https://www.facebook.com/tomas.beshai

عشوائية لّم شعرك
خلتني احب اللغبطه
نص عشقك للمظاهر
ملامحك اللي مخاصمه كل مساحيق الجمال
الشبه بينك و بين صحابي الولاد
فـ الجدعنه و المشاكله و العناد
عنيكي اللي دايما باصه علي الجزء المبسوط من الدنيا
شمس بشفايف
قمر متكفهوش السما لو جئ عليه الليل
حكاويكي شبه ونس القهاوي
صوتك ده غنوه من غير ولا مزيكا
ايديكي ك نسمه هوا في يوم الشمس فيه زعلانه
حضنك بحبه مع اني مجربتوش
ك حب المهاجر ل فيزه مش وياه

أنتِ .. اول جزء .. توماس بشاي

و حب كتير و متحبش
و يوم ما اتحب ماحبش
عنيها جتله فـ اتلبش
فـ قال للدنيا بعشقها
 
كان دايما بيحكيلها
و كانت هي تحكيله
ده اول حرف من اسمها
كان مالي كل كشاكيله
 
و شافها لايقه عل الفستان
قصاده واقفه في الفاترينه
ف باع كل القصايد فرط
و اجر كل ايامه
ف طلعوا قد التمن بالظبط
و هي قد احلامه
مكنش فـ جيبه
غير الاشعار
و ضحكه ساكنه في كلامه
 
ف لف الحلم و خباه
ده لف كتير عشان يلقاه
و يوم ما نوي يعيش جنبه
مرضيتش الدنيا تسيبه معاه
 
ف داس علي كل شوارعها
و جّرح كل حواريها
ده يوم ما حلمله مره بحلم
مطلعش الحلم ده فيها
 
ف دخل ايده في جيوبه
و لخبط همه فـ عيوبه
و شاف الضعف فـ ذنوبه
و قال للدنيا يا كافره !

تايه .. توماس بشاي

كلمات : توماس بشاى
غناء : محمود طارق
ألحان : أبانوب شوقى

وحب كتير ومتحبش

من ديوان .. تفاصيل .. للشاعر توماس بشاي

و ناس ..

و ناس سيباك و هاتسيبك
و ناس حباك علي عيبك
و ناس ترحل و هاتجيلك
و ناس ترحل و ما بتجيش
و ناس في البعد مش بتنام
و ناس تنسي مع الايام
و ناس تفضل يقولوا تمام
و ناس علي طول يقولوا مفيش
و ناس ضحكتها مبتكمّلش
و ناس ضحكتها بتكّمل
و ناس في الحزن تتكسر
و ناس تانيه بتتحمل 
و ناس تطلب و مش بتنول
و ناس بتنول بلا طلبات
و ناس عيشينها عل الكتالوج
و ناس عيشاها ب استعباط
و ناس تسكت عنيها تقول
و ناس بتقول دموعها تزيد
و ناس في الفضفضه ترتاح
و ناس الفضفضفه ليهم
كأنه جرح تاني جديد ..
و ناس ماشيه اهي عل الارض
و ناس سرحانه اهو و طايرين
و ناس في السجن لاقيه براح
و ناس في براح لكن مساجين

و ناس .. توماس بشاي

من ديوان " افيون " الصادر عن دار دون

توماس بشاي

Popular tracks