قصيدة لشاعر السويس طارق منجي .. القصيدة كتبت عقب احداث الاتحادية 5 -12 -2012 إهداء للشهيد ياسر ابراهيم

الوصية :

حبيبتي .. يمكن تكون اخر رسالة اكتبها ليكي
من غير الم من غير بكى من غير حداد
بلغي امي التحية .. ابعتيلها ميت سلام
واتلي عليها الوصية ..
امي الحبيبة .. بالله عليك استحملي
داري ف دموعك داريها ... ارحميني
مش انتِ الي علمتيني ..
من صغري كيف احب انا الوطن .. فمتزعليش
ليه معلمتنيش .. اشتم وازم ف البلد
لما غيري اتجلد .. سابها ومرجعشِ
علمتيني ليه م الموت مخافشِ
مدام دلوقتي بتخافي
اوصيكي ياما بالولاد ... مع إني لسة م دخلت دنيا
اخلقيلي م القضية .. يجي 50 الف ابن
ان مات شهيد .. يتولد غيره الي يقدر ع الفدا
ابن الشهيد لازم يكون جامد حديد .. م ينخرش جواه الصدا
خليكي فكراني يا بلدي واياكي يوم لو تنكري
الكفن مبلول بدمي .. جوة طينك حسسيني بالدفا
كوني مرة يا بلادي منصفة
كنت بحلم اني ابقى واني ابقى .. يكفيني انك انتِ تبقي
اما بعد ..
الحداد .. عمره م يوقف نزيف الحلم .. ولا يقدر يخليه علم
دمي ظاهر ع العلم .. محتمل .. يطير النسر من جرحه
لكن عمره ف يوم م يموت .. دمي ضايع ف السكوت
بحلم اني اشوف ولد .. فرحان ودايب ف البلد
ضحيت انا لجلن يعيش .. فمتسرقيش حلمه
كفاية الحلم ضاع مني ..
ف النعش راح ادندن واغني 
وسامع صوت كإنه هتاف
محدش فينا تاني هيخاف .. وجي ورايا يجي الاف
مش كل حاجة يا بلدي دم
معدش فيكي مكان لنعي ..
خفي حبة ع الشباب ..
ف الموت منيش مغترب  .. الحلم ونسني
معاد الي مات ولو دفعو الف دية
روحي ليكي هدية ..
خديها بس صوني الجسد جواكي
وهي دي يا مصر الوصية
وصية إبنك وضناكي ..

قصيدة الوصية للشاعر طارق منجي

ع الارض نايم يا عزيز - طارق منجي

الوطن هو اللي مات - من سجن جمصة -طارق منجي

المدفونين بالحيا - طارق منجي

المزيق العتيق

مشهد من على طبلية الاعدام

سحابة صيف - طارق منجي

شاعر شاب حُر .. سويسي ثورجي مناهض للعسكر

Tarek Mongy

Popular tracks