لما سِتي دخلت البيت دخل معاها شعاع أخضر زي ما تكون سنابل الشمس نورت من طَلتها.
الستات الكُبار فيهم ريحة حلوة، سِتي ريحتها كانت زي ريحة الكحك أول ما أشمها أعرف أن العيد هيزورنا وهيعشش في بيتنا شوية.

العيد غايب من زمان يا سِتي.. راح وساب وراه ضلمة، ده حتى نور الشمس مدخلش من ست شهور..
ياريت تخليكي هنا حبه، خلي للبيت حِس، البيوت كبرت والناس مشيوا، خُدوا البيوت ورجعولنا الناس.

فاكرة البيت القديم، طب فاكرة صوت التليفزيون اللي مكنش بيسكت وزعيق جدو معاكي والعيال اللي بيجروا حوالين سريرك..
العيال كبرت يا سِتي وفساتينهم طِولت وجرت في ديولها خوف بدل الطينة.

طب فاكرة أوضة خالو وشباكه اللي مكنتش بعرف أقفله كويس، وصوتك آخر كل يوم "المغرب أذن أجري أقفليه بسرعة لحاجة تخشلنا؟"
أنا وستي كنا بنخاف م الليل.

طب فاكرة لما النور قطع وولعت شمعة وقعدت أسمع حكاويكي بتاعت زمان وأسئلتي الغريبة "هي ماما زمان كانت بتلبس قصير؟ أشمعنى أنا!"
دلوقتي مش هتبعدي عني تاني، خلاص هنقعد في نفس البيت وملكيش حجة بقى يا ستي، اللي كنتي بتتكسفي منه مشى..

كانت ساعة غفلة، يادوبك سرحت عنك شوية، لقيتك تعبتي.. طول عمرك تعبانة، أنا متعودة أشوفك كدة مش هتخض.
قولتيلي بنبرة هادية "أنا مالي؟"
أنتي بتتعبي كل فترة متخافيش.
مفيش شعاع تاني هيروح من البيت، أظن ده العدل، أنا متأكدة المرة دي..

نظرات ستي مرت علينا واحد واحد، بصتلنا بصة طويلة وعيونها راحت لتفاصيل الأوضة..
الناس الكبيرة بتسرح كتير..
عادي
بيقولوا تعبانة زيادة المرة دي..
آخر نظرة كانت ليا على باب البيت، مكنتش أعرف ساعتها أنها آخر مرة..

اللي بيمشي ساعة العصر بيروح مع شعاع الشمس ومبيرجعش.. 
الغروب قتال ومخيف
الساعة ٣ بتاخدهم كلهم مني لمكان معرفوش..

ستي مرجعتش المرة دي 

-أول مرة أحكي لستي 
كلمات وأداء: آية الخولي

Aya Fahmy Elkholy

Popular tracks