ساعه صفا

#poem #gerges_alfy 
فَاتِت سَنة..
و الذِكرىَ لَفِت و إتعَكَس كُل إللي كان
أسباب سعادتك جِه الأوان و إتحولت
لسجن مِتقَفِل عَليك بأربع حيطان
و إنتَ المُدان....
بِتحِب ليه !!!!؟
مين إللي قال إن الهَوىَ..
ينفَع لِغير أهل الهَوىَ ..
و البياعين..
طَبع الهوىَ... 
..مَلوش طِباع
يعيبه طبع العاشقين
و إنتَ حَبيبتك مـ الأساس مِش طَيبَة
ليه مِسِكت فيها و سِبت جَمع الطيبين !
فَـاللوم عَليك إن كُنت راجِع تشتكي
مُر الخُسارة أو ضَجيج صُوت الحَنين
من قبلها...
مِليون إشارة تحذرك...
الحَرب جاية و العَدو فـِ توب حَبيب
إبعد و سيب..
قَدمت ليه قَلبَك بوكيه فـِ وش سكاكين غَدرها !!!؟
إنت اللي خَدَعك حُسنها
حَبيت عُيونها الكَدابين 
و خَرجت مَدبوح مـ البُكا
قَلبك سَبب... 
بَس إشتكىَ
نَفض غُبار المَعركة 
راح إستخبىَ فـِ الحِصون
حَاوِل يصون..
الباقي من باقي الوَجع
لقىَ نَفسه مِتحاصِر حَنين
بِتحِب ليه !!!!؟
إنتَ إللي بِتصُوغ الحَكاوي و النُصوص
عارف بإن السِندريلا هتِختفي 
مين إللي قالك حِبَها !!!؟
مَنتَاش أمير ...
جِسمَك هَزيل..
مِش حِمل سَهرة للبُكا عَلىَ بُعدَها
رَعشِة إيديك...
فاضحاك معَ الناس أجمعين
و ف ضِحكِتَك بيلاحظوا كِتمان الأنين
يقروا كلامَك يسألوك
بتحب ليه الشِعر الحَزين ؟
مُغفلين...
مَيعرَفوش إن الكِتابة مِش قَرار
و إن القَصايد هي "آه" العَاشقِين
فاتِت سَنة..
و إياك تِعاوِد تِنتِظر تاني الرجوع
إنت إللي زَاهِد فـِ الغَرام
إياك تِوافِق أي نَزوة و سَدٌ جوع
بُكرة الحياة هَـتعود لِقَلبك مِن جِديد
عَشان كِدَه .. حَافِظ عَليه و كِف الدُمُوع
___
‫#‏جرجس_ألفي‬

Mo’meN WaZerY

Popular tracks