Kapag Umiibig Ka- Ferdinand Jarin At Genaro Gojo - Cruz

Salima, a rock musical about "small voices who just want to take a rest from the seemingly endless war in Mindanao" (Arnel Mardoquio) conceptualized and directed by Geej Williams (aka Geejay Arriola), written by now award-winning filmmaker and librettist Arnel Mardoquio, composed by Gary Granada, Popong Landero, Eric Gancio, Gauss Obenza, Geej Williams, Icoy San Pedro, Maan Chua, Eugene Villarino, Maree Contaoi Cayas, Paolo Sisi, Mualang Nacion, Jigger Eledia Performed by the composers, and Gibson Viduya, Amor Aquino, Jerimie Sabandal Tampoy, and Pink Mustang's Charlie Comendador, Jeffrey Calixtro, Daniel Binag, Jeffrey George. Production staff: Joey Sison, Bejay Conde Absin, Lyndee Prieto.

11 Balangaw-Live, music by Gauss Obenza

MABUTI PA ANG MGA HAYOP
(Sa mga nagsusulong ng Cha-Cha)
Teksto ni Danny Fabella
Musika ni Joel Costa Malabanan

Mabuti pa sa inyo ang mga buwaya
Kapag nabusog na’y di na naninila
Hindi tulad ninyong mga walang kabusugan
Sa yama’t kapangyarihan,
Sagpang pa rin nang sagpang sa naghihingalong bayan

Mabuti pa sa inyo ang mga baboy
Kontento na  sa tira- tirang pagkain
Mula sa kung kaninumang hapag-kainan,
Hindi tulad ninyong nabubundat
Mula sa kabang yamang dapat ay para sa lahat

Mabuti pa sa inyo ang mga unggoy
Marunong magtakip ng mukha, marunong mahiya.
Hindi tulad ninyo na sobrang garapal, mukha’y makakapal
Bistado na’t lahat ayaw pa ring paawat
Ninanakawan  ang bayan nang walang puknat.

Mabuti pa sa inyo ang mga aso
Marunong kumilala’t magserbisyo
Sa taong sa kanya’y nagpapakai’t bumubuhay.
Hindi tulad ninyong matapos palamuni’t payamanin
Ng sambayanang Pilipino
Patuloy na  pinagtataksilan, nililinlang at pinapaslang.

Sige!  Kayo’y humahalakhak!
At magpakalasing sa tuwa at galak 

Sa inyong mga maitim na balak
Dahil habang sa Cha-Cha kayo’y umiindak
Nagmamatrsa ang bayang sa inyo’y magpapabagsak.

Mabuti Pa Ang Mga Hayop (teksto Ni Danny Fabella)

PAALALA
Tula ni Jerry B. Garcio
Musika ni Joel Costa Malabanan
Ika-3 ng Marso, 2018   10:55 pm

Pagbaril sa puki ay di gawang biro,
Dapat na labanan ang armas na hawak
Nang hindi mapatda kapagka nakita
Ang munting lagusan kung sa’n ka nanggaling;

At nang di manginig habang inuumang
Ang sandatang tanging nagbibigay-tapang.
Sapagkat ang puki’y makapangyarihan
Ito’y bumubuhay, ngunit pumapaslang

Kung kinakaylangan, niyaong ang tingin 
Sa puki’y puki lang, di sinapupunan 
Ng buong tinakpan, at siyang pinagmulan 
Ng kab’yak ng mundo at anak ng tao.

Bago kalabitin ang tangang gatilyo
Ay alalahanin: puki ng ina mo.

Paalala (tula Ni Jerry B. Gracio)[1]

Hugot Lines
Musika at Teksto ni Joel Costa Malabanan

KPop ka ba? Minamahal  kahit hindi nauunawaan
Lotto ka ba? Pinipilahan kahit hindi naman tamaan
Teleserye ka ba?  Inaabangan kahit paulit-ulit na lamang
Facebook ka ba?  Sinusundan kahit walang kabuluhan

Gadget ka ba? Hawak-hawak mula paggising hanggang tulugan
Love song ka ba? Hinihimig kahit ng pusong sugatan
Sweldo ka ba? Kararating lang ay naglaho na naman
Dasal ka ba? Sinasambit upang pag-asa’y makamtan

Ikaw ba ay troll? Tagapagtanggol kahit wala na sa katwiran
Pabahay ka ba? Nakatiwangwang ay di mapakinabangan
Tokhang ka ba? Bigla ka kasing kumakatok sa pintuan
Diktador ka ba? Inilalagak kahit sa bayaning libingan

Ang mga hugot lines, malalim man o mababaw
Nagpapaalalang sa buhay: matutong magtampisaw
Ang paglaya ay hindi lang pangarap na tinatanaw
Pagkat laging may tunggalian sa mundong ibabaw

Teacher ka ba? Tagapagturo ng katotohanan 
Journalist ka ba? Nag-uulat sa ngalan ng katarungan
Musikero ka ba? Tumutugtog upang gisingin ang bayan
Sundalo ka ba? Tagapagtanggol ng mamamayan

MRT ka ba, tumitirik sa gitna ng paglalakbay
Kaibigan ba kita sa hirap at ginhawa’y aking kasabay
K-12 ka ba? Dagdag na taong paghihintay
Pangarap ka bang balang araw mapapasakamay?

Hugot Lines (Muska at Teksto ni Joel Costa Malabanan)

Balak ko sanang sa SM Manila ito irekord para makatotohanan ngunit baka sawayin lang ako ng guard. Inirekord ko na lang habang may nag-uusap na mga estudyante at guro sa faculty para may background na ingay.  Dagling-Awit lang ito at nabuo sa isang upuan. Saka ko na aayusin pag sinipag. Salamat sa makatang Ed Romano Labao na pumayag na kantahin ko ang tulang nakita ko lang sa kanyang timeline:

MAY GAMIT ANG MGA SALITA
Tula ni Ed Romano Labao
Musika ni Joel Costa Malabanan 

Sa Hypermarket
ritwal na ang ganitong katanungan

"May SM Advantage Card?"

Sa kahera
ritwal na rin  ang aking  kasagutan

" Bayaan mong si Henry Sy 
ay higit pang yumaman
Baka sakaling kayo'y maging permanente't
ENDO ay wakasan"

"ENDO po'y pinalitan
PROVISIONARY na ang katawagan"

Ngiti na may ismarteng kahulugan

"May gamit ang mga salita
Pinalalambot ang nagngangalit na maralita"

Otomatikong pumalakpak
sa takdang-oras
ang lahat ng empleyado

Mapait na binigkas
ng kahera

"Happy to serve you!"
"We've got it all for you!"

May Gamit Ang Mga Salita [tula ni Ed Romano Labao at Musika ni Joel Costa Malabanan)

Dagling-Awit, biglaang pag-awit sa tulang nakita sa facebook. Minsanang pasada sabay record para hindi makatakas ang sining ng paglikha at maikulong sa pinaka basal nitong anyo. Salamat sa maganda at napapanahong tula ng makatang si Francisco Rey Arias Montesena. Inirekord ngayong ika-2 ng Mayo , 2018 sa mainit na gabing tagaktak ang pawis sa lipunang dinadambana ang karahasan ng tokhang.


Funeral
Tula ni Francisco Rey  Arias Montesena
Musika ni Joel Costa Malabanan
Ika-2 ng Mayo, 2018

Huwag kang maghanap ng bangkay
Sa kabaong na di kayang ibaon.
Hindi lamang para sa ugat
Ang silbi ng lupa. 
Kung kaya 
Nang tigisin ng luha ang lahat
Ng dapat isilid sa kahong ito,
Saka ako maniniwala sa sabi-sabi.
Hindi lahat ng nasa ataul 
Ay bangkay. 
Hindi lahat 
ay umaalingasaw. Hindi lahat
Ay nabubulok. Minsan, naiiwan
Sa ibabaw ang naghahasik
Ng rabaw ng panimdim. Patuloy
Na gumagala at pinaniniwala
Na kaluluwa ang naglalakad
Nang tahimik sa kalaliman ng gabi.
Nang may binaril na kaibigan, 
Nang may inagas na sanggol,
Nang may dinahas na birhen, 
Nang may pinatahimik na saksi, 
Nang may tinapos na pangarap,
Naisip mo na rin bang hindi multo
Ang lumalabas sa katawang-lupa?
Na hindi dapat katakutan 
Ang gumagalang patuloy
Na naghahanap ng hustisya't katahimikan?

Funeral (tula Ni Francisco Rey Arias Montesena at Musika ni Joel Costa Malabanan)

SIYAM-SIYAM
Musika at Titik ni Joel Costa Malabanan

Siyam-siyam inabot nang siyam-siyam, 
Nalilibang pa rin sa sayawan at tawanan
Siyam-siyam nabubulag sa kamangmangan
Nakangiti sa problemang ngayo’y pasan-pasan.

Jack and Poy pork barrel nangangamoy
Sinong nangungurakot mas masahol sa unggoy
Aasenso pa ba buhay nitong Pinoy?
Kung sa kahirapan sambayana’y tumataghoy

Bumbero, bumbero may sunog
Saan, saan sa puwit ng kalan
Ang lupang sakahan golf course na ng dayuhan
Mga magsasaka ay napabayaan

Nanay mong maganda caregiver sa Taiwan
Ate mong masungit dancer na sa Japan
Bato-bato sa langit presyo ng gasolina
Tumataas, tumataas parang matrikula

Penpen de Sarapen bayan ko’y kapit sa patalim
Haw haw de carabao nabenta na ang lupain
Gipit namimilipit, hustisya’y nasa langit
Ginto’t pilak, ipingakait sa mga batang yagit

Mga magsasaka sa Hacienda Luisita
Hangad ay reporma ang sumalubong ay bala
Mga kahoy pinutol at naningil ang kalikasan
Delubyo ng baha ang bitbit ay kamatayan.

Mga mamamahayag minasaker sa Maguindanao
Hanggang ngayon ang hustisya ay hindi pa matanaw
At sa Mamasapano mga pulis ay pinaslang
Katarungang inaasam di pa nakakamtan

Inaagaw ng China, dagat natin at lupa
Gobyerno natin ay wala namang nagagawa
Natatakot sa giyera, kaya ang diplomasya
Ay ang isuko na ang pambansang soberanya!

Siyam-siyam inabot nang siyam-siyam, 
Naghahahanap pa rin sa tunay na kalayaan
Siyam-siyam nabubulag sa kamangmangan
Nakangiti sa problemang ngayo’y pasan-pasan 

K-12 pinatupad na, ano ang aasahan?
Kung diwa at bituka’y hawak na ng dayuhan
Mga kabataan ay Kpop ang sinasamba
Nag-aaral upang lisanin ang ating bansa

Patuloy na pinapaslang mga Lumad at aktibista
Mag-ingat pag pinaratangan kang isang komunista
Berdugong militar ang naghahari-
harian
Siyang pasimuno ng mga karahasan

Siyam-siyam inabot nang siyam-siyam, 
Nagahahanap pa rin sa tunay na kalayaan
Siyam-siyam nabubulag sa kamangmangan
Nakangiti sa problemang ngayo’y pasan-pasan.

Salot na VFA ay dapat buwagin
Mga sundalong Kano ay dapat na palayasin
Alam mo ba kaibigan ang tunay na terorista
Ay ang gobyernong ito na tuta ng Amerika.

Siyam-siyam inabot nang siyam-siyam, 
Bansa nati’y sakal-sakal pa rin ni Uncle Sam
Siyam-siyam nabubulag sa kamangmangan
Nakangiti sa problemang ngayo’y pasan-pasan

Libo ang pinaslang sa ng rehimeng tokhang
Pagkalat ng droga’y hindi naman mapigilan 
Murang malulutong ang siyang tanging alam
Bigas na may bukbok ang alay sa sambayanan!

Siyam-siyam inabot nang siyam-siyam, 
Nagahahanap pa rin sa tunay na kalayaan
Siyam-siyam nabubulag sa kamangmangan
Nakangiti sa problemang ngayo’y pasan-pasan.

Tapang at malasakit ay di matagpuan
Oligarkiya’t si Marcos ang siyang kinampihan
Habang nagbabangay ang DDS at Dilawan
Ang yaman ng bansa’y inuubos ng dayuhan!

Siyam-siyam inabot nang siyam-siyam, 
Nalilibang pa rin sa sayawan at tawanan
Siyam-siyam nabubulag sa kamangmangan
Nakangiti sa problemang ngayo’y pasan-pasan

Halaga ng piso, tuloy sa pagbulusok
Presyo ng bilihin ay hindi na maabot
Mga manggagawa ay kontraktuwal pa rin
Kaya dapat magbuklod, lakas ay pagkaisahin!

Siyam-siyam inabot nang siyam-siyam, 
Nagahahanap pa rin sa tunay na kalayaan
Siyam-siyam nabubulag sa kamangmangan
Nakangiti sa problemang ngayo’y pasan-pasan.

Lahing kayumanggi ay di lahing alipin
Imulat ang mata karapata’y kilalanin
Mahirap o mayaman, ating alalahanin
Kapag nagkaisa bansang ito’y lalaya rin!

Siyam-siyam inabot nang siyam-siyam, 
Nagahahanap pa rin sa tunay na kalayaan
Siyam-siyam nabubulag sa kamangmangan
Nakangiti sa problemang ngayo’y pasan-pasan.

Hangga’t tayo’y alipin sa sariling bansa natin
Ang pakikibaka ay dapat palakasin
Ang bukas na malaya ay ating pandayin
Halina’t sumama, ang lipunan ay baguhin!

Siyam-siyam inabot pababayan bang ganyan?
Saan na napunta ang pag-asang 
kabataan?
Siyam-siyam ang pagbabago’y dapat simulan
Kumilos at ang bayan ang siyang 
pagsilbihan!

Siyam - Siyam[musika at teksto ni Joel Costa Malabanan)

Iginawa ako ng tula ng makatang si Danilo V. Diaz na ang orhinal na pamagat ay "Sa Awit Mo at Gitara, Joel". Dahil nilagyan ko ng Dagling-Awit, tinanggal ko ang pangalan ko para maging angkop sa lahat ng musikerong umaawit para sa bayan. 

Inuubo at paos pa rin, pero kinanta ko na bago pa makatakas ang musa ng melodiya. Aayusin ko pa rin pag sinipag.  Inirekord ngayong ika-25 ng Oktubre, 2018 sa bahay bago pumalaot patungong pamanatasan.

Sa Awit Mo At Gitara
Tula ni Danilo C. Diaz
Musika ni Joel Costa Malabanan 

Titik ang kalabit ng alab ng dibdib
Nang ang mga manhid marinig ang tinig;
Ang talas ng kwerdas ay para sumugat
Sa mga naghudas sa bayan mong liyag.

Sa bawat pagtunog ng gitarang yapos
Ay iyong paghaplos sa paghihikahos.
Kapiling at yakap habang binibigkas
Ang hanap mong lunas sa dusa at hirap.

Ang tono mong lambing ng mga hinaing
Kung sana'y damahin, magpasalin-salin;
Walang alinlangan, awitin nang tunay
Nang may pagmamahal at pusong may dangal.

Sa iyong pagkanta aking damang-dama
Ang  himig ng nota ay letra ng masa;
Bakas sa 'yong mukha kahit walang luha
Ang inis at suya sa mga madaya.

Sa Awit Mo At Gitara (tula Ni Danilo C. Diaz)[1]

EXTRA
Written by Sigfreid Sanchez Barros
on January 5, 2009, 7:40PM
Performed and recorded by Joel Costa Malabanan
on November 23, 2018, 9:23AM

Kuya, pwede bang umekstra?
Kahit ipakain niyo sa buwaya
Rapist ng seksing artista
O daanan lang ng kamera

Sige na, Kuya, sige na
Umarte na ‘ko dati sa eskwela
Wala lang ngang binigay na linya
Di kasi paborito ni Mrs. Vida

CHORUS I:
Extra! Gusto kong maging extra!
Isang araw na feeling ko’y artista
Extra! Gawin niyo akong extra!
Para sikat pag-uwi ko sa probinsya!

Kuya, sige na, pa-extra
Talent ko sa iyo’y ipapakita
Maglalabas ng aking kaha
Kahit di kailangan sa eksena

Extra! Pa-extra! Pa-extra!
Subok lang baka may ibubuga
Kahit ano, Kuya, ang iyong ipagawa
Pa-eexploit sa ngalan ng pera

CHORUS II:
Extra! Lahat gustong mag-extra
Gagawin lahat sa harap ng kamera
Extra! Sa kagustuhang umekstra
Naaabuso, madalas ay nahahada

CHORUS III:
Extra! ‘Daming gustong mag-extra
Isang araw na feeling kang artista
Extra! Sari-sari ang istorya
May saya at may “Huwag po! Huwag po, Kuya!”
… May saya at may “Huwag po! Huwag po, Kuya!”

Extra! Extra! Extra! Extra!
Extra! Extra! Extra! Extra!
Extra! Extra! Extra! Extra!
Wah-wah-wah! Extra! Extra! Extra!

Siyam - Siyam[musika at teksto ni Joel Costa Malabanan)

Wikang Sarili

Related tracks