متزعليش
أنا من غيرك مقدرش اعيش
أنا من غيرك ببقى صغير 
متغيرتش ولا هتغير
بس حقيقي بقيت تعبان
زعلان منك ؟
لأ مش زعلان
قلقان جايز حيران ممكن
والحيرة المرادي اختلفت
الحيرة من الجوع استلفت
احباط وعياط وأنين وشموع
والفرحة اللي فاكرها اترسمت
اتقلبت فجأة لبحر دموع
وامل متعان مع باكو لبان
وسجاير فرط وولاعة
والوعد إياه (أنا مش هيأس)
لساه متعان ع الشماعة
والليل زهقان دايما خرمان
لسجايري وهمي وتنهيدي
الحزن الساكن فـ ملاحك
اتسرسب سراً لوريدي
من ايدي اتفرطت احلامي فرط الرمان
مواعيدي اتفقت مع قطر مالهوش قضبان
فطبيعي يبان إن أنا تعبان
وطبيعي تشوفي كلامي دموع
وطبيعي تحسي إن أنا موجوع
وطبيعي اغيب عنك ايام
وطبيعي انام اليوم كله
هربان م الواقع فـ الاحلام
وطبيعي الحلم يكونلي كابوس
لو حلم جميل يحتاج لفلوس
وانا واد منحوس محتاج لقاموس
متخصص فـ الاحلام والسرد
فـ طبيعي الرد يكون على القد
يتغير صوتي فقول م البرد
وطبيعي اقوم من النوم مخضوض على تليفونك
يتغير لونك من صوتي وانا قايم من نومي وبنهج
نرجع و نعيد نفس المنهج
وتقولي مالك زعلان مني ؟
فأرد واقولك مش زعلان
تعبان جدا علشان تعبان
والسبب الواضح ياحبيبتي
الحزن الكامل من خيبتي
والعجز فـ كلمة هتغير
العمر يبان انه قصير
لو يوم فكرت ابعد عنك
او انك يوم متزعلنيش
أنا وانتي اساسا بنحاول
نهرب من فيلم مالهش افيش
فـ متزعليش
#تامر_عابد
19/8/2016

NorAly

Popular tracks