KONEKTA

Un sabbath sumamente bendishona pa bo, bo hogar, bo famia  y tur ku ta rondona bo.

SEÑOR ta papia ku nos di e siguiente forma awe mainta:
'Keda den Mi i Ami lo keda den boso. Un taki no por duna fruta di su mes, sin ku e ta pegá na e mata. Meskos asin'ei boso no por karga fruta si boso no keda den Mi.
Huan 15:4
https://bible.com/bible/818/JHN.15.4

Sin ta konekta ku e tronko; ku ta KRISTU HESUS, abo y ami NO, por karga niun fruta di e kunuku ku nos SEÑOR ta manega.

E frutanan ku nos lo karga, tin di haber ku tres area importante y esakinan ta:
1. E area bondat;
2. E area di hustisia;
3. E area di berdat.

E palabra ta splika nos bon kla kwa ta e frutanan ku KRISTU ta papia di dje:
'Pero loke Spiritu di Dios ta generá den hende ta amor, goso, pas, pasenshi, amabilidat, bondat, fieldat, humildat i dominio propio. E kosnan ei no ta bai kontra ningun lei.
Galatanan 5:22-23

E asuntu di konekshon ku KRISTU HESUS, no ta awe si majan no, of awor aki si y aki ratu no.

Pa nos usa e terminologia sibernetiko e ta bisa asina aki:
Nos konekshon ku KRISTU HESUS ta "online, real time".

🙏🏽SEÑOR danki pa duna nos e posibilidat di ta konekta 24/7 pa tur eternidat ku KRISTU HESUS y ku e speed ku SPIRITU SANTU ta obra den e konekshon ta simplemente esun di orashon. AMÉN Y AMÉN.🙏🏽

BO TABATA SA KU E PALABRA, E BEIBEL, TA KITA TUR SPYWARE, MALWARE Y TUR SORTO DI WARE FOR DI NOS:
'Si boso keda den Mi i mi palabranan keda den boso, pidi e ora ei loke boso ke i boso ta hañ'é.
Huan 15:7

TA E PALABRA TA DIRIGI BO PA KEDA KONEKTA KU E SERVER KRISTU HESUS Y BO OUTPUT LO TA DEN E AREA DI BONDAT HUSTISIA Y BERDAT.

FELIS SABBATH Y NO LAGA NIUN HENDE NI NADA DISKONEKTA BO.

BENDISHON
WSN

KONEKTA

NO SEA TERKO

Riba e mainta glorioso aki, SEÑOR lo bendishona bo, bo hogar/famia y kontaktonan grandemente.

SEÑOR Su palabra ta papia ku nos asina aki:
'Konfia den SEÑOR ku henter bo kurason i no sea tèrko. Tene kuenta kunÉ den tur loke bo hasi i lo E mustra bo e kaminda korekto.
Proverbionan 3:5-6
https://my.bible.com/bible/818/PRO.3.5-6

E jamada primeramente ta pa bo no sea terko.

Un persona terko ta konfia riba su mes razonamentu y no sa di pone su mes di akuerdo ku niun otro hende.

Ku otro palabra, SEÑOR ta jama nos pa nos bandona nos propio huisio y desishonnan y konfia plenamente riba djE.

E persona ku pa kada desishon ku e mester tuma ta tene kuenta ku SEÑOR, lo  bai e sumamente bon, pasobra tur su desishonnan ta basa riba hasi e boluntad di SEÑOR.
Esey ta ensera pues, debi ku SEÑOR konose futuro, E ta alerta bo y bo toma di desishon ta basa e ora di akuerdo ku Su boluntad, kual semper ta noble, korekto y ta duna of hiba na bida.

🙏🏾SEÑOR danki pa ilumina nos awe mainta ku Bo palabra. Nos ta entrega tur kos den bo man y pidi Bo PSIRITU SANTU guia nos den kada desishon ku nos lo tuma di awor padilanti. Den nomber di KRISTU HESUS nos ta pidi y gradisi. Amén y amén.🙏🏾

E palabra ta bisa nos finalmente:
'Stòp ku terkedat, respetá SEÑOR i bira lomba pa maldat.
Proverbionan 3:7

No tin mihor ehempel pa sigui, ku no ta esun di nos Señor Kristu Hesus.

KRISTU HESUS TA E KAMINDA, BERDAT Y BIDA

STOP KU TERKEDAT
WSN

NO SEA TERKO

E LAMCHI DI DIOS

Risibi SEÑOR su bendishon riba e djaluna aki den bo bida, bo hogar, bo famianan y bo amistatnan.

E palabra di SEÑOR ta bisa nos lo siguiente awe:
E dia siguiente Huan a mira Hesus ta bini serka dje. El a bisa: ‘Ata e Lamchi di Dios, ku ta kita piká di mundu! Huan 1:29

SEÑOR a hasi bon kla na humanidat en general y su pueblo partikularmente ku HESUS ta Su lamchi ku ta kita pika di mundu.

Ku otro palabra, pa medio di e sakrifisio di KRISTU HESUS  e provishon di pordon a keda establece y pone na nos disposishon.

Pa nos por risibi e provishon ey, nos mester asepta HESUS komo nos salbador personal y arepenti di nos pikanan.
Resultado di e proseso aki ta un bida kompletamente transforma, un bida ku tantu e pensamentunan, su expreshonnan y akshonnan ta empeña pa hasi loke ta bon, mihor bisa, kumpli ku e boluntat di nos TATA na shelu.

E mensage na nos awe ta, pa nos garantisa nos kontinuashon na bida eterno, dor di asepta e lamchi di Dios ku ta kita nos pikanan.
Nos por enfatisa ku KRISTU HESUS ta e uniko ku por kita nos pikanan, debilidatnan y kualkier difikultat ku nos tin.

🙏🏽SEÑOR nos ta gradisi Bo pa a pordona nos soberanamente pa medio di Bo yu stima KRISTU HESUS. Danki pa mustra nos awe mainta, ku e pordon aki por ta efektivamente obrando den nos, na momentu ku nos arepenti y komberti di nos mal kaminda. Danki pa Bo SPIRITU SANTU ku ta den nos pa guía nos na KRISTU HESUS. Den Su nomber nos ta gradisi y alaba Bo santu nomber. Amén y amén🙏🏽

E palabra ta bisa nos finalmente:
Esun ku tin e Yu, tin bida; esun ku no tin e Yu di Dios, no tin bida! 1 Huan 5:12

MI RUMAN, NO PROKRASTINA BO DESISHON PA KU KRISTU HESUS, PASOBRA BIDA NO TA DEN BO MAN.

GARANTISA BO PARTISIPASHON NA BIDA ETERNO
THE POWER OF THE WORD

E LAMCHI DI DIOS I

KEN TA DIRIGI BO

Un djamars sumamente bendishona pa bo, bo hogar, bo famia y tur bo kontaktonan y amistatnan.

E palabra di nos SEÑOR ta bisa nos lo siguiente:
P'esei mes mi ta bisa: Si boso laga Spiritu di Dios dirigí boso bida, boso lo no satisfasé boso mal deseonan. Galatasnan 5:16

E teksto aki ta bisa nos ku otro palabra, ku tin un batalla formal ta tuma lugar den e ser hende, pasobra e SPIRITU SANTU ta dirigi den un direkshon y di otro banda e deseonan karnal ta dirigi den e direkshon opuesto.

E SPIRITU SANTU ta dirigi nos na bida, pasobra:
pero si, pa medio di Spiritu Santu, boso pone un fin na e práktikanan di maldat, boso lo biba! y Tur hende ku ta laga Spiritu di Dios guia nan ta yu di Dios. Romanonan 8:13, 14
Loke mi ta bai bisa ta bèrdat, Kristu ta mi testigu. No ta gaña mi ta gaña; sí, mi konsenshi bou di guia di Spiritu Santu mes ta konfirmá lo siguiente: Romanonan 9:1
Esun ku no tin Spiritu Santu no ta aseptá loke ta bini di Spiritu di Dios. 1 Korintionan 2:14
Ma ora e Spiritu di bèrdat bini, lo E guia boso na bèrdat kompleto i konta boso tokante kos ku ta bai pasa. Lo E duna Mi gloria, pasobra loke E konta boso E ta haña sa di Mi. Huan 16:13, 14.

Ku otro palabra, e tekstonan aki ta mustra klaramente ku e SPIRITU SANTU ta guia na KRISTU HESUS, E ta pone fin na praktikanan di maldat, E ta guía nos na obediensia, E ta pone nos konsenshi bow di Su control, E ta guía na berdat y laga kombense nos di e kosnan di Dios y E ta guía nos na e akshonnan di grasia ku ta duna biba.

E deseonan di karni ta guia na:
Ta bon kla kiko esnan ku ta sigui nan mal deseonan ta hasi. Nan ta kometé akto di inmoralidat, nan ta hasi kos impuru i ta biba un bida parotin; nan ta adorá dios falsu i praktiká bruheria; nan tin un aktitut hostil, nan ta trese pleitu i ta envidiá otro hende. Nan ta kla pa rabia, nan ta buska nan mes probecho i ta trese desunion i partidismo. Nan ta hende yalurs, buraché, parandero i otro kos semehante. Mi ta atvertí boso manera mi a hasi un bia kaba: esnan ku komportá nan asina lo no tin parti den reino di Dios. Galatanan 5:19-21

E mensage na nos awe ta, pa nos laga SPIRITU SANTU kombense nos pa skohe pa bida ku ta den KRISTU HESUS, skonde den Dios TATA, pasobra deseo di karni ta tene nos pafo di e reino di Dios.

🙏🏽SEÑOR danki pa Bo SPIRITU SANTU ku ta guia nos na bida, ku ta den Bo yu KRISTU HESUS. 
SEÑOR hasi di nos un kreashon kompletamente nobo, pa asina nos deseonan karnal ta sinkronisa ku guia y instrukshonnan di SPIRITU SANTU. AMÉN Y AMÉN🙏🏽

Un hende ku ta uní ku Kristu ta un kreashon nobo. E kosnan di ántes a pasa bai i loke ta nobo a yega. Tur esaki Dios ta hasi; El a rekonsiliá nos kunÉ pa medio di Kristu i a duna nos enkargo pa anunsiá e rekonsiliashon ei. 2 KORINTIONAN 5:17, 18

MI RUMAN, E KONSEGO TA PA NOS SKOHE PA BIDA Y BIBA DEN KRISTU HESUS.

LAGA SPIRITU DI DIOS GUIA BO
THE POWER OF THE WORD

KEN TA DIRIGI BO

NO DESANIMA

Awe nos ta kibra e siman na 2 atrobe y nos ta risibi SEÑOR Su bendishona riba e dia aki pa nos kontinua y mira e pronte regreso di su yu KRISTU HESUS. Su bendishon lo kubri bo, bo hogar, bo famia y tur bo kontaktonan y amistatnan.

SEÑOR Su palabra ta bisa nos lo siguiente awe mainta:
Laga nos tene nos bista fihá riba Hesus, ku a bai nos dilanti riba e kaminda di fe i ku lo hiba nos tambe na final di e kaminda. Hesus a sufri na krus, sin a sinti bèrgwensa di e morto akí, pasobra E tabata sa ku despues di e sufrimentu akí lo El a haña alegria; i awor E ta sintá na man drechi di trono di Dios. 3Meditá riba Esun ku mester a soportá tantu resistensia di pekadó; ya boso lo no kansa ni desanimá. Hebreonan 12: 2+3

E teksto di meditashon ta amonesta nos pa mantene nos bista figa riba HESUS y esey ta sumamente importante, pasobra na momentu ku nos kita nos bista for di djE, ku tur probabilidat nos bista lo keda figa riba otronan ku no a kana e kaminda di fe y lo no konose nan propio kaminda.

Naturalmente nos no sa ki ta e situashon ku kada unu di nos ta pasando aden, loke ku si nos por bisa bo ta ku HESUS a kana e kaminda ey di sufrimentu, dolor, persekushon y hasta e morto na e krus di Kalvario, konfiando den nos TATA na shelu ku lo a rekompens'E pa su obediensia genuíno na djE.

Nos komo siguidornan di KRISTU HESUS tambe mester ta konsiente ku nos lo pasa tribulashon, persekushon y tur klase di dolor y sufrimentu, pa e simpel hecho ku nos no ta di e mundu, pero nos ta den e mundu.

E mensage na nos awe ta, ku nos Salbador a bai nos dilanti riba e kaminda di Fe, sabiendo Kiko tabta sper'E y awe E ta sinta riba e trono di Su TATA na shelu. Laga nos persevera den kualkier situashon ku nos por ta pasando, pasobra nos rekompensa ta sigura.

🙏🏽Nos TATA ku ta na shelu, bo nomber sea santifika awor y pa Semper. Fortifika nos boluntat liber pa nos permanece den e kaminda di bida aki, sabiendo ku Bo lo kumpli ku Bo promesanan hasi na nos den gran forma. Danki KRISTU HESUS pa a kana e kaminda pa nos y ta dispuesto pa kane ku nos. Amén y amén🙏🏽

KRISTU ta bisa nos awe lo siguiente:
Esun ku triunfá, lo Mi pone sinta banda di Mi riba mi trono, manera Mi mes a triunfá i ta sintá banda di mi Tata riba su trono. Revelashon 3:21

MI RUMAN, NOS TIN REKONPENSANAN SPERANDO NOS, PUES PERSEVERA PA NOS TRIUNFA.

NO DESANIMA, PASOBRA, KRISTU PRONTO LO FINALISA SU TRABOW.
THE POWER OF THE WORD

NO DESANIMA

DIOS A YAMA NOS

Un djawebs sumamente bendishona pa bo, bo hogar, bo famianan, bo amistatnan y kontaktonan.

E teksto di meditashon ta bisa nos lo siguiente awe:
Pero boso ta un pueblo skohí, saserdote real, un nashon konsagrá na Dios, propiedat di Dios mes, skohí pa proklamá e obranan magnífiko di Dios ku a yama boso pa sali for di skuridat i drenta den su lus maravioso. 1 Pedro 2:9

SEÑOR a yama nos pa nos sali for di skuridat y drenta den e lus admirabel y maravioso. E lus ey ta Esun grandi ku ta lusa tur esnan ku SEÑOR a jama, pasobra e palabra ta exprese di e forma aki:
E lus berdadero ku ta lusa tur hende, tabata biniendo na mundu. E tabata den mundu i mundu a haña eksistensia pa medio di djE, ma e hendenan di mundu no a rekonosé ken E ta. Huan 1:9-10

Bida tin su origen den e yu di Dios ku ta KRISTU HESUS y despues ku Ela hasi posibel atrabes di su bida ku humanidat por keda salba, SEÑOR a pone tur kos bow di su pianan, asina ku tur ser krea mester dobla nan rudianan p'E.
El a humiliá su mes i a bira obedesidu te na morto, sí, morto na krus. P'esei Dios a als'É na e lugá di mas altu i a dun'É e nòmber ku ta riba tur otro nòmber. Pa asina na honor di nòmber di Hesus tur kriatura dobla nan rudia, tantu esnan den shelu, komo esnan riba tera i den e mundu bou di tera. I nan tur konfesá ku Hesu-Kristu ta Señor, pa gloria di Dios Tata. Filipensenan 2: 8-11

E mensage na nos awe ta, pa nos sali for di skuridat y bria pa medio di e lus grandi KRISTU HESUS ku ta hasi nos bria den gran manera, reflegando e kosnan maravioso ku SEÑOR a, ta y lo hasi pa kada un di nos y humanidat en general.

🙏🏽SEÑOR nos ta gradisi Bo pa e previlegio ku Bo a duna nos pa via di e lus mayo KRISTU HESUS, ta un testimonio poderoso den e mundu di skuridat aki ku nos ta aden. Den su nomber nos Salbador KRISTU HESUS nos ta gradisi Bo. Amén y amén.🙏🏽

HESUS ta bisa nos;
Boso ta lus pa mundu. No ta posibel skonde un siudat situá riba un seru. Mateo 5:14

MI RUMAN, BAN BRIA PA MEDIO DI NOS BIDA TRANSFORMA.

NOS TA LUS PA MUNDU
THE POWER OF THE WORD

DIOS A YAMA NOS

ABO TA KOMPRONDE

Un dia di preparashon sumamente bendishona pa bo, bo hogar, bo famianan kompletu y tur bo amistat y kontaktonan.

HESUS papiando ku su pueblo a bisa nan lo siguiente:
P'esei El a bisa nan: ‘Ora boso alsa Yu di Hende, boso lo sa ku “AMI TA” i ku Mi no ta hasi nada riba Mi mes. Mi ta papia solamente loke mi Tata a siña Mi. Huan 8:28

HESUS na un di e okashonnan ku E tabata siña e pueblo, nan no a kompronde e lokual ku E tabata splikanan. Pues na e momentu ey Ela mustranan bon kla, kon pega e ta ku su TATA na shelu.

Aunke HESUS ta yu di Dios, E ta bisa nos akinan ku ku ela somete su mes kompletamente na Su TATA ku ta na shelu, y ku tur su akshonnan tabata kompletamente bow di direkshon di Su TATA na shellu.

Di  e mesun manera ey HESUS ta siña nos tambe awe ku nos mester obedese nos TATA ku ta na shelu, pasobra e promesanan hasi na nos, sea direktamente di TATA of direktamente di HESUS mes, ta bow di kondishon di obediensia.

E mensage na nos awe ta, pa nos no tuma nos relashon ku divinidad ligeramente , pero pa nos permiti SPIRITU SANTU genera den nos e donnan pa nos por hiba un bida di obediensia, tantu na TATA, komo Yu, komo na SPIRITU SANTU.

🙏🏽SEÑOR nos ta bin den Bo presensia gradisiendo Bo pa Bo amor demonstra na nos. Danki pa kubri nos ku e sanger presioso, maravioso y poderoso di Bo yu KRISTU HESUS pa pordon di nos pikanan y danki pa Bo SPIRITU SANTU komo nos tutor. Duna nos poder di boluntat pa por kumpli ku Bo boluntat. Den nomber di Bo Yu nos ta pidi y gradisi. Amén y amén🙏🏽

E palabra ta bisa nos: 
Boso ta toka parti na e promesa ku Dios a hasi na e profetanan i boso tambe tin parti den e aliansa ku Dios a sera ku boso antepasadonan, ora El a bisa Abraham: “Huntu ku bo desendensia lo Mi bendishoná tur generashon na mundu.” 26Ta serka boso, na promé lugá, Dios a manda su sirbidó (HESUS pues) pa boso keda bendishoná, ora boso kada unu bira lomba pa maldat.’ Echonan 3: 25-26

MI RUMAN, YA NOS TA PARTISIPANDO DEN E PROMESANAN HASI NA HUMANIDAT Y KU A KEDA KUMPLI DEN KRISTU HESUS DEN GRAN MANERA . É, SOLAMENTE É TA HASI NOS KAPAS PA KUMPLI KU BOLUNTAT DI NOS TATA NA SHELU.

E TA AMI TA
THE POWER OF THE WORD

ALSA YU DI HENDE

NA NOS FABOR

Un siman sumamente bendishona pa  kada un ku ta skucha e voice app aki, pa bo hogar, bo famia y tur bo  kontaktonan.

Nos teksto di meditashon ta bisa nos lo siguiente awe:
P'esei kiko mas nos por bisa? Si Dios ta na nos fabor, ken por ta kontra nos? Romanonan 8:31

E palabra ta hasi un pregunta klave awe: "si Dios ta pa nos, ken por ta kontra di nos?

Ku otro palabra, Esun ku tin tur autoridat, poder y derecho pa kondena nos mes no a hasi esey, ki tribilidat kualkier ser humano ta tuma pa husga te pa yega na e desishon pa kondena nos.

E loke ku Dios a hasi pa nos ta surpasa tur komprondementu y análisis humano y konsekwentemente no tin kondenashon pa esnan ku asepta e regalo di bida duna na nos den KRISTU HESUS.
Ken lo riska kondená nan? Niun hende! Kristu-Hesus ta e úniko hende ku no solamente a muri, pero tambe a lanta for di morto pa nan. E ta Esun ku ta sintá na man drechi di Dios i ta intersedé pa nos! Romanonan 8: 34

E mensage na nos awe ta, ku nos tin un intersedor na nos fabor den presensia di nos SEÑOR y konsekuentemente nada y ningun ser krea por ta kontra di nos.

🙏🏽SEÑOR den e trankilidat di e mainta aki, nos ta gradisi Bo pa e lokual ku Bo a, ta y lo hasi pa kada un di nos. Danki pa e sakrifisio di KRISTU HESUS komo garantía di nos existensia. Amén y amén🙏🏽

Finalmente:
Pero den tur e kosnan akí nos ta mas ku viktorioso pa medio di Esun ku a stima nos. Pasobra mi tin sigur ku ni morto ni bida, ni angel ni outoridat, ni kos presente ni kos futuro, ni podernan spiritual, ni e lugá di mas altu ni esun di mas profundo, ni niun otro kos ku Dios a krea, no por separá nos nunka di e amor ku Dios a mustra nos den persona di Kristu-Hesus nos Señor Romanonan 8: 37-39

MI RUMAN, NO TIN NADA NI UN SER KREA KU POR SURPASA E AMOR NOS TATA TIN PA KADA UN DI NOS.

BENDISHON
THE POWER OF THE WORD

NA NOS FABOR

MI TA GABA SU PALABRA

Un djaluna yena ku e goso, pas y bendishonnan pa bo, bo hogar, bo famia, bo amistat y kontaktonan.

E palabra di nos SEÑOR ta relata lo siguiente na nos awe mainta:
Dia mi sinti miedu, mi ta sigui konfia den Bo: den Dios, kende su palabra mi ta gaba, den Dios mi ta pone mi konfiansa; mi no tin miedu di nada, anto kiko hende por hasi mi? Salmo 56: 3+4

E teksto di meditashon ta instruí nos pa sigui konfia den SEÑOR y gaba su palabra.
Awor, den gabamente su palabra, nos ta haña konsuelo pa ku situashonnan penoso ku nos por ta enfrenta, nos ta haña forsa pa bringa kualkier batalla den nos bida y ta pa medio di Su palabra nos tin konosementu di djE, di Su plan di salbashon pa ku nos y Su promesanan hasi na nos.

Kisas awe nos ta bai na enfrenta kualkier situashon di tenshon ku kisas ta duna nos sierto miedu: korda ku e palabra ta bisa nos pa nos no tene miedu.

Nos anker den tempu di prueba ta esaki:
No tene miedu, pasobra Mi ta ku bo, no wak asina spantá, pasobra Ami ta bo Dios. Mi ta duna bo forsa, yuda bo, Isaías 41: 10.

E mensage na nos awe ta, pa nos yama e presensia di SEÑOR den nos bida, pa asina nos kita tur tipo di miedu, pa medio di Su presensia nos kurason, nos mente, sentimentunan, analisisnan ta funda riba Su palabra, palabra di nos Dios eterno.

🙏🏽Nos TATA eterno, Bo nomber sea alaba y glorifika den gran manera. Danki pa a komarti bda ku nos y a duna nos Bo palabra komo instrumento y instrukshon kon pa hiba un bida ku ta agrada Bo santu nomber. Danki pa KRISTU HESUS e palabra enkarna ku a laga un legado atrás pa nos sigui kabalmente. Den Su nomber nos ta gradisi Bo. Amén y amén🙏🏽

Finalmente sa esaki:
Pasobra Ami ta SEÑOR, bo Dios, Mi ta kohe bo man tene i bisa bo: “No tene miedu, Mi ta yuda bo.” Isaías 41:13

MI RUMAN, TUMA E PALABRANAN DI SEÑOR NA KUENTA Y KONFIANAN PLENAMENTE.

NO TENE MIEDU, PASOBRA SEÑOR TA YUDA ABO Y AMI
THE POWER OF THE WORD

MI TA GABA SU PALABRA

SU BOLUNTAT SOBERANO

Un djawebs sumamente bendishona pa bo, bo hogar, bo famia y tur bo amistat y kontaktonan.

SEÑOR Su palabra ta informa nos di e siguiente manera:
'‘Señor, nos Dios, Bo ta digno di risibí gloria, honor i poder, pasobra Bo a krea tur kos; dor di bo boluntat tur kos a kuminsá eksistí i ta kreá.’' Revelashon 4:11, https://www.bible.com/nl/bible/818/REV.4.11

Berdaderamente SEÑOR nos Dios ta merese di haña tur honor y gloria, pasobra den Su imensidat Ela disidi soberanamente pa duna nos bida.

E desishon ey ta irevokabel y tin su proposito ku lo keda kumpli, debi ku ta pa e motibu ey mes, Ela manda Su yu KRISTU HESUS bin entrega Su bida pa nos por keda salba, reskata di e kaminda di desstrukshon ku nos tabata kaminando.

Ku otro palabra, pa grave ku pika ta, e no por kita e boluntat di Dios keda eherse y kumpli den su totalidat y spesifikamente pa ku humanidat, pasobra, ta solamente serka nos e fenómeno di morto a hasi su entrada y impakto y SEÑOR den Su sabiduria a resolve e problema ey riba e krus di Kalvario.

Awe, enfoka riba e krus di Kalvario, kaminda ku e poder, sabiduria y amor di SEÑOR a keda manifesta den Su yu KRISTU HESUS y ku awe E ta sinta riba trono di e TATA y ku pronto lo E bin buska nos pa nos ta kaminda E ta.

🙏🏽SEÑOR den tur trakilidat of turbulensia di e dia aki, nos ta duna Bo tur honor y gloria, pasobra Abo TATA, KRISTU HESUS Y SPIRITU SANTU, Dios eterno, boso so merese esey. Danki pa a garantisa nos partisipashon na bida. Genera den nos e gradisimentu genuino, pa nos por responde na Bo yamada adekuadamente. Amén y amén🙏🏽

Finalmente:
'Mi rumannan, paga tinu pa ningun di boso, pa medio di un aktitut robes, no bira infiel na Dios bibu i bira lomba p'E. Pero tanten e ‘awe’ ku Skritura ta menshoná dura, boso mester animá otro tur dia, di manera ku ningun di boso no ta laga piká gañ'é i sera su kurason. Pasobra nos tin parti na Kristu, si nos mantené e konfiansa ku nos tabatin na prinsipio, te na final. Skritura ta bisa: ‘Si awe boso tende su stèm, no sera boso kurason, manera promé ayá tempu di e lantamentu.’ Hebreonan 3:12-15

MI RUMAN, AWE, PA MEDIO DI E APP AKI, SEÑOR TA PAPIA NA NOS KURASONNAN, NO HASI NOS KURASONNAN DURU, PERO LAGA NOS TAMBE TUMA E DESISHON SOBERANO DI DUN'E TUR HONOR Y GLORIA.

E MERESE
THE POWER OF THE WORD

SU BOLUNTAT SOBERANO

MUSTRA GRATITUT

Abo, bo hogar, bo famia y tur bo amistat y kontaktonan lo ta den gran manera bendishona riba e dia aki pa e grasia di nos SEÑOR eterno..

E palabra ta relata ku Lazaro a keda resusita despues di 4 dia ku e tabata morto y ku den e siman ku nan a ku nan a krusifika HESUS, rumannan di Lazaro a tene un komementu, un bankete p'E. Durante e festividat ey, Maria, ruman di Lazaro, a mustra su gratitut na HESUS dor di hunta Su pianan ku un perfume sumamente kostoso y a seka Su pianan pa medio di Su kabeinan. Na e okashon ey e tesorero di e disipulonan, Hudas, a remarka ku por a bende e perfume pa un prijs igual ku un di 1 aña salario minimo.

HESUS Su kontesta riba e remarke ey tabata:
'Hesus a bisa: ‘Lag'é na pas! Lag'é warda e zeta pa dia di mi entiero. Hende pober boso tin semper serka boso, ma Ami sí boso lo no tin semper serka boso.’ Huan 12:7-8, https://www.bible.com/bible/818/JHN.12.7-8

HESUS su reakshon ta siña nos 2 punto importante:
1. Kualkier akto di gratitut  di nos demonstra na djE no kwestionabel
2. Akto terenal no ta di kompara ku esnan eternal

Sa ku nos forma pa demostra HESUS nos gratitut lo lanta oposishon. Gradisi'E anaway, pasobra no tin nada riba e mundu aki of akshon ku nos por tuma, for di kwa nos por paga HESUS pa e loke ku Ela hasi, ta hasiendo y lo hasi pa nos.

🙏🏽Nos TATA ku ta na shelu, Bo nomber sea santifika awor y pa Semper. Danki SEÑOR pa e sakrifisio di Bo yu KRISTU HESUS riba e krus di Kalvario. Danki HESUS pa a konsidera nos y a soporta tur e insultonan brusko riba Bo, pa awe nos por disfruta di Salbashon, di bida pues. SPIRITU SANTU, danki pa Bo intervenshon. Amén y amén🙏🏽

E palabra ta bisa nos finalmente:
'Hudas no a papia asina, pasobra e tabata preokupá pa e hende pobernan, ma pasobra e tabata un ladron. T'e tabata tene e kaha di plaka i e tabata hòrta sèn afó. Huan 12:6

SA MI RUMAN KU REAKSHON DI DESAPROBASHON DI NOS GRATITUT TA BINI DI ESNAN KU KIER HUSTIFIKA NAN PROPIO POSISHON

NO TIN FORMA PA NOS PAGA KRISTU HESUS BEK
THE POWER OF THE WORD

MUSTRA GRATITUT

TENE NA BIDA

Riba e mainta aki nos ta risibi SEÑOR Su bendishon den gran manera pa via di Su palabra ku ketu bai tin tur poder. Bo hogar, bo famia y bo amistat y kontaktonan tambe ta keda gratamente bendishona pE.

Nos teksto di meditashon ta bisa nos asina aki:
'Esun ku ke tene na su bida lo pèrd'é, ma esun ku no tene na su bida den e mundu akí, lo preserv'é pa eternidat. Huan 12:25, https://www.bible.com/es-ES/bible/818/JHN.12.25

HESUS ta bisa nos brevemente ku otro palabra ku, esun ku no ta dispuesto di hasi sakrifisio lo perde su alma y esun ku ta dispuesto di hasi sakrifisio, su alma lo pastisipa na eternidat.

E teksto aki ta mustra nos riba 2 ley importante:
1. E ley di sakrifisio propio
2. E ley di servisio propio

E ley di sakrifisio propio ta hiba na konserva loke ku bo tin kaba, bida, bo alma, en kambio e ley di servisio propio ta hiba na destrukshon di esakinan.

Esun ku ta dispuesto pa pone tur loke ku ta di mas balor y of importante den su bida un banda y na su luga interesa den kresementu spiritual, lo yega na e konklushon na final ku e no a perde net net nada ku tabata bale la pena.

Tumando esaki na kuenta e punto ta ken nos ta kere?: e enemigu ku ta bisa bo ku bo mester disfruta di bo bida, of KRISTU HESUS ku ta bisa bo pa entreg'É bo bida.

🙏🏽Nos TATA di amor, alaba y glorifika ta Bo nomber pa tur eternidat. Nos ta yama Bo danki pa Bo palabra y KRISTU HESUS ku ta siña nos netamente pa kwa  proposito di bida nos mester lucha pe. Danki tambe na Bo SPIRITU SANTU ku ta guia nos riba e kaminda di berdat. Amén y amén.🙏🏽

E palabra ta bisa nos asina aki finalmente:
'Ma mas ku esei, no solamente e kosnan ei, sino tur kos mes mi ta konsiderá di ta un pèrdida, kompará ku konosé Kristu-Hesus, mi Señor. Esei ta mas balioso ku tur otro kos! Pa su motibu mi a entregá tur kos i mi ta konsiderá tur e kosnan ei bagas, pa asin'ei mi por gana Kristu i ta uní kunÉ. Ku Dios ta aseptá mi komo hustu no ta basá riba mi kumplimentu ku lei. Ma esei ta bini pa medio di fe den Kristu; esei ta bini di Dios i ta basá riba fe. Filipensenan 3:8-9

MI RUMAN, NO LAGA NADA TEMPORAL KITA NOS FOKUS ETERNAL.

GANA KRISTU HESUS Y TA UNI KUN'E
THE POWER OF THE WORD

TENE NA BIDA

E NO T'AKI

Riba e prome dia di e siman nobo nos dilanti aki, risibi SEÑOR Su bendishon den forma di resurekshon di nos Salbador KRISTU HESUS. Bo hogar, bo famia y bo amistat y kontaktonan tambe ta bendishona pa Esun ku a resusita.

Nos teksto di meditashon ta bisa nos asina aki awe mainta:
'E no t'aki; El a resusitá, manera E mes a bisa ku lo sosodé. Bin mira e lugá kaminda su kurpa tabata poné. Mateo 28:6, https://www.bible.com/es-ES/bible/818/MAT.28.6

Nos teksto di meditashon ta bisa nos ku HESUS a resusita manera Ela bisa ku lo sosode, sin embargo, nos ta esaki relashona ku su sakrifisio so Ela bisa ku lo sosode, pasobra check loke ku Ela bisa e fariseonan y dokternan di ley tokante Su deramentu:
'Hesus a bisa nan: ‘Generashon perverso i malbado, ku ta pidi señal, e úniko señal ku boso lo haña, ta e señal di profeta Yonas. Pasobra manera Yonas a keda tres dia i tres anochi den barika di e piská grandi, asina ei e Yu di hende lo keda tres dia i tres anochi den barika di tera. Mateo 12:39-40

Lastimamente ku e mundu kristian ta tuma un periodo di selebrashon di HESUS Su sufrimentu, krusifikashon y deramentu, di djabierne pa djadumingu mainta, kual no ta manera Ela bisa y konsekuentemente ta hasi'E un mentiroso.

E mensage na nos awe ta, pa nos konfia genuinamente den e palabranan di nos Salbador KRISTU HESUS, pasobra E loke ku Ela bisa nos mester sosode manera expresa y no ta na ningun ser humano pa duna interpretashon di situashonnan of expreshonnan di HESUS, simplemente pa kambionan ku a keda hasi den pasado pa nan ta aseptabel den presente. 

🙏🏽SEÑOR nos ta gradisi y glorifika Bo santu nomber pa e palabranan divino ku nos a risibi for di boka di nos Salbador KRISTU HESUS.  Duna nos inspirashon , revelashon y  sabiduria pa nos studia y kompronde expreshonnan hasi na nos dor di nos Salbador. SPIRITU SANTU guia nos den e palabra. Amén y amén🙏🏽

Na momentu ku HESUS Su disipelnan a puntr'E pa signal di su pronto binida, Ela duna nan un advertensia ku ta konta pa ku e siñansa tokante e dianan di Su graf tambe, ku ta bisa asina aki:
'Ora Hesus tabata sintá riba Seru di Oleifi, e disipelnan a bin puntr'É den privá: ‘Bisa nos: ki dia e kosnan akí lo sosodé? Na kua señal nos por mira ku Bo ta serka di bini i ku fin di tempu ta serka di yega?’ Hesus a bisa nan: ‘Tene kuidou, no laga niun hende gaña boso. Hopi lo bin usa mi nòmber i bisa: “T'ami ta e Mesias!”, i nan lo gaña hopi hende. Boso lo tende di guera i rumor tokante guera; sòru pa boso no bira sobresaltá, pasobra e kosnan akí mester sosodé, ma lo no ta e fin ainda. Mateo 24:3-6

MI RUMAN, PRIMERAMENTE, WAK PA NIUN HENDE NO GAÑA NOS Y NA DI DOS LUGAR, LOKE KU HESUS A BISA Y EXPRESA MESTER SOSODE.

E TA BINI BEK TAMBE MANERA ELA BISA
THE POWER OF THE WORD

E NO T'AKI

ARMADURA

Riba e djaluna aki, nos mester ta prepara pa enfrenta kualkier situashon ku ta buska moda di kita nos pas, goso y nos enfoke riba e lokual ku SEÑOR a bendishona nos kune den gran manera. Bo hogar, bo famia y tur bo amistat y kontaktonan tambe lo ta den gran manera bendishona.

E instrukshon ku nos ta risibi awe mainta ta bisa nos lo siguiente:
'Bisti e armadura ku Dios ta duna boso, pa boso por enfrentá diabel su plannan engañoso. Efesionan 6:11, https://www.bible.com/es-ES/bible/818/EPH.6.11

E teksto ta bisa nos ku pa nos por enfrenta e plannan engañoso di diabel, nos mester bisti e armadura ku SEÑOR a pone na nos disponibilidat.

E palabra ta relata e armadura di e forma aki na nos:
'P'esei antó para kla ku bèrdat komo faha na bo sintura, ku hustisia komo korasa i ku zelo pa anunsiá e mensahe di pas komo sandalia na boso pia! Ma huntu ku esei, laga boso fe ta e eskudo ku por wanta e flechanan sendé na kandela ku e malbado ta tira riba boso. Salbashon mester ta e hèlmu ku ta tapa boso kabes i palabra di Dios e spada ku Spiritu Santu a duna boso. Efesionan 6:14-17

E armadura ku SEÑOR a duna nos aki, e berdat komo faha, hustisia komo korasa, e mensage di pas komo sandalia, nos fe komo eskudo, salbashon komo helmu y e palabra di Dios e spada ku SPIRITU SANTU a duna nos, ta netamente pa nos por tin viktoria riba engañonan di Satanas y pa nos hiba un bida ku ta alaba y glorifika Su santu nomber.

🙏🏽Nos TATA ku ta na shelu, Bo nomber sea santifika y glorifika awor y pa Semper. Danki pa Bo armadura ku lo protega nos den e momentunan difisil ku nos lo bai na enfrenta den e ultimo fase di historia di humanidat. SPIRITU SANTU fortifika nos den e kaminda di berdat ku Bo a guia nos pa tur eternidat. Amén y amén 🙏🏽

Finalmente e palabra ta bisa nos lo siguiente:
'Resa i pidi Dios su yudansa semper i na tur okashon, guiá pa Spiritu Santu. Den esei sea alerta, i resa sin deskurashá pa henter e pueblo santu. Efesionan 6:18

MI RUMAN, E INSTRUKSHON TA PA NOS RESA PIDI DIOS YUDANSA SEMPER, PASOBRA NOS ENEMIGU TIN EXPERIENCIA AMPLIO RIBA E TERENO DI ENGAÑO.

RESA SIN STOP
THE POWER OF THE WORD

ARMADURA

NOS LUCHA 

Un dia sumamente bendishona pa bo, bo hogar, bo famia y tur bo amistat y kontaktonan.

Nos a risibi instrukshon pa pone e armadura ku Dios ta duna nos, pa enfrenta e engañonan di diabel.
Awe e teksto di meditashon ta mustra nos e pakiko di e instrukshon di ayera:
'Pasobra nos lucha no ta kontra ser humano, sino kontra e outoridatnan, e gobernantenan i e gobernadónan spiritual di e mundu den skuridat akí i kontra e spiritunan malu ku ta biba den e regionnan selestial. Efesionan 6:12, https://www.bible.com/es-ES/bible/818/EPH.6.12

Yunan di Dios mester ta konsiente ku nan lucha no ta kontra di hende meskos ku nan, sino kontra gobernantenan, autoridatnan, kontra spiritunan malu.

Tin situashonnan ku nos ta rabia ku nos prohimo, sin tene na kuente ku e hende ey ta un viktima di e sernan invisible di skuridat.

Ku otro palabra, fuera di nos kontesta, nos realidat y loke ku nos por ta konsiente di dje atraves di nos 5 sentidonan, tin podernan di maldat ta obrando kontrra di nos fabornan, via di sernan humano, strukturanan manera gobiernu, organisashonnan, sistemanan teknologiko y hasta organisashonnan religioso ku aparensia di bondat. 

E bon notisia ta ku nos no mester kobardia, pero tuma kurashi manera HESUS a bisa nos:
'Mi a bisa boso tur e kosnan akí pa boso tin pas den Mi. Na mundu boso lo pasa den tribulashon; ma tuma kurashi, Ami a derotá mundu!’ Huan 16:33

Ku otro palabra, na momentu ku nos tin KRISTU HESUS den nos bida, nos tambe ta vencedornan den e mundu di maldat aki, meskos ku E a vense y awe ta sinta riba trono di nos TATA den shelu.

E mensage na nos awe ta, pa nos no basila y asepta KRISTU HESUS komo nos salbador personal y asina risibi Su poder y autoridat pa nos tambe vense e mundu y ta vencedor den e mundu di skuridat.

🙏🏽Nos TATA ku ta na shelu, alaba y glorifika ta Bo santu nomber pa tur eternidat. Danki pa a provee Bo poder y autoridat riba tur e astronan di skuridat den KRISTU HESUS y asina hasi nos tambe viktorioso den e mundu di maldat ku nos ta bibando. Danki tambe pa Bo SPIRITU SANTU ku ta guía nos den nos pensamentunan, desishonnan y akshonnan pa ku Bo reino di amor eterno. Amén y amén🙏🏽

Despues di HESUS Su resurekshon Ela bisa Su disipelnan y nos awe:
'Hesus a aserká nan i bisa: ‘A entregá Mi tur outoridat riba mundu i den shelu. Bai antó i hasi hende den tur nashon mi disipel: batisá nan den nòmber di Tata, di Yu i di Spiritu Santu i siña nan kumpli ku tur loke Mi a manda boso. I sa ku Mi ta ku boso tur dia, te na fin di mundu.’ Mateo 28:18-20

MI RUMAN, LAGA NOS ENFRENTA BIDA KONFIADAMENTE, PASOBRA ESUN KU TA KU NOS TA MAS PODEROSO KU ESNAN KU TA KONTRA NOS.

NOS TA VIKTORIOSO DEN KRISTU HESUS
THE POWER OF THE WORD

NOS LUCHA II

TENE KUENTA

Un dia di preparashon sumamente bendishona pa bo, bo hogar, bo famia y tur bo amistat y kontaktonan.

Un di e hombernan mas sabi ku a biba riba e mundo aki, Salomon, a relata e siguiente palabranan inspira pa SEÑOR na nos:
'Konfia den SEÑOR ku henter bo kurason i no sea tèrko. Tene kuenta kunÉ den tur loke bo hasi i lo E mustra bo e kaminda korekto. Proverbionan 3:5-6, https://www.bible.com/en-GB/bible/818/PRO.3.5-6

Konfia den SEÑOR ku henter bo kurason no ta hasi bo un hende inútil, sino sabi, pasobra bo ta pone bo konfiansa den Esun ku konose e prinsipio, e presente y e futuro prome ku nan presenta y sa kon pa ta posishona den kada un di e situashonnan ey.

Banda di esaki e teksto ta bisa nos tambe pa no ta terko. Un hende terko ta konfia den su mes komprondementu y e ta limita na e informashon  ku ta di e situashon presente y pihor di tur kos ta ku un hende terko, no tin e kapasidat di tuma desishon los for di influencia di maldat y pika.

Sin embargo, e hende ku pone su konfiansa plenamente den SEÑOR su inteligencia ta duna SPIRITU SANTU e espasio pa dirigi'e den e desishon pa ku e kaminda korekto.

E mensaje na nos awe ta pa nos ta inteligente y pone nos konfiansa plenamente den e Doño di konosementu, sabiduría, inteligencia, prinsipio, presente y futuro, ku ta independiente di maldat y pika den nan totalidat: nos DIOS eterno of eterno DIOS, YHWH ta su nomber abrevia.

🙏🏼YEHOWAH, SEÑOR nos ta bin den Bo presencia den nomber di YESHUA, KRISTU HESUS pa somete nos mes totalmente na  Bo santu boluntat. Guia nos pasonan atrabes di Bo SPIRITU SANTU, pa di e forma ey nos ta kompletamente y genuinamente rekonsilia ku Bo. Amèn y amèn🙏🏼

Finalmente sa esaki:
'Tin kaminda ku parse règt, pero finalmente nan ta hiba bo na morto. Proverbionan 16:25

SA ESAKI MI RUMAN, NO TIN UN SER KREA MAS SABI KU ESUN KU PONE SU KONFIANSA TOTALMENTE DEN SEÑOR.

TENE KUENTA KU SEÑOR
THE POWER OF THE WORD

TENE KUENTA

LOKE NOS MESTER

Riba e djamars aki, ku goso den nos kurasonnan, nos ta inisia e dia gradisiendo SEÑOR pa e bendishon di bida, Su miserikordia, Su grasia y Su amor y Su pordon   demonstra y duna na kada un di nos, nos hogar, nos famia y nos amistat y kontaktonan.

E palabra pa alegra y motiva nos aun mas pa ku e dia aki ta bisa nos lo siguiente:
'Su poder dibino a duna nos tur loke nos mester pa hiba un bida dediká na Dios pa medio di nos konosementu di Esun ku a yama nos dor di su mes gloria i obra maravioso. 2 Pedro 1:3, https://www.bible.com/en-GB/bible/818/2PE.1.3

E pregunta logiko ta, "Kiko ta e lokenan ku nos mester pa hiba un bida rekto"?
Ora ku nos analisa e teksto, nos ta kompronde ku realmente e ta bisa nos ku KRISTU HESUS ta Esun ku a yama nos dor di Su mes gloria y obra maravioso.

Ta HESUS ta hasi nos awe mainta tambe e yamada pa sigui  ku Su obra maravioso,  di acuerdo ku Mateo 28:20:
'Hesus a aserká nan i bisa: ‘A entregá Mi tur outoridat riba mundu i den shelu. Bai antó i hasi hende den tur nashon mi disipel: batisá nan den nòmber di Tata, di Yu i di Spiritu Santu  Mateo 28:18-19

Nos ta yega na e siguiente kontestanan di e pregunta:
1. Nos mester di Su poder divino
2. Nos mester di Su amor y pordon eterno y;
3.  Nos mester di Su ehempel genuìno.

Ku otro palabra, pa hiba un bida dedika na Dios ta ensera hiba un bida santu, un bida ku ta odia pika y stima justisia, un bida kompletamente konsagra na SEÑOR pa medio di e poder ku KRISTU HESUS a duna nos riba pika y maldat, Su amor y pordon demonstra na nos y asina tin un mente kla y determina pa sigui Su bida ehemplaar.

🙏🏼Nos TATA ku ta na SHELU, alaba y glorifika ta Bo santu nomber pa medio di nos bida kompletamente dedida na Bo, pa medio di Bo yu KRISTU HESUS ku a duna nos e poder, Bo amor, Bo pordon y Su ehempel pa nos sigui. Danki tambe pa SPIRITU SANTU komo nos tutor den e bida konsagra na Bo. Amèn y amèn🙏🏼

Finalmente e palabra ta bisa nos asina aki:
Esun ku tin e Yu, tin bida; esun ku no tin e Yu di Dios, no tin bida! 1 Huan 5:12

MI RUMAN, BUSKA PA BO TIN Y KONOSE E YU DI DIOS, PASOBRA TA SOLAMENTE DEN DJE TIN BIDA, ANTO GUESS WHAT: BIDA NA ABUNDANSIA.

KRISTU HESUS TA TUR LOKE NOS MESTER
THE POWER OF THE WORD

LOKE NOS MESTER

KONSEGO

Nos a kibra e siman aki na 2 y seguramente nos por mira bek riba e dianan ku a pasa ku gradisimentu den nos kurasonnan pa tur e bendishonnan ku nos, nos hogar, nos famia y tur nos amistat y kontaktonan a risibi di nos SEÑOR. Alaba y glorifika ta Su nomber pa tur eternidat.

SEÑOR ta konsega nos di e forma aki awe:
'Mihó boso sòru pa derecho sigui su kurso manera awa di un riu, pa hustisia kore manera un roi ku nunka no ta seka. Amos 5:24, https://www.bible.com/en-GB/bible/818/AMO.5.24

No tin un kos ku ta wal nos Dios su stoma manera hipokresia.
Kiko ta hipokresia?
Hipokresia ta akshon di un persona ku ta kontrali na su propio balornan ku e ta sostene o biba pe.

Awendia nos tin hopi hipokritanan spiritual, ku ta pretende un kos, pero ta reflega otro kos den bida. E palabra ta bute di e forma aki pa nos:
'Mi sa tur kos ku boso ta hasi. Mi sa ku boso no ta ni friu ni kayente! Mare boso tabata friu òf kayente! Pasobra boso ta lou i no ta ni kayente ni friu, p'esei lo mi skupi boso for di mi boka. Revelashon 3:15-16

Mi ruman e teksto di meditashon ta konsega nos pa soru pa derechi sigui su kurso y hustisia kore manera un riu. Esey ta ensera pa nos no ta simplemente skcuhado y sturiado di e palabra di SEÑOR, sino ponedo di su balornan den praktika pa ku nos prohimo, tantu pa ku su nesesidatnan di e bida fisiko di tur dia, komo esnan spiritual.

🙏🏼SEÑOR danki pa hala nos atenshon ku e konsego di awe mainta. Danki pa mustra nos ku Bo yunan ta esnan ku realmente ta care pa otro. SPIRITU SANTU yuda nos y transforma nos manera di pensa y aktua. Den nomber di KRISTU HESUS nos ta pidi y gradisi. Amèn y amèn🙏🏼

Yunan di SEÑOR genuìno ta hasi esaki:
Ata aki loke Dios Tata ta konsiderá dedikashon puru i ireprochabel: buska drechi di e wérfano i biuda ku ta pasa trafat, i wak pa maldat di e mundu akí no susha bo. Hakobo 1:27

MI RUMAN, KONTA KU BO AKSHONNAN DI BON SAMARITANO?
SA MI RUMAN, KU HESUS TA BISA NOS DEN MATEO 7:21, KU NO TA TUR KU BISA  MI SEÑOR SEÑOR, LO DRENTA E REINO DI SHELU, MA ESNAN KU HASI BOLUNTAT DI NOS TATA DEN SHELU.

E REINO DI DIOS TA DI UN SOSTENE E OTRO
THE POWER OF THE WORD

KONSEGO

KON TA HASI

Un djamars yena ku e bendishonnan di SEÑOR den gran manera den bo bida, den bida di miembronan di bo hogar, bo famia y bo amistat y kontaktonan.

Nos ta risibí e siguiente palabra di SEÑOR ku ta bisa nos asina aki:
'Ma ta kon nan por invoká Señor, si nan no ta kere den djE? Anto kon nan ta hasi kere, si nan no a tende e bon notisia? Kon tende e bon notisia, si niun hende no a predik'é na nan? Anto ta kon ta hasi predik'é si niun hende no a haña òrdu pa hasié? Manera tin skibí den Skritura: ‘Esta un legria mira portadó di bon notisia ta! Romanonan 10:14-15, https://www.bible.com/en-GB/bible/818/ROM.10.14-15

E apostel Pablo, un hudiu di pura sepa, ku a studia e palabra vigente den e tempu ey profundamente, ta hasi e preguntanan aki relashona ku e pueblo hudiu ku a rechaza KRISTU HESUS komo e salvador pa humanidat.

E bon noticia tokante di HESUS ku ahinda mester keda predika na e hudiunan, pero tambe na otro rasa y tribunan, na tur lenga y pueblonan, ta e mensaje mas alentador, di amor, transformador y di speransa ku hamas humanidat a risibí for di SHELU.

Den e rekta final di e historia di humanidat aki, e bon noticia tokante HESUS, ku e propósito ta pa kita pika de hende y duna pordon, ku e rason ta ku Dios a stima nos asina tantu ku Ela manda Su uniko yu bin muri pa nos, ku e objetivo ta pa hende keda transforma den nan forma di pensa, papia y aktua, den un kondukta igual na esun di HESUS mes, mester keda predika pa  testimonio di e lokual ku KRISTU HESUS a nifika den kada un di nos bida.

🙏🏼SEÑOR nos ta yama Bo danki pa e bon noticia Di KRISTU HESUS duna na nos y obra den nos. Duna nos di Bo SPIRITU SANTU pa E sigui guía nos den nos bida di testimonio na  nos hendenan di kas, trabow, aktividatnan sosial y unda ku nos frekuenta. Den nomber di KRISTU HESUS nos ta gradisi y alaba Bo santu nomber. Amèn y amèn🙏🏼

E palabra ta bisa nos finalmente:
Den djE so por haña salbashon; riba mundu no tin niun otro nòmber duná na hende, ku por salba nos.’ Echonan 4:12

MI RUMAN, LAGA NOS BIDANAN TESTIGUA DI NOS RUMAN MAYO KRISTU HESUS, PASOBRA TA E FORMA MAS EXCELENTE KU E BON NOTICIA POR KEDA PREDIKA.

HESUS SO POR SALBA
THE POWER OF THE WORD

KON TA HASI

MATA DI WENDRUIF

Nos a bin ta parti e siman aki na 2 y ku goso den nos kurasonnan nos ta yama SEÑOR danki pa tur e bendishonnan risibí durante e dianan ku a pasa y di antemano nos ta gradisi'E pa e dianan bendishona ku nos lo bai na experiencia, den kompania di nos miembronan di nos hogar, di nos famia y di tur nos amistat y kontaktonan.

HESUS ta papia ku nos awe mainta di e siguente forma:
'Ami ta e mata di wendrùif berdadero i mi Tata ta e vitó. E ta kita tur taki fo'i Mi ku no ta karga fruta, i E ta snui tur taki ku sí ta karga fruta, pa nan karga mas fruta ainda. Huan 15:1-2, https://www.bible.com/en-GB/bible/818/JHN.15.1-2

Den e alegoría aki, HESUS ta mustra nos enfatikamente ku nos bida di fieldat, bondat, di miserikordia, gracia y amor, ta depende exclusivamente di Su poder ku ta flui pa medio di SPIRITU SANTU den nos.

Banda di esaki, E ta mustra nos ku nos TATA den  shelu lo bai na korta aki y aya den nos bida, ku e propósito noble y divino pa nos por karga mas frutanan.

Ku otro palabra, na momento ku nos TATA ta obrando de nos bida pa nos alkansa estaturanan spiritual eleva, no komete e error di puntra: dikon ami?

Si net abo y of ami, pasobra e skritura ta bisa nos:
'Ya boso a lubidá loke Dios a bisa boso, su yunan, pa kurashá boso. Den Skritura E ta bisa: ‘Mi yu, no despresiá korekshon ku bini di Señor, i no pèrdè kurashi ora E kastigá bo. Pasobra Señor ta koregí esun ku E ta stima, E ta kastigá tur esnan ku E ta aseptá komo yu. Hebreonan 12:5-6

Awe mi ruman, sa ku bo no ta ken ku ta ni kiku ta, bo ta yu di adoptivo di SEÑOR, di ent na e palu di bida, KRISTU HESUS.

🙏🏼TATA di amor, nos ta yama Bo danki riba e mainta aki, pa Bo trabow di snuimentu den kada un di nos su bidanan. Duna nos e don di perseveransia pa nos por mantene nos firme manera nos ruman mayo KRISTU HESUS, sabiendo ku nos alegría ta na kaminda. Amèn y amèn.🙏🏼

Nos ruman mayo a soporta ku e konosementu aki:
'Laga nos tene nos bista fihá riba Hesus, ku a bai nos dilanti riba e kaminda di fe i ku lo hiba nos tambe na final di e kaminda. Hesus a sufri na krus, sin a sinti bèrgwensa di e morto akí, pasobra E tabata sa ku despues di e sufrimentu akí lo El a haña alegria; i awor E ta sintá na man drechi di trono di Dios. Hebreonan 12:2

MI RUMAN, KUAL SEA BO SITUASHON, MANTENE BO FIEL RIBA E KAMINDA PA ETERNIDAT AKI, PASOBRA NOS LEGRIA TA MAS SERKA DI OLKE KU NOS MES POR PENSA Y IMAGINA.

HESUS TA BINI PRONTO
THE POWER OF THE WORD

E MATA DI WENDRUIF

LEY DI YUDANSA

Un dia bendishona pa bo, bo hogar, bo famia y tur bo kontakto y amistatnan.

Nos ta risibí un instrukshon di nos SEÑOR awe mainta ku ta bisa nos lo siguiente:
'Tin hende generoso, ku ta risibí mas ku nan ta duna, i tin hende pichiri ku ta muri bashí. Es ku hasi bon, bon ta p'e, es ku duna alivio, ta haña alivio. Proverbionan 11:24-25, https://www.bible.com/bible/818/PRO.11.24-25

Ora nos tira un vista den naturalesa, nos por mira klaramente ku un simia ku nos sembra, SEÑOR ta germin'e y laga un palu krese duna un kosecha 100 bes mas tantu ku e solo simia ku nos a hinka den tera.

Ku otro palabra, mi akshon di gracia y miserikorda pa ku mi prohimo, SEÑOR ta hasi esey tambe redunda den palunan di harmonia y goso, ku frutanan di e karakteristikanan di amor ey ku hamas nos por pensa y of imagina.

Nos ta yega na e konklushon e ora ey ku kada bes ku nos retene akshon pa hasi bon y of pa alivia nos prohimonan den nan situashon di nesesidat, nos ta kumpra kastigu pa nos kurpa, pasobra e palabra ta but'e mas bunita ahinda di e forma aki:
'Bo ta yuda bo mes, ora bo yuda otro hende, bo ta perhudiká bo mes, ora bo perhudiká otro hende.  Proverbionan 11:17

Yudansa na otronan ta un di e temanan ku tantu e palabra skirbi komo esun enkarna, KRISTU HESUS pues, ta enfatisa pa ku nos komo suidadanonan di e reino selestial.

🙏🏼SEÑOR nos ta yama Bo danki pa duna nos tur dia di nobo oportunidat pa yuda nos prohimonan den kualkier nesesidat ku nan por tin. KRISTU HESUS danki pa duna nos un ehempel y manda nos kuida di nos rumannan. SPIRITU SANTU guía nos den e proceso di ta generoso pa ku loke ku nos ta sembra. Amèn y amèn🙏🏼

E religión bendadero ta esaki:
'Ata aki loke Dios Tata ta konsiderá dedikashon puru i ireprochabel: buska drechi di e wérfano i biuda ku ta pasa trafat, i wak pa maldat di e mundu akí no susha bo. 
Hakobo 1:27

MI RUMANNAN, E YEGA E ORA PA NOS PONE NOS DEDIKASHON NA SEÑOR DEN PRAKTIKA, YUDANDO OTRONAN PUES, PASOBRA ESEY SEÑOR TA KONSIDERA KOMO RELIGION Y DEDIKASHON PURU.

ORA BO YUDA OTRONAN BO A YUDA BO MES.
THE POWER OF THE WORD

LEY DI YUDANSA

ROSEA DI BIDA

Un dia di preparashon super bendishona pa bo, bo hogar, bo famia y tur bo amistat y kontaktonan.

E teksto di meditashon ta bisa nos lo siguiente awe mainta:
'E ora ei SEÑOR Dios a forma hende for di tera. El a supla rosea den su nanishi i asina hende a haña bida. Génesis 2:7, https://www.bible.com/bible/818/GEN.2.7

E proceso di duna hende bida atrabes di rosea, te ku awe ta tuma lugar konstantemente y kontinuamente.
Esey ta ensera ku kada persona ku nase riba e mundu aki, loke ku nan hasi ku nan bida ta independiente di nan mayornan.

E asuntu di tira falta riba mayornan y mayornan tira falta riba yu of yunan no ta bai, pasobra SEÑOR ta husga kada persona pa su propio aktonan pasobra Su palabra ta bisa nos asina aki:
'E yu hòmber no tin mester di paga pa maldat di su tata ni e tata pa esun di su yu hòmber. Es ku ta hustu ta haña rekompensa p'esei, pero es ku ta inhustu ta haña kastigu. Ezekiel 18:20

Ku otro palabra, kada persona mester tene cuenta ku loke ku e hasi, e mes ta paga of risibí un rekompensa pa nan.

🙏🏼SEÑOR danki pa Bo instrukshon di awe duna na kada persona individual, independientemente di nan relashonnan. Danki pa Bo invitashon na nos pa komberti y biba di acuerdo ku Bo santu boluntat. Den nomber di KRISTU HESUS nos ta gradisi y alaba Bo santu nomber. Amèn y amèn🙏🏼

Esaki SEÑOR ta bisa nos awe:
'Mi no ta keda kontentu ku morto di un hende ku mester muri,’ SEÑOR Dios ta bisa. ‘P'esei kombertí i keda na bida!’' Ezekiel 18:32

NOS YUNAN, NOS RUMANNAN, NOS FAMIANAN, NOS AMIGUNAN, NOS AMISTATNAN Y NOS EXNAN, SEÑOR TA HASI UN APELASHON NA BOSO PA KOMBERTI Y BIBA, PASOBRA E NO TA KONTENTU KU BOSO MORTO Y NOS MENOS.

KADA KEN PA BIBA PA NAN MES
THE POWER OF THE WORD

ROSEA DI BIDA

DI KON

Un felis dia di preparashon pa bo, bo hogar, bo famia y tur bo amistat y kontaktonan.

Nos teksto di meditashon ta hasi nos e pregunta aki:
'Mi alma, di kon bo ta flihí, i bo ta keha den mi? Konfia den Dios! Lo mi bolbe alab'É, mi Salbador i mi Dios!' Salmo 42:11, https://www.bible.com/en-GB/bible/818/PSA.42.11

E salmista a bai dje lew ey den su pensamentunan relashona ku su SEÑOR y awor e ta puntra su mes, di kon su alma ta aflihi den dje.

Bida por tin su bueltanan ku por hiba nos hasta na pensa ki sentido bida tin?

Alma ta keda konsidera komo e parti intangibel di e ser humano ku ta hasi'e kapas di pensa y sinti y ta e esensa inmaterial ku ta defini e komo un persona, un ser bibiente. 
Na momento ku nos laga situashonnan of otro sernan dirigi nos fakultatnan, nos forma di pensa, nos manera di sinti y e esensia di nos identidat, nos lo ta for di equilibrio y tur sorto di keho, expreshon amargante y denigrante tokante nos mes ta bini ariba y keda expresa.

Mi ruman, mientras nos ta heringa, rebeldía y nos no kier somete nos mes na e SEÑOR soberano y Su leynan, mandamentunan, instrukshonnan y dekretonan, nos alma lo keda afligi.

E les pa nos awe ta, pa nos no laga situashonnan di bida y of kualkier ser bibu dirigi nos bida, sino somete bo mes genuinamente na nos TATA soberano y laga E dirigi kada pensamentu, sentimentu y e esensia di nos bida.

🙏🏼SEÑOR di awor pa dilanti nos kier somete nos mes kompletamente na Bo y tur bo leynan, mandamentu, instrukshon y dekretonan. SPIRITU SANTU tuma control kompletu den kada pensamentu, sintimentu y esensia di nos bida. Den nomber di KRISTU HESUS nos ta pidi y gradisi. Amèn y amèn🙏🏼

Nos salvador KRISTU HESUS tambe a haña Su alma den aflikshon y esaki ta loke ku Ela hasi:
'El a bisa nan: ‘Mi ta sinti un tristesa asina grandi den mi kurason ku Mi por muri; keda aki, ma keda alerta huntu ku Mi.’ Hesus a bai un tiki mas leu i a tira su kurpa abou. El a bisa: ‘Mi Tata! Si ta posibel, laga e kopa di sufrimentu akí pasa bai. Pero no loke Ami ke, ma loke Abo ke.’ Mateo 26:38-39

MI RUMAN, SA KU HESUS A SOMETE SU BOLUNTA LIBER GENUINAMENTE NA SU TATA DEN SHELU. TANTU NOS PAS MENTAL, NOS GOSO DI BIDA Y ESENSIA DI BIDA TA DEPENDE TOTALMENTE DI NOS ENTREGA NA NOS TATA DEN SHELU, DOR DO SOMETE NOS BOLUNTAT LIBER NA DJE.

ESAKI TA E REMIDI PA UN ALMA PERTURBA
THE  POWER OF THE WORD

DI KON

PROPOSITO

UN felis dia di preparashon pa bo, bo hogar, bo famia y tur bo amistat y kontaktonan.

Nos ta risibí e palabra di SEÑOR ku ta fortifika nos pa ku e dia aki y e ta bisa nos lo siguiente:
'Bo ta duna esnan ku no ta desviá di nan propósito pas kompleto, pasobra ta den Bo nan ta konfia. Isaías 26:3, https://www.bible.com/en-GB/bible/818/ISA.26.3

E pregunta ku kada un di nos mester hasi ta: kwa ta e propósito ku mi tin pa bida y den mi bida?

E pregunta aki, fuera di hasi personalmente, tin ku keda soberanamente kontesta pa kada un di nos. Ku otro palabra, e pregunta aki no por keda kontesta pa un otro persona, ni nos no por permiti ku ta otronan tin e influencia determinante pa ku nos propósito di bida.

Anto guess what, asta  pa determina e propósito di bida y pa biba, SEÑOR a but'e pa nos bon kla y simpel.
Sa awe mi ruman ku ta 2 propósito tin:
1. Sea pa biba eternamente y 2. of muri eternamente.

SEÑOR Su palabra ta bisa kada un di nos asina aki awe:
'Awe mi ta laga boso skohe entre bida i morto, entre felisidat i desgrasia. Deuteronomio 30:15

E les di bida pa nos awe ta, ku nos pas ta determina a base di nos firmesa pa ku e propósito di bida ku nos a skohe.

🙏🏼SEÑOR nos ta yama Bo danki pa e les di bida ku nos a risibí awe y e oportunidat ku nos tin awe pa figa nos proposito di bida. Fortifika nos boluntat liber di skohe, pa nos por ta firme pa ku e propósito y ku Bo a buta nos dilanti. Den nomber di KRISTU HESUS nos ta gradisi y alaba Bo nomber santu. Amèn y amèn🙏🏼

Mi ruman, pa komplika ku situashonnan di bida por ta, no permiti ku nan ta kita bo enfoke, pasobra e uniko éxito ku realmente ta exsisti, ta esun pa biba.

'Mi ta yama shelu i tera pa testigu, awe mi ta laga boso skohe entre bida i morto, entre bendishon i maldishon. Skohe anto pa bida, ya boso i boso desendientenan por biba. Stima SEÑOR, boso Dios, tende di djE i ked'É fiel. Pasobra di esei ta dependé si boso lo keda na bida òf biba den e pais ku SEÑOR a primintí boso antepasadonan Abraham, Isak i Yakob solemnemente.’' Deuteronomio 30:19-20

ESAKI TA KONTA AWE TAMBE SOLEMNEMENTE PA KADA UN DI NOS
THE POWER OF THE WORD

PROPOSITO

EHEMPEL

Un meimei di siman sumamente bendishona pa bo, bo hogar, bo famia y tur bo kontakto y amistatnan.

Nos teksto di meditashon ta duna nos e siguiente instrukshon:
'Kerido ruman, no sigui mal ehèmpel, sino sigui loke ta bon. Esun ku hasi bon ta pertenesé na Dios; esun ku hasi malu no a mira Dios nunka.' 3 Huan 1:11, https://www.bible.com/es/bible/818/3JN.1.11

Nos ehempel pa excelencia pa loke ku ta trata biba un bida kompletamente konsagra na nos TATA den shelu, ta esun di nos Salbador KRISTU HESUS.

Logikamente Su bida ta bira e estandarte, e kondishon pa nos evalua ehempel di kualkier persona, sea esun di un fiel kreyente di SEÑOR of no.
E karakteristika di HESUS mas exalta  riba kara di tera tabata Su humildat y esey nos por mir'e den tur fase di Su bida, por ehempel:
1. E no tabata hasi distinshon di persona pa motibu di nan status ekonomiko, religioso y of posishon financiero.
2. E no a laga su boluntat prevalese riba esun di Su TATA na shelu.
3. Ela refuta engaño y mal interpretashon di e palabra di Dios a base di loke ku tabata skirbi y no a base di su propio konosementu y sabiduría.
4. Ela distansia su mes di tur gloria personal y rikesa pa e por a bin sirbi nos komo sernan humano y hasta muri pa kada un di nos.,

Esakinan ta djis un par di e karakteristikanan di Su huminldat komo ehempel laga a tras pa nos tambe por sigui, pasobra ta abase di humildat e reino celestial ta funshona y ayanan no tin espasio pa arogansia y rebeldía.

🙏🏽SEÑOR nos ta yama Bo danki pa e instrukshon di awe mainta. Danki pa mustra nos ku e ehempel excelente ku nos mester tin semper na vista ta esun di Bo yu stima KRISTU HESUS. SPIRITU SANTU sigui guía nos riba e kaminda pa eternidat ku e don di humildat. Amén y amén🙏🏽

Mi ruman, kondishon pa drenta e reino di SEÑOR:
'Den e tempu ei, e disipelnan a aserká Hesus i bis'É: ‘Ken ta mas importante den reino di shelu?’ Hesus a yama un mucha chikí pon'é para meimei di nan, i bisa: ‘Mi ta sigurá boso: si boso no kambia bira manera mucha, boso lo no por drenta reino di Dios. Esun ku ta humilde manera e mucha akí, ta esun di mas importante den reino di Dios. I es ku risibí un mucha asin'akí den mi nòmber, ta risibí Mi mes.' Mateo 18:1-5

MI RUMAN, PALABRA NO MESTER TA HOPI. HUSGA PA BO MES.

BENDISHON
THE POWER OF THE WORD

EHEMPEL

KOMPARA

Un djawebs mainta super bendishona pa bo, bo hogar, bo famia y tur bo amistat y kontaktonan.

E palabra di SEÑOR pa nos awe ta bisa nos lo siguiente:
'SEÑOR n' bisa bo kaba, o hende, loke ta bon? I awor kiko SEÑOR ta eksigí di bo? Esaki so: praktiká hustisia, stima fieldat i konsultá Dios den tur kos.' Mikéas 6:8, https://www.bible.com/es/bible/818/MIC.6.8

E teksto di meditashon ta mustra nos klaramente ku SEÑOR ta exsigí 3 kos di nos:
1. Hustisia, 2. fieldat y 3. humildat.

Ku e 3 puntonan aki SEÑOR ta bisa nos y instruí nos ku e no ta riba formalismo, sino riba realismo.

Ku otro palabra, no ta basta pa konose e palabra di SEÑOR pasobra no ta esey E ta desea di nos. By the way, e enemigu tambe konose e palabra di DIOS. 
Loke ku E ta desea realmente ku konosementu di Su palabra ta, ku esey ta trese un kambia radikal den nos forma di pensa, papia y aktua. Pues e imagen ku SEÑOR a krea nos aden, ta keda kompletamente restaura den nos y asina nos ta keda transforma den Su yunan.

E les pa nos awe mainta ta pa nos hiba un bida ku ta ehemplifika esun di KRISTU HESUS.

🙏🏽SEÑOR nos ta yama Bo danki pa e instrukshon di awe. Danki pa a pone na nos disposishon Bo SPIRITU SANTU pa guía nos den tur nos akshonnan. Danki KRISTU HESUS pa ta nos ehempel pa ekselensia. Amén y amén🙏🏽

E palabra ta konfirma:
'E ta imágen visibel di Dios invisibel; E ta Esun promé, alsá riba henter kreashon.' Kolosensenan 1:15

MI RUMAN, NA MOMENTU KU NOS PERMITI KRISTU HESUS BIBA PLENAMENTE DEN NOS, NOS IMAGEN TAMBE TA KEDA RESTAURA Y NOS POR YAMA SEÑOR, ABA, TATA.

SA KU BO TA YU
THE POWER OF THE WORD

KOMPARA

DRUMI NA PAS

Un dia di preparashon sumamente bendishona pa ku nos fiesta semanal pa bo, bo hogar, bo famia y tur bo amistat y kontaktonan.

Nos ta konfia ku bo tabatin excelente oranan di sosiegu anochi y ku bo a lanta den gran forma pa enfrenta e retonan di e dia aki.
Nos teksto di meditashon ta mustra nos en todo caso riba un parti esencial pa ku nos momentunan pa drumi y e ta bisa nos asina aki:
'E alegria ku Bo a duna mi ta mas grandi ku hamas nan lo tin ku tur nan maishi i biña. Ki ora ku mi bai drumi mi ta pega soño na pas; pasobra, SEÑOR, Abo so ta laga mi biba trankil.' Salmo 4:7-8, https://www.bible.com/es-ES/bible/818/PSA.4.7-8

Tin hende ta kere y konfia den nan kuentanan di banko, nan posishonan ekonomiko y nan propiedatnan y ku eseynan ta duna nan e alegría y nan por drumi tranquil.

Sin embargo, e teksto ta mustra nos klaramente ku ta SEÑOR So por laga nos drumi tranquil.
Nos a puntra nos mes: dikon eigenlijk?

Pas mental, ta SEÑOR So por duna nos e, pasobra por ehempel:
1. E so a pordona nos y ta hasi nos un invitashon pa kere y asepta Su amor eterno pa nos.
2. E so a duna nos promesanan ku tur dia di nobo nos ta mira ku nan ta kumpliendo den nos bida.
3. E so a duna nos garantía di bida pa medio di e sakrifisio di Su yu stima KRISTU HESUS.
4. Ela duna nos SPIRITU SANTU pa guía, konsola y konbense nos di Su presensia den nos bida.

E mensage pa nos awe ta, pa nos pone tur nos konfiansa den divinidad, TATA, YU Y SPIRITU SANTU, pasobra ta serka nan so nos tin primeramente tur kos y nan sa di genera pas y goso den nos.

🙏🏽SEÑOR riba e mainta aki nos ta gradisi Bo pa e anochi ku bo a laga nos drumi na pas y tranquil. Danki pa garantisa nos bida riba e dia aki y siguramente eternidat pa medio di KRISTU HESUS. Danki pa SPIRITU SANTU ku ta genera den nos goso y pas. Amén y amén🙏🏽

E palabra ta pone finalmente asina aki pa nos:
'Konfia den SEÑOR ku henter bo kurason i no sea tèrko. Tene kuenta kunÉ den tur loke bo hasi i lo E mustra bo e kaminda korekto. E ora ei bo por sigui bo kaminda trankil, e ora ei lo bo no trompeká. Ora bo kai drumi, sustu lo no lanta bo, lo bo drumi trankil. Proverbionan 3:5-6,23-24

MI RUMAN, UN DIA TRANKIL, SIN SUSTU Y ANSHA PA BO, PASOBRA E KONSEPTO TA: KONFIA DEN SEÑOR

BENDISHON
THE POWER OF THE WORD

DRUMI TRANKIL

DRUMI NA PAS

NOS MOTIVASHON

Un prome dia di e siman nobo nos dilanti aki sumamente bendishona pa bo, bo hogar, bo famia y tur bo amistat y kontaktonan.

Na un okashon HESUS tabata predika den un kas, anto tabatin asina tantu hende presente ku niun hende mas no por a jega serka djE. Na e situashon ey, 4 homber a trese nan amigu ku tabata lam den un dragbar pa HESUS y e palabra ta relata nan ahson di e siguiente manera:
'Algun hende a bini ku un hòmber lam, ku kuater hòmber tabata karga den un dragbar, serka Hesus. Komo tabatin muchu hende, nan no por a hib'é te serka Hesus. P'esei nan a habri e dak, traha un buraku kaminda Hesus tabata i laga e dragbar ku e hòmber lam drumí aden, baha.' Marko 2:3-4, https://www.bible.com/es-ES/bible/818/MRK.2.3-4

E relato aki a hala nos atenshon pa ku e konfiansa ku nos tin y e fe den HESUS.

Nos fe y konfiansa den HESUS ta asina grandi ku nos lo tuma akshon manera e hombernan aki pa trese otronan serka djE, pa nan tambe haña loke ku nos a risibi di djE? Nos lo hasi lo imposibel pa hiba otronan serka dje?

Ta bon pa nos para ketu un ratu y analisa nos relashon ku HESUS y visa versa.
Ku otro palabra, nos bida ta reflega e milagernan ku Ela hasi riba kara di tera of nos bida ta un entrega total na e reino di Dios ku Ela predika, pa nos por praktikamente obliga otronan moralmente pa sigui'E, of nos tambe tin e posishon pa bisa laga e muchanan, e werfanonan, e drogadiktonan bini serka nos.

E les di un bida ku KRISTU HESUS mester motiva nos pa hiba otronan serka djE, ku e motivashon pa otronan tambe risibi e benefisionan y e transformashon di bida ku nos a risibi di djE.

🙏🏽TATA di amor, nos ta yama Bo danki pa a invita nos sigui Bo yu stima. Danki KRISTU HESUS pa e transformashon ku Bo a trese den nos bida. Danki SPIRITU SANTU pa genera den nos e mesun sentido di HESUS pa nos tambe buska bienestar tantu fisiko, komo spiritual di nos prohimonan. Amén y amén🙏🏽

Finalmente:
'Ora Hesus a mira nan fe den djE, El a bisa e hòmber lam: ‘Mi yu, bo pikánan ta pordoná.’ Marko 2:5

MI RUMAN, LAGA KU NOS FE DEN HESUS BIRA E INSTRUMENTO PA E PORDONA PIKA DI NOS PROHIMONAN.

TA NOS KONVINSHON TA NOS MOTIVASHON
THE POWER OF THE WORD

NOS MOTIVASHON

HOMBER SABI

Riba e djaluna aki, risibi SEÑOR su bendishon den gran manera den bo bida, den bo hogar, bo famia y tur bo amistat y kontaktonan.

E instrukshon di e palabra di nos SEÑOR ta bisa nos lo siguiente:
'P'esei ken ku tende e palabranan di Mi akí i kumpli ku nan ta manera e hòmber sabí ku a traha su kas riba baranka.' Mateo 7:24, https://www.bible.com/es-ES/bible/818/MAT.7.24

Un di e preguntanan ku hopi kreyente ta kontesta yenyen di duda ta esaki: "bo ta salba of bo ta bai salba na momentu ku KRISTU HESUS bini bek?

Ki ora ku nos duda den nos salbashon of kontesta e pregunta aki riba ku duda, nos ta hasi nos di SEÑOR un mentiroso. 

E homber sabi ta esun ku tende e palabranan di e TATA, e YU y E SPIRITU SANTU  y ta kumpli ku nan, pues pone nan den praktika di su bida diario.

Ku otro palabra, traha bo kas riba baranka ta ensera konfia plenamente den e palabra di nos DIOS y laga tur nos forma di pensa, papia y aktua ta di akuerdo ku e dekretonan, instrukshonnan, e konsegonan, e mandamentunan y no perde niun di su promesanan hasi na nos for di bista.
Pasobra loke ku e palabra ta siña nos ta, ku nos ta sirbi un Dios ku ta kumpli kabalmente ku loke ku E a priminti nos y den djE no tin luga pa duda y deskonfiansa.

🙏🏽SEÑOR awe nos ta konfia y pone bo palabra den praktika di nos bida. KRISTU HESUS danki pa Bo instrukshon pa konfia plenamente den e palabra di sabiduria, poder y seguridat duna na nos. SPIRITU SANTU amplia nos kapasidat pa kompronde y konfia plenamente riba e palabra. Amén y amén🙏🏽

HESUS ta bisa nos:
'No ta tur hende ku bisa Mi: “Señor, Señor,” lo drenta reino di shelu, ma esun ku kumpli ku boluntat di mi Tata den shelu.' Mateo 7:21

MI RUMAN, NO LAGA NOS GAÑA NOS MES. NOS SA BON BON KON NOS KAS DI RELASHON KU SEÑOR TA TRAHA, KI TIPO DI FUNDESHI Y DEN KI TIPO DI TERA.

EN TODO KASO, LAGA KU TA KRISTU HESUS TA E BARANKA KU BO KAS TA TRAHA RIBA DJE, PASOBRA E TA FIEL Y AMÉN.

HESUS NOS BARANKA FIEL
THE POWER OF THE WORD

HOMBER SABI

NOS SEGURIDAT

Un dia sumamente bendishona pa bo, bo hogar, bo famia y tur bo amistat y kontaktonan.

Nos ta risibi un palabra di motivashon y siguransa pa nos inisia e dia aki ku ta bisa nos lo siguiente:
'Bo ta duna esnan ku no ta desviá di nan propósito pas kompleto, pasobra ta den Bo nan ta konfia. Konfia semper bai den SEÑOR, pasobra SEÑOR, nos Dios, ta un Baranka eterno!' Isaías 26:3-4, https://www.bible.com/es-ES/bible/818/ISA.26.3-4

Bo tin bo proposito di bida figa kaba y bo ta determina pa no desvia for di dje?
Awel sa ku bo por tin pas kompletu na momentu ku bo konfiansa ta plenamente den e Dios eterno ku nos ta sirbi.

E teksto di meditashon ta bisa nos ku E ta e baranka eterno.
Pa nos por haña un impreshon di Kiko realmente e teksto ta bisa nos, no por djis tuma nota di e baranka di mas grandi riba e mundu aki ku ta esun Yarlung Tsangpo situa na China, ku un superfisio di 9168 km2 y un profundidat di 5000meter.

E les ku nos ta risibi awe ta, ku na momentu ku nos ta riba of den baranka terenal aki, no tin ningun fenómeno di naturalesa ku por move nos, di un luga pa otro of pone no pianan tembla. 
Asina lo ta tambe ora ku nos pone nos konfiansa plenamente den SEÑOR, e baranka eterno ku ta surpasa tur e midinan di e baranka terenal: ningun fenómeno di bida lo move nos di un luga pa otro of laga nos pianan tembla.

🙏🏽SEÑOR awe nos ta skohe pa pone nos konfiansa plenamente den bo y enfrenta e dia aki ku tur su desafionan ku balentia. Danki HESUS pa a mustra nos ku Bo bida ku nos por. Danki SPIRITU SANTU pa duna forsa pa persevera den nos propositonan di bida. Amén y amén🙏🏽

HESUS su palabra na Pedro y nos ta bisa asina aki:
'I Mi ta bisa bo: abo ta Pedro, esta baranka, i riba e baranka akí lo Mi traha mi iglesia; forsa di morto lo no triunfá riba dje.' Mateo 16:18

MI RUMAN, SA KU A NI FORSA DI MORTO LO NO TRIUNFA TANTU RIBA HESUS KOMO E BARANKA, SU IGLESIA KOMO INSTITUTO Y ABO KU AMI KOMO SU DISIPELNAN.

MIEDU DI KIKO NOS POR TIN
THE POWER OF THE WORD

NOS SEGURIDAT

RESPETA

Un felis sabbath di SEÑOR pa bo, bo hogar, bo famia y tur bo amistat y kontaktonan.

Nos teksto di meditashon ta bisa nos lo siguiente awe mainta:
'Respetá dia di sabat i dedik'é na SEÑOR. Bo tin seis dia pa hasi tur bo trabou, pero e di shete dia ta dia di sabat, konsagrá na SEÑOR, bo Dios. No hasi niun trabou e dia ei. Esei ta konta pa bo, pa bo yunan, pa bo katibunan, pa bo bestianan, pa e strañero ku ta biba serka bo. Pasobra den seis dia SEÑOR a traha shelu, tera i laman i tur loke ta pertenesé na nan, pero riba e di shete dia El a sosegá. P'esei SEÑOR a bendishoná dia di sabat i a hasié un dia sagrado.' Éksodo 20:8-11, https://www.bible.com/es-ES/bible/818/EXO.20.8-11

SEÑOR a bendishona y hasi e di 7 dia di e siman un dia sagrado.

Na momentu ku nos respeta e dia di sabbath, nos ta rekonose SEÑOR komo nos kreador, pasobra e dia di sabbath a keda duna na humanidat for di inisio di kreashon of mas spesifiko bisa: ora ku SEÑOR a kaba di krea hende komo e korona di Su kreashon.

E tempu ku SEÑOR a krea pa nos por move den dje tin 3 dimenshon y nan ta aña, luna y siman.

E aña ta keda defini ku dor di e tempu ku mundu ta tuma pa e drai rondo di solo y e luna ta keda defini dor di e tempu ku mundu ta drai rondo di luna, sin embargo pa ku e siman, nos tin un rotashon masha particular ku lamentablemente nos no ta tuma den konsiderashon pa disfruta plenamente di dje.

E siman ta keda defini dor di nos mundu ku ta drai rondo di Dios mes, pasobra ta na momentu ku SEÑOR a kaba ku Su kreashon Ela krea un dia di sosiegu pa humanidat y a bendishon'e.

Awor ku nos ta konsiente di e prinsipio di e Sabbath, ban selebre meskos ku nos ta hasi fin di aña, preparando, kumprando, invitando tur esnan ku nos ta desea realmente pa inisia un siman nobo ku nos, manera e palabra ta indika nos pa hasi'e:
'Den un siman tin seis dia di trabou; e di shete dia ta sabat, e dia di sosiegu kompleto ku boso ta reuní na mi honor. Boso no mag hasi ningun sorto di trabou e dia ei; e sabat mester ta un dia dediká na Mi, unda ku boso por ta biba.' Levítiko 23:3

🙏🏽SEÑOR riba Bo dia santu, nos ta bin den Bo presensia ku un kurason yen di gratitut pa nos alegria y goso ta kompletu. Danki pa e dimenshon di tempu ku Abo a krea pa nos y asina ku nos por pone tur nos pensamentunan, nos palabranan y nos akshonnan drai rondo di Bo divinidat, Bo deidat: TATA, YU Y SPIRITU SANTU. AMÉN AMÉN Y AMÉN🙏🏽

MI RUMAN SA KU E DIA AKI NO TA ASUNTU DI HUDIU, SINO TA ASUNTU DI SELEBRA KU NOS ETERNO DIOS.

UN FELIS SABBATH
THE POWER OF THE WORD

RESPETA

FELIS DIA DI TATA

Nos ta inisia e siman nobo aki ku e regalo di SEÑOR di ta un Tata. Tatanan bendishona boso ta, boso hogar y famia kompletu y tur esnan ku ta rondona boso.

E palabra di nos SEÑOR ta informa nos di e siguiente manera:
'Tende di bo tata ku a engendrá bo; no despresiá bo mama dia e bira bieu. Kumpra bèrdat i sabiduria, siñansa i komprenshon. No bende nan pa nada di mundu! Tata di un yu hustu i sabí, tin rason di sintié felis i orguyoso. Hasi pa bo mama i bo ta tata ta kontentu; hasi pa esun ku a karga bo den su seno sintié alegre.' Proverbionan 23:22-25, 
https://www.bible.com/es-ES/bible/818/PRO.23.22-25

Ta un honor y placer pa eherse e tarea di mas noble ku ta exsisti y esey ta e tarea di ta un Tata.

Tatanan por mira bek y konkluì ku e tarea aki no ta fasil, sin embargo, ku e sabiduria, e inteligencia, e poder y amor ku nos a risibi di nos TATA eterno, nos por konklui ku E ta Esun ku ta hasi e tarea aki posibel.

Pa esnan ku ta na inisio di eherse e tarea di Tata, nos ta konsega boso pa afera boso na nos TATA selestial, pasobra E siguramente lo revela, inspira y ilumina boso di e manera mas excelente pa kumpli ku boso tarea.

🙏🏽TATA di amor, awe nos ta yama Bo danki pa tabata y ta ku nos den ehegersementu di e tarea noble ku Bo a designa pa nos komo Tatanan terenal. Danki pa e goso ku nos tin pa e dianan di bida ku den bo presensia. Den nomber di nos ruman mayo KRISTU HESUS nos ta gradisi y alaba Bo, Amén y amén🙏🏽

Ser Tata no ta un tarea fasil, pero ta e mihor regalo ku nos por a risibi di nos TATA eterno.

TATA GOSA DI BO YUNAN Y YUNAN DI HASI BO TATA FELIS Y ORGUYOSO.
THE POWER OF THE WORD

FELIS DIA DI TATA

STIMA DIOS

Riba e djaluna aki, nos ta inisiando nos labornan ku konfiansa den SEÑOR pasobra tur nos habilidatnan tantu fisiko, komo spiritual ta funshonando den gran manera.
Nos ta yama SEÑOR danki pa su bendishonnan, pa nos hogar, nos famianan y tur nos amistat y konaktonan.

SEÑOR Su palabra ta kla y raspa awe mainta pa loke ta trata nos amor pa kun'E y e ta bisa nos lo siguiente:
'E amor ku mi ta papia di dje ta nifiká ku nos ta biba segun Dios su mandamentunan. E mandamentu manera boso a tende for di kuminsamentu, ta pa boso biba den amor.' 2 Huan 1:6, https://www.bible.com/es-ES/bible/818/2JN.1.6

E palabra ta pone énfasis riba e amor y aki ta trata di e amor ku ta pafo di nos kuadro di pensamentu y sentimentunan.
E amor aki no ta trata di nos afektonan emoshonal ku ta influencia nos forma di pensa, papia y aktua.

E amor ku e palabra ta papia di dje ta esun ku ta basa riba e parti rational di nos komo sernan humano. 

Ku otro palabra, aki ta trata di e amor komo un aktividat mental: aki ta trata di e razonamentu argumentativo ku ta koresponde na e inspiriashon ku sea SPIRITU SANTU a duna den e instrukshon aki, of e yu di Dios KRISTU HESUS a duna nos ora E tabata riba e mundu aki. 

HESUS a pone pa nos di e forma aki:
'Si boso ta stima Mi, boso lo warda mi mandamentunan. Esun ku aseptá mi mandamentunan i obedesé nan, ta stima Mi. Mi Tata ta stima esun ku stima Mi i Mi tambe lo stim'é i mustr'é ken Mi ta.’ Hesus a kontest'é: ‘Si un hende ta stima Mi, e ta obedesé mi palabra i mi Tata lo stim'é; nos lo bini serka dje i keda biba serka dje. Esun ku no ta stima Mi, no ta obedesé mi palabranan. I e palabranan ku boso a tende, no ta di Mi, ma di mi Tata ku a manda Mi.' Huan 14:15,21,23-24

Analisando e tekstonan aki, HESUS ta bisa nos ku otro palabra, ku stima Dios ta ensera ta obedesido na djE, ta nifika ta loyal, fiel, franko, noble, honesto, sinsero ku n'E.

🙏🏽SEÑOR nos ta gradisi Bo pa e instrukshon di Bo palabra na nos. Nos ta habri nos kurason, nos mente y nos ser kompletu pa Bo purifika nos ku Bo palabra y asina nos por stima Bo di kurason, pues: obedese, ta fiel, honesto, sinsero, y franko ku Bo. Guia pa e SPIRITU SANTU nos ta gradisi Bo den nomber di KRISTU HESUS.🙏🏽

Mi rumannan, e enemigu a argumenta, interpreta y gaña Eva y e na su turno razonando riba pilarnan di mentira a tuma e desishon pa ta desobedesido.

Awe, e enemigu ta huza sernan humano pa argunmenta, interpreta y gaña humanidat ku e dia di adorashon ta e dia ku e Yu di Dios a lanta for di morto, kristiannan na nan turno ta rasona y tuma desishon pa ta desobedediso na SEÑOR.

Na moda di papia, nos posishon di stima Dios mester ta, ni maske ku ta KRISTU mes desvia di un mandamentu di SEÑOR, nos lo keda obedesido, fiel franko, loyal, honesto y sinsero na Su mandamentunan.

SYIMA DIOS INKONDISHONAL RIBA TUR KOS
THE POWER OF THE WORD

STIMA DIOS I

GOBERNADÓ

Un djamars sumamente bendishona pa bo, bo hogar, bo famia y tur bo amistat y kontaktonan.

E palabra di SEÑOR for di boka di HESUS ta yega na nos bisando lo siguiente:
'Mi no por sigui papia muchu mas ku boso, pasobra gobernadó di e mundu akí ta na kaminda. E no tin poder riba Mi, ma mundu mester sa ku Mi ta stima Tata i ku Tata ta stima Mi i ku Mi ta hasi loke Tata manda Mi hasi. Bon, lanta ariba, ban fo'i djaki!' Huan 14:30-31, https://www.bible.com/es-ES/bible/818/JHN.14.30-31

E palabra ta relata na nos ku diferente biaha HESUS a hañ'é enfrenta y konfronta ku e gobernado di e mundu aki, esta Satanas.

Na Su nasementu e enemigu a intenta ku un dekreto di e rey dje tempu ey pa a mata tur e yunan ku a nase di 2 aña y pa abow, despues di a yuna 40 dia largu e enemigu a intenta di lage kai den pika, pa via di Perdo ela intenta pa kita HESUS di kumpli ku su proposito di muri pa humanidat y finalmente ela orquestra henter un plan di huisio y kondena y hiba HESUS riba e krus di Kalvario. 

Kada un intento di e enemigu, HESUS a vense nan pasobra E tabata fiel na loke ku e TATA a ordena den Su palabra y a mande hasi pa ku humanidat. 

Awe nos tambe por sali for di poder di e gobernadó na momentu ku nos asepta HESUS komo nos salbador y mantene nos fiel na loke ku E a manda nos hasi of sigui Su ehempelnan ku Ela laga atrás pa nos.

E las pa nos awe ta, pa nos tambe tuma e desishonnan korespondiente pa e gobernadó di e mundu aki no tin poder riba nos.

🙏🏽SEÑOR nos ta gradisi Bo pa e sakrifisio di Bo yu KRISTU HESUS pa asina nos ta kompletamente libra for de e poder di e enemigu. Danki tambe na Bo SPIRITU SANTU ku ta fortifika nos den nos desishon pa ku Bo plan di salbashon. Amén y amén 🙏🏽

Finalmente sa esaki:
'pasobra e echo ku un hende a nase di Dios ta loke ta vense mundu i ta nos fe den Kristu a duna nos e viktoria ku a vense mundu. Ken por vense mundu si no ta esun ku ta kere ku Hesus ta Yu di Dios?' 1 Huan 5:4-5

MI RUMAN, NOS FE DEN KRISTU HESUS TA DUNA NOS E VIKTORIA.

E NO TIN PODER RIBA MI
THE POWER OF THE WORD

GOBERNADO

BIBA TRANKIL II

Nos ta kibra e siman aki na 2 y ku un kurason trankil nos ta inisia e di 2 parti di dje. 
Nos ta gradisi SEÑOR pa e seguridat ku E ta provee pa kada un di nos, pa nos hogar, nos famia y tur nos amistat y kontaktonan.

Su palabra ta bisa nos asina aki;
'No perhudiká otro, asina boso ta respetá boso Dios. Pasobra Ami ta SEÑOR, boso Dios. Kumpli ku mi leinan i sòru di biba segun mi mandamentunan. E ora ei boso lo biba trankil den e pais ei. E tera lo produsí kosecha basta abundante pa boso haña kome i biba trankil einan.' Levítiko 25:17-19, 

Awe SEÑOR ta bisa Su pueblo eskohi, Su Israel spiritual, pa nos sigui e instrukshonnan duna den e tekstonan di meditashon, pasobra e ora ey, kaminda nos ta biba, traha y frekuenta lo tin produkshon na abundansia pa nos por kome y biba trankil.

Bo tabata sa ku nos obediensia ta influencia tur loke ku ta rondo di nos?

Esaki e palabra ta siña nos:
'E hòmber Adam El a bisa: ‘Pasobra bo a tende di bo kasá i bo a kome for di e palu ku Mi a prohibí bo di kome for di dje, tera lo ta maldishoná pa bo motibu. Henter bo bida largu lo bo mester traha duru pa e tera duna bo di kome.' Génesis 3:17

Di igual manera ku den e lei di obediensia na e palabra ta ensera ku na momentu ku Adam a desobedece tera a maldishona, ku humanidat den su totalidat na momentu ku nan ta hiba un bida obediensia na e palabra tur loke ta rondo di nan lo ta bendishona. 

E les pa nos awe mainta ta, ku obediensia na e palabra di SEÑOR ta paga pasobra e poder di e palabra ku a krea tur kos lo laga tur kos den nos mundu abunda.

🙏🏽SEÑOR nos ta sumamente agradesido pa Bo palabra duna na nos awe. Nos ta skohe pa obedese y respeta Bo, dor di no perhudika otronan. Danki pa Bo PSIRITU SANTU ku Bo a duna nos pa guía nos tur dia na obediensia. Den nomber di KRISTU HESUS nos ta gradisi y glorifika Bo santu nomber. Amén y amén🙏🏽

Konsekuensia di obedese e palabra:
'Hesus a kontest'é: ‘Si un hende ta stima Mi, e ta obedesé mi palabra i mi Tata lo stim'é; nos lo bini serka dje i keda biba serka dje.' Huan 14:23
https://www.bible.com/es-ES/bible/818/JHN.14.23

MI RUMAN, RESULTADO DI OBEDIENSIA TA KU TATA, YU Y SPIRITU SANTU TA BINI SERKA NOS Y TA KEDA BIBA SERKA NOS.

OBEDIENSIA TA PAGA
THE POWER OF THE WORD

BIBA TRANKIL II

E TESORO DI MAS GRANDI

Un djawebs sumamente bendishona pa bo, bo hogar, bo famia y tur bo amistat y kontaktonan.

Nos ta risibi un instrukshon di nos SEÑOR ku ta bisa nos lo siguiente:
'No montoná rikesa riba mundu kaminda mòt i frus ta kome nan i ladron ta kibra drenta hòrta nan. Montoná rikesa den shelu, einan ni mòt ni frus no por kaba ku nan, ni ladron no por kibra drenta hòrta nan. Pasobra kaminda bo rikesa ta, einan bo kurason tambe ta.' Mateo 6:19-21, https://www.bible.com/es-ES/bible/818/MAT.6.19-21

E instrukshon di "no montona rikesa riba e mundu aki" ku nos ta risibi di SEÑOR, ta esun ku mayoría yunan di Dios ta pone un banda, sea konsientemente of inkonsientemente.
Relashonnan den hogarnan, famianan ta keda kompletamente distorsiona y of kibra pa motibu di negligencia di e instrukshon di no montona rikesa riba e mundu aki.

E realidat ta ku, tur loke ku nos a bin haña aki, lo keda aki, pasobra nada nos no por bai kune.

Di otro un banda, e instrukshon di "montona rikesa den shelu" ta e instrukshon ku realmente nos por ta doño di dje. 

Na momentu ku nos tuma e instrukshonnan aki na kuenta, nos ta kompronde ku HESUS ta pidi nos ku otro palabra pa no eksagera den loke ku nos realmente tin mester di dje físikamente riba e mundu aki, sino hasi ku nos nesesidatnan pa ta ciudadano di e reino selestial ta nos máximo prioridat.

🙏🏽SEÑOR nos ta gradisi Bo pa a supli den nos nesesidatnan fisiko di tur dia y danki pa sostene nos den nos forma pa akumula tesoronan den Bo reino selestial. Nos ta yama Bo danki pa e tesoro di SPIRITU SANTU ku Bo a duna nos, y e tesoro di salbashon den KRISTU HESUS ku Bo a buta na nos disposishon. Amén y amén.🙏🏽

E tesoro di mas grandi ku nos mester tin ta esaki:
Pueblo di Herusalèm, SEÑOR ta duna bo seguridat den bo bida, kada be di nobo E ta trese salbashon, E ta duna sabiduria i konosementu na abundansia. Temor di Dios, esei ta bo tesoro di mas grandi. Isaías 33:6

MI RUMAN, NA MOMENTU KU NOS TIN E TESORO AKI, NIUN SER KREA POR KITE FOR DI NOS Y LO E AUMENTA KADA DIA DI NOBO DEN BALOR.

TEME DIOS DEN TUR LOKE BO HASI
THE POWER OF THE WORD

E TESORO DI MAS GRANDI

DESKANSO

Un felis dia di preparashon pa ku e dia di deskanso di nos SEÑOR sumamente bendishona pa bo, bo hogar, bo famia y tur bo amistat y kontaktonan.

Nos teksto di meditashon ta bisa nos lo siguiente awe mainta:
'Ke men ku tin un tempu di deskanso ta warda pueblo di Dios ainda, manera Dios a sosegá riba e di shete dia. Pasobra esun ku drenta e lugá di deskanso di Dios, ta sosegá di su trabou, manera Dios a sosegá di djE.' Hebreonan 4:9-10, https://www.bible.com/es-ES/bible/818/HEB.4.9-10

Na momentu ku nos SEÑOR a deskansa di Su obra di kreashon, Ela santifika y bendishona e di 7 dia. Awe, Su deskanso di Su trabow di redenshon ta den Su yu KRISTU HESUS.

E relashon ku e dia di deskanso fisiko ta duna nos ku e deskanso spiritual ku KRISTU HESUS ta duna nos ta ku nos enfuerso humano pa haña seguridat di bida, di pordon di alimentashon pa kualkier nesesidat, ta e TATA di amor, den Su imenso miserikordia ta provee pa nos den un estado di inaktividat.

Ku otro palabra, pa medio di nos fe genuino den SEÑOR, realmente tur nos nesesidatnan, tantu fisiko, psikologiko, material y spiritual lo haña nan kumplimentu den djE. SEÑOR a salba nos den Su yu KRISTU HESUS.

🙏🏽SEÑOR awe nos ta bin den Bo presensia y konfia Bo plenamente ku tur nos karganan. Danki pa Bo invitashon hasi na nos pa medio di Bo yu KRISTU HESUS. Danki pa duna nos di Bo SPIRITU SANTU pa E guia nos na tur berdat y asina nos keda konfia bow di tur sirkunstansia den Bo provishon. Amén y amén.🙏🏽

E invitashon pa nos drenta den SEÑOR su deskanso ta bini di Su yu di e forma aki:
'Tur ku ta kansá i kargá, bini serka Mi i Ami lo duna boso sosiegu. Tuma mi yugo riba boso skouder i siña di Mi, pasobra Mi ta mansu i humilde; i boso lo haña sosiegu. Pasobra mi yugo ta suave i mi karga ta lihé.’' Mateo 11:28-30

MI RUMAN, LAGA NOS ASEPTA E INVITASHON Y DRENTA E SOSIEGU DI HESUS, ASEPTANDO SU MERITONAN GANA RIBA E KRUS DI KALVARIO Y SU RESUREKSHON PA NOS.

UN FELIS DIA DI DESKANSO DEN HESUS
THE POWER OF THE WORD

DESKANSO

TENE DURU

Un sabbath di nos SEÑOR sumamente bendishona pa bo, bo hogar, bo famia y tur bo amistat y kontaktonan.

E palabra di SEÑOR ta motiva nos di e siguiente manera:
'Laga nos tene duru na e fe ku nos ta profesá. Pasobra nos tin un gransaserdote elevá, esta Hesus, Yu di Dios, ku a drenta shelu yega te serka Dios. Nos tin un gransaserdote ku ta kapas di kompadesé di nos debilidatnan; E mes tabata poné na prueba den tur sentido, presisamente meskos ku nos. Pero E no a peka. Ban aserká Dios su trono, antó ku konfiansa, kaminda por haña grasia, pa E tene mizerikòrdia ku nos i den su bondat yuda nos na ora di nesesidat.' Hebreonan 4:14-16, https://www.bible.com/es-ES/bible/818/HEB.4.14-16

E teksto ta motiva nos pa mantene nos fe firme den loke ku e palabra a siña nos.

HESUS ta nos gran saserdote y esey ta hasi ku nos por aserka nos TATA den shelu konfiadamente pasobra E ta entersede pa kada un di nos.

E teksto ta bisa nos ku HESUS a keda buta na prueba na e mesun manera y tipo di prueba ku nos tambe ta pasa aden, sin embargo, E no a peka. Gloria na SEÑOR.

Finalmente e teksto ta bisa nos ku Dios ta yuda nos den ora di nos nesesidatnan. 

🙏🏽SEÑOR nos ta gradisi Bo awe pa duna nos pleno konfiansa den nos relashon ku Bo. Danki nos ta yama Bo pa a manda Bo yu bin muri pa nos y asina nos por aserka Bo trono konfiadamente. Danki pa Bo SPIRITU SANTU ku ta guia nos tur dia di nobo riba e kaminda smal. Amén y amén🙏🏽

E loke ku mantene nos fe ta hiba n'e:
'Ounke E tabata Yu di Dios, El a siña pa medio di tur loke El a sufri, kiko ta obediensia.' Hebreonan 5:8

MI RUMAN, MANTENE BO FE TA HIBA NA UN OBEDIENSIA GENUÍNO NA NOS ETERNO SEÑOR.

BENDISHON
THE POWER OF THE WORD

TENE DURU II

*KONOSE KRISTU

Riba e prome dia di e siman nobo nos dilanti aki, ku konfiansa nos ta bin den presensia di nos SEÑOR, gadisiendo E pa bida, amor, miserikordia, gracia y pordon. Tur e bendishonnan aki nos ta desea tambe pa nos hogar, nos famia y tur nos amistat y kontaktonan.

SEÑOR Su palabra ta siña, instruí y motiva di e siguiente manera:
'Ma awor tòg mi ta konsiderá tur e kosnan akí, ku na mi pareser tabata ganashi, un pèrdida pa motibu di Kristu. Ma mas ku esei, no solamente e kosnan ei, sino tur kos mes mi ta konsiderá di ta un pèrdida, kompará ku konosé Kristu-Hesus, mi Señor. Esei ta mas balioso ku tur otro kos! Pa su motibu mi a entregá tur kos i mi ta konsiderá tur e kosnan ei bagas, pa asin'ei mi por gana Kristu i ta uní kunÉ. Ku Dios ta aseptá mi komo hustu no ta basá riba mi kumplimentu ku lei. Ma esei ta bini pa medio di fe den Kristu; esei ta bini di Dios i ta basá riba fe.' Filipensenan 3:7-9, https://www.bible.com/es-ES/bible/818/PHP.3.7-9

E apostel Pablo ta duna nos den e tekstonan aki, inspira pa SPIRITU SANTU, e nivel di relashon ku kada ser humano mester tin ku e Salbador KRISTU HESUS.

E palabra ta mustra nos awe mainta ku no tin nada mas valioso riba e mundu aki pafo di e relashon ku nos kreador y redentor KRISTU HESUS.
Esaki ta nifika ku nos eskoho pa nos Salbador mester ta e prioridat number unu den nos bida y e palabra ta bute tambe di e forma aki:
'Niun hende no por sirbi dos shon, pasobra lo e odia esun i stima e otro. Lo e pega un na su kurason i menospresiá e otro. Ta imposibel sirbi Dios i plaka tambe.' Mateo 6:24

E les pa nos awe ta pa nos ta firme den nos desishon pa ku KRISTU HESUS, pasobra E ta e uniko proposito real di bida y no permiti kosnan material, posishon ekonomiko y of financiero, ni niun otro kos ku ta existi kita nos enfoke riba djE.

🙏🏽SEÑOR nos ta yama Bo danki pa mustra nos e uniko kaminda di bida y pa biba. Danki SPIRITU SANTU pa revela nos y guía nos den e kaminda di berdat aki. Den nomber di KRISTU HESUS nos ta gradisi y alaba Bo santu nomber. Amén y amén.🙏🏽

HESUS ta bisa nos awe asina aki:
'Hesus a kontest'é: ‘Ami ta e kaminda, bèrdat i bida; niun hende no por yega serka Tata, si no ta pa medio di Mi.' Huan 14:6

MI RUMAN, HESUS REALMENTE TA E KAMINDA, BERDAT Y BIDA, Y ESAKI NO TA TEORIA, PERO TA E BERDAT DI BIDA.

KRISTU HESUS E PROPOSITO DI BIDA Y PA BIBA
THE POWER OF THE WORD

KONOSE KRISTU

LIBER I

Un djaluna super bendishona pa bo, bo hogar, bo famia y tur bo amistat y kontaktonan.

E palabra di nos SEÑOR ta skerpi awe mainta y e ta bisa nos lo siguiente brevemente:
'Boso lo konosé e bèrdat i e bèrdat lo hasi boso liber.’ Huan 8:32, https://www.bible.com/es-ES/bible/818/JHN.8.32

Manera nos a termina nos deboshonal ayera, kaminda ku HESUS a afirma nos ku É ta e kaminda, e berdat, y bida, E ta afirma nos un biaha mas ku e berdat lo hasi nos liber. Ku otro palabra, È lo hasi nos liber.

Liber di Kiko un hende lo puntra?
Nos lo ta liber di engaño di Satanas, liber di pika y maldat ku tur nan konsekuensianan y liber di autoengaño.

Den e bida diario niun hende no por gaña nos ku un bijete di 200florin antiyano, pasobra nos konose e berdat. E berdat ta ku den sirkulo di nos florin, nos no konose e denominashon di 200 pero si di 250. Pa mas perfekto ku e bijete di 200florin por ta traha y hasta nan ta sigura nos ku ela sali for di banko central, konosiendo e berdat, e ta bira difisil pa e bijete haña su akogida den pueblo, pues, pa nos keda engaña.

E ta un lastima ku riba diferente tereno di bida, HESUS a adverti nos pa engaño, hendenan perverso, sistemanan korupto, sin embargo, nos no ta ker'E y konsekuentemente nos ta haña nos den desgrasia. 
HESUS a bisa nos por ehempel:
'Nashon lo lanta kontra nashon, reino kontra reino; lo tin temporada di mizeria di hamber i temblor na diferente lugá. Hopi profeta falsu lo aparesé i nan lo gaña hopi hende. Maldat lo plama asina tantu ku amor di hopi hende lo fria,' Mateo 24:7,11-12

Hopi no ta kere e siñalnan ku HESUS a duna nos pa ku su pronto binida, pero ta kere firmemente ku nos ta bibando den tempu di pas, ku ora e profeta falsu nan di e sientifikonan predika nos un kos ku esey ta bai sosode. Analisa henter e episodio di Covid 19.

🙏🏽SEÑOR nos ta yama Bo danki pa adverti nos den Bo palabra di e kosnan ku ta y lo bai sosode riba kara di tera. Genera den nos mas fe pa ku Bo palabra. Den nomber di KRISTU HESUS nos ta gradisi Bo. Amén y amén🙏🏽

E tema di konose e berdat y bira liber ta kontinua mañan ku e poder di nos SEÑOR, kaminda ku HESUS lo mustra nos e berdat di berdat.

BOSO LO KONOSE E BERDAT Y LO E HASI BOSO LIBER
THE POWER OF THE WORD

LIBER I

“MINISTRY “THE POWER OF THE WORD”

The ministry “The power of the word” was founded on 10th of January 2015 and her mission is making disciples for our Lord and Savior Jesus Christ.
In order to achieve this goal, we are spreading the word through podcasts and through charity service, called “helping hand services”.
Our Lord Jesus Christ expressed the following words in Matthew 4:4
Jesus answered, “It is written: ‘Man shall not live on bread alone, but on every word that comes from the mouth of God; 
And this is the inspirational text for every step we are taking in achieving the mission of the ministry.
PODCAST
Taking the words of the master Jesus Christ into account, we started to produce daily devotional for our contacts and followers.
The main purposes of the podcasts are:
1. Initiate the day with the word of God;
2.  Enhance knowledge of the word of God;
3. Spread the good news of Jesus Christ.

Personal information:
•	Name:			Wendell S. Noor
•	Date of birth:		01 July 1957
•	Place of birth:		Curaçao
•	Residing:			Dominican Republic
•	Believe:			7th Day Adventist

Contact information
•	Telephone/whatsapp:	+1-809-429.9152
•	E-mail address:		wendellnoor0107@gmail.com

THE POWER OF THE WORD

Pinned to spotlight

Popular tracks