#شبح_الموت 
شبح الموت بيطارد الكل 
دم كتير وبرد وطل 
ومفيش ولا واحد موجود 
كل الناس عايشه على الموت 
بيت الكل تراب ف تراب 
صف طابور مين ف الدور 
واحد واقف يخطف روحهم 
صوت مهموم 
صوت أفكار بتصارع بعض 
مين هيكون 
أم بتصرخ بنت بتندب 
ايه الحظ العابس ليه 
من ضمن بنات العالم كله 
ابقى البنت المكسور روحها 
قبل الموت 
 كل جيرانا باعو وخانو 
وسابونا زي الأوهام 
ولا راجل ينقذ أفرحنا 
ولا بنت تطمن أروحنا 
فجأه الصوت الحي ده مات
صوت أشباح جايه بعيد 
كل سكوت 
سكتو لحد ما ماتت روحهم 
بكره الدور يختار الكل 
وقتها يعرفو مين الجارح والمجروح 

#حلب
#قصيده_مجهوله 
#حكايات_قلمي 
#يحيى_الجبيري

شبح الموت💀

كلمات نزار قباني 
ألحان يحيى الجبيري

وعدتك 1

كلمات نزار قباني 
أداء يحيى الجبيري

وعدتك 2

لا تلمني 
يا حبيبي لا تلمني 
واسأل الأيام عني 
واغلق الأبواب خوفا من لقائي 
ما عاد بابك مشرقا منذ ابتعدنا 
ما عاد قلبك مرهفا منذ ابتعدا 
ما عاد حبك نابضا 
فاذهب بعيدا وارتحل 
وانسى رجائي 
وانسى هواي ولهفتي 
وانسى بكائي 
اني ألوم القلب على حب يهين 
وألوم حبك أنه أضحى حزين 
أهديك دمعا قد تحدر للفراق 
أهديك قلبا طالما عشق العذاب 
أهديك أيامي الحزينة كلها 
فاذهب
 فاذهب وغني
وانتظر مني السراب 
#يحيى _الجبيري

الذكريات 

لا تلمني

العام الهجري 1439

21 سنه 
سته طفوله وسته جري وشعبطه 
وخمسه جرح بيتنسي بالمرمطه 
وأربع سنين عصفوره طايره مرفرفه 
فرحانه بالعمر اللي جاي 
بتنَّسي روحها كل حاجه معلمه 
الدنيا قاسيه علينا ليه 
وروحنا ليها مسَلِمه 
أربع سنين وسط العمل وسط الأمل 
ويا الفرح بين عمر راح وعمر لسه بيبتدي 
والقلب متشعبط ف روح وبيهتدي
واحد وعشرين سنة 
عدوا عليكي بيندهوكي ف كل صبح وكل لليل 
انك أميره ونجمه عاليه ف السما 
وانك دلليل للفرحه والأمل البعيد 
والليل ف بعدك شئ عنيد 
وبيحلفولك ميت يمين بالله رب المرحمه 
إن الوداع بينك وبينهم شئ أكيد 
واحد وعشرين سنة 
عدوا ك يوم سهل وبسيط 
الشمس طله ف أوله
 وف وسطه طالعه ومؤلمه 
وف عصره غيمه مضلله
وف أخره نسمة فجر مصحوبه بدعاء 
وف كل عام وف يوم ميلادك تسمعيه 
يا رب يبعد دمعتك يا رب تكمل فرحتك 
يا رب يهديكي لطريقه وجنته 
وكل لحظه تكوني عايشه طيبه 
واحد وتسعين سنة 

#يحيى_الجبيري

واحد وعشرين سنه

ممكن سؤال ؟

اتنين وخمسين سنه 
شوف كام سنه 
بتحارب الألم اللي حاصر قلبنا 
وبتزرع الأمل اللي غايب من سنين 
حتى يتامانا أبوهم غائب 
كان غايب فعلا وقت ما كنتي بتتمني 
بغناكي يعود 
واهو مات بفارقك وبموتك 
واعطي نصف عمري للذي يجعل طفلا باكيا يضحك 
واديتي لقلب الطفل حياه 
والكانسر أخد النص التاني 
واعطي نصفه الثاني لأحمي زهرة خضراء أن تهلك
وزهور الدنيا خلاص ماتت بوادعك يوم 
مهو مش معقول هيكون العمر تلت تنصاص 
لو كان الكانسر عارف انك أمل الورد 
كان مات هوه وسابك لينا 
غنواتك ورد ف أراضينا 
ودعك الورد وبات دبلان 
كم عام بيمر وكان بيهد ف روحك موت 
غرقتي الحزن ف بحر سكوت 
وبرغم الألم الصارخ فيكي بتتعالي على طعمه بغنوه تنور ليه 
ليه فجأه الدنيا اتقلب خوف 
يمكن علشان عرفت غنواتك خبر الموت 
يمكن علشان صوتك بيودع بسكوت 
من أول صرخه ف يوم جيتي
والدنيا بترقص حواليكي 
وبتنشر أملك وسط الناس 
ولآخر صرخه ف عز آلامك كتماها 
مش عاوزه تحس الدنيا بخوف 
وف عز ألامك نشر أمل 
الشال والعقد وورداتك 
بينادوا عليكي بدمعاتهم 
متردي عليهم ولا خلاص 
دمعاتهم دي بتودع روح 
أنا قلت مسافره عشان كام جلسه 
هتحاربي الكانسر وجنوده 
وتعودي كمان أقوى بعودك 
وتغني يالليل ما اطولك 
والليل أهو طول فعليا والكانسر كالعاده بيقتل 
فرحتنا ويمحي الأحلام 
والله يا ريم مش خوف من موت 
ولا معترضين على أي قضاء 
كل الموضوع إنك على طول 
كنتي بتتعافي وبتعودي 
ف يعود ف وجودك طعم النور 
والمره دي روحتي بعيد جدا وأخدتي معاكي 
أمال متعلقه بيكي 
مين بس يغني لصوت المسجد متحاصر جوه فلسطين 
واهو مين يتريأ ع الغادرين
 هيبعوا كنيسة وبيقولوا 
الأرض الخضره وزيتونها ورثوها سنين 
ما تعودي يا ريم واهو تدينا كما نقطة خير من أغانيكي علشان نتسند ونقاوم 
وحياة الغنوه اللي قالتلك غنيها تدوم 
من صوتك هيخاف الجبنه وهيرهبوا يوم 
وفي يوم هنلف ف اراضينا بعد التحرير 
ونعلم كل الأولاد اغانيكي الحلوه يغنوها 
ونصلي عليكي صلاة الغايب ف الأقصى  
ونقول القلب اللي اتغنى بالغائب يوم 
من نغمة روحه اتسندنا وقاومنا بكل أمل سابه 
رحمات على قلبك من ربي 
يجعل صرخات ألمك رحمه درجات ف جنان 
ويطيب روحك بالمطره من اكبر غيم 
تنزل على قبرك وتبرد بسلام وحنين 
سلامات من كامل أراضينا 
سلامتنا يا ريم 

#وداعا_ريم 
#يحيى_الجبيري

ريم

حيره

إلى إبنتي الحبيبه 

ف عينها رحمه من اللي فاتو 
وضحكتها حنان مش متذكراه ايامنا
بسمعها بتدندن ايات وبرقه بصفالها 
حبك براءه مش مطوعاها الحياه
بتعاند الآلام فتروق وتحلالها 
شكل الدكاتره
 زي الملايكه وقت السؤال 
حوالين سريرك ملفوفين 
شكل السرنجه ف لون وريدك 
زي خنجر جوه قلب شهيد 
لونك بيرسم دمعه بتسلم حنين
وجهاز تنفس زي خوذه للمحارب 
صبرك بيشهد كل لليله على الآلام 
فاكر ف عينك نظره يحلالها الكلام 
تبعت وصيه من الخلود تبعت سلام 
وصمود عجيب على البراءه ف نظرتك 
وبرغم وجعك ابتسامه ما فارقتك 
يا ساكنه ف الروح من قبل موعد مولدك 
سايبه ف قلبي جروح من يوم غيابك 
مش هقول وداع لكن هقول حبة فراق 
بعد الفراق كام م  الأحبه اتلاقو 
وحشتني منك طلتك 
شايله ابتسامه بتحكي بيها كام حكايه 
وبترسمي كام صوره فينا 
قبل الوداع 
بتودعينا بنظره مالياها بحنين 
يا ضحكه حبساني لسنين 
يا نظره محفوره ف وريدي 
وبتحكي فيا المستحيل 
يا أحلى حاجه فرحت بيها وشيلتها 
بصتلي يومها عشقتها 
فارقتني فجأه 
ضمتني ضمه من الجمال أدمنتها 
فاكر ف روحك خفة فراشه ولون ورود 
فاكر ف قربك صوت داود 
وف نظرتك تسبيحه منه ف ليل طويل 
وف دمعتك راسملنا صبر 
بنعدي بيه كل الدروب 
يا صابره صبر الاوليا 
بسرح بروحي ليوم فراقك 
وايديكي فيا متبته 
وعنيكي ثابته لفوق وروح متسلمه 
ودموع بتجري ف النهاية 
لحظة سكوت 
لحظة وداع لحظة ألم 
وطوفان محاصر روحنا 
وسفينه كاسره لقلبنا 
مستني أشوفك مره حتى ف المنام 
واغسل ف روحي من الألم 
وانسى بنظرة قرب منك خوف زمان 
بستنى بس أحس بوجودك هنا 
يمكن تهدي الروح 
واطمن ف انام   

#إلى_رقيه 
#يحيى_الجبيري

إلى ابنتي الحبيبة


وقت الفراغ كنزك ف اوعى تضيعه 
ارفع ستارة مسرحك وانسى ان في جمهور 
مثل لنفسك هيئتك وكأنك المشهور 
اعرض حياتك ع التسلسل في الفصول 
واشرح تفاصيلك لقلبك حسها 
قرب لروحك كل مشهد حبها 
ارفع عصاية فرحتك 
واضرب بروحها بحر خوفك 
وان يوم لقيت البحر شق 
اهرب وناسك م الغريق 
متخدش غير قلبك صديق 
قودهم لنور يعيشوه معاك 
يفضل يعيش جوه القلوب 
ويعيش معاهم رسم طيفك 
دور على الأمل اللي ساكن قلبهم 
جمع قلوبهم كلها واملاها خير 
متكونش يوم خنجر ف حدوتة الامل 
ويجوز تكون قشايه يلاقاها الغريق 
متكونش ضلمه تتوه الأحلام بخوفك 
ويجوز تنور حلمهم بأمل يشوفك 
الدنيا حلوه للي بيشوف حلوها 
عندك نجوم ف سماك دليل 
عندك قمر النظره ليه تشفي العليل 
عندك شجر وقت الربيع أخضر جميل 
عندك زهور وجبال وخيل 
والشمس أجمل م الجميع...ونورها خير 
عندك بحار وامواجها عاليه ومبهره 
وانهار جميله زي فضه
 خليها تمحي أرض بورك 
بصلها وازرع بيها فرحك 
وابعت عليها جواب بحبك 
و احفظ عليها كلام بسرك 
واحصد بفضه منها نورك 
ارفع عصاية فرحتك
 اضرب بروحها صخره تشبه قسوتك 
تنضب عيون الفرحه منها وتسعدك 
واشرب حنين للذكريات منها 
واوعاك تدوق الخوف يا إما هيهلكك 
جرب تعيش حبة فرح حبة أمل 
حبة تجارب ف الحياه هتعلمك 
حبة سعاده تغيرك 
ارفع عصاية فرحتك واضرب بروحها هزتك 
 خليها تسند خطوتك خليها تمحي دمعتك 
وتكون ونس وياك وتقتل وحدتك 
وتكون معين وتكون ف ايدك فكرتك 
الفرحه فكره وعايشه فيك 
ثبتها دايما وابدي بيها كلمتك 

#عصاية_الفرحه 
#يحيى_الجبيري 

عصاية الفرحه.mp3

لسه القلم أستاذ لكل العاشقين ❤

Yahya Elgebery

Popular tracks