narito ang ngalang mayroong bakas, na kung
tutungo sa haraya’y tutugon, iigpaw sa paano
nabibigkas ang tanong ng kinaiiralan, ng nagaganap
sa pagitan ng hantungan at pagkabuo. ang
pagkilos patungo sa totoong natatanaw sa bawat
pansamantalang panaklong, sumusuray ngunit tumitibay. ang Salita

na tutupad sa pangakong inawit. nguni’t salita
rin ang mismong lilikha ng alab kung
lumubay sa lunduyan ng meron ang bawat
dupong nagniningas, pumapaso, at sumisilab sa paano
at ano, ugong na bumabagtas, pumapailanlang, ang
hindi pa lubusang natatanaw bagaman nasasabi, nagaganap

bilang pagsugal at paglagak ng kamalayan. nagaganap
bilang pahayag, hungkag na nibel ng salita
na sumisilo sa kaligiran, sa anino, ang
dakilang Bilang, taksil na liwanag na kung
titipuni’y matutuklasan sa ingay, sa katanungang: paano
mapapawi ang dahas ng suheto sa bawat

pagsambit ng kaibhan. kasaysayan, sugatang makina: bawat
pag-inog ng saysay at kawalan ay nagaganap
sa mga lagusang nagiba’t nahati, nabura. paano
kakawala sa tanikalang animo’y humihilom sa salita?
marahil: lindol itong dadantay, bubulong. at kung
pagmamasdan, lubusang mababatid: nahukay na magmuli ang

basag na tinig. paos na himagsik, ang
talang gumagabay sa kamao, na sa bawat
pagkuyom ay nagbubuklod sa api, na kung
patuloy na dadaloy ay babalik sa nagaganap.
aapuhap sa ingay ng kalagayan ang salita,
at sasaklawin ng itim na puso. paano

ilulunsad ang pagbangon mula sa pagkaguho? paano
ititindig ang taog ng kasaysayan? ito ang
abang layunin sa gitna ng unos. salita,
ang pusod ng karunungang magdurugtong sa bawat
katawang nilimot, bininyagan, sa dahas ng nagaganap:
ang pagtatalabang paikot sa totoo, na kung

may buslo ang busal, paano babawiin , bawat
pagluluksa’t lumbay, ang karit at punglo? nagaganap
ang lihim na salita ng liham kung

KARA KRUS

full text here: https://www.facebook.com/notes/vince-dioquino/inaugural-text/10154278519672905

thesewordspass