Vi inviterte eit panel til å snakke om eit viktig tema i norsk omsettingspraksis, nemleg omsetting via tredjespråk. 

Det finst mange døme i norsk omsettingshistorie på bøker som er blitt omsette via eit tredjespråk, som regel engelsk. Dei siste åra har dette blitt ein mindre akseptert praksis, omsetting skal skje direkte frå eit språk til eit anna. Norsk Oversetterforenings ståstad er at indirekte omsetting er noko ein berre skal gjere i nødstilfelle. 

Vi spør kor utbreidd denne praksisen er, om det eigentleg er blitt tabu å omsette via andre språk og kva som kan gå tapt i ei slik språkoverføring. Men kva skjer med all litteraturen frå kikuyu, shona, bengali eller malayalam om ein ikkje kan omsette via eit tredjespråk? Og er det eigentleg så viktig at vi omset litteratur frå desse fjerne språka? Er det så enkelt – og vanskeleg – som at vi rett og slett manglar språkkompetanse – stoppar det der?

I panelet:
Hedda Vormeland, omsettar frå engelsk og nederlandsk
Magne Tørring, omsettar frå engelsk og japansk
Johanne Fronth-Nygren, omsettar frå engelsk og Norsk Oversettforening sin representant i Norsk PENs Komité for fengslede forfattere
Asbjørn Øverås, redaktør for omsett litteratur i Aschehoug
Ordstyrar: Runa Kvalsund, redaktør i Mellom

Arrangementet blei støtta av Norsk Tidsskriftsforening og Norsk Oversetterforening.

Panelsamtale om indirekte omsetting

Tidsskriftet Mellom er eit rom for litteratur- og omsettingsinteresserte, mellom språk, mellom skrivarar, mellom tekstar.

Vi trykker omsettingar og tekstar om omsetting i alle sjangrar, samt kritikk av omsett litteratur. Vi vil utvide den omsette kanonen, løfte fram verdien som ligg i omsetting, og vise breidda i kva omsetting kan vere. Vi ønsker å vere eit rom for ordskifte om korleis den omsette litteraturen både kan forme og bli forma av kulturelle strøymingar, tankegods og maktforhold.

Vi gir ut to trykte nummer i året. Redaksjonen består av Runa Kvalsund, Ingeborg Urke Myklebust, Ida Hove Solberg, Erlend Wichne og Julia Wiedlocha.