سورة الكهف - للقارىء مصطفى اللاهونى

بعد التقسيمة
وبعد الدم المصرى ما سال
طالعين بيتاجروا بينا على كل الشاشات
ولسه الصليب حضنه الهلال ف الاعلانات
يلا كمان افرزوا.. مين ده اللى مات ؟؟؟
شوف كام قتيل من عندكوا
وكام قتيل من الحسرة مات
وكام حرامى متخفى ف لبس البنات
طب ايه اللى وداهم هنا ؟؟ 
وايه اللى وداهم هناك ؟؟
يلا قوام .. مزاد ومفتوح للتصنيفات
متسمعوش كلام داعر يقول
قتلاهم فى النار وقتلانا ف حضن الحور
تكونش هتحارب صهاينة يا خى 
ما تقول ياسيدنا كلام معقول 
ومن هنا
ومن هنا اقتل وروع باسم الدين
ولع كنايس
وحاجج رسولك يوم الدين
وقوله دم اللى ماتوا ف رقابنا
ومش هانقدر نوفى الدين
ياسادة ياكرام 
الدم لونه واحد  
عمرك شفت عسكرى لون دمه أصفر
طب اخوانى او سلفى لون دمه اخضر
او حد ع غير المله
يكون لون دمه اشقر
يبقى ليه بنقسمه ونفرقه
اللى رأيه رأينا ده شهيد ونكرمه
واللى رأيه غيرنا ولو صح دايما
بنجرسه
وبنفضحه
ونجرمه
وبتسألوا ايه اللى وصلنا لكدة
اسكتوا....................
ده الحالة اسوأ من كدة
ياسادة ياكرام
استقيموا يرحمكم الله
*****
Xenga - 14/8/2013

Xenga - ياسادة ياكرام

كلمات ومونتاج وسرقة موسيقى : ياسين
تم التسجيل بالاوضة اللى على الشارع بجوار البلكونة بمايك معفن بعشة جنيه :D
*************

تقديرى فى الحياة مقبول
وده مايكفيش انى أحلم
بانى أعيش او حتى أكون
اكون ليكى حبيب مجنون
رحالة وياكى نلف الكون
ندوق العشق فتمطر سمانا
من الورد ألف شكل ولون
وده مش هروب منك
 بس هاعمل ايه
وتقديرى فى الحياة مقبول
تقديرى يادوب شغلنى فى الدنيا .. انا مبيعات
ابيع الحب لكل الخلق طول اليوم .. ولما ببات
اعذب نفسى بين حيرتى وجلد الذات
ودكتورى مانعنى ادوق لو حتى نقطة من اللذات
فيمكن اكون فيكى  شىء خيبان
لكن بالرغم من خيبتى هاعيش انسان
ولو ضاقت بيا على الآخر
ومن الآخر
مفيش احسن من الآخرة مكان
أنا انسان

ياسين - أنا مبيعات

كلمات : العبد لله :D
موسيقى : مسروقة من الموقع من هنا من واحد معرفوش :D
تم التسجيل من داخل تليفون سونى اه والمصحف زمبئولكم كدة :D
********************************
زى أغلب شباب جيلى
فكرت انى أنتحر كذا مرة
ويلا أهى تبقى موتة وكُفر بالمرة
كفر بالحضن اللى مجمعناش
بالأمل اللى راح ولا جاش
بنص الكوباية الفاضى
ضيعنا عمرنا عشان نملاه
 ومعرفناش
بلقمة عيش مش لاقينها
وفرحة فى الزحمة ناسينها
بمر حياه
وطعم الآه
وعروسة فى الشباك سهرانة
تشوفنى تجرى فرحانة
وتتكحل وتتجمل
 ومش فاهمة ومش عارفة
انى بينى وبينها جبال من نار 
هاعيش كافر بمبادؤكم
واموت مؤمن بأحلامى
بأشعارى
بأصحابى
 بفقر الحال
وبأنه محال
أعيش فيكى يومين تانى
وانت ياليبو قول لصحابى انى بودعهم
خليهم يزرونى فى قبرى ده لو هاوحشهم
قول لاخواتى هاسبق على فوق مستنيهم
ام الباقى
فلا هاشغلهم ولا هاوحشهم ولا حتى هيحسوا غيابى
وابقى احضرللى كتب كتابى
ارقصلى
هنى المعازيم على بابى
خلى عروستى تغنيلى حاجة من شعرى
وقبل ما تمشى ويا الزفة
 ترمى بوكيها وتنهى الحفلة .. ببحبك
ياحاضر ولانتش غايب
يا كل قرايب
يا كل الناس وأحلاهم
ياعقلى وروحى وكل حواسى وياهم
يا أحلى هتاف
فى ثورة حبى على النسيان
ولا تنساش .. توصفلى شكل أطفالى
طول الشعر .. لون العين .. ووصلوا لفين
واحكيلهم كتير عنى
 يمكن يحبونى .. فيدعولى
وادخل جنة بدل النار
ومين عارف ؟
ده ربك كريم غفار
♥♥♥

ياسين - هاعيش كافر

:D موسيقى موج البحر مسروقة من ليال وطفة
أول شاعر ألدغ فى مصر :D

ياسين - فى التفاصيل

ياسين - افتح بنموت

ياربنا لنا أحبة فقدناهم إليك ولا نملك إلا الدعاء لهم كما أمرتنا ربنا فاجمعنا بهم تحت ظل عرشك :)


Yassin Xenga

Popular tracks