Տէր  եւ  Տիկին  

Յարգարժան, 
Պատուարժան,
Պարոն կանանչ կոկորդիլոս,
 անունը՝ Խամուն…   

Համեստափայլ, 
Ազնուափայլ,
Տիկին կանանչ կոկորդիլոս,
անունը՝ Խաթուն…    


Պարոն Խամուն, 
Տիկին Խաթուն,  
Տէր եւ Տիկին 
երկու կանանչ կոկորդիլոս 
միասին գացին Եգիպտո՛ս…

Եգիպտո՛ս, 
ուր կայ գետ մը  
շա՛տ լայն 
ու երկայն,
անունը՝ Նեղոս…          

Պարոն Խամուն, 
Տիկին Խաթուն,  
Տէր եւ Տիկին 
երկու կանանչ կոկորդիլոս 
Նեղոսին մէջը լողացին…

Կորկոս կիրկոս, լայնքին,
կիրկոս կորկոս, երկայնքին…
Կորկոս կիրկոս, լայնքին,
կիրկոս կորկոս, երկայնքին… 
Մէկը դարձաւ Թութանխամուն,
միւսը դարձաւ Թութանխաթուն…  
     
–	Պարոն Խամուն, 
     Թութանխամուն,
     ինչ լաւ ըրինք եկանք հոս…

–	Տիկին Խաթուն, 
     Թութանխաթուն,
     ինչ լաւ ըրինք եկանք հոս…


Պարոն Խամուն՝
Թութանխամուն,
Տիկին Խաթուն՝
Թութանխաթուն,
Տէր եւ Տիկին 
երկու կանանչ կոկորդիլոս 
միասին մնացին Եգիպտո՛ս…

Եգիպտո՛ս, 
ուր կայ գետ մը  
շատ լայն 
ու երկայն,
անունը՝ Նեղոս,
Նեղոսին մէջ,
      Տէր եւ Տիկին    
երկու երջանիկ կոկորդիլոս…                      


Կորկոս կիրկոս, կոկորդիլոս…
Կիրկոս կորկոս, կոկորդիլոս…

Album inconnu (05/01/2023 16:13:24)

երկու կանանչ կոկորդիլոս

Ախ ըլլայի, ըլլայի,
պզտիկ ձուկ մը ըլլայի…
Ամբողջ օրը՝ չըլըփ չըլըփ,
ջուրին մէջը՝ չըլըփ չըլըփ,
ուրախ զուարթ լողայի…
Սուր կարթը… 
Փախի՛մ փախիմ…

Ախ ըլլայի, ըլլայի,
պզտիկ ձուկ մը ըլլայի…
Ամբողջ օրը՝ չըլըփ չըլըփ,
ջուրին մէջը՝ չըլըփ չըլըփ,
ուրախ զուարթ լողայի…
Ուռկանը…
Փախի՛մ փախիմ…

Ախ ըլլայի, ըլլայի,
պզտիկ ձուկ մը ըլլայի…
Ամբողջ օրը՝ չըլըփ չըլըփ,
ջուրին մէջը՝ չըլըփ չըլըփ,
ուրախ զուարթ լողայի…
Շանաձուկը…
Փախի՛մ փախիմ…

Ախ ըլլայի, ըլլայի,
պզտիկ ձուկ մը ըլլայի…
Ամբողջ օրը՝ չըլըփ չըլըփ,
ջուրին մէջը՝ չըլըփ չըլըփ,
ուրախ զուարթ լողայի,
վտանգէն փախէի,
վտանգէն շատ շուտ փախէի…


Ախ ըլլայի, ըլլայի,
պզտիկ ձուկ մը ըլլայի…

ախ ըլլայի, ըլլայի

Տամ, տամ, 
որո՞ւն տամ

Ողնայարը,
շարէ շարէ,
ողնաշարը
եւ
մէկ երկու,
տասներկու,
անգամ երկու, 
տասը,
քսան,
չորս՝
քսանչորս 
ոսկորները…

Քսանչորս 
ոսկորներով
վանդակը,
վանդակին մէջ
թռչուն սրտիկը
կը տրոփէ՝

Տամ, տամ, տամ,
փաթթուկ տամ…
Տամ, տամ,
որո՞ւն տամ…

Տամ, տամ, 
Շուշիկին տամ…

Տամ, տամ, տամ,
փաթթուկ տամ…
Տամ, տամ, 
որո՞ւն տամ…

Տամ, տամ, 
Նուշիկին տամ…


Տամ, տամ, տամ,
փաթթուկ տամ…
Տամ, տամ, տամ,
որո՞ւն տամ…

տամ տամ, փաթթուկ տամ

Հաւուկ, հաւիկ, խատուտիկ,
կու տամ քեզի, կուտ կուտիկ…

Կուտիկ ուտես, գիրուկնաս,
հաւկիթ ածես ինծի տաս… 

Հաւուկ, հաւիկ, խատուտիկ,
առանց քեզի չկայ Զատիկ…

Զատիկ է, Զատիկ,
հաւիկը ածեց 
կարմիր հաւկիթ։

Զատիկ է, Զատիկ,
հաւիկը ածեց 
դեղին հաւկիթ։

Զատիկ է, Զատիկ,
հաւիկը ածեց 
կանանչ հաւկիթ։

Զատիկ է, Զատիկ,
հաւիկը ածեց 
կապոյտ հաւկիթ։

Զատիկ է, Զատիկ,
հաւիկը ածեց 
գոյն գոյն հաւկիթ։

Զատիկ է, Զատիկ,
եկէք խաղանք
թաք թաք հաւկիթ,
թոք թոք հաւկիթ։

հաւուկ հաւիկ

Դդում՝
մեծ դդում…
Դդում՝
մեղրադդում…

Դդումին փորը պարպեցի,
մէջը բրինձ լեցուցի…


Դդում՝
մեծ դդում…
Դդում՝
մեղրադդում…

Դդումին փորը պարպեցի,
մէջը բրինձ,
չիր ու չամիչ լեցուցի…


Դդում՝
մեծ դդում…
Դդում՝
մեղրադդում…

Դդումին փորը պարպեցի,
մէջը բրինձ, 
չիր ու չամիչ,
մեղր ու կարագ լեցուցի…


Դդում՝
մեծ դդում…
Դդում՝
մեղրադդում…

Դդումին փորը պարպեցի,
մէջը բրինձ, 
չիր ու չամիչ,
մեղր ու կարագ լեցուցի,
թոնիրին մէջը կախեցի…


Ղափամա, ղափամա,
Շուշիկը մեզի հիւր թող գայ… 

Ղափամա, ղափամա,
Նուշիկը մեզի հիւր թող գայ…

մեծ դդում

աստղիկները
երազ հիւսեն
երազ հիւսեն
եւ օրօրեն

մշիկ մշիկ 
սիրուն թռչնիկ
յուշիկ յուշիկ
անուշ քունիկ



աստղիկները
երազ մաղեն
երազ մաղեն
եւ օրօրեն

մշիկ մշիկ 
սիրուն թռչնիկ
յուշիկ յուշիկ
անուշ քունիկ

ձագուկ Բալենին եւ իր մաման

Տօնածառ


Փաթիլ փաթիլ ձիւն կը տեղայ
ծառերուն վրայ,
իսկ մեր երդիքին տակը
տօնածառ մը կայ…


Տօնածառ տօնածառ,
շուրջը երգ ու պար…
Տօնածառ տօնածառ,
ճիւղէն կախուած 
մաղթանք մը կայ,
Շուշիկին համար…

Ուրախ ըլլաս, Շուշի՜կ…


Փաթիլ փաթիլ ձիւն կը տեղայ
ծառերուն վրայ,
իսկ մեր երդիքին տակը
տօնածառ մը կայ…


Տօնածառ տօնածառ,
շուրջը երգ ու պար…
Տօնածառ տօնածառ,
ճիւղէն կախուած 
մաղթանք մը կայ,
Նուշիկին համար…


Արցունք չունենաս, Նուշի՜կ…


Խաղը կը սկսի,
բոլորը միասնաբար կը կրկնեն խաղիկը
եւ երեխայ մը
գեղեցիկ մաղթանք մը կը ստանայ…

Խաղը կը շարունակուի
եւ երբ կը հասնի մաղթանքի պահը,
այն երեխան որ մաղթանք մը ստացած էր,
պէտք է ընտրէ յաջորդին անունը,
որ իր ընկերն ալ ստանայ 
նոր մաղթանք մը…

Եւ այսպիսով
խաղը կը գլորի,
մինչեւ բոլոր երեխաները
տօնածառէն ստանան 
գեղեցիկ մաղթանքներ…

տօնածառ

Հանելուկ է, 
մտածէ՜,
պատասխանը 
արդեօք ո՞ւր 
մտած է…

Այն ո՞վ է…

Կանանչ ապուր միշտ կ’եփէ…
Կանանչ ապուր միշտ կ’ուտէ…

Եթէ չգիտնաս,
չըլը΄փ, չըլը΄փ,
տաք ապուրին մէջ կ’իյնաս…  
 
-	Չըլը΄փ, չըլը΄փ, ո՞վ ինկաւ… 
-	Չըլը΄փ, չըլը΄փ, Շուշիկը ինկաւ… 

-	Չըլը΄փ, չըլը΄փ, ո՞վ ինկաւ… 
-	Չըլը΄փ, չըլը΄փ, Նուշիկը ո՞վ ինկաւ…

հանելուկ՝ ո՞վ ինկաւ

Եօթը խեչափառ
բռնեցին շուրջպար
չորս քայլ դէպի աջ…

Խաչ, խուչ, խեչ, պար…
Խաչ, խուչ, խեչափառ…

Եօթը խեչափառ
բռնեցին շուրջպար
չորս քայլ դէպի աջ,
չորս քայլ դէպի ձախ…

Խաչ, խուչ, խեչ, պար…
Խաչ, խուչ, խեչափառ…

Մենապար` չէ, չէ…
Նազպար` չէ, չէ…
Բերդպար` ինչու չէ…
Շուրջպար` ի հարկէ…

Եօթը խեչափառ
բռնեցին շուրջպար
չորս քայլ դէպի աջ,
չորս քայլ դէպի ձախ,
ոչ մէկ քայլ դէպի առաջ…

եօթը խեչափառ

Ո՞վ է թացը


Անձրեւ է, անձրեւ է,
ըսաւ մուկը, մտաւ ծակը...

Հոգս չէ, հոգս չէ,
ըսաւ ձուկը, շարժեց պոչը...

Մուկը ծակը, ձուկը ծովը,
ըսէ ինծի՝ ո՞վ է թացը...

Մո՞ւկը թէ ձուկը...
Ձուկը, ձուկը...

Ձո՞ւկը թէ մուկը...
Մուկը, մուկը...

Մո՞ւկը թէ ձուկը...
Ձուկը, ձուկը...

Ձո՞ւկը թէ մուկը...
Մուկը, մուկը...

Հապչի՛...
Շուշիկը...

Հապչի՛...
Նուշիկը...

Հապչի՛...
Աաաա․․․․
Թաշկինակը...թաշկինակը․․․

Ինչպէ՞ս խաղալ

Խաղիկը կրկնել
ձեւերով
եւ ծափերով…

Խաղիկին վերջին տողը երբ կը հասնի,
այն երեխան
որուն անունը նշուած է,
պէտք է փռնգտայ՝ հապչի,
եւ ուրիշ երեխայի մը անունը տայ…

Խաղը կը շարունակուի,
իւրաքանչիւր երեխայ
ուրիշին անունը տալով,
իսկ եթէ մէկը յանկարծ ուշանայ
կամ սխալի,
բոլորը միասնաբար
սխալող երեխային 
խնդալով կը կանչեն՝
թաշկինակը թաշկինակը,
նոյնիսկ թաշկինակ մը կու տան
քիթը խնջելու համար…

ո՞վ է թացը

Վերմակը


Մէկ գառնուկ,
երկու գառնուկ,
առաւել երկու՝
թող ըլլան 
չորս գառնուկ…

Չորս գառնուկ,
հինգ գառնուկ,
առաւել երկու՝
թող ըլլան 
եօթը գառնուկ…

Եօթը գառնուկ, 
Շուշիկին հետ 
փաթթուկ փաթթուկ քնանան,
Շուշիկին
փափուկ փափուկ վերմակ դառնան…

Շուշիկին վերմակը
տաքուկ տաքուկ…


Մէկ գառնուկ,
երկու գառնուկ,
առաւել երկու՝
թող ըլլան 
չորս գառնուկ…

Չորս գառնուկ,
հինգ գառնուկ,
առաւել երկու՝
թող ըլլան 
եօթը գառնուկ…


Եօթը գառնուկ, 
Նուշիկին հետ 
փաթթուկ փաթթուկ քնանան,
Նուշիկին
փափուկ փափուկ վերմակ դառնան…

Նուշիկին վերմակը
տաքուկ տաքուկ…

վերմակը

Ո՞վ ինկաւ


Փայլուն աստղ եւ լուսին,
բարձ ու վերմակ, անկողին…

Սաւանը,
փետուրէ բարձը
եւ
Շուշիկը
տաքուկ տաքուկ 
վերմակին տակը…

Շուշիկը ե՜ւ…

Երկու աստղ եւ լուսին,
բարձ ու վերմակ, անկողին…

Սաւանը,
փետուրէ բարձը
եւ
Շուշիկը, Նուշիկը
տաքուկ տաքուկ 
վերմակին տակը…

Շուշիկը, Նուշիկը ե՜ւ…

Երեք աստղ եւ լուսին,
բարձ ու վերմակ, անկողին…

Սաւանը,
փետուրէ բարձը
եւ
Շուշիկը, Նուշիկը, Անուշիկը
տաքուկ տաքուկ 
վերմակին տակը…

Շուշիկը, Նուշիկը, Անուշիկը ե՜ւ…

Չորս աստղ եւ լուսին,
բարձ ու վերմակ, անկողին…

Սաւանը,
փետուրէ բարձը
եւ
Շուշիկը, Նուշիկը, Անուշիկը, Արուսիկը 
տաքուկ տաքուկ 
վերմակին տակը՝ բա՛թ…

Վայ…
Ո՞վ ինկաւ անկողինէն…
Անկողինէ՞ն, թէ երկինքէն…

Հազար աստղ, մէկ լուսին,
բարձ ու վերմակ, անկողին…

փայլուն աստղ եւ լուսին

Քիթը թոքը


Քիթը թոքը,
թոքը քիթը…
Քիթը թոքը,
թոքը քիթը…

Լեռը, ձորը, անտառները,
ներշնչէ թթուածինը…
Լեռը, ձորը, անտառները,
արտաշնչէ ածխաթթուն…


Քիթը թոքը,
թոքը քիթը…
Քիթը թոքը,
թոքը քիթը…

Հովը, ծովը, ալիքները,
ներշնչէ թթուածինը…
Հովը, ծովը, ալիքները,
արտաշնչէ ածխաթթուն…


Քիթը թոքը,
թոքը քիթը…
Քիթը թոքը,
մաքուր օդը…

Քիթը թոքը,
թոքը քիթը…
Քիթը թոքը,
մաս մաքուր թոքերը…

քիթը թոքը

Կաղանդ պապուկը ո՞ւր է


Կաղանդ է, կաղանդ է,
Կաղանդ պապուկը ո՞ւր է…
Կաղանդ է, կաղանդ է,
Կաղանդ պապուկը հոս է…

Գլխարկը կարմիր է,
մօրուքը  երկար է…

Կաղանդ է, կաղանդ է,
Կաղանդ պապուկը ո՞ւր է…
Կաղանդ է, կաղանդ է,
Կաղանդ պապուկը հոս է…

Գլխարկը կարմիր է,
մօրուքը  երկար է…

Մօրուքը երկար է,
փորիկը կլոր է…

Կաղանդ է, կաղանդ է,
Կաղանդ պապուկը ո՞ւր է…
Կաղանդ է, կաղանդ է,
Կաղանդ պապուկը հոս է…

Գլխարկը կարմիր է,
մօրուքը  երկար է…

Մօրուքը երկար է,
փորիկը կլոր է…

Փորիկը կլոր է,
տոպրակը լեցուն է…

Կաղանդ է, կաղանդ է,
Կաղանդ պապուկը ո՞ւր է…
Կաղանդ է, կաղանդ է,
Կաղանդ պապուկը հոս է…

կաղանդ պապուկը ո՞ւր է

Թաթիկ մատիկ՝ ա


Թաթիկ մատիկ,
մամիկ ու թոռնիկ…
Մամիկ թոռնիկ,
անօթի փորիկ…

Բթամամիկը՝
ալիւր մաղեց, ալիւր մաղեց…

Ցուցամամիկը՝
խմոր շաղեց, խմոր շաղեց…

Միջնեմամիկը՝
թոնիրը վառեց, թոնիրը վառեց…

Մատնեմամիկը՝
հացիկ թխեց, հացիկ թխեց…

Ճկոյթիկ թոռնիկը
հա՛մ, հացիկը կերա՜ւ…

Ձեռքերը դալար մամիկին,
հազար անուշ թոռնիկին…

Թաթիկ մատիկ,
մամիկ ու թոռնիկ…
Մամիկ թոռնիկ,
համով հացիկ…

թաթիկ մատիկ՝ ա

Թոնիրը

Թաթիկ մատիկ,
մամիկ ու թոռնիկ…
Մամիկ թոռնիկ,
անօթի փորիկ…

Ճկոյթը ճկոյթին,
մատնեմատը մատնեմատին,
միջնեմատը միջնեմատին,
ցուցամատը ցուցամատին,
բթամատը բթամատին
եւ ահա΄… թոնի՛րը…

Կրակ կա՞յ…
Ո΄չ, վե՛ր ելիր…  
Կրակ կա՞յ…
Ո΄չ, վե՛ր ելիր…  
Կրակ կա՞յ…
Ո΄չ, վե՛ր ելիր…  

Մամի՛կ, մամի՛կ,
կրակը վառէ, 
լաւաշ հացիկ թխէ…

Մամիկս ալիւր կը մաղէ,
մամիկս ալիւր կը մաղէ…

Մաղէ մաղէ, ալի՛ւր մաղէ…      
Մաղէ մաղէ, ինչո՞վ մաղէ…     
Մաղէ մաղէ, մաղո՛վ մաղէ…    
Մաղով մաղ մաղ ալի՛ւր մաղէ… 


Մամիկս խմոր կը շաղէ,
մամիկս խմոր կը շաղէ…

Խմորը, թոնիրը… 
Թոնիրին կրակը…         

Թըխկոց, չըխկոց, կարմիր բո՛ց…
Թըխկոց, չըխկոց, կրա΄կ ու բոց…

Մամիկս լաւաշ կը թխէ,
մամիկս լաւաշ կը թխէ…

Ծա΄փ ծափ, ծափիկով, 
լաւաշը ուտեմ պանիրով… 

Ծա΄փ ծափ, ծափիկով, 
լաւաշը ուտեմ պանիրով եւ լոլիկով…

Ծա΄փ ծափ ծափիկով, 
լաւաշը ուտեմ պանիրով, 
լոլիկով եւ վարունգով… 

Ծա΄փ ծափ, ծափիկով, 
լաւաշը ուտեմ պանիրով, 
լոլիկով, վարունգով եւ երգելո՜վ…

Ես ալ լաւաշը կ՚ուտեմ, 
ես ալ լաւաշը կ՚ուտեմ…

թոնիրը

Գլուխկոնծի


Ախ, ախ,
աջ ձեռքս կը ցաւի… 

Ո՛չ աջ ձեռքս,
ձա՛խ ձեռքս կը ցաւի… 

Ոչ աջ ձեռքս,
ոչ ձախ ձեռքս, 
աջ ո՛տքս կը ցաւի… 

Ոչ աջ ձեռքս,
ոչ ձախ ձեռքս, 
ոչ աջ ոտքս,
ձա՛խ ոտքս կը ցաւի… 

Ոչ աջ ձեռքս,
ոչ ձախ ձեռքս, 
ոչ աջ ոտքս,
ոչ ձախ ոտքս,
փորի՛կս կը ցաւի… 

Ոչ աջ ձեռքս,
ոչ ձախ ձեռքս, 
ոչ աջ ոտքս,
ոչ ձախ ոտքս,
ոչ փորիկս,
կոկո՛րդս կը ցաւի… 

Ոչ աջ ձեռքս,
ոչ ձախ ձեռքս, 
ոչ աջ ոտքս,
ոչ ձախ ոտքս,
ոչ փորիկս,
ոչ կոկորդս,
գլո՛ւխս կը ցաւի… 


Գլուխկոնծի՜… 
Եօթը անգամ գլուխկոնծի
եւ
գլխացաւը 
գընտըլ մընտըլ կը գլորի՜…

Գլուխկոնծի՜… 
Եօթը անգամ 
գլուխկոնծի
եւ
Բարեկենդանը կը սկսի…

գլուխկոնծի

Ճախարակ, ճախարակ,
դարձիր, դարձիր, 
շարունակ…

Ճախարակ, ճախարակ,
մանէ, մանէ, 
բուրդ բամպակ, բուրդ բամպակ, 
բուրդ բամպակ…


Ճախարակ, ճախարակ,
դարձիր, դարձիր, 
հակառակ…

Ճախարակ, ճախարակ,
մանէ, մանէ, 
յուշ յիշատակ, յուշ յիշատակ,
անուշ յիշատակ…


Ճախարակ, ճախարակ,
դարձիր, դարձիր, շարունակ…

Ճախարակ, ճախարակ…

ճախարակ

Արեւը գնաց, լուսինը եկաւ՝ ա


Արեւը գնաց, լուսինը եկաւ…
Լուսինը փափուկ բարձիկ մը բերաւ…

Արեւը գնաց, լուսինը եկաւ…
Լուսինը փափուկ վերմակ մը բերաւ…

Արեւը գնաց, լուսինը եկաւ…
Շուշիկը փափուկ փափուկ քնացաւ…


Արեւը գնաց, լուսինը եկաւ…
Լուսինը փափուկ բարձիկ մը բերաւ…

Արեւը գնաց, լուսինը եկաւ…
Լուսինը փափուկ վերմակ մը բերաւ…

Արեւը գնաց, լուսինը եկաւ…
Նուշիկը փափուկ փափուկ քնացաւ…

արեւը գնաց, լուսինը եկաւ՝ ա

Պայուսակը


Դպրոց կ՚երթամ բռնած պայուսակ,
մէջը մատիտ, գիրք, մէ՛կ տետրակ…

Մէ՞կ տետրակ…

Դպրոց կ՚երթամ բռնած պայուսակ,
մէջը մատիտ, գիրք, երկո՛ւ տետրակ…

Երկո՞ւ  տետրակ…

Դպրոց կ՚երթամ բռնած պայուսակ,
մէջը մատիտ, երե՛ք տետրակ…

Երե՞ք տետրակ…

Դպրոց կ՚երթամ բռնած պայուսակ,
մէջը մատիտ, գիրք, չո՛րս տետրակ…

Չո՞րս տետրակ…

Դպրոց կ՚երթամ բռնած պայուսակ,
մէջը մատիտ, գիրք, շա՛տ տետրակ…

Ո՜չ, ո՛չ մէկ տետրակ…



յ․գ․

Երեխաները
շրջանակին մէջը կը քալեն
երգին կշռոյթով,
երբ խաղը վարողը
տետրակին թիւը արտասանէ,
երեխաները շուտով
պէտք է խմբուին ըստ արտասանուած թիւին՝
երկու, չորս, մէկ, հինգ…
Երբ արտասանուի՝
ո՛չ մէկ տետրակ,
բոլորը պէտք է 
շուտով իրենց տեղերը վերադառնան,
իսկ երբ արտասանուի՝
շատ տետրակ,
բոլորը իրարու փաթթուելով,
մէ՛կ խումբ պէտք է դառնան…

պայուսակը՝ վերամուտի խաղ

Ոսկի աշուն

Աշուն, ոսկի աշուն է… 
Աշուն, ոսկի աշուն է…

Մեր ծառը նախշուն շապիկ հագեր է…
Մեր ծառը նախշուն շապիկ հագեր է…

Աշուն, ոսկի աշուն է… 
Աշուն, ոսկի աշուն է…

Մեր ծառը օրօր շորոր կը պարէ…
Մեր ծառը օրօր շորոր կը պարէ…

Աշուն, ոսկի աշուն է… 
Աշուն, ոսկի աշուն է…

ոսկի աշուն՝ կարճ տարբերակ

Ոսկի աշուն

Աշուն, ոսկի աշուն է… 
Աշուն, ոսկի աշուն է…

Մեր ծառը նախշուն շապիկ հագեր է…
Մեր ծառը նախշուն շապիկ հագեր է…

Աշուն, ոսկի աշուն է… 
Աշուն, ոսկի աշուն է…

Մեր ծառը հետս շորոր կը պարէ…
Մեր ծառը հետս շորոր կը պարէ…


Աշուն, ոսկի աշուն է… 
Աշուն, ոսկի աշուն է…

Մեր ծառը խաշխաշ շապիկ հագեր է…
Մեր ծառը խաշխաշ շապիկ հագեր է…

Աշուն, ոսկի աշուն է… 
Աշուն, ոսկի աշուն է…

Մեր ծառը հետս խըշ խըշ կը պարէ…
Մեր ծառը հետս խըշ խըշ կը պարէ…

Աշուն, ոսկի աշուն է… 
Աշուն, խըշ խըշ աշուն է…

ոսկի աշուն

Վարդապետին մօրուքը

Վարդապե՛տ մը՝ սիրելի՜,
մօրուքին տակ,
աշակե՛րտ մը՝ երանելի՜…

Վարդապետին մօրուքը
յուշի՜կ, յուշիկ կը շարժի,
այբուբենի տաղը կը սկսի՜…

Այբը՝  
Ամարասին, 
առաջի՛ն դպրոց՝ Ամարասին…

Բենը՝ 
բոլորի՜ն,
բի՜ւր բարիքը բոլորի՜ն…

Գիմը՝ 
գլխագիրին, 
գո՛յն, գոյն գլխագիրին…

Դան՝  
դպրոցին, 
դպիրներու դպրոց՝ Ամարասի՛ն…

Եչը՝    
երգողին 
շարական երգող դպիրին…

Զան՝  
զանգակին, 
զնգացո՜ղ զանգակին…

Էն՝     
թիւ եօթին,
եօթներորդ էջը շարակնոցին…

Ըթը՝  
ընթրիքին, 
ընթրիքը՝ ժամը ութին…

Եօթին, ութին,
Էն՝ եօթին, Ըթը՝ ութին,
իսկ Թոն՝ 
թէ՛ եօթի՛ն, թէ՛ ութի՛ն, 
թթու թութը ուտողին…

Ժէն՝  
ժամկոչին,
ժամը մոռցած ժամկոչին…

Ինին՝ 
իշուկին,
փուշով, նուշով իշուկին…

Լիւնը՝ 
լուսամուտին,
լուսամուտէն՝ լոյսի շողին…

Խէն՝  
խորանին,
խունկի բոյրով խորանին…
   
Ծան՝ 
ծիածանին,
եօ՛թը գոյնով ծիածանին…

Կենը՝ 
կէսուկէսին,
կէսը մէկո՛ւն, կէսը միւսի՛ն…

Հոն՝    
Հացեկացին,
հիւրին հետ հա՛ց կիսողին…

Ձան՝ 
ձկնորսին,
ձուկ բաժնող ձկնորսին…

Ղաթը՝ 
Ղազարոսին,
աղքա՛տ Ղազարոսին…

Ճէն՝    
ճախարակին,
ճախարակով գի՛ր մանողին…

Մենը՝  
Մագաղաթին,
մագաղաթէ մատեանի՛ն…

Յին՝  
յիշատակին,
յիշատակը յիշողի՛ն…

Նուն՝ 
Նարեկին,
բարձերուն տակ աղօթագիրք՝ Նարեկին…

Շան՝  
շուշանին,
շուշանազարդ խորանին…

Ոն՝   
կարմիրի՛ն՝
որդա՛ն կարմիրին…

Չան՝ 
չունեցողին,
չիր ու չամիչը՝ չունեցողի՛ն…

Պէն՝ 
պատարագին, 
խնկաբոյր պատարագին…

Ջէն՝ 
պաղ ջուրին, 
պաղ պաղ ջուրը պզտիկին, ապա մեծին…

Ռան՝ 
ռունգերուն,
խունկին բոյրը ռունգերուն…

Սէն՝ 
Սարգիսին, 
սպիտակ ձիով Սուրբ Սարգիսին…

Վեւը՝  
վարդապետին, 
վեղարով վարդապետի՛ն…

Տիւնը՝ 
տէրտէրին,
տժվժիկ ուտող տէրտէրին…

Րէն՝    
թող ըլլայ գաւազանը՝
վեհափառին…

Ցոն՝    
թող ըլլայ ցորենը՝
Հացեկացին…


Իսկ Ւիւնը՝  
թող միանայ Ո գիրին, ուուուո՜ւ,
ձայնը անվե՜րջ պահողին…

Փիւրը՝   
փիւնիկին,
փիւնիկէն փրթած փետուրին…

իսկ Քէն՝ 
Սուրբ Մեսրոպ Մաշտոցին 
խնկաբո՜յր մօրուքին տակ,
մո՜ւշ, մուշ քնացող աշակերտին…

Երանելի՜…
Երանեա՜լ է…
   
Վարդապետին մօրուքը 
յուշի՜կ, յուշիկ կը շարժի,
շարակա՛ն մը կը լսուի՝

Անկանիմ առաջի քո
եւ խնդրեմ զթողութիւն յանցանաց իմոց.
մի անտես առներ Հայր, զաղաչանս իմ։

վարդապետին մօրուքը

Արտային օրօրը

Մեր հաւուկը խատուտիկ է,
գոյն գոյն հաւկիթ ածեր է…

Այսօր մեզի
կարմիր, կանանչ,
Զատիկ է…

Կարմիր հաւկիթը կը գլորի,
կանանչ հաւկիթը կը պտտի…

Այսօր մեզի
երգով խաղով,
կարմիր, կանանչ,
Զատիկ է…


Մաման չէօրէք թխեր է,
պապան փիլաւ եփեր է…

Այսօր մեզի
համով հոտով,
երգով խաղով,
կարմիր, կանանչ,
Զատիկ է…

Արտային Զատիկը

ոսկի աղջիկ՝ Շուշիկ



Պայուսակս
շա՜տ, շատ, շա՛տ ծանր է,
իսկ կօշիկս 
շա՜տ, շատ, շա՛տ նեղ է…

Կօշիկս 
շա՜տ, շատ, շա՛տ նեղ է,
իսկ դպրոցս 
շա՜տ, շատ, շա՛տ հեռու է…

Դպրոցս 
շա՜տ, շատ, շա՛տ հեռու է,
իսկ վերմակս 
շա՜տ, շատ, շա՛տ տաքուկ է…

Վերմակս 
շա՜տ, շատ, շա՛տ տաքուկ է,
իսկ բարձիկս 
շա՜տ, շատ, շա՛տ փափուկ է…

Բարձիկս 
շա՜տ, շատ, շա՛տ փափուկ է,
իսկ երազս
գո՛յն գոյն, գոյնզգոյն է…



շատ շատ շատ

օրօր՝ Սարին

Թըխկ, չը՛խկ թաց է, չոր է… 
Թըխկ, չը՛խկ թաց է, չոր է…

Թըխկ, չը՛խկ ընկոյզները…
Թըխկ, չը՛խկ ընկոյզները…

Ընկոյզները ջարդեցի, 
երկար թելէն անցուցի…

Երկար թելէն անցուցի,
ռուպին մէջը թաթխեցի…

Ռուպին մէջը թաթխեցի,
Մարիամին մազերէն կախեցի…
Մարիամին մազերէն զոյգ զոյգ կախեցի…

Քառասուն ճիւղ ծամ,
անուշիկ Մարիամ…

Քառասուն ճիւղ ծամ,
համովիկ Մարիամ… 

Քառասուն ճիւղ ծամ, հա՛մ…

Թըխկ, չը՛խկ ընկոյզները…
Թըխկ, չը՛խկ ընկոյզները…

Թըխկ, չը՛խկ թաց է, չոր է… 
Թըխկ, չը՛խկ թաց է, չոր է…


թըխկ չըխկ՝ համ


Մեր ծառին՝
երկար ճիւղին
թառեցաւ 
թըռ թըռ թը՜ռ-չո՛ւն…


Մեր ծառին՝
երկար ճիւղին
բարի՛ եկար,
ըսէ մեզի՝ ո՞վ ես դուն…

Շուշիկն է, Շուշիկն է, 
անունը՝ Շուշի՛կ է…



Մեր ծառին՝
երկար ճիւղին
թառեցաւ 
թըռ թըռ թը՜ռ-չո՛ւն…

Մեր ծառին՝
երկար ճիւղին
բարի՛ եկար,
ըսէ մեզի՝ ո՞վ ես դուն…

Տիգրանն է, Տիգրանն է, 
անունը՝ Տիգրա՛ն է…





թռչունը եւ անունը

Օրօրէ, օրօրէ, օրօրելով պարէ,
կլոր, կլոր դարձիր, պարէ… 
Օրօրէ, օրօրէ, օրօրելով պարէ,
օրօր, օրօր շորոր… 

Կլոր, կլոր դարձիր, պարէ,
կլոր, կլոր դարձիր, պարէ… 
Օրօրէ, օրօրէ, օրօրելով պարէ,
օրօր, օրօր շորոր…

oրօր շորոր ամանոր

Երկու փայտ, յարդէ գլխարկ,
հին շապիկ, մէ՛կ կոճակ…
Խլխլիկ, Խուլխուլիկ,
խրտուիլակ մը խարխուլիկ…

Աջ թեւին սարեակ,
ձախ թեւին սոխակ…
Խլխլիկ, Խուլխուլիկ,
խրտուիլակ մը խարխուլիկ…

Գլխուն վրայ թառեցաւ,
կռա՛ւ կռա՛ւ, սեւ ագռաւ,
կռա՛ւ կռա՛ւ, ո՞վ վախցաւ…
Կռա՛ւ կռա՛ւ, սեւ ագռաւ,
կռա՛ւ կռա՛ւ, ո՞վ վախցաւ…

Սարեակը վախցաւ, թը՜ռ թռա՜ւ,
սոխակը վախցաւ, թը՜ռ թռա՜ւ,
շապիկին կոճակը չը՛րթ փրթաւ,
սեւ ագռաւը կռա՛ւ կռա՛ւ,
կոճակը առաւ ու փախա՜ւ…

Երկու փայտ, յարդէ գլխարկ,
հին շապիկը անկոճակ, չունի՛ կոճակ…
Կռա՛ւ կռա՛ւ, սեւ ագռաւ,
կոճակը առաւ ու փախա՜ւ…

Մայրիկին կարի տուփը 
խառնէ, խառնշտկէ, 
կոճակ մը գտիր,
Խուլխուլիկին շապիկին կարէ՜…

Երբ կարես,
Խուլխուլիկին փորիկը չծակե՜ս…
Եթէ ծակես, 
Խուլխուլիկը կ՚ունենայ պորտի՛կ…

Փորիկը ծա՛կ Խուլխուլիկ,
խրտուիլակ մը խարխուլիկ…

ձեռք ձեռքի՝ բարեւ արեւ

Popular tracks