خليك وحيد  

كعادة كل شئ وحده
بننسي وجوده بالفطرة
كعادة كل حلم وحيد
من السهل انه يتكسر
بتتحسر 
علي الناس والحياة 
وغيمة من الماضي
وخيمة بسيطة م الانجاز
بتطلب كل شئ ممتاز
فمش بتنول
تعادي وانت قصر ازاز
بيأذيك الكلام مسنون
وتصبح من جنون لجنون
وحيد بتخانق الخيالات
ووقتك فات
وصورتك في المراية نشاذ
ياريت تفضل وحيد دايما
وتقفل كل باب جواك
عشان آخر طريق مفتوح
رماك من تاني بالاوهام
اقع قدام 
اقع ماتقمش مش لازم
يجوز تحجل..يجوز تعرج
عيون الكل تتفرج
لسانهم طلقة بتهرج
بلاش تحرج
وكمل خطوة تخرسهم
واوصل لاعلي قمة 
حاجة ترضي غرورك المطلوب
و دوب وسط الحياة الوان
بلاش تفرق معاك بسمتهم الراضية بمكانك وسطهم عادي
يا ذاك الكائن الراضي
تمد الايد لابعد نجم توصل له
خليك بعيد
الدنيا بتضيق وانت مشغول بحكاياتهم
مش ضروري انك تكون صاحب وفي
يمكن من الاحسن تكون جندي خفي
قبل اما يجي الحكم انك تتنفي
اهرب وخليك حاجة شاغلاهم شغف
مانتاش خزف ينفع تشكله من جديد
خليك وحيد
تماثيل شعورك مش هتأذي وتتأذي
ونهار شروقك الذي
كان يوم شعاعه بيعمي 
اصبح م التحف
فبلاش تقف واخلق هدف
وارسم حدوده وعدي ليه
بس المهم اياك تكون نسخة
من الشئ اللي كله اعتاد عليه

خليك وحيد

بمرور الوقت
هتلاقي في نفسك شخص جديد
هتلاقي طباعك مختلفة
وهتبرد جواك الاُلفة
وهتكره تصديق المواعيد
وتبُص بسخرية لمشاعرك
ومشاعرك ضدّك متحالفة
وحالفة تزُقك لمغامرتها
ايام بتضيع
طب قوم هاتها
ماتفوق وتمدّ لنفسك ايد
محتاج تجديد
موجود هنا اسباب للوحدة
محتاجة تفنيد
بمرور الوقت..
مش هبقي سعيد!
والكدبة ان الوقت ينسّي
بمرور الوقت هكون مَنسي
وهودّع ذكرايا في بالكو
واكون مش ظاهر وقبالكو
وقتالكو هينقصه شخص صموت
انا ضد الموت 
وبخاف من تسليته بخوفنا
وبمرور الوقت هكون ميت
اوجاعنا بتفرح وتزيط
وبتلفت انظار الواقع
علشان النكتة دي تتضافله
كان نفسي اكون مسرح كوميدي
وستايره النازلة تسقفله
والكون يوسعله و ينضفله
كان نفسي اكون 
بيت ع الرملة
بمرور الوقت عيال يشوطوه
وهيبهر ناس 
في اليوم التاني هينسوه
وهيبني اتنين عاشقين 
في حديقته مكان 
علشان اطفالهم يلعبوا فيه
وهيحفظ في اغاني المارين
وهيضحك جامد ع الافيه
بمرور الوقت احضان الناس
تتحول تلج
والشتا يتحنن ويدفيه
بمرور الوقت كل التفاصيل 
هتدوب في الجد
والقلب الجامد يصبح سد
والبنت الحلوة هتتجوز
والواد الاراجوز هيبوز
وخناقة الدنيا في جذر ومد
وخناقتي انا من جوة بتكبر
بمرور الوقت الغرفة الفاضية 
اللي في قلبي 
كراكيبها اتراكمت وبتكتر
والغربة دي واجهة بتتصدر
بمرور الوقت هتلاقي الدنيا
الصيف شتت
وحاجات شتت تاهت منك
وانت بتجري وراها ماتلحقش
بمرور الوقت 
هتقبل بالموجود 
وهتقرا الدنيا ومتعلقّش...

بمرور الوقت

شبيهِك قلبي مشتاقلِك
يداري في فرحِتِك وجعه 
يشكّل فيكي من طبعه
يسيبك تسكني مدنه
ويدّي لقصتك ودنه
ويعتاد كل تفاهاتنا 
وياخدك فوق حصان دهبي
لموطن تصنعيه لينا 
شبيهك قلبي متفصل
لخامتك ولوهج لونك 
وراسم كون يكون كونك 
وسايب سكته دونك 
ومستني تسافريله 
تضيعي جوة تفاصيله 
وتصغيله وتحكيله
وتنسي الوقت في كلامنا 
يمر العمر قدامنا 
ونرسم فيه علي كيفنا
نلجم حزننا وخوفنا 
ونستعجل علي الاحلام 
ف مرة ومرة نستني 
ونعقل ف الكلام نوبة 
ومليون نوبة نتجنن 
ونتفنن في شوف الدنيا شئ ارقي 
شعور الحب قوي خارقة 
بتقدر تحيي ارواحنا
فمش فارقة نكون عاجبين
مزاج الناس
ومش فارقة نكون راضيين
ولا مِراضيين لقوانينهم..
عشان جوانا شئ انقي
عشان واضحة ملامحنا 
بنلمسها في ارواح بعض
ماتيجي نطير..
نسيب الكل هنا ع الارض!
هسدّد قرض ارض الواقع الزحمة
من الالوان وبهجتنا
واجدّد من حُطام قلبي
حِيطان بيتنا
وابطّل ابصّ لشمالي
وافَصّص بُؤسْ احوالي،
مادام الفرحة سِمعِتنا،،
هنخسر ايه اذا روحنالها بِعَشَمنا؟!
هَصَدّق مَرّة مِن نِفسي..
واَسَكّت اِنفِعال نَفسي..
واسيب الشَكوي،، والفَجوة
مابيني وبين جروح الكون.
تعالي نكون..
علي ابعد رصيف...من مِينا دَوْشِتهم
ونهرب من مُنَاقشاتهم
ونعمل شئ يكون مجنون كفاية،،،
نعيش ف احداثه.
مشاعرنا زمان اِتْخَبّوا واِنداسوا
وقاسوا من مُدَارِتنا
نسيبهم انهاردة يقولوا كِلمِتهم...
نسيبهم انهاردة يقودوا مَسيرتنا...

شبيهِك

بإسمَكْ
هغني وهفرد الروح م القلق
وهعيش كتير جوة الصور
وهموت كتير جنب العيون الطيبة
وانقش بمواويلي الحاجات المتعبة
وارميها غدوة لاي نهر تلوّثه
شَبطان في ضِلَّك
والحياة فَرَّة رسوم مستعجلة
ماشين بننزف كل حاجة مؤجّلة
وانا لفظ خارج 
عن كتاب ضَلْ الهدف
تَوّهني تعشيم الصُدَف
بمشي الطريق
علي رجلي مرة والف لأ
بارقص كتير جوّة الخيال
وارمي الذنوب علي وِحدتي
دخان مشاعري المحروق
بيخلف اعراض جانبية
جوايا صداع
وناس خايفين
 واهداف عَجّزِتْ
في القلب كان
اتنين بيتخانقوا بغلاسة ويضحكوا
معرفش اناصَدّقتْ ليه
 صوتها اللي يشبه للكمان
اتعب كمان"
وهكون هناك لو عوزتني"
صدقت ليه؟
يمكن علشان حبيت اعدي المرحلة
وانا مش ضليع ف الاحتيال
فبسيب حياتي بخُطْرها
اوقات بَزَنّق ع الممات
بسطور و نور
ولكني دايب م الفتور
من كام حكاية اتْفَكِكَتْ
لاشعة فوق الاحتمال
من كام مجال
انا كنت بتحرك وافور
واصَدّق الليل واطلبه
واتْبع خطوط المسطرة
وايه اللي خَسّرني الحياة
غير بس هَوَسْ الفلترة؟!
اذا كان مفيش
في حد عَدَّي من هنا
وسمع بكايا وحب نغمه وردده
باسم الذي نقاني روح
من غير هموم
هنشدلكم
يمكن لغاية ما الشكوك
 في الراس تدوخ 
باسم الذي علمني اكون
انسان مابين كل المسوخ

ابتهال انسان

في روتين،
 حاقنَك اِحباط وحنين
..الي طفل قديم 
كان يشبهلك،،
كات اقصَي مَخاوفه
اللعبة تبوظ !
دلوقتي
 شروخ قلبه بتكبر
..في روتين،
 بيبوّر طيش حِلمك
ويخلّي الكون مش مِحتملك
ويدسّ الخوف
 وسط ساعاتك..
وبيملا كفوفك.اٍلتزامات،،
ويلوّن جلدك، من برده.
.وبرضو مكفّاش!
كام متر خيال.
.هيكفّي تفصّل بيه مهرب؟
لحسن لو سِبته
..هيستنسخ
 زنازين جوّاك
بدواير وبحسابات اكتر....
اثبت 
في ساحة المعركة
لملم قواك الخارقة
واياك تبصّ
 لمصدر الدوشة الخفي
انتَ..وهدفك
 وابتهاجك واكتفِي
واهرب براسك 
عن صداعهم واختفي
انتَ الممثّل الوحيد 
والباقي كواليس قصتك
انت اللي عندك سر دائك
 فاعلنه
مش تدفنه...
محتاج تحارب
.. تسترد الروح
 وفوقها هتتشفيِ

matuered

Popular tracks