رواة

قصيدة ويستيرن يونيون - مصطفى إبراهيم

الجاي مش أد اللي راح؟
وللا إللي جاي أكتر؟
الشاش على أد الجراح؟
وللا الجراح أكبر؟
لسه معاك ف المحفظة.....
اللي يقضي دور كمان؟
وإفرض يا حلو خسرتهم؟
أخسر لكن مبقاش جبان...
وألعب بآخر فيش معايا....
والزهر مينصفنيش كفاية...
واجي يادوب قبل النهاية....
الحظ يمشي على هوايا.......
ف أرمي الجنيه يرجع كتير....
وأرمي الكتير ...يرجعلي أكتر....
وف لعبة واحدة الفيش يطير....
و أطلع ف أخر الدور مقشفر .....
وأفضل كدا طالع ونازل...
على كل طاولة أفوت شوية...
ومرة واحدة الدنيا تسكت...
صاحب المكان.... ينده عليا....
ويقوللي ها....نفسك ف إيه؟...
أسكت...وأتهته....و أقول رضاك...
يقول تعبت وللا إيه؟....
أقوله خدني أفضل معاك...
يحضنني جامد مرة واحدة....
واللي خسرته ف ألف دور....
يديهولي ف ضمة واحدة ....
يرمي جوا قلبي نور....
ألقى كل حاجة.. غير...
ألقى كل حاجة.. خير....
ألقى نفسي زى طير...
عاش.... ومات.....
من غير مناهدة

قصيدة من غير مناهدة - مصطفى إبراهيم

قابل شهيد الثورة ف الآخرة. شهيد الحرب
قالّه يا بختك يا أخي. عارف بتضرب مين
أنا مُت معرفشي. كان جاي منين الضرب
كل اللي كانوا هناك شبهي ومصريين
أنا وإنتا مُتنا صحيح.
علشان بلدنا تعيش
ونا وإنتا مُتنا صحيح.
شجعان. وبنقاتل
أنا جيت هنا علشان.
إيدي ما طاوعتنيش
أقتل. وإنتا عشان. 
أبطأ من القاتل
إنتا الجميع خلفك. من ناس ومن سلطة 
وأنا الجميع خلفي. من جيش ومن شرطة
إنتا شهيد رسمي
وأنا لسه فيا كلام
دمك بيسقي الأرض
ونا دمي للحُكّام
يظهر وراهم نور 
فيبصوا فوق ع الضوء 
يملا السما ملاكين 
ويقربّوا منهم
وف أول الرحلة 
الطالعة بيهم فوق 
بدأوا كلام. قام دار. هذا الحوار. بينهم
قال الشهيد للشهيد ف السما الأولى
الطلقة مش طايشة. والدولة مسئولة 
قال الشهيد للشهيد ف السما التانية 
الأرض طبّت جنبي مقتولة 
قال الشهيد للشهيد ف السما التالتة 
الحظ جابنا. واحنا مش فَلتة
قال الشهيد للشهيد ف السما الرابعة
الدم حيروح فين. الدايرة مقفولة
قال الشهيد للشهيد ف السما الخامسة
الأرض دي. متبوعة مش تابعة
لو كان دَعَاكوا نزول ونا لسه وسطيكوا
يبقي ف غيابي تنزلوا أدعى
قال الشهيد للشهيد ف السما السادسة 
مين كان من الانبيا مش قلة مندسة 
وحكي الشهيد للشهيد م السما السابعة
عن ثورة تانية حتيجي. أقوى م الأولى.

قصيدة مع الثورة ذلك أفضل جداً - مصطفى إبراهيم

يا مصر لسة الأنبياء كتيرة
جيل إبن نفسه فى زمن عيرة
ريحة هدومهم خلّ و خميرة
و بيكتبوا السيرة ...و ملهمش ف الإملا
يا مصر لسة الأنبيا بالكوم
ختم النبوة بغُرَز...و بشاش.. و ميكروكروم
طل الشهيد م السما ل صحابه أخر اليوم
خللى الجميع يبكى
و خللى الهتاف يعلى
السيرة سيرة عيال ....واقفة ف اول صف
بيقولوا دم بدم
و يردوا كفّ بكفّ
أم البطل تبعته
يرجع شهيد ...يتزف
بالبدلة متقطعه....
و بدم ع الدبلة

قصيدة لسه الأنبيا كتيرة - مصطفى إبراهيم

لو بس كنت ساعتها عارف....
إن دي المره الاخيره....
.....ميه ميه
كات حتفرق ف الوداع..
كنت هحضن سندس اللي ف تانيه تالت ع المشاع...
واحنا طالعين م اللجان...
بعد اخر امتحان...
و اسألها لو بتشوف فلان 
طب فاهمه مادة ميس ايمان؟
طب ينفع ابقي اجيلكوا عادي ؟
قصدي يعني البيت يساع؟ 
لو بس كنت ساعتها عارف....
إن دي المره الاخيره....
.....ميه ميه
كات حتفرق ف الوداع....
كنت يومها أكيد حبيّت...
عند جدي ف شقته...
نلعب ورق....
نسهر سوا....
ومش حسيبه عشان ينام ليلتها من بعد الدوا...
أو يرد الشيش عشان ضهره بيتعب م الهوا....
واقوله يعني بذمتك....
اخر نفس ساقع اخدته ف صحتك....
بقي مايساويش حبة وجع ؟
بطل دلع …
جدي اللي مات دفيان ليلتها بـاللحاف …
لو كان عرف....
إن الليلادي وداع لانفاس الهوا....
مكنش رد الشيش ف اخر ليله له....
ومكنش خاف …
كل الشوارع والمباني...
اللي مش حدخلها تاني …
والاغاني...
اللي لما سمعتها...دندنتها...
من مره واحده بالسماع …
ميه ميه...
كات حتفرق ف الوداع....
يا كل حاجه كسبتها ...
أو سبتها....
و ملحقتش اشبع منّها …
اكمنّها...
قالت “حنروح من بعض فين؟ "
يا ناس يا عبط يا عشمانين...
ف فرصه تانيه للقا...
بطلوا اوهام بقي....
وكفايه أحلام واسمعوا....
عيشوا بذمه و ودعوا...
كل حاجة بتعملوها...
وكل حد بتشوفوه...
وكل كلمه بتقولوها...
وكل لحن بتسمعوه...
عيشوا المشاهد... كل مشهد....
زي مايكون الأخير...
واشبعوا ساعة الوداع ….
واحضنوا الحاجه بـضمير....
دا اللي فاضل مش كتير ….
اللي فاضل....
مش كتير

قصيدة كانت هاتفرق في الوداع - مصطفى إبراهيم

قالولي زمان ونا صغير..
مفيش إنسان بيتغير..
وقالوا الوش و الماسكات..
تمللي عمرها قصير..
ومدام الطبع كالعادة..
تمللي بيغلب التطبيع..
حتفرق تربية زيادة..
ف واحد بالجينات حيصيع؟
أنا صايع على الفطرة..
ولا بكيفي..ولا بيدي..
وكل ماقول أكيد فترة..
ألاقي العمر بيعدي..
ولسه السنكحة كيفي..
ولسه السرمحة ف دمي..
ولسه ببوسها ف السيما..
و تضحك..أقولها إتلمي..
ولسه بلف ف الشارع..
ونا معرفش رايح فين...
وف الفجرية ع الكوبري..
مفيش غيري مع الأسدين..
بدندن لحن أغنية..
وتيجي إنتي على بالي..
فصوتي يبتدي يقطع..
ودمعة ف عيني تتلالي..
ف أطلع نوتة الأشعار..
وأقطع كل أوراقها..
وأبعزقها..
وتيجي الريح تفرقها..
على الأسفلت ف الشارع..
ياست الكل أنا واقع..
ف عرضك لجل تقريهم..
وبعد ما تقري ارميهم..
أو انسيهم..
بحكم الطبع و العادة..
هتيجي قصايدي متعادة..
ومدام كار الكلام كاري..
ومفيش غيرك ف أفكاري..
هتفضل كل أشعاري..
مفيش غيرك..
بنات فيهم..

قصيدة قالولي زمان - مصطفى إبراهيم

يارب 
ياللي سايبلي الحبل ع الغارب 
أنا غرقان بدون قارب 
ومعرفتش أعوم وحدي 
وكل ما امدلك يدي
وتنشلني 
وأعوم شبرين 
إديا يفلفصوا الاتنين 
وأقولك سيبلي انا الباقي
تسيبلي الحبل ع الغارب 
تخش المية حلقي .. اشرق
فاصرخلك .. وأقول بغرق 
وأقولك عمري ما حسيبك 
فتنشلني 
أعوم شبرين 
إديا يفلفصوا الاتنين 
وأسيب إيدك
وأعيد الكرّه ميت مره
وماتخذلنيش ولا مره
تقوللي حضنهم بره
لا عمره يساع دراع سيدك
ونا لسه 
بسيب إيدك !

قصيدة ع الغارب - مصطفى إبراهيم

"البقاء لله يا صاحبي شد حيلك .. كله فاني ..
و بقول لو عوزت حاجة و انت عارف فين مكاني ..
و احنا أهل ما فيش كسوف حد ضامن الظروف ؟.
و انت عارف عيني ليك احنا عشرة عيب عليك ..
انت خيرك برضه سابق و اللي بينا مش شوية ..
اللي راح كان زي اخويا كان جدع بيخاف عليا ..
و كنت احس ايه مضايقه و هو جاي من بعيد ..
و كان فاهمني زيي و اكتر كنت انا صاحبه الوحيد من و كنا صغيرين ..
اتناقشنا في كل حاجة .. كورة فن سياسة دين .
له معايا 100 حكاية و ذكريات ملو السنين ..
ربنا يجمع ما بيننا في حتة احسن ... قول آمين ..
هو مين بيعزي مين ؟؟ و لا اعزي ازاي في دمي ؟
عالعموم ما تشيلش همي و خللي بالك بس منك ..
مش بقول تنساه لكنك عارف ان الدنيا ماشية و بكرة نبقى كويسين ..
و ابقى زوره كل جمعة و اقرى عدية ياسين ..
و انت عارف لو هينفع كنت اجيلك و البقاء لله يا صاحبي ..
شد حيلك " .
اللي فات نص تلغراف وصلني من ساعات ..
كان عزا نُصي اللي عايش ليّا في النُص اللي مات .....

قصيدة شد حيلك - مصطفى إبراهيم

...يا دفعة
....يا مرمي
...ف كشك الحراسة
...لحد أما يطلع عليك النهار
...يا صبحي محمد سعيد الفواعلي
...نزيـل المــوائد ف سـاعة الفطــار
....يا كردي يا صالح يا جندي المراسلة
...توصــل مدام إنشراح بالخضــار
...وترجع تجيب العيال م الحضانة
....وتطلع توّدي فلوس الإيجار
...وسيد بشندي
...بتاع النضافة
....بيكنس تقاطع لاظوغلي ونوبار
....ومحسن عفيفي بيقطع تذاكر
....ف خط المنيرة لحد المطار
....وسعد المنادي
...في خط العبور
...أخو أحمد قناوي أشارجي المرور
...و أشــرف شرارة
...ف نفــس الإشارة
...بيطلع يوزع بواكي البخور
...وعبده السواحلي بتاع الفريسكا
.....بيسرح يوماتي ف شط الزهور
.....ودفتر أسامي الهاموش و الغلابة
.....بيكبــر ولا توفّيــهوش الكتابة
......وتسمن و تتخن كروش الديابة
......بلحم اللي ماتوا
.......ف أخــر الطابور

قصيدة دفتر اسامى الهاموش - مصطفى إبراهيم

انا شعرى غامق
بس قلبى مطقطق ابيض من زمان
جايز عشان
الناس ساعات بتلاقى ناس
تعرف تشوفها بجد
و انا قلبى لسه عمره ما اتكشف ع حد
بقابل اد ما اقابل
و افارق اد ما افارق
و ما اتعلمش
بلخبط ف الاسامى عشان
بخاف انسى
بلخبط ف الدنيا عشان
بخاف لا ما اعيشش
بقالى كتير ما بتكلمش
بخاف يبقى الكلام متعاد
ما كملتش ف اى رحيل
ما كملتش ف اى قعاد
و بدى للحياة بالكاد
ما يكفيها
و يكفينى
شرور البهدلة فيها
مليش ف البنت طلبات غير
تنسينى اللى قبليها
و بدخل ف حاجات تخاطيف
و عينى ع اللى بعديها
رقصت كتير ع السلم
بخاف اطلع
و اخاف من الارض
- اكيد الخوف مش الفكرة
و حتى يا ستى يعنى بفرض
اكيد الخوف مهواش عيب
طبيعى الناس تخاف من الغيب
و من المقدور
برغم كدة
بحب الضلمة اكتر ما بحب النور
ساعات بتمنى شقة ف برج شايفة النيل
و اوقات انى اعيش مستور
و بزهد .. ف كل ما ف الرحلة من زخرف
و ما زهدهاش
ما دام فيها رمق يتعاش
اكيد ف الرحلة يوم متحاش
و مستنى اعدى عليه
- و تعرف عنه اصلا اية ؟
مفيش غير انه لسه مجاش
بنام ؟
طبعا .. كتير جدا
و بالايام
و طول الوقت بحلم ان انا بجرى
و بشبع من الحاجات بدرى
و رغم كدة لسه ما شبعتش
من الجرى و من الاحلام
بخاف من الموت
عشان خايف ساعتها اكون
عبيط .. كل اللى سيبته كلام
بشوف افلام
عن الدنيا
و عن حكايات
لناس عاشت حاجات تانية
و عن حكايات لناس ماعاشوش
و بتأثر
و بتحسر
ع كل اللى كان ممكن
اكونه
بس ما بقيتهوش
ما سبتش شئ مجربتوش
ولا جربته و ما سبتوش
بحب العود
و احب الناى
و اموت و اعرف حقيقى ازاى
حاجات من دى
ساعات بتدب فيها الروح
من اللمس و من الانفاس
فتبقى حية اكتر من البشر و الناس
مفيش احساس
لحسن الحظ و لسوئه
ما بيعديش
مفيش ولا طعم حاجة من اللى بتدوقه
مسيره يعيش
بحلوه و بمره كله بيتسخط لمفيش
يا سبحان اللى بيعودنا ع الحاجة
فننساها
و بيخفف كاسات الناس
بميه بدال ما يملاها
عشان طعم اللى فيها يروح
عشان طعم اللى فيها يخف
يقولوا مجازا المجروح
اذا خد ع الوجع .. بيخف
تلف عليه سواقى الكون
تدوب اللى فات
ف الجاى
ف سبحانه اما قال
منها جعلنا
( كل شئ حى )
زمان فيه حد علمنا
ف درس الدين
دعاء بيقول :
يا خالق كل شئ ناقص .. كمالته معاك
يا شايل من الحاجات حتة .. بنترجاك
بحق المشهد الكامل
و اسمك اللى انا عرفته
تسيب اللى يكفينا
و تكفينا بما سبته
ما تحوجناش
لجاى مجاش
و ترضينا بما جبته
و ندعى وراه بصوت عالى
يرج الفصل رج خفيف
و اكمل دعوتى ف سرى
( و ترحم قلبى ف شيبته )
كما تدعو الفروع الاصل
دعوتها
ف كل خريف”

قصيدة تفرانيل 100 - مصطفى إبراهيم

أنا بفضل دايما للآخر
ف جيمات الكونكان والشايب
و ف كشف الحاضر والغايب
وف حجز شقق مصيف بلطيم
أنا آخر تايب في اصحابي
وآخرهم ف الصلا ف التسليم
وف دور المدرسه في التطعيم
وفي وقت السين
أنا آخر جيم
أنا جرح قديم...كان متغطي
إكمني مشتي ولابس كم
سبتني الدنيا بستين أم
وسبتلها ميت مِلّه ودين
ولحد ماتميت ست سنين
أنا كنت بحب البني آدمين
وكرهت الناس من بعديها
علشان نسّوني أنا أصلاً مين 
مش فاكر إمتى حقيقي بدأت
إنما فيه فتره فاكرها طشاش
كان فنجان قهوتي مابيفضاش
وبكلم ربنا طول الوقت
عمري ماصدقت بنات غير ريم
ويمكن دلوقتي ما اصدقهاش
آخر مره
شفتها فيها
كانت تقريبا بتعزل
و كان فيه سواق تاكسي منزل
ف شنط ناس حتحل مكانها
ووشوش بني آدمين معرفهاش
أنا ريم يمكن كانت قدي
أيامها... لكن دلوقتي أصغر
عارفه إن أنا يوميا بكبر ؟
وبعجز إكمني مابنساش
أنا فاكر أيام بالميللي
أنا فاكر أيام بالتفصيل
أنا فاكر يوم دفنة أختي
حتصدقي..؟ أكتر مافاكرها
وساعات بنسي ف ليله كبيرها
أنا فاكر شقة قصرالنيل
ومش فاكر حد من السكان
من صغري وعمري مابنسي مكان
أنا أصلاً فاكر بيت شادي
مع إني مازورتوش غير مره
بأمارة فيه برواز بره
كان جواه صورته ف إعدادي
كان لسه ساعتها طالعله شنب
ونا حاسس إني طلعلي أتب
من تقل الشيله و م التفكير
معلش أنا آسف برغي كتير
وبسف ف وقتك وف وقتي
أنا حاسس بدماغي بتتقل
أنا نفسي أنام
أنا عاوز أروّح دلوقتي
متشكر جداً ع الجلسه
حنكمل إمتى علاج طيب ؟
لازم حنشوف بعض قريب
أنا ماشي... 
سلام”

قصيدة تفرانيل 50 - مصطفى إبراهيم

قصيدة بندعيلكو- مصطفى إبراهيم

الصورة قصادك ممدودة...
و مش محدودة...
بالطول و العرض...
و البرواز ضلعه الفوقاني...
ف السما....
و التاني مساوي الأرض...
و بما إنك حيلتك بس عينين...
ف قصادك حل من الإتنين...
يا تقرّب جامد م الصورة...
و تاخدلك كادر تركز فيه...
و تعيش حكاويه...
و ساعتها مفيش..
و لا كادر يعيش...
و يكونله لزوم...
غير كادر الزووم...
أصغر تفصيل ف الصورة يبان...
ريحة الدنيا و طعم الأحداث...
الفرق ف تدريج الألوان...
شكل التجاعيد ف وشوش الناس...
ف تعيش مستمتع بالتفاصيل...
الجهل... جميل...
بيقربلك سقف النشوة...
و الحزن كمان...
أما لو اخترت إنك تبعد...
و تشوف المنظر من برة...
حتغطي عينيك كادرات أكبر...
و حاجات أكتر...
لكن أحجامها بقت أصغر...
م الأول ميت مليون مرة...
تكتشف إنك...
مبقتش في حاجة تأثر فيك...
و لا بتبكيك...
مبقتش بتزعل تقريباً...
و الدنيا بقت أبيض فاقع...
و إن انت بقيت إنسان ساقع...
مبقيتش بتضحك بالساهل...
و لا حاجة ف نظرك تستاهل...
تتمنى ساعتها تعود جاهل...
ف تلاقي الزووم...
كان رايح بس...
و لجل النحس...
مفيش راجع.
~
برواز الدُنيا

قصيدة برواز الدنيا - مصطفى إبراهيم

قصيدة إني رأيت اليوم.. كاملا - مصطفى ابراهيم

أنا لزق اتشال خمسين مرة
من فوق خمسين نوتة وكشكول
وإتساب في الهوا عريان برة
ف نشف .. مبقاش يلزق على طول
- هو انت تطول ؟
قاللي الدرويش
مش عايز أطول .. أنا عايز أعيش
-إنتا اللي فهمت الزهد بلاء
إزاي هزهد في حاجات معييش ؟
-ياحمار دي فضيلة الاستغناء
وانا كنت استغنيت بمزاجي ؟
أنا اسمي يئست ومستغنتش
إيه الزهد ف إني أمّا آجي
أشتري مابَجبيبش عشان ملقتش ؟
فيه فرق مابين صبر العاجز
علشان مبقاش حاجة في إيده
وبين واحد أصلاً مش عايز
غير زي ما بس يعوز سيده
صدّقني أنا زاهد بالصدفة .. أو من غير قصد
أنا طاير آه .. لكن علشان مش لاقي الأرض
صدقني أنا كان نفسي أتعلّق .. في حاجات ياما
وأعيش إحساس إن أنا فعلاً من غيرها هموت
أنا عارف اعيش
من غير ما احتاج إني أقرا الوقت
من غير ولا واحد .. م اللي أنا أعرفهم دلوقت
أنا أعرف اعيش من غير اسمي
أو سنتوف برّة حدود جسمي
ومن غير السلسلة والمفاتيح
ومن غير ولا واحد من أهلي
ومن غير سارة
ومن غير البنت اللي أنا نفسي أجيب منها ولاد
ومن غير فيزا البنك الأهلي
وهشوف من غير النضّارة
عايز هَوا بس .. وميّة .. وزاد
كل يومين .. بَكْبَر وارمي حاجات
واكتشف إن أنا كان ممكن أعيش
من غيرهم أصلاً م الأول
معرفش بقى اليأس اتحوّل
وقلب على زُهد ..
ولا ده جين صوفي من الأول مش محتاج جهد ؟

علّيت صوتي وقلتله ماترد
الدرويش أصلاً مش موجود
الجامع فاضي ومِتغيّر
فيه عيل شبهي ونا صغير
شايل بلطة وبيهد عمود
مش عارف احرّك رجليّا
ةمش عارف أصرّخله يبطل
صوت دف بيعلى وبيقرب
دقات ورا بعض
وعمود الجامع بيشقق
وبيعمل أصوات زي الرعد
العيل بيسرّع أكتر
زي المسعور
أكتر أكتر أكتر أكتر
في نور ضارب في عنيّا
وألوان بتدور
كل اللي أعرفهم حواليّا
السقف خلاص كله بيتهد
فجأة مفيش في الجامع ولا حد
وبحسس على وشي كويس
وبشوف الدم
وببص لفوق
السما باينة منورة جداً
ومفيش عصافير
فيه ناس واقفين
شايلين في حاجات
ناس غيرهم شايلين بني آدمين
فيه ناس منهم شبه العِيلة
ومفيش غيري من غير شيلة
ف محدش عارف غيري يطير
أنا عمّال أترقّى وأطلع
السبورة عمالة تضيع
على مد الشوف .. أنا شايف بيت
و بتمتم بكلام مش واضح
فيه صوت بيقول (على فين رايح ؟)
ف بشاور .. ف يقوللي (لوحدك ؟)
ف أضحك وأشاور حواليّا
لولا إني لوحدي ..

قصيدة المولوية - مصطفى إبراهيم

الكوتشي اللي باش 
م اللف ف شوارعك
يحرم عليه
يبوس ارض غيرك

والقلب القماش 
اللي مكوي بعمايلك
لساه معبق
بريحة عبيرك

والواد اللي عاش
طول عمره يحايلك
ونفسه اسمه
ييجي في رسايلك

وتبعتيله تطمنيه
ان انتي عارفة
ان انتي ليه
وان انتي قايمة ونايمة بيه

وقت الشتا يتدفي بيكي
ووقت الخطر تتحامي فيه
وساعة اما بيقسي عليكي
وساعة اما بتدعي عليه
محدش فيكوا بيهنالوا بال

واول ما تصفي تفكي الريال
وتروحي تجيبيلوا كوتشي بدال
الكوتشي اللي باش”

قصيدة اللف في شوارعك - مصطفى إبراهيم

-------------(م)-------------- 
ماسبيرو أخطر م الرصاص و القصر
ملّى عنيك بالدم...قبل الطلوع قدام
ما تسيبش جيشك تِقسمه الأعلام
مش كل مين جنبك....جواه بيهتف مصر

--------------(ا)---------------
الوقفة جنب النار ..بتقلل الدخان
- إهتف هتاف إبن المكان و الظرف
- إضرب بعزمك ... أو ما تضربشى
إرجع بضهرك ... أو ما تهربشى
إمسك عصاية ثورتك م الطرف
التاريخ ضمن الغنايم ..و بيكتبه الكسبان




--------------(ن)--------------
نقى دايما طوب صغير حدفتك توصل بعيد
نفترق ساعة المطاردات ..أربعات
نشّن الباراشوت ناحية الصف العريض
نجرى فجأة.. نردّ فجأة.. نص قوتنا المفاجأة
ندّم اللى يعورك........و إقطعله إيد

--------------(ي)--------------
يؤتَى الحِذر من مكمنُه
يأتِى الغبى باللص ثم يحلّفه
يؤتَى الهتاف... رَّجاً بممن يَهتِفه
- يؤتَى الجدع... قلبا بمما إتجَدعنُه

--------------(ف)--------------
فّرق ما بين....الجرأة و القلب الحديد... و الرمى جوا التهلكة
فتش بإيد ع المستفيد ..و بإيد عن الصاحب الجدع
فتح اذا الناس غمضت....غمض إذا نظرك خدع
فرّغ عياطك ع الصحاب... دم و خميرة... مش بكا

--------------(س)--------------

سمى الحاجات دى بإسمها...الكدب... و الخوف... و الخيانة
سجادة المسامير... تتحط ع الناصية ...غطّيها بالدخان ..ولّع قصادها كاوتش
سد الطريق لورا علشان ما تترددش
سيب باب لجيشهم يهربوا منه
سلّم رايات الحلم لحد من سِنُّه
سلّم قراركوا لأكتر كفّ عرقانة

--------------(ت)--------------
تبّت يدا من ساب رفاق المعركة بطولهم
تمن القضية اللى اندفع مبقاش يجوز يرجع
تتعب تبص ف عين.. إصحابك الطايرة....شوف مين من الآخر دفع....لو زيهم... إدفع
تلت الرصاص نحو العدو... .تلتينه للخاين..الطعنة جاية من هنا مش من هناك
تعب النهاردة غير تعب بكرة....الوقت مش دايما معاك.
تحتك فيه ناس عاوزة الأمل...مش عاوزه؟... سيبهولهم

--------------( و )--------------
وسّع الجبهة لو إنتوا كتير... و .ضّيقها لو إنتوا أقل
ولع شماريخ وسطكوا اول ما تلقى الرتم قل
وقّع لمض كل العواميد اللى كاشفة ناحيتك
وّدى الإعاشة قبل ما تدوق لقمتك
وجّب مع السكان و أهل المنطقة...حتى لو فاهمين غلط...فيه ناس كتير متلخبطة ...إكسب عدد ....و إكسب غطا
وزع عيونك فوق و تحت....و خاف من اللى يصورك
وطّى و عينك باصّة فوق ع الطوب و إلا يعوّرك
وقّف إذا سحبوك على شارع طويل
وفّر بديل
وافق على الهدنة إذا سحبوا الكلاب
لو سابوا خليك انتا آخر حد ساب
واحد بيفرق ف العدد جدا
و عشان كده....
أول ما تلقى إن الصفوف ناقصاك ...
وسع مكانك... للى جاى وراك

المانيفستو - مصطفى إبراهيم

هيحزّموك زي الجنيه ف الأستك
هيسيبولك الفُتات
و يبيعولك الأمل ف الإعلانات
و الهجرة لبلاد البلاستيك
و ف خطبة الجمعة عن الجنة
و قُولِة استنى.. فات الكتير هانت خلاص
لحد ما خيل الحكومة..
يدوسه عَجَل الميكروباص
النظام العالمي بيقتل
أوقات كتير ..
من غير رصاص
الهوا ..
هيحَصّل المَيّة اللي بقت ماركات
تعددية تعني.. تعدد الشركات
حرية تعني حق فتح القفص ..
على الناس اللي ملهاش باب
الأخطبوط الرأسمالي اتساب
على الناس اللي ملهاش حظ
على الناس اللي ملهاش فرص
حياتك 
مهمة لبياعين الحلم 
وفاتك
مهمة لبياعين القُرَص
حسابك حتى في قبرك مهم
رخصة الجنة مهمة لبياعين الرُخَص
و لبياعين الدين 
و لبياعين الآخرة اللي هتنصف المساكين
"العالم بيتطوّر"
يمشي إسم مسرحية..
أما الحقيقة المضحكة المُبكيّة..
العصاية اللي بتوقّف و بتدوّر..
بتمشي..
من إيد صحاب الجنة..
لصباع صحاب البندقية..
لجيوب صحاب البنك...
دم الغلابة بيتحرق ف التانك...
شامم ريحتهم و انتا بتفوّل...
الغرب هيموّل..
إعمار ِبيار النفط..
لضمان زيادة منسوبات الشفط...
و ضمان بقائك عبد متسوّل...
يا زميل الكوكب المنكوب..
رَكب الحضارة ماشي بالمقلوب...
يا زميل المنطقة المنكوبة...
رَكب الحضارة كان لازم له ركوبة...
العالم بيتطوّر...
و انتا شمعة بتتحرق علشان ..
برج التجارة ينوّر..
..العصاية هي هي و شكلها بيتحول
العالم بيتغوّل
و انتا واقف ف وش الطيارات بالطوبة.. هتعيش حمار و تموت حمار...
أخرك تحس بإنتصار لما...
بتولّع الأعلام..
و تدوس على صورة إصحاب الدولار و القرار بالجزمة..
القناة ..في نشرة الأخبار.. 
هيقولوا عنك فوضوي و قاتل..
نفس القناة وقت اللزوم ..
هتطلّعك مقتول و بتناضل..
فيه ناس كتيرة أكل عيشها الأزمة..
و ده عيبه..
إن هذا العالم صوته من جيبه.
و مفيش حقيقة صعب تتأوّل..
و دي ناس تعرف تبيع الآه
زي ما بتعرف تبيع اللأ 
الميديا بائع حق...
متجول..
بشرى لابناء العالم التالت م العالم الأول
بشري لابناء العالم الهمجي
م العالم الإنسان
العالم الحر اللي ما بيضربش ف المليان
بس بيجوّع بلاد لحد الموت
القاتل الشيك المحترف
أبو طلق من غير صوت
فيه الجيوش ما بقوش
لابسين هدوم ميري
و الطيارات ما بقتش بتوزع منشورات اليأس
و البنوك مش هيسيبوك تتحبس ...بالعكس
النهارده حاطط إعلانات ع التاكس
علشان عليه أقساط
بكره تتعلق على هدومك 
زي اللعيبة ف الماتشات
عالم جديد 
هتخشه بمزاجك قبل ما نزُقّك
الكهنة فيه لابسين بدل و كرافتات
هيأكِّلوك الحقيقة بمعلقة ف بقك 
و كسر حُقّك ياللي مش عايز
عالم ديمقراطي رأسمالي سعيد
الشركة فيه اقوى من الاوطان
غضبان ؟...أكيد غضبان
مربوط ف ساقية و بتجري في مكانك
مسجون و مش عارف وش سجّانك
عايز تخبّط كوبايات الحبس ع القضبان لكن هتعمل إيه ...معذور
أمريكا عملت سجن من غير سور
أمريكا رابطة الناس ف بعضيهم
أمريكا رابطة الناس و مربطّاك بيهم
تدّن في مالطا قد ما هتدّن
أمريكا هتفضل بتحب البشر جدا...
و بتعمل جِميل فيهم..
فيها الخير يا هل ترى
ولّا فيها فلوس؟
أمريكا فيها الحلم
و بلادنا فيها كابوس
الناس تخاف
امريكا تحميهم
الناس تجوع
امريكا تديهم
تِكسي بالإيد اليمين اللاجئين 
بعد ما إيديها الشمال تعرّيهم
شركة بتهِدّ البلاد
و شركة تبنيهم
شركة بتبيع السلاح
و شركة بتطبطب على اللي يموت
العالم بيتقسّم دول
العالم بيتقسّم بيوت
العالم بيتقسم لبني آدم
و لبنكنوت
مكتوب على شهود البلاد الممسوحين بأستيكة
أنتَ حر
ما لم تضر
أمريكا

البنكنوت - مصطفى إبراهيم

يقظة الفكر (الممسوخات) - توفيق الحكيم

من كتاب: هل هو عصر الجنون للدكتور مصطفى محمود.. أداء الصوت: هند صفي الدين

لحظة حب | مصطفى محمود

إن الله يعطي اصعب المعارك لاقوى جنوده 
♥ صبرا♥

رواة

Eaglesta