قداش -
  صوت: يسر مشفر
نص: أمين ڨلّح

قداش لا عندك لا وعد ولا عندك كلمة 
وقداش منها الساق تعفس حافية عالجمرة 
وقداش مني نستنى فيك تحت حيط خايخ 
بارد سارد اكثر من جواجيك 
وقداش كرهتك ومزال عيني فيك 
وقداش عشقتك وهربت من مسة يديك 
وقداش اشتهيت نكذب عليك 
نسبلك عرق بلوتك لولاني الي سلسلني فيك 
وقداش منو الوقت الي قالو ينسي
والشكوى لسكات الليل وين بش ترصي 
وقداش الدمع نشح 
وقداش منها لغبينة والقلب لابس اكحل مافرح 
وقداش منو عمري وعرفو الي تهد 
وقداش ماحلاها الدنيا ومكش فيها 
تب اي نكذب ماو قالو الكذب ينجي والدنيا تربي الي نساها
قداش طويلة الدقيقة
وقداش باردة لمخدة 
وقداش من تصويرة في اللحظة تعمل بلعاني لا تتفسخ لا تتعدى 
ضيعت حسابي 
ونسيت ناسي وحبابي 
وغزرت بعين الشماتة لشبابي
ونسيت قداش عبيت من غزرتك عيون وجوابي 
ونسيت قداش كتبتلك "نحبك" بسكاتي الي تدفن في ترابي
قداش مانترباش ومانشعفش 
وقداش سكاتك مايرحمش
قداش من علاش 
وقداش منها عشقة ماتموتش وماتوفاش 
وقداش ماتكلش وماتعياش
وقداش ماعنديش كلمة ومانترباش

قداش - بقلم أمين ڨلّح- صوت يسر مشفر

- صوت يسر مشفر  -

نحن قريبون جداً، أيها الربّ،

قريبون وفي متناولكَ.

.

مخطوفون، أيها الربّ،

متمسّكون واحدنا بالآخر، كما لو

كان جسد كلِّ واحدٍ منّا

جسدكَ، أيها الربّ.

.

صلِّ، أيها الربّ،

وجِّه صلاتكَ إلينا،

نحن قريبون جداً.

.

لقد ذهبنا محنيين،

ذهبنا نميل

فوق البركة وفوق حفرة المياه.

.

ذهبنا الى المسقى، أيها الربّ.

.

كان ذلك دماً، كان

دماً ما سكبته، أيها الربّ.

.

كان يلمع

كان يعكس صورتكَ في عيوننا، أيها الربّ.

الفم والعينان فارغة وفاغرة، أيها الربّ.

.

لقد شربنا، أيها الرب.

شربنا الدم والصورة التي في الدم، أيها الرب.

.

صلِّ، أيها الرب.

نحن قريبون جداً.

باول سيلان

PaulCelan أيها_الرب مناجاة

- أيها الرب _ باول سيلان - صوت  يسر مشفر

نص :  اشراق معطر
 أداء صوت  : يسر مشفر
موسيقى  : ياسين عزيز

ما فهمتكش
حيرتني و ما نجمتكش
وين غبرت ما عوايدكش
توحّشتك, توحّشت حديثك و ضمارك الي ما يفارقكش
أما اسمع!! يمشيش في بالك نحبّك! لا راني ما نحبّكش
أما ما فهمتكش

و انا نحب نفهم كلّ شيّ
و ما نحبّ يخفى عليّ شيّ
و انت مالناس الّي تحكي كلّ شيّ
و ما تحكي حتّى شيّ
و غموضك الواضح يعذّبني عذاب الحيّ

انت ما تضوّيش
على أمورك ما تحكيش
المخبّي ما تورّيش
و عمخرك ما تهبّط فريش

و هذا الّي علّقني بيك
خلّاني نخمّم فيك
و نكتب عليك
على خاطر كي نتوحّشك ما نجّمش نجيك

اما انتِ تجيني
عمرك ما وحدي تخلّيني
ديما تجيني
و في همومي تنسّيني
ترسم الضّحكة على خدّي و تمسع الدّمعة من عيني
منّك عطشانة انا.. و انت مالشّهوة تسقيني
منّك جيعانة انا.. و انت مالحبّ ما تعطيني
و ديما تجيني

تجيني و عيني ما تشوفك
و وذني ما تسمع صوتك
و بدني ما يحسّ بوجودك
ديما تجيني

تجيني و ما نشمّ ريحتك البنينة
و ما تلمسني يدّك الحنينة
و لا نتهندملك و لا نعملّك زينة
على خاطر
تجيني في الخيال
انت وهم هبال
حقيقتك فال
ما تخطر على بال

إيجا.. أمان إيجا و يزّينا ماللّعب
إيجا نحكيو على هموم الشّعب
إيجا اتّكّى في شوني و نحكيو عالبلاد
و علّي عامل معاها الدّوني و هاززها للواد
إيجا العبلي بشعري و احكيلي عالثّورة و النّظام
و نتناقشو في السياسة و نتفرّجو عالأفلام

و إيجا

إيجا نشطحوا راقدين
و نتمايلو عالفرش زاهيين
و موش كان يدينا متشابكين
و توشوشلي كليمتين
بيهم نجنّح و نطير يسار و يمين
و نحفظ فيك و تحفظ فيّ كلّ شبرين
و نعبّيو البيت فلّ و ياسمين
و احنا ساهرين
من خمرة الغرام شاربين
و نباتو مصبّحين

و تدخل الشّمس مالشّباك
و نغير منها كي تجي بحذاك
و كي ترسم على بدنك نورها و نوّارها
نتّرما عليها و نقطعلها ادبارها

و نسكّر الشباك نخاف لا تقوم
و نعشق هواك مواتيك حتّى النّوم

و نحسبك وليدي
نبنّن عليك بيدي
و نحسبك محبوبي
نبوس جبينك العروبي

و كيف تصحى و تفيق
نعرفك توّ تمشي و ما تحبّ هالرّيق
أما إيجا بركَ شيّ ما يصير
إيجا نفرشلك زربيّة حرير

إيجا و ما يهمّكش
إيجا راني ما فهمتكش
حيرتني و ما نجمتكش
وين غبرت ما عوايدكش
توحّشتك, توحّشت حديثك و ضمارك الي ما يفارقكش
أما اسمع!! يمشيش في بالك نحبّك! لا راني ما نحبّكش

إيجا .. أما راني ما نحبكش - أداء صوت يسر مشفر

- نخاف -
 نص : سنية زيد
  أداء صوت : يسر مشفر
موسيقى : مهدي مشفر
نخاف منّك عليّ ، نخاف منّي عليك ، نخاف عليك ، نخاف تغيب عليّ تضيع 
نخاف نقدّم، نخمّم نجيك تدزّني بيديك ، ترميني تخلّيني وحدي نلوّج عليك
نخاف نبعد كلملح نذوب من قدّام عينيك ترميني بسهامك تنساني و تحرمني من سلامك
نخاف نقلّك توحٌشتك ما نسمع كان صوتي و أنفاسي و تجاوبني بسكاتك
نخاف نسكت يجرحني ملامك و تذبحني بشوك كلامك
نخاف نكتبلك تحرقلي أوراقي تنشرلي أسراري
تحكيلهم على خنّاري و قدّاش خنقتك و من حبّي تعاني
نخاف نصوّرلك ذاتك تسكّر عليّ بابك و شبابك حياتك
تبلّها التّصويره و تبزّع ماها عل عتبه و ترمي وراي ألف حجره و حجره
نخاف نبكي تقول عليّ ممثّله و نحبّ نسخّف الغير و نوّلّي كيفي كيف الطّفل الصّغير
نخاف نضحك نولّي حجره في عينيك ، نولّي ثلجه و لعبت بيك ، لا خمّمت فيك لا نهار حبّيت
نخاف نرقد و غدوه نلقاك عليّ مشيت
نخاف نسهر و حياتي عليّ تضيع
نخاف نكبّش نخنقك نقتلك نفدّدك و بيدي نكتب إخرّ كلمه في الحكايه و تولّي غريب
نخاف نسلّم نأيّس نعدّي ندوّر الصّفحه يتحرق لكتاب يولّي رماد يهزّو الرّيح
نخاف نخاف و نهدّ الّي بنيتو سنين
نخاف ما نخافش و حقيقتك تقتلني و برودك يحرق لكنين
نخاف منّك ، نخاف منّي ، نخاف من النّسمه إلّي تمسّح على شوافر عينيك
مالغنايه إلّي تدغدغ وذنيك ،
مالدّنيا إلّي عاكستني و خلّاتني بعيده عليك
نخاف من قلبك ،من دقّاتو نخاف لا نهار ما يعقلينش
نخاف لا تطلع ما تحبّنيش ...

نخاف - نص : سنية زيد - أداء صوت : يسر مشفر

- نرجعلك - 
 أداء صوت :يسر مشفر
نص :أمين ڨلح

نرجعلك 
كي الفرططو الي غنى عليه عم الهادي 
 مشتاق لحضنك عليه نفركس نلاجي وندادي
نرجعلك 
ونخيرك على ناسي وأماليا وأكبادي
ومن عيون حسادي  ونخبيك من هواهم وجفاهم 
نرجعلك 
على غرادة ومش بلعاني 
كي هاك الغزرة الزعبانة إلي ترميهالي كل ما تراني 
 كيف الوقت إلي يجري شامت ما ستناني
نرجعلك 
كي الڨمرة إلي تطل ليلة النص 
كي الزنزانة إلي تبلي وما تتحس 
 كي شيخة في الروح بعد كميتين وربع نفس
نرجعلك 
كي تنهيدة الشاقي بعد ما صبر 
كي التنعويشة بعد تبخنيس لمطر 
 كي الهايم المستاحش وكرو بعد ثنية سفر
نرجعلك 
 كيف ما ترجعلك هاك الشهوة المنسية 
كي الحشمة على خدود طفلة صبية تربيتها زمنية 
 كي النسمة محاذية ياسمينة تتسيب عقاب لعشية
نرجعلك 
في الشدة كيف شاهد لعقل 
كي الرزانة بعد ما لكنين عليك ضبع وفيك وحل 
كي وحلة ممحون بيك يستخايل روحو إرتاح منك وهو بيك زاد هبل 
 كيف ما تتلم المشاكل ومفما كان انتي الحل
نرجعلك 
كي الضحكة لمعششة في ممو عينيك 
كي الفرحة إلي مكفنتها في وسط جواجيك
كي الخمسة والريحانة إلي يزينو حواليك
 كي لرض المتسلطنة بمشيتك وانت راشقة فيها ساقيك
نرجعلك 
وأنا ساكن فيك ... 
كل ما تبعد نفطن بروحي مزلت نرجى فيك  ...
نرجعلك 
يلعن بلوتي بيك كي تفكرني فيك ... 
نعن والديك شمرجعك وشمرجعني نبربش عليك ...

نرجعلك - نص :أمين ڨلح/ أداء صوت :يسر مشفر

- انا مرا -
 اداء صوت : يسر مشفر

سيّدي العزيز ..

كان تعرف روحك مغلّڨ ...

و المرا عندك مهما كِبرِتْ و نِجحِتْ ما عندها وين تطير و تحلّق ...

خوذها منّي قبل ما بشباكي تتعلق ...

آنا مرا لا نصلح بيك و لا بلّي كيفك...

ما تتفجعش.. مانيش خايبة ولا دونية..

أما صعيبة و ما نرضاش بالراجل إلي يعامل المرا بمحقرانية..

آنا نتععب و ياسر نتقلّب.. ما تنساش السيكل و الهرمونات الأنثوية .

آنا مرا في حبسي حرة.. و حتى كي نحتار ما نخلي حتا حد في بلاصتي يختار..

آنا نسمع، و نقدر، و ناخو بالخاطر.. أما نناقش ، و نرفض ، و كلمة لا عندي كي شربة الماء..

آنا كيما بقية النساء.. حبيت ، و نحب ، و مازلت بش نحب ، أما كي نقول وفا معناها وفا..

و مانيش كيما برشا نساء.. خاطر عندي مع الكوجينة و حوستها .. و عندي زادة مع المكتبات و دوختها ..

إي نعم .. آنا مرا تقرا الكتب و تكتب الروايات .. رغم عصر السرعة و التكنولوجيات ..

و الحمد لله مخّي ما فيهش كان عروض الأزياء و الموضة و الحجّامات ..

آنا من النساء الي على قدّ لهوِتها بزينتها .. على قدّ ماهي لاهية بثقافتها ..

آنا تولدت و تربيت على يدين مرا صبورة و قوية ، و حتى كي نطيح ، نجي واقفة على ساقيا..

آنا نرفض الظلم و القهر و الهيمنة على المرا بآسم الرجولية..

آنا نهزك ل العين و نروح بيك عطشان..

نوصلك ل البحر ، و نخليك تعوم في الشايح..

آنا مرا على قد ما تعشق و تحترم " الراجل ".. على قد ما تعتبرو في حياتها حاجة " إضافية " موش " ضرورية "..

... يعني كان ما لقاتش إلّي يصلح بيها .. لا الدّنيا توفا و لا ترضى بأقل ملّي تستحق ..

... ما تولدتش هكّا.. أما التجارب إلي عشتها و العباد إلي عرفتها

علمتني إنّي بش نعيش واقفة على ساقيّا و بش الدنيا ما تطيحش بيّا

.. لازمني نكون ذكية و قوية و عندي ياسر أفكار شيطانية..

انا مرا  - اداء صوت:  يسر مشفر / نص: اميمة القروي

- و شيء- 
  اداء صوت :يسر مشفر
نص:  خديجه بكوش

Yosr Machfar

Popular tracks