معين شمس

معين .. خايف اقول اللى في قلبى

معين. . مزيكا جديدة

قالتلي نتفارق 
قولتلها مش فارق 
بس اللى كان فارق 
مش لازم ابقى ضعيف
ودموعي تسبقني 
وقت الفراق ده مخيف 
وتقيل على قلبي 
انا بس كان ذنبي اني آمنتلها 
كدبت كل الكون وصدقت حلفانها 
والله علشانها خسرت نص الناس 
منهم قريب مني ويشيلني فوق الراس 
كدبتهم وخلاص 
معرفش كنت أعمى !
أو عيني مش شايفه غير هيا واحده وبس 
وازاى هنعرف نحكم ع القلب يوم لو حس ؟!
والحب بردو حظوظ 
وانا حظي واضح نحس 
كان قلبي طفل بيتدلل 
ماشي على الأرض 
كان ماسك ورد 
رايح لحبيبته بيتمخطر 
لابس جلابيته ومتعطر 
كان لونها ابيض رجعت احمر 
فوقها السكين 
شريره بترقص ع الجثه
وبتضحك زي الشياطين 
دمي بينقط من ايدها 
عمال بيسيل 
ازاى وانا قلبي بيحييكي يرجعلى قتيل ؟!
طب كنتي سبتيني افرح شويه معاكي 
اكتبلك اشعاري وأغني الحروف في هواكي 
واوصف لكل الناس جمالك الساحر 
وقصيدتي تبقى تراث وأصبح بيكي شاعر 
لكن من الاخر كل الكلام ده وهم 
هكتب قصيده اكيد عن واحده غيرك أهم 
عن واحده مستنيها جايه في زمن تاني 
تمسح تاريخ مهجور وتداوي أحزاني 
وانسى اني كنت معاكي
وافرح هناك وياها
تسألني عن ذكراكي 
اضحك واقول نسيناها 
السيره دي ما بلاها 
يدوب فاكرها طشاش
كان حبها نكره 
مات من قبل ما يتعاش 
تسألني عن بكره وحياتي الجايه معاها 
وعيونها كلها غيره والنار بتقيد جواها 
ابتسملها بهدوء 
وبنظره كلها شوق 
توصف معاني الحب 
مش معني اني في يوم 
حسيت ده يبقى حب ..
الحب فيه هفوات 
وحاجات يجوز تخدعنا 
أحاسيس بتاخد وقت 
نكتشف ملهاش معنى 
وتروح مع الايام 
أما انتي بقى بالذات 
حبك ده يبقى دوام
يا ذكرى في روحي مش بتموت 
صراخ القلب مش بالصوت 
بموت جوايا 100 مره 
مفيش مره صادفني الموت 
وبضحك بس من برا 
ووجعي بكتمه في سكوت 
تشوفني الناس تمام جدا 
وأضحك وأبان مبسوط 
ورغم أن الوجع ساكن 
حزين قلبي صحيح لكن 
مسيري انسى الالم ويفوت

#معين_شمس

قالتلى نتفارق

تعرفي !
مش عارف أبرر موقفك ولا حتى احدد موقفي 
حاسس كأني شمعه دايبه نورها قرب ينطفي 
كل شيء كان حلو فيا فجأه قرر يختفي
أو يكتفي 
بزرع ورود وبتقطفي ورقتها وتسيبي العامود 
دبلان عليه دموع الندى 
انا مستاهلش كل ده 
عملتي ليه فيا كده !
و أنا كنت أكتر حد شايلك جوه عينه وطمنك 
كنت بفهم من عنيكي إن كان فيه حاجه بتشغلك 
كنت بسمع فيكي خوفك 
كنت بفرح يوم ما اشوفك 
كنت خايف من ظروفك تبقى حاجز يوم ما بينا 
كنت اشوف الويل في قربك أحلى جنه 
كنت بتلهف لكلمه من شفايفك فيها شوق 
كنت طاير بيكي فوق 
كنت مستعد أدوق النار ولا انتي تبعدي
لسه بقنع نفسي لأ ، لأ لايمكن تقصدي 
تعلقيني بيكي ثم تودعيني بدون سلام
هو ده مسك الختام ؟
ولا ده حسن الممات !

حبيت
علشانك حجات 
محبتهاش ف يوم ابدا 
وكرهت برضو كتير حجات 
حبيتها وكنت سعيد جدا
من غير ما اعرف
أو حتى أسأل 
كان شايي خفيف وشربته اتقل 
حبيت ازاى محشي الفلفل !
وانا عمري ما كنت بقرب ليه 
ولأول مره اخد بالي 
عمرو دياب غنى وقال ايه 
هو ده اللي حلمت بيه 
ضحكته نظره عنيه

هو ده اللي حلمت بيه ؟!!
لااا مش هوه 
ضحكته نظرة عنيه ؟! 
فيهم قسوه من جوه 
انا دايس على قلبي بقوه ولحد ما تخرجي من جواه 
خدتيه زي الورد مفتح ورجعلي بينزف جرحه معاه
فعلا معاناه 
قلبي الموجوع عيط بدموع
بتوقف نبضه وشريانه
كان نفسي الاقيلك عذر حقيقي
ينفع اسامحك علشانه ! 
الجرح بيصعب نسيانه لو كان من حد يعز عليك 
تقطع من قلبك تديله ولما بيشبع بيعض ايديك
وإن يوم احتاجته ما يسأل فيك 
قلوبهم طوب ووشوشهم fake 
بالله يا قلبي الله يخليك متفكرنيش بحجات فاتت 
عاشت جوايا واهي ماتت 
وانا مين في حبيبتي يعزيني !

بيني وبيني

بلاقيني بقول انا ليه مشغول عني ب عنها 
انساها وفكك بقا منها 
بيني وبيني 
الدمعه بتطلع من عيني 
مش علشانها
لأ علشاني 
من يومها مش عارف انساها 
ونسيتني هي في ثواني

و ربنا يشهد

حبيتك حب محبتهوش ولا عمري هحبه في مره لحد 
على قد الحب اللي انا حبيته كرهت بجد 
قدمت السبت مشوفتش حد 
سكنتك قلبي وقلبك صد 
وانا بابي عليا خلاص أترد ولا عمره هيفتح دراعاته 
وحنيني وشوقي خلاص ماتوا 
مبقتش بآمن حتى بحب 
وكفاية عليا ايام فاتوا 
ضاعت على حد سقاني الغلب

و أشهد يارب 
مفيش ف إيديا شيء معملتهوش
حتى الميزان من كتر شيلته فجأه طب

ادي الحياه و ادي النصيب 
تديه عنيك تلاقيه يسيب 
ويروح لحد آداه عنيه 
تقلان عليه
يا كل حلم حلمت بيه مش طالب منك غير تُصدق
وانا هثبت وياك على مبدأ 
هسعالك .. وانت هتتحقق 
وتحققني 
خطاويا الجايه هتسبقني وانا هثبتلك 
وهتحكم بينا الايام 
مين اللي هيندم ع التاني
ومين اللي هيطلع قدام

#شمعه_دايبه

#معين_شمس

معين شمس

نور السعدنى