رأيكم يهمني أكيد
جديد....  زي اليمام🐦😀 .

كان نفسي اكون زي اليمام
مش قصدي زي؛ انا قصدي اكون مخلوق يمام
وطنه شجر 
أحلامه فوق متعلقة على غصن أصله مايملكوش 
مالهوش وطن 
كل الأماكن ليه مكان؛ إن شاء تكون 
ولا فيه قضايا تهمه ولا فيه سجون 
ولا فيه يمام إن  غضبوا منه يخنقوه
ولا  فيه بشر يستأنسوه
ملعون أبوه السجن  لو هينعّموه
السجن سجن مهما قالوا وزوقوه
والحر روحه تطير يمام 

طاير لاني املك سلام
أيام أطير، ومكان ما احط افرد وطن
وابني المكان مش قش لكن بالسكن 
أفرح كأن الكون ميزان 
وانا عقلي أصبح متزن
صبح ومسا طاير يقول
رحال يمام 
ولا إن عمر تعيش شجر
هذي الحياة 
ملعونة يمكن للبشر
فالسجن أصبح التزام

طاير يمام
ولا إني سرب حمام في خط نظام 
ولا غية حابسة فيا حق الهجر 
صفارتي رحلة ابدأها وقت الفجر
وقت اما اقرر احقق الاحلام
وابني مكان، وافرش ربوعه سلام
واسمع ضجيج الصبح يتنفس 
يزيح الضلمة من عيني 
فاقوم من ليلي بتلمس
جمال الكون على عيوني
بحرية، اطير بسلام

طاير يمام

#أسامة_الرهواني

أسامة الرهواني