تبغى الحقيقة يا ابيض الوجه مليت
ونفسي تزايد يا السنافي غضبها

حاولت أعدّي ماجرا لكن ازريت
لا جيت اطفّي نار، شبوا لهبها

سكت .. حتى في سكوتي تماديت
احسب امورٍ غيرنا، ما حسبها!

لين اكتشفت ان الرخوم الهفاليت
اما خزمت خشومها؛ قل ادبها!

وقمت اتقصّى دروبهم لين طبّيت
بـ اسم الوضيع اللي علينا جلبها

كنت احسب انه عزوتي لاتعزويت
اثر البنادق قفشها في عربها

اقرب من الدّله لامنّي تقهويت
ربعه جنبنا مختلط مع جنبها

من روس قومٍ بالملاقا شفاليت
لا ثارت الهيجاء تزايد طربها

لكن توالي النار كومة فتافيت
رمادةٍ ما سرّت اللي حطبها

جاني سقيطتهم ملقب يابلفيت
في نبتةٍ ما طاح منها رطبها

ورسمت له خطه تحتها ديناميت
وقدمت له بنت الضياع؛ وخطبها

ويوم اكتشفت اسمه عن "اللاش" صديت
يمناي مهما كان، ما اقطع عصبها!

ماهو بعيبٍ لا ارتفعت وتساميت
العيب تنزيل الدقون وشنبها!

والله! لولا شيمة اللي لهم صيت
يالرخوم كاشفها لـ اخيّب تعبها

لكن عشان الرجال تعفى سرابيت
عند الرجال اللي رفيعٍ نسبها

ياحويت عن سرد القصيدة، خذ البيت
يمكن تعرف السالفه وش سببها ..

ماماتت الشجرة من الفاس ياحويت
اللي ذبحها، إن العصا "من حطبها!"

#جايز_جزاء_الحربي

جايز جزاء الحربي

فرحت لك وأنا معاليقي حطام
والصدر من ما فيه بيّح كنينه

فرحة يتيمٍ ليلة العيد ما نام !
خالاته وخواله مواعدينه

مواعدينه بشت وشماغ بسّام
ويلّعبونه في ملاهي المدينة 

مانام وأحلامه تحّراه قدّام
كنه يطول أحلامه بـ( راحتينـه ) !

صبحه تجّلا نـوره بـ/ عيـد الإسلام
وقبل يروح المسجد ملّبسينه


جده ما بين العين والجيم واللام
خلّيه يافلانة ولا تأخرينه !

تراقبه بعيونها حب وهيام
وعيونها ممّا تكنّه حزينه

"يعرض لها الماضي مثل عرض الافلام "
لماضي ابوه وغلاه وحنينه 

يرجيه لـ( سنين القسـا ) درع وحزام 
وجنـب ٍ علـى صكات بقعا يعينه 

أبو ثلاث أعوام والّا 4 أعوام 
يغار منه البدر.. من كثر زينه 

صلّى وجاء وأمر الله اللي قضى تـآم
ماهوب داري عنه.. زينه وشينه

بشته عليه مهنـدم ٍ خير هندام 
واللي بعمره كلهم محترينه

يوم اطلعوا للشارع أنقسموا أقسام 
وأهم مافي القصّة ملّعبينه

تداعب رموشه ذعاذيع الانسـام
ويابردها يـوم آيبست شفّتينّه

وعلى تراب الأرض بأصبعه رسّام
أمّا رسـم لـه طيـر .. والا سفينه

العيد طعمه كان في الشارع العّام
ماهوب عن رغباته مقيدينه

رجع ولكن فرحته ضايعه (دام
كل ٍ مشى ) واخذ ولده بـيمينه

صاروا خواله في نظر عينه أصنام 
آحيـوا بـ.. داخله الجروح الدفينه

ولا عنده الّا امه وناب القهر سّام
جاها يبي منها اليدين الأمينه

شعوره اللي حس به مثل الإلهام 
وأول سؤال في باله : أبـوي وينـه ؟

سؤال : لكن كان مثل النبا الهّام
لازال باقي في المسامع رنينـه

جته تعدي ماهو تخّطي بالاقدام
وشالته بيديها وحبّت جبينه

أبوك : جاء البارح وقبل الفجر قام 
وشرى لك ألعاب وهدايا ثمينه

تراه حبّك وأنت غارق في الأحلام 
وراح لدوامه والشغل مرسلينه 

لحظه وهو بين الحقايق والأوهام 
والدمع الأزرق حاير فمقلتينه

يمّـه : ترى مانمت والعالم نيام
ماجاء.. ولا لمست يديني يدينه 

مادام رقمه معك من بين الأرقام 
بأكلمه يوم إنك تكلمينه!

طاحت ما كن آلها من الصدمة عظام 
ولاعاد فيها صبر ولا سكينه 

قالت بدون شعور وإدراك وإلمام
أبوك في تراب القبر دافنينه..

العام مات ومتّ من موته العام 
وكنّي بعد مامات عني سجينه 

أبوك جنـديع للوطن ضد الإجرام
عطاك عمره دون داره ودينه

تفجّرت من تحت رجلينه ألغام
ولاعاد لي بعده حصون ٍ حصينـه

بكّت .. وطاح الدمع من حر الآلآم
وبكى وطاح الكون من موق عينه 

كل ٍ عذلها بين عاتب ولوّام
تصّبري خلّي ضلوعك متينه

ماهو صحيح ان الضروره لها أحكام 
أكبر خطأ يوم إنك تعلمينه 

بكره تنسّيه الليالي والأيام 
هو فيه أحد ينسى حدا والدينه ؟

طير السعد في عالمه مابعد حام
والله يعلم وش تخبي سنينه 

أنا كذا؛ ساكت، وصابر، ومنضام
لكن كان الفرق بيني وبينه

الدمع لعيون الأرامل والايتام
ودمع الرجل ذل وهـوان وغبينه

#مشعان_البرّاق

مشعان البراق - دمعة يتيم

البارحه تحتريك النّود
‏يا مدّله النّود .. للمسرى

‏عيّنت قلبي قليل الفود
‏مالي خبر فيه، وأنت أدرى

‏إليا تذكرك زاد لهود
‏وان سجّ في سيرتك هذرى

‏وان غبت ماكن احد موجود
‏لله! ولا كن احد يطرى

وان جيت .. يمّي رقيت سنود
‏والساعة اللي ماهي قشرى

‏هيّف على قلبي الملهود
‏إن مابرى منك! مايبرى ..

#مساعد_الرشيدي

البارحة تحتريك النود - مساعد الرشيدي

ياللي تزّعل وانا ماني بغلطان
خلك على راحتك واللي تبي سوّه 

لا ترفع الخشم يوم انك تعداني
والله لتبطي! وانا ما قلت لك قوّة

ان كان قصدك عبث ودّك تحدّاني؟
فأبشر بقلبٍ على الصدّات يا قوّة

نسيت يومك بعزّ الحب تجفاني؟
أقفيت لا جابتك غيرة ولا مروّة

يومك تلذّذ بتعذيبي وحرماني
وان جيت تلقى حبيبك منقلب جوّة

ان قلت وينك حياتي؟ قلت لي كاني
يا نار هالقلب من كاني ويا ضوّة

ان كان جت غلطةٍ وحدة من لساني
الواجب انك تطوّفها من الخوّة

لكن .. على راحتك، واليوم صحّاني
أسلوبك اللي تغيّر للأسف توّة

تكفى .. على هالزعل خلّك على شاني
عشان تبطي وانا ما قلت لك قوّة

#حمد_السعيد

ياللي تزعل - حمد السعيد

ليت اللّيالي تقدّر غُربة السّاري

هَلا

Popular tracks