ له حروف اِسمها .. 
ـــ أُمِّي ـــ  
وْڨُلْتْ لُه : 
! كُونها

الطيب بوعلاق ـ إليها .. إلى أمي

خَطْوَة .. عْلَى خَطْوَة .. عْلَى خَطْوَة 
وإطويها مِيل وْراء مِيل
اِلعِينْ عْلَى شَمْسِةْ غُدْوَة
مَاهْيَاشْ عْلَى رْصِيف اللِّيلْ

ما تْعِيشْ عْلَى رْصِيف حْكاية
مغزولة بْحِبْكِةْ لَيَّامْ
مكسُورة أحلامكْ في مْراية
مَنشُورة عْلَى حَبْلْ كْلامْ
خَطْوَاتِكْ خَلّيها لْغايَة
كِالواد لْوِجْهاتُه يْسِيلْ
لِّي عِينُه عْلَى شَمْسِةْ غُدْوَة
ما يْعِيشْ عْلَى رْصِيفْ اللِّيلْ

وْلَوِّجْ في خْزايِنْ لَحْظاتِكْ
وِاسْرِڨْ عُمْرِكْ مِنْها وْعِيشْ
وْلَوَّحْ في الدِّنيا جْناحاتِكْ
وِافْرِدْهَا في حْياتِكْ رِيشْ
ما يْفيدِكْ يرجع ما فاتِكْ
وْإنْ فات كْثِيرْ مْعَ قْلِيلْ
لِّي عِينُه عْلَى شَمْسِةْ غُدْوَة
ما يْعِيشْ عْلَى رْصِيفْ اللِّيلْ

لِّي عِينُه وْڨَلْبُه عْلَى شَمْسَة
يَنْزَعْها مِنْ لِيلُه الشّاتي
يْوَشْوِشْها ، يْدَفِّيها بْهَمْسَه
وْيَزْرَعْها في رِيحْ مْواتي
يَا طِينْ وْمِحْتاجْ لْلَمْسَة 
.. وْيَا رُوحْ وْمِحْتاجَة دْلِيلْ
ما تْدِلِّكْ كان شَمْسِةْ غُدْوة
لَوْ ضُعْتْ عْلَى رْصِيفْ اللِّيلْ

Taieb Bouallegue

Popular tracks