قراءة القرآن بصوت الطالب يوسف فايز 

بعض فقرات الإذاعة اللي ممكن الصوت ما يكونش واضح فيها أوي

::::::::::

صباح الفل
صباح السعادة صباح التفاؤل 
صباح الخير على كل اللي سامعينا ومركزين معانا  
أنا يوسف هشام من راديو مدرستي
صباح الخير عليكو يا جماعة
** صباح الخير يا يوسف إزيك
أنا تمام انتو عاملين إيه
**تمااااااااام
إيه أخبار الأجازة
** هااااه ؟
لأ ولا حاجة أنا آسف

ألو أيوة يا مستر
أيوة حاضر بنبدأ اهه
حاضر
سكوت يا جماعة
أكشن
___________________________

كل سنة
في أول الدراسة ... تقريبا بقول لنفسي نفس الكلام 
 
بقول لنفسي السنة دي أنا هذاكر كويس ... أنا متحمس جدا ومش هفوت يوم غير وأنا مذاكر كويس فيه
 
دايما الكلام ده بيكون بس عشان متحمس وبعد كام يوم دراسة بنساه  طب إزاي
 
أنا أحمد سعيد من راديو مدرستي ، وجاي أسأل ، إزاي أقدر أواظب وأكمل السنة بنفس حماس أول يوم
 
المسألة بتتلخص في 6 خطوات
 هنسمعهم مع بعض من حسن التهامي وهاجر سامي

الخطوة الأولى
لو انت محتاج تنام ادخل نام
لانك عشان تذاكر لازم تكون مركز وعشان تركز لازم ترتاح خصوصا بعد يوم دراسي طويل اوي

الخطوة التانية
حدد هدفك
شوف المفروض تذاكر ليه؟ عشان تبقى متفوق وسط زمايلك؟ ولا عشان تفرح باباك ومامتك؟ ولااا عشان تبني مستقبلك ولما تكبر تشتغل الحاجة اللي بتحبها؟

الخطوة التالتة 
اكتب هدفك في ورقة
بس أهم حاجة إنها تفضل قدامك وتفضل شايفها على طول
ممكن حتى تعلقها

الخطوة الرابعة
افتح كتابك ياعم 
ابدأ ذاكر بجد هو كله كلام !ّ!

الخطوة الخامسة
سيب المذاكرة
بعد 50 دقيقة من المذاكرة  حتى لو ماكنتش خلصت سيب  الكتاب وقوم اعمل أي حاجة
أهم حاجة إنك بعد كل 50 دقيقة مذاكرة تاخد 10 دقايق راحة عشان مخك يفضل نشيط 
وهكذا لحد ما تخلص مذاكرة اليوم

الخطوة السادسة
ادعي ربنا
خليك قريب من ربنا وادعيه على طول وتوكل عليه بس أهم حاجة اعمل اللي عليك
_________________________________________

أنا ساعات كتير وقتي بيضيع من غير ما أحس ... تقريبا بلحقش أذاكر حاجة 
طول عمري بسأل نفسي سؤال محير جدا ... إمتى هبقى منظم في وقتي؟

أنا محمود النبوي من راديو مدرستي
لما قريت ودورت وسألت عرفت حاجات كتير ممكن تساعدني في الموضوع ده
موضوع إني إزاي أخلي وقتي منظم أكتر وبالتالي هقدر أخلص كل اللي ورايا وأنا مرتاح

أهم حاجة في الموضوع إنك ترتب أولوياتك
حدد إيه هي الحاجات الأهم واللي مفروض تخلص الأول
أكيد هي دي البداية المناسبة للحاجات اللي مفروض تذاكرها

حاول تحط جدول صغير بأولوياتك خلال اليوم وحاول على قد ما تقدر  
تنفذ أكبر عدد من الحاجات اللي فيه
أصل المذاكرة عايزة اللي يمخمخلها مش اللي يبقى منفعل ومزنوق

خلي هدفك إنك تخلص مذاكرتك بإتقان في وقت مناسب بحيث يفضل عندك وقت في اخر اليوم تقدر تستغله في اللعب أو غيره

اليوم فيه 24 ساعة
حاول تقسمهم بجدول وما تضيعش وقت على الفاضي
خلص مذاكرتك الأول واعمل اللي انت عايزه
بس أهم حاجة 
حدد أولوياتك خلال اليوم ورتبها واعملها في جدول وحاول تلزم نفسك بيه طول اليوم
  
____________________

أنا بقى الواد الجن
أنا إبليس من راديو مدرستي
سوري سوري
أنا حسام أيمن من راديو مدرستي
والنهاردة قررت أتكلم بلسان صديقي الصدوق المعلم إبليس
إبليس مرة قالي : وانت تذاكر ليه ما انت كده كده هتنسى
قالي إني أنا ممكن ألعب براحتي وقبل الامتحان بكام يوم أبقى أذاكر وبكده هفضل فاكر
قالي مش مهم تعمل الواجب
ليه تتعب وتعمل الواجب بنفسك لما ممكن تنقله من أي حد بكرة في الفسحة؟
فيه حاجات أهم وراك ... ماتش الريال والبارسا بالليل ... مين غيرك هيتفرج عليه
قولتله تصدق يابو الشياطين أقنعتني
بس تفتكر في الكام يوم اللي قبل الامتحان فعلا هقدر أذاكر الحاجات دي كلها ولأول مرة
قالي اه ياعم أومال إيه ... انت ذكي جدا وهتقدر تحفظ بسرعة

وجه يوم امتحان الميدتيرم
طبعا انتو متوقعين اللي حصل 
لأ هو أنا ما سقطتش ولا حاجة
الحمد لله جت سليمة المرة دي

بس في امتحان التيرم مكنتش عارف حاجة فعلا وأنا بحل   
حاولت آخد من أي حد جنبي أي سؤال بس المستر قفشني
ويوم النتيجة كان الكل بيهزأني
مكنتش قادر أبص في وش بابا ولا حتى المستر
جيت أنادي على أبو الشياطين أسأله أعمل إيه لقيته ما بيردش عليا
أتاريه عمل المقلب المرة دي فيا

من يومها وأنا وقفت مع نفسي وقفة وقررت أرجع تاني ألتزم 
حاول يجيلي يكلمني تاني بس ده بعده
أصله لا يلدغ المؤمن من جحر مرتين

ولا يقدر يعمل معايا حاجة تاني ... خلاااص حرمت 
____________________

لا لا لا 

تؤ برضه مش ده

إيه السخافة دي برضه لأ

أنا ربا طارق من .... اه .. من راديو مدرستي
هو في الحقيقة أنا أصلا مش من الشبان
احنا كنا زمان بنزور المدرسة هنا وأنا تقريبا تهت من بابا وماما
ومن يومها وأنا كل يوم عمالة أدخل الفصل وآخد حصص
الحقيقة دي حاجة حلوة وسخيفة
صعبة وممتعة
كل حاجة كده في نفس الوقت
على الرغم إني ممكن أبقى متضايقة شوية وأنا في الحصة 
إلا إني فعلا بستفيد
بحس إن كل معلومة جديدة بسمعها أو بقراها دي إضافة ليا 
مرة حد كبير
ما تحاوليش تبصي للمذاكرة على إنها عقبة في حياتك ... حاول تشوفيها سلم  من خلاله هتقدري توصلي وتحققي ذاتك
من ساعتها وأنا حاسة المذاكرة فعلا حاجة مهمة
وحاسة إني لازم أستفيد بكل معلومة بسمعها أو بذاكرها
أصلي قولتله إني نفسي في المستقبل أبقى حد مهم جدا ومعروف
قالي ابدأي ابني مستقبلك دلوقتي باللي في إيدك وانت هتوصلي 
ما تحاوليش تبصي للمذاكرة على إنها عقبة في حياتك ... حاولي تشوفيها سلم  من خلاله هتقدري توصلي وتحققي ذاتك

راديو مدرستي 1

نغمة وبحتاجلك وتحتجلي

SLATT/SLATTYY (prod. dem0nant)

Lift (prod.diegosoulja)

بتيجى مصر فى العيد

100دليل بصوت #ندي مصطفي

هلا بچوي😍

Farhet hayaty ahy 💜👑

تراك " معدى كل الحواجز " كلمات - غناء - توزيع - محمد مساهل 2020

مهرجان قرار ازاله_ كلمات - غناء- توزيع محمد مساهل 2021

تراك " معدى كل الحواجز " كلمات - غناء - توزيع - محمد مساهل 2020

حمزة نمرة - فاضي شوية

Related tracks