♥️♥️♥️♥️♥️♥️♥️

وعادي الحزن دة يفضل يروح مره ومره يبات

لكني يوماً ما ه جعل ايديا تطول ❤️

ومش هنسي الشاعر اللي زمان اتولد فيا مرضيش يموت ولا حتي يتكيف ولا راضي يتكتف ولا راضي يتأيف ولا حاجه ف الدنيا قادره تسد طغيانه ولا عاش اللي كان يهواه زي اقرانه ولا راضي يتزيف .. وهي فوضي

في قلبي كومة غضب
في قلبي قايدة جحيم 
و عقلي بيوزني 
و شطاني خام و رجيم  


و انا من روايح الزمن الجميل
و انا الحلو اللي كان قادر يخلي 
اي قلب يميل 
انا الكلمه و جبروتها 
في صوت الناس و سطوتها 
و انا اللي ياما عشت سنين 
بعيش ذكري و اموتها

عالقهوه دلوقتي
بَعّد الحِلبه بالواحدة
و اقول حبات 
و اعد الخيبه و ورا خيبه 
و اقول خيبات 
و عادي الحزن دا يفضل
يروح مرة 
ومره يبات 
لكنه المره دي ثابت
و آي ثبات !

حليم بيغني دلوقتي 
من ايه يا زمان جاي تداوينا 
والله بجد ..
من ايه يا زمان !
ملعون ابو الإنسان

مش مشكله الاسماء 
لو كلنا مقتول
مش معضلة جوعنا
لو من بقول ل بقول
العدل مش موجود
و الظلم مش مسؤل
و انا مش سعيد ابدا
و مش حزين علي طول
لكنني يوما ما 
هجعل ايديا تطول 
و من غير م اقول اسباب
مش مشكلة الاسماء
لو كلنا مقتول


و انا شاعر و ان كنت بنسي ساعات
افهم في حل الللغز 
و بمنتج الازمات
و اطلع من المشكلة 
بحل و مشكلات
و لسه مش بيأس 
ولا بلعن الازمات
ولا ويايا بعيش 
ولا بموت لسه 
و مش فاكر 
و مش هنسي
الشاعر اللي زمان اتولد فيا
مرضيش يموت 
ولا حتي يتكيف 
ولا راضي يتكتف 
ولا راضي يتقيف
ولا حاجه في الدنيا قادرة تسد طغيانة 
ولا عاش اللي كان يهواه زي اقرانه 
ولا راضي يتزيف


و هي فوضي 
مبتقولبش
و مش برضي
ف صعب تلمني في قالب 
بطبع عنيد و كيف غالب 
وحزن و خبرة  تجارب 
ف صعب تلمني في قالب 
و صعب ارضي
وصعب اشوفني ناقص شي
و صعب اشوفكوا مش مرضي
و مش هحسبها بالاهداف
هحسبها بكام مرة 
هشوط و  ترض مالعارضه


قلبي و ياما اقول قلبي
ايام م كان موجود 
ايام مكان لسه بلاد 
و منطقه و حدود 
ايام م كنت ساعتها متغطي 
او قبري لسه متملاش 
بجتتي و ورود 
دلوقتي عايش بس بالكلمه
و الكلمه جايز يوم ياكلها الدود



ايه النجاه
من الشعور باليأس و الإحباط
و قلة الحيلة 
و الإنحطاط 
و الصبر عالخيبة التقيلة 
و الوقوع ديما من فوق البساط
و الفشل في رفع أقلها شيلة 
و النجاح اللي ديما ليه إشتراط
او إشتراك
منملكش ندفعلة 
يحجز علي حظوظنا 
اسهلنا و اسهل له
النجاح اللي بنخسر اكثره
و يفضلنا اقله
و العقبة انه مفيش بديل 
ولا يحقلنا حلة 
و اللي حاولوا من سنين ملقوش 
و اللي حاولوا لحد م اتشلوا 
واللي حاولوا حله و مفهموش 
واللي لا حاولوا ولا حلوا 
مرار يسلم مرار 
و تتقل الشيلة 
و احنا اللي لا نملك امل اعظم
ولا حل ولا حيلة 
احنا اصحاب المرار 
و الشللة و الشيلة 
احنا اللي فاتنا كل انتصار 
و فادنا كل انكسار 
و فاتتنا حكمة و صبر
و خدنا بس
سخرية الاقدار
و العلة و العيلة


و انا مش معاك و مش ضدك
انا عالحياد
انا ضد فكرة انتاج البشر
و ضد فكرة ان البشر تتباد
و ان عشت مش هديلك النياشين
و ان موتت مش هنصب علي روحك حداد
ولازم تكون عارف انك هنا بطولك
و انك راجل كبير و دا كلام 
مهوش محتاج واحد يقولهولك
انت فطن تفهم لوحدك دا 
انا بردو تايه زيك من زمان 
و كل دا مش نتاج انهارده 
انا لا بمثل الشباب و لا العواجيز 
ولا حتي نفسي في بعض اوقاتها
و لا املك القدرة ولا املك التعجيز 
و لا في رسايل نفسي ابعتها 
انا واضح زي رسالة فالنشرة 
و جاي اقول اني انهارده بصاغ
و بكرة انا بعشرة 
و ان الصحاب و الهري و الجيرة و العشرة 
لا يسووا في عينيا بكوين من الاخضر 
و ان كنت عايش انهارده 
فيمكن بكرا مش هقدر 
و هتنتهي الفكرة 
فبلاش نموت ف العفن
يمكن تعيش برا 



هو الحنين جارف
ولا الحنين جارح
هو البعيد شايف 
ولا لبعيد سارح 
الجثه دي يلزمها ڤاترينه
مش طب و مشارح
و الجثه دي بتحس و حزينه 
من غير امل في الجاي 
ولا حزن عالرايح
ولا شامه ريحه انتصار قرّب
ولا عمرها ارتكبت خطأ فادح
ولا عينها شايفه الأسود اللامع 
ولا قادره تلمح اي لون فاتح
بتشتري من اي دكانه مقفولة
و سايبه دكان الحظوظ فاتح 
 
الجثه دي زيي انا بالظبط
و لا راضي عن ماضي 
و لا عايش شئ سعيد 
ولا ناسي و مسامح 
و كل اللي عارفه
 ان أنا دلوقت 
ماشبهش نفس الأنا 
اللي عاش إمبارح 

مزيكا التراك مزيج بين اعمال ظافر يوسف و غسان بن حلتم

facebook \ https://www.facebook.com/beshoy.gerges.9822/
instagram \ https://www.instagram.com/beshoy_gergs/?hl=ar

لا حل ولا حِيلة

صعلوك مهمش بقلبٍ شريدٍ و احلامٍ كبيره جداً... 

Comments

melleina🦄

boles essa

boles essa

boles essa

Abram Isaac

hoshos_mela

Hadeer Mohsen