الــكــلــمــات : 

أنتِ نجمة وحيدة مُضيئة بين ملايين النجوم 
بيحاولوا يطفوا نورك و نورك للأبد هيدوم 
برجوكي تحفظي نورك حتي لو ملوكي هموم 
أنتِ آخر أمل ليا في عالم مبشوفش فيه النور

متطلعيش بره الوحده بعد م حبيتيها 
متكسريش بخاطر قلبي قبل م تخسريها 
صدقيني رجوعك ليها شئ أكيد لو حسبتيها
بس عشمك في ناس خذلاكي خلاكي تلزميها

سحابة واقفه وسط كوم من السحاب ماشي 
هي وحيده بتمطر و باقي السحاب مش داري 
لا مطرت جنبها سحابة ولا حتي وقفت تواسي
هخرج من محنتي بنفسي و لو آخر نفس ف حياتي

ليه طفوكي و طفوا معاكي آخر أمل جوايه 
لما نصحتك تحبي الوحده ليه مسمعتيش حُكاية
قتلوا فيكي النور اللي كان قادر ينور سماية
فديتيني فداهم و فديتك منهم في سبيل الهداية

لو أنتِ الحَيَاة في آخر نجمة في الكون 
فالموت أفضلي من عيشه فيها نفسي بتهون 
ألف واحده ف ألف زمن ، و أنتِ زي م أنتِ 
ألف عيشه ف ألف سَكَن و طَبيعتِك غير طَبيعتي

إنهياري داخلي مش هيبانلك من بره 
مش هتقدر ضعفي و أنت شادد من البودرة 
حياتي ف زمن مختلف عن حياة سعادتك
لو مأساتي ف حب دنيا هموت بعد م أساعدك

فاكرة علاجي في كوني مُدمن و أنتِ مصحّة
لأ فوقي أنتِ قبري و أنا ثابت يمكن بنصحها
هبعد وقت م هفقد أملي فيكي صدقيني 
ليه جواكي ريحة خوفي فوق تُراب غيّم عليكي

كنت قادر أوصف حالي في كُنّا شخص واحد 
لإن اللي بينّا أقل من كونك شخص متواجد 
الحرفة حرفة صُنع و حِرفتك أحرّف حِرفة 
تقدري تصتنعي شخص و تبقي فعلاً زايفه

صدقني هحب حُبه لما حُبه يحب حُبي 
مش هحب الشخص اللي حبه لشخص أدي 
الحُب ميزة مش كل الناس تقدر توصلها
علشان توصل لازم حُبك ليها يبعد عن جسمها

قدامك رسمة واضحة بين سطور من الكلام 
واحده واحده هتبقي شِبه وهم من ضلام
إنسي إنها تفضل لوحة مليانة بالألوان 
كل لوحة فيها لون إسود لو ركزت هيبان

لوحدي بغرق في وسط بحر كُره الحياة
مسكت ف ورقة من شجرة فكرتها طوق نجاة
هربت بسرعة مني ، معرفتش من أي إتجاه
فجأة لقيت باقي الورق واقع و الموت مرساة

E3gaz Elwaqi3

Vocals: Youssef Anwer 
Lyrics: Youssef Anwer 
Music: Sad Guitar Rap Instrumental [Hip Hop Beat] 2015 - Lonely
Master&Mix: ArDevel
©2016 Youssef Anwer

E3gaz Elwaqi3 I إعجاز الواقع

Title : Bedayt Nehaya | بداية نهاية
Vocals: Youssef Anwer 
Lyrics: Youssef Anwer 
Music : Instrumental Sad Piano | Emotional | Prod. Tower Beatz
Master&Mix : Ahmed Mano / Youssef Anwer
©2016 Youssef Anwer

الــكــلــمــات :
 
كان عنده تسع سنين لما بدأ يفهم حياته 
فهم إنه مش مسموع و محدش بيقدر كلامه 
كان محتاج للي يحس بيه قبل م يفهمه 
بس محدش حس و الحجه ف صُغر سنه

سن بلوغه عدي و بيعاني من نفس مشاكله 
فكر يتماشي مع الناس و بدأ يطلع من جحرة
علم نفسه بنفسه و محدش كان فاضي يساعده 
لما بقي حاسس إنه قادر يفضفض مع ضلُّه

صحابه اللي مختارهمش كانوا دايما بيشدوه 
كان في الغالب بيعافر بس المرة دي خدوه 
راحوا مكان كان فاكره و قبل م يخرج نسوه 
كان نادم ع فعله لكنه بيقول محدش خالي ذنوب

صحي من نومه بعد غياب أكتر من شهرين 
إتفاجئ بحالته لما حسّ إنه نايم من يومين 
غيبوبة بتحتمل الموت بس نجاته لحكمة ربه 
لقي نفسه مبينطقش و كمان فاقد بصره

الخطوة في طريق الشر صدقني متستهونهاش 
غيرك خد الخطوة قال محدش مبياخدهاش 
ربنا برحمته بيحاسب لكن أوقات لازم تفوق 
لو الفكرة بتحيا ف ذهنك إقتلها قبل م تموت (+١)

رجع من المستشفي لما حسّ إنه حمل تقيل 
قاعد ف البيت الضلمة متحاوط بأفكار بتزيل 
حيطان بناها لنفسه لما كان قادر ع الحمل يشيل 
إتقتل جواه طموح مقتول في كل الجيل

مبقاش قادر ع العيشه بحاسة الإحساس 
ساعتها عرف سبب القسوة في نفوس الناس 
بؤسه إتحول لعادة بيجيله علي هيئة وسواس
أتعس شئ ف الدنيا إنك تموت حي بمقياس

عقله إختل و مش عارف إيه يختار 
يكمل حياته ببؤسه ولا يفضّل الإنتحار 
فترة كبيرة عدت فجأة إفتكر أفكار زمان 
لما فِكرة كان مُختلف حسّ إنه فعلاً ندمان

بدأ يخرج من دايرة خوفه و إتحمس للحرب 
صراع ما بينه و بين نفسه هيغيرله الدرب
إستقوي بقربه من ربه و إتخلص م الكرب
الدنيا بتتحدي اللي ناقضها بعصيان الرب

دعي من قلبه و ربنا إستجاب لدعائه بالشفاء 
فتح عينه في عين أمه كانت فرحتها مُقلقة 
عرفت إنه مبينطقش لكنه شفي من العمي
يقدر يستمتع بحياته و يحرر نفسه م البُكا

الخطوة في طريق الشر صدقني متستهونهاش 
غيرك خد الخطوة قال محدش مبياخدهاش 
ربنا برحمته بيحاسب لكن أوقات لازم تفوق 
لو الفكرة بتحيا ف ذهنك إقتلها قبل م تموت (+١)

إتخرّج من الجامعة بإمتياز و إتعيّن في وظيفة 
كان كل أمله ينسي أهله اللي عمله بالبيسه 
حججهم في بيت الله و حياتهم مبقتش تعيسه 
أجمل شئ في الدنيا إنك تبني حياة سعيدة

قابل كونتيسا في سفره و كان مُغرم بجمالها 
قال لنفسه : أنا أبعد من المُشتري في خيالها 
إفتكر صراعه مع المرض لما غلبه و حسمها 
هيتحدي العالم لمُجرد كونه أد جوزها

منحوتة في صورة جواه شايفها كل لحظة يأس
فاكر دايماً مش ناسي اللي حصله و بس
كوّن نفسه بنفسه و إتحدي الكون ده بأسره 
إتجوّز كونتيسا نبيلة رغم وجود إعاقتة

نجاحك مش مُقتصر علي بداية طريق و نهايته
إبدأ في طريق مُختلف و إبعد عن خط إنطلاقته 
إمشي في طُرُق الصح و إمنع نفسك من الثبات 
متجريش في طُرُق الغلط و إتعلم من أخطاء اللي مات

Bedayt Nehaya | بداية نهاية

أغنية رواية متتجسدش - إنعكاس عاكس ليوسف أنور و محمود أنور 

إهداء لـ Mohammed Samer 
الكــلــمــات : 

راسمك علي الحيطان بلون يبانلهم بهتان 
إنعكاس الرسمة في عنيهم خلي راسمها يتهان 
مش هيشوفوا إن أنتِ إعجاز غير بعد فوات الآوان 
هستحمل وجع بديته لكونِك مش لغير الإنسان 

كنتِ كبحر و أنا قارب سارح في حُضني الأمل 
خدتيني لدنيا مُنعزلة عن وشوش جميع البشر 
قولتيلي هكونلك الدنيا و هقتل يأسك الماضي 
هبعد عنك التفكير في بُعد كان زمان قاضي

شايف حروفك طايرة في السما بتغني علي لحن الأوتار
بآلآت خيال عازفها مأدركش حدود للجمال
رؤية جمالك صعبة علي شخص محدود الخيال 
صدقيني مُستحيل وصفك علي كاتب من الفِحال

بصي لنفسك في المياه و هى ساكنه و هاديه 
إنعكاس عنيكى في عنيكى خفي القمر ف ثانية 
إزاى هيشوفك أجمل و يفضل مكانه ثابت 
الجميل فيه أجمل منه بس أنت الأجمل بكيانك

بكلم ربنا عنك و بسيبلك في السما جوابات 
لعله يستجيب لدعائي و نعيش ننسي اللى فات 
يقينى غلب شك إن أنت إنسانه مثالية 
نبض قلبي عزف ألحانك بأعظم آلآت موسيقية

إتخلقتي فيا مولود فـ فضلت بيكي موجود
عيشت فيكي موجوع فـ صنعتي لوجعي سدود 
بتنفس وجودك فيا وأن خروجك بداية موت 
بقوي بحماكي ليا زي قلبي في كهف محطوت

موصفكيش قلمي يا ساكنة دمى
ميعبكيش إن أنتي علاج لألمي ( ×٢ ) 

حُضن بيهديني في وقت م ببقي محتاجلك 
نَفسي بترازيني في وجودك لبعدي عنك 
بصنع لنفسي المرسي اللي يحفظني جواكي 
و أجري فيه بقلبي لحد م تتقطع أنفاسي

حبيبتى ، اللي قاعدة علي كرسي الملكة مش أنتِ 
جميلتي ، في قلعة عظيمة و قمر حارس مدينتي
بأؤمن بالمعجزات لإنك طرف من أطرافها 
تأكدي إني في ثبات يا وردة مستحيل أقطفها

وعد أكون معاكي و نَفَسي واخده هواكي 
إذا كان للمرادِ جهاد سأجاهد لحماكي 
ريحانه تسكن في حديقة تتميز برائحتها 
فتبُث عبير الحب لمن يشتاق لزفيرها

متفكيش إيدك من إيدي رقصتنا مخلصتش 
هكسر حاجز نهايتنا لنهاية بقدر ميعذبش
موتي و موتك ده بداية لتخليد رواية متجسدتش 
حقيقة شخصي و شخصك سبق لكمال منقصش

موصفكيش قلمي يا ساكنة دمي 
ميعبكيش إن أنتِ علاج لألمي ( ×٢ ) 


في قربك كنت أتمني الكون يشهد علينا 
في بعدك كنت أستني لقاء تاني لعنينا 
سأعافر في وسط الأمواج لأخوض معركتي الأخيرة 
سأصل إلي المراد و أعانق سيدتي الأميرة 

Title : رواية متتجسدش ( إنعكاس عاكس ) 
Vocals: Youssef Anwer Ft Mahmoud Anwer
Lyrics: Youssef Anwer 
Music : 'Regrets' Emotional Thoughtful Hip Hop Rap Beat Instrumental (Prod. Contrary & Feelo) 
Master&Mix : Youssef Anwer
@ 2017 Youssef Anwer

رواية متتجسدش - ( إنعكاس عاكس ) | Rewaya Mattgsdsh

الــكــلــمــات :

براكين بتثور جوايا من الغضب بتقولك روحي 
لا ليا عندك وعد ولا قلبك هيداوي جروحي 
كاسك كسرته بإيدي لما شربته لتاني مرّة 
+2 و التالتة فوقت عارف نكهته المُرّة

أمد إيدي للنسيان بسهولة صافحني الحنين 
بتألم عدد دقاتك لما سقيتك الفرح نيكوتين 
شاعر مش قادر أوصفك .. هرسم حقيفتك بعد م أهدمك
بستنزف كلمات تقتلك  كاتب في الماضي إحتاجتلك

إستنيت رجوعك أكتر من غيابك عنى بمراحل 
هتيجي بندم هتهونى عليا مش هقرب لراحل
كلامي معاكي مش عتاب و سكوتي لأ مش عذاب 
إنسحابي كان في وقت إكتشافي لجزء من السراب

هتفارقي ؟ مش همسك فيكى بقلبي هحله 
اللي خرج من حياتي مش هيتبعه غير بس ضله 
مش أنا ، الشخص اللي بيكى يعيش من غيرك يموت 
أنا شخص حبك بس إتنفست جرحك ف بدأت أفوق

و كأن فيكي ملامح بوعد سلام لخراب الأرض 
بس الحقيقة وعد سلام لوداعي في صمت بفرض 
كوني هموت بعاني من بعد بُعد بطلة روايتي بفترة 
لكني بروي بعد إنتصار نفسي ف حربك ثمرة (+١)


أبعد فترة ، أرجع فترة ، أفتح باب ، تقفل عشرة 
أنزل درجة ، أمشي خطوة ، أبني حجرة ، تهد الحجرة 
أصنع بكرة ، تفتح ذكري ، تفسد يومنا و تحرق بكرة 
أداوي آلمنا ، بعشم ف الجنة ، أقول هتعقل ، تنفي الفكرة

بلاقي في عز وحدتى سكون و راحه في العزلة 
أفضل من نفاق في عيون بشر بيكرهولك الجنة 
بزيد في الهم لما بكون محتاج لـنَفس بتصبَّر 
بس عذراً مش موجود كونياً شخص ليأسي بيقدَّر

هدوئي في عز حربك ده مش معناه الإستسلام
كان وجودي جنبك شبه عشم في كتير من الأوهام 
كل شئ عيشته عدي إتحول ماضي في ذكريات 
إلا إنكسار قلب حي ، حاضر ثابت حتي الممات

همى شكيته لورقي جتلي نارك حرقته 
ألمي زود لهيب النار  بإشتعال أوراق صحته 
قرب شرك لطرف خيرى بداية للهزيمة 
إبعدي بسرعة و إهربي الخير بيولد الأميرة

و كأن فيكي ملامح بوعد سلام لخراب الأرض 
بس الحقيقة وعد سلام لوداعي في صمت بفرض 
كوني هموت بعاني من بعد بُعد بطلة روايتي بفترة 
لكني بروي بعد إنتصار نفسي ف حربك ثمرة (+١)

عمرك م هتكوني كجنس  نصي التاني بالعكس 
إسمعيها نصي التاني كتابتي و نصي الأول عقل 
إختياري لحوا مش مسير منك عليكي و بس
مش هدرس تاني منهج أخره سحابة بتمطر جهل

لما طلبتي إني أبني سفينتك .. بنيتها جفيتي 
لما حطمت بعزمي سفينتك .. نزلتي كمطر في بحيرتي 
عايزاني أعيشلك ؟ عيشت فيكي شبت ده إحدي معاني الكبت 
موتي فيكي مكانش الحب ده  أنا حرفيا مت

مش شايف قربي ليكي مكسب ولا في بعدك خسارة
حبل وصلك بيا سيبته وقعتي فهمتي إنك غدارة
عشانى الشمس إتحرقت سيبتها إتغزلت في القمر 
محستش الفكرة ساذجة غير لما عاشرة القدر

أنا التنهيدة اللي في كل مرة تخرج منك بعد خيبتك 
لما تعبتي إتحميتي في شجرة ضلها كان جزء من طيبتي 
فهمتي ؟ إني ساعدتك و برغم كل حاجه بينا خسرتي 
هبيع بايع مباعليش مشاعر علي أد ما إديتلك

رواية كاتبها في عذاب دايم طاغي علي سطورة 
بتقرأ فيها بقلبك ، مع فقدان إستيعاب لميوله
هو أنا ، أنت هم إجتمعتوا في وصفي ليك
همك مسّ طَرّف ألمي حسيت بوهم ماضيك (+١)


بعد م نزل المطر حضنت الوتر .. ملعونه 
لكنه وتر بقسوته إتقطع لحن بعزفهوله 
لما قولت بصي لنفسك متوقعتش إنك تنسيني 
 بقولك حاربي بؤسك لو قدرتي تاني تجرحيني

Title : وعد سلام | Wa3d Salam
Vocals: Youssef Anwer 
Lyrics: Youssef Anwer 
Music : De FROiZ - Insomnia [ BEATS
Master&Mix : Youssef Anwer
@ 2017 Youssef Anwer

وعد سلام | Wa3d Salam

Title : 7agez EL 7orya | حاجز الحرية
Vocals: Youssef Anwer 
Lyrics: Youssef Anwer 
Music : Sad Piano Violin Rap Hip Hop Beat[WalidossBeatZ] 
Master&Mix : Youssef Anwer
@ 2017 Youssef Anwer

الــكــلــمــات : 

أنا عارف إني ياما إتنهدت ضعفك بصبر 
بس وقت القوة نسيتى كوننا مربوطين ببعض
دوستى علي الشخص اللي كان بيعافر فيكى و مل 
و لسه هتيجى ع اللي يحاول يدورلك علي حل 

بعدي عنك كان مراد سعيت إني أوصل ليه
لكن حبي ليكى معاصر حتى قلبى حجزتى عليه
قوليلي لحد إمتى هفضل متقيد  وسط البحر 
لا عارف أهرب منك أغرق ولا قادر أعيش ف قهر 

إمتى هتكونى الشجرة اللي بتضطر المار يرويها 
ولا خدتي خلاص ع الموت بعد أول قطفة إتقطفتيها
الحرية واقع متقيد في ظل نظام ظاهر العكس 
أنت لو إنسان بالمعنى مكنتش تقتل إنسان باليأس

أنت مش شخص عادي أنت شخصك ماسك هادي 
نقطة بُعد بينكوا مهيئالي كونك جحيم بشكل تاني
 مش عيب فيهم ولا ميزة منك العبرة في كون اللي زي ضدك
خوفك منا مش هيظهر إلا  بكبت فينا و مش بيدك 

الحُر هيفضل حُر مهما شبع حتى أو جاع 
و العبد فيكم هيفضل عبد مهما شبع أوجاع 
و كأنك إتولدتي يا بلدي كهل من رحم العدم 
لا قادر أوصفنى كأهل ولا قادر أوصفك كوطن 

متطلقوش رصاص ضحية لتهمة إنتوا إرتكبتوها 
بيتها ف السما  من إزاز لكن إنتوا اللي كسرتوها 
علاقتنا زي إتنين ما بينهم حاجز من فولاز 
لا هما ببُعد يقطع أمل ولا بقرب يخدش إزاز

بصيت للسما ف سكون ، إمتي هتفهم كل العقول 
نزل عليا الندا بيقول ، أنتوا عتمة في وميض النجوم 
العكس كان ممكن يبقي ، لو كنتوا إتبعتوا الفطرة 
قولت ما يمكن دى فطرتنا ، رد بفكرك مش هتغير بكرة

و كأنني أنظر من عالم موازي و أسرد حديثي لنجمة لترسلة إلي العالم الآخر في  موقعنا علي كوكب الأرض هذا المرسال يحتوي علي عبارة في إعتقادي أنها الحل الوحيد للخروج من التيار الأسوء علي الأرض ..
"إذا كان هناك أمل فإنه يكمن في العامة" 

قضية .. محتاجة كم طُرق نقدية 
لو تصارع بين طرفين هتتحل بعنصرية 
العدالة بتصرخ جوايا : مفيش مساواة بين الناس 
لو كل سطر مش هيعبر  كفاية نبرة بإحساس


الموت محظوظ ببنود بتأهله إنه ياخد الحق 
لكن الحياة مرساه و منتهاه و دوره فيها إتفض 
شاور من بعيد علي شخص و قول أمثاله السبب 
حاور نفسك ف المراية و قول ده و أمثاله الأتب


جهل ظلم فقر ذل نقص عقل أنتج شاب كهل 
شر شخص شد شعب لمر واقع شئ مش سهل
 هم شايله أخ فاقده مع أمل بالرجوع
وهم عايشه في فكر عارفه لمجتمع مريض بالخشوع

خضوع بعض الجموع لمخرج حرك فيهم دور الشروع 
في تفسير منزوع حقيقته يغمي فقراء عن قضية الجوع 
الحرية علشان أعيش مش بعيش علشان حرية ، هموت 
بس التابوت هدية لكونكم جمود في بيوت من غير صوت


الفرض مش إجبار بدون دافع لمعرفة المغزي 
دي بداية المشوار لفهم بعض أسباب النكسة 
كل نفس هتدوق الموت لكن البعض بيدوق الحياة 
قايضوني بتاريخ أجدادي مقابل حرية بمساواة

السهل هو الجهل لو  مرض علاجة الصعب 
أنت لو خارج عن القطيع هيشدوك بأقل ذنب 
مربوط الفقر بيهم بس دايما فاكرينه إبتلاء 
القدرة لسه في إيديهم لكن الجهل بيولد غباء

المُخطيء بيخرج نفسه من خطيئة معصية إرتكبها
المُجرم بيصدق نفسه بإقتناع لجريمة إفتعلــها
العالم بيبرأ قلمة من بعد وصية إخترعها 
العامة بينفذوا عامة بيملوا خانة أذكاهم إكتشفها

شاربين الكأس للآخر ، و هم بيشربوا ف التُت 
فلسطين لساها بتعافر ، و إحنا بنطوّح م الشُرب

7agez EL 7orya | حاجز الحرية

الــكــلــمــات : 
الكون بكل قسوة مضالي علي عقد فصل 
التعايش واقعياً ضعف القوة هي العزل 
البحر لو قيّم مكانتش داست عليه السفن 
الملك لو كان عظيم كان خلّد مكانش إتدفن

لكل اللي في عنيك كبير كبوة تهد صورته 
الشجر يبان جميل بس التفاحة ظهرت خبثه
الموت قدرنا بنسيب آثارنا و ناخد أفعالنا 
القدر فرضنا في زيف عزلنا عن ناس في حالنا 
 عاشرنا العتمة 

إحساس بقرب موت الشغف ، خلق يقين بالهم
ل حين إنقراض الأدب ، ممنعش الإحساس بالذنب
خروجنا عن التصنيف تقصير مينفيش وجود العلم 
لكن بواقي الفكر مَمَر لسَرّد حقيقة بشكل مُلِم

مش هتقربيني بتفاهه فكريّة حتي لو ضحية 
لمجتمع كل همه سخريّة من ثقافة هي المُنجيّة 
قطيع سائد خروجك منه مش هيكون بالساهل 
متخذلنيش و عارف كونك هتقطعي الحبل الواصل 

عايشين بقناع الدين 
فاهمين إننا خالدين 
هنصلح فكر مُعطل ، إزاي و إحنا بنتمادي 
هنعالج فكر مُسرطن ، بالعقل و بالإرادة


النور في آخر طريق العتمة عمرهم كان وصول 
ده حلم بيتحرق م أنت عيشتك بس خمول 
متعشم ليه و واهم نفسك و أنت متستحقش
فكر ف إنجازاتك و إبني قبل م تسمع مندمتش ؟

نوع فني تصنيفه متدني هيأذي إبني 
طول م فيه تمويل للهلس هيطرح مُنتج سلبي 
الزمان بيعدي علينا و إحنا بكل غفوة نكابر 
إزاي ثابت في جزيرة و محاوطاك المراكب ؟

عايشين ف ثُقب أسود بيجبرنا نلف معاه
لو إخترت إتجاه مُعاكس هيبلعك جواه
وعدك إنك تهدي جهلك كان أصله وعيد
طبعك مدّك تشدي نفسك لوراثة تقاليد

الفرحة مبتتاكلش قولي إزاي هتدوق طعمها ؟
النتيجة مبتقيّمش حد معافرش مُقابل عِلمها
الظن نسجّ الذم في دم كل فرد إدراكه صفر
الأهم لو أعمّ هفرقنا عن ثبات الأسوأ بحكر

دخل فوهة العدم ف بالواقع إتصدم ندم 
علي كونه إتّسَم بطيبة في وسط عالم مُبتذل 
إكتشف إن النور لو كاذب سوادة أشد م العتمة 
و إقصاء الغير للغير لو شائع برده شذوذ للفطرة

مستني اللي يمدلك إيده يساندك 
متغمي عن إن إيده مقطوعة عنك
أنت بالنسبالهم وسيلة هم بالنسبالك غاية
هتفوق لما تشوف إسمك ممسوح من تتر النهاية 

مُخدرك تفاصيل بتعذبك أقاويل ثنايا 
بيهملك قريب شكوتك لليل إدمانك شظايا
أطلقت صراح العاطفة عادت جناحها مكسور 
بعقلي كسرت التاني الفِكر منبع النور

عظيم السهر لما تختاره جحيم لما يختارك 
جدارك هش م الصدمات بقيت سادي ف أفكارك
نظامك ثغرته واضحة ف أي مار يصطادك

حر كالريح كتوم لكن صريح 
قلبي ساكن جوه ضريح ضعفي أصلة قوة مسيح

Vocals: Youssef Anwer 
Lyrics: Youssef Anwer 
Music : Tears - Sad Emotional Piano Rap Beat Hip Hop Instrumental 2017 (New)
Master&Mix : Youssef Anwer
Design : Yehia Salah Eldin
@ 2017 Youssef Anwer

EL Thokb EL Aswad | الثقب الأسود

الــكــلــمــات : 

أحلامنا إتقتلت بالتقاليد لكننا برده صبرنا 
أوقات الصبر بيكون هو العقبة ف خط سيرنا
كل اللى طلع السلم درجة درجة ببطء إتفعص
وصل بيجرى مبيزحفش بس ده وش القفص

إمتى العقل يرحم نفسه و يستسلم للنوم
لو حسبت كل فكرة بلحظة مش هيكفيها يوم 
أجسامنا خدلت من كتر القعاد فوق سطح الأمل 
شدينا بإيدنا ناس كانوا هم سبب الخلل

كل جميل جه متأخر كان بالنسبالى بشع 
لو القمر مظهرش ف وقته محدش ف العتمة يشع
كنت ذرات أكسچين و الكل بينتهكها 
بقيت غُربال و شبتكه بتصفى الجاهل بمحيطها 

هم بيتجاهلوك أيام و بيرجعوا وقت إحتياجهم 
السبب إنك مرفعتش تمن العودة بعد إنسحابهم
حاضر بس بيغرق ف الماضى و بينسى مروره 
آخر نسخه حنين إتحرقت و لسه مستنى صدورة

إحساس بصوت مفاتيح بتقرب لزنزانة برئ 
يا ترى هيشوف النور ولا هيكون للوحده صديق
غواص نط ف محيط كان فاكر إنه جرئ 
شده الموج لكنه عنيد سحب فيه بالتدريج
ياترى هيلاقى المنقذ ولا هيكون ع البر غريق
السلام مش طليق الميت مكانش  قتيل النار مكانتش حريق
 غاية الشيء مش تدمير  الفكرة بالتحديد أكيد فى شر عقلك المعيق

ولعت لنفسى شمعه علشان أبحث عن النور
إتغميت عن إن عدم الرؤية للنظام دستور
لو هدفى ألاقى الإبره بإيدى هحرق كوم  القش 
 تجاربى كنت البطل فيها فإستمتاعى كان  بالبحث

نزعت فتيل ذكريات أنفقت عليها مشاعرى 
مجرد سحب عابرة و سحبت معاها سذاجتى
دمية مركونة جوه أوضة ملهاش أى أهمية 
مبدأ خليك يمكن أحتاجك كان ليه الأولوية

زمان لما عانيت عاندت  خدتنى لهفة التمنى
و لما يأست فهمت إنه بالفعل مش بإنى
أميل و أتمنى أستقيم لأ أقوم و بجهدى مميلش 
أخيّب أمال ناس بس فى نظر نفسي مخيبش

حطيت فاصلة وقت م كان لازم أحط نقطة 
بعض مشاكلى إتحلت لما حذفت منها كلمة فرصة 
مبيبقاش حد معايا لكنى ببقى الحد معاه
لو فهم إنى الوحيد هيلاقينى آخر طوق نجاة 

برشد تايه لطريقه و أنا محبوس جوه المتاهه 
 شايف كل عثراتك دى ؟ بالنسبة لدربى بلاهه 
كوابيسي قبل النوم و بعده مش ف وقت لُقاه
كان نفسي أعيش حى مش عايش بحلم بحياة 

إحساس بصوت مفاتيح بتقرب لزنزانة برئ 
يا ترى هيشوف النور ولا هيكون للوحده صديق
غواص نط ف محيط كان فاكر إنه جرئ 
شده الموج لكنه عنيد سحب فيه بالتدريج
ياترى هيلاقى المنقذ ولا هيكون ع البر غريق
السلام مش طليق الميت مكانش قتيل النار مكانتش حريق
 غاية الشيء مش تدمير  الفكرة بالتحديد أكيد فى شر عقلك المعيق

هتفت لما نبذت كل مُخالف لأفكارك 
الحرية لكل نجمة نورها إنطفى فى سجن مدارك 
إوعى تنسى إن السمك الميت بس بيسحبه التيار 
شعاع آخر نفقهم مش هدفك ده مستوئد 

عنكبوت ... و مات مخنوق بخيوطة
تفتكر تمسكه بالحياة هو سبب موته ؟
عنكبوت ... و مات مخنوق بخيوطة 
تفتكر سعيه للحياة هو سبب موته ؟


Written by : Youssef Anwer
Music : Shuka4 Beats
Vocals : Youssef Anwer
Rec by : Jo studio
Master and mix : Youssef Anwer
Poster by : Youssef Anwer
©2018 Jo studio

EL Mataha | المتاهة

الــكــلــمــات :

مشخصاتى لعب معظم أدوار السينمات 
مرة كان سعيد و مرة رومانسى و مرة مات 
مرة يكون البطل و مرة كومبارس صامت
حط بصمة فى كل دور بإنه شخص صامد

أول تجربته بكى بحرقة على وجوده فى سيناريو 
المفروض إنه بطله بس بيموت قبل نهايته
بدأ يفتح عينيه و يدرك معانى كتيره 
منها إن تحقيق سبب وجوده بيدى لنهايته قيمة

التجربة التانية كبر و أدواره كبرت معاه
دور شاب مراهق خطفاه ملزات الحياة 
حب يبدع شويه ، شك فى وجود إله 
فشل يكون مُنصف ، نجح ف إتباع هواه

إتعلم ميندفعش لفكرة بدون إكتمال نضجها 
إتعلم يبقى حكيم ، ميبدأش ف طريق إنتهى
تالت سيناريو كان بطله رجل دين متشدد 
بشغف بيقرأ للأمة فى حد الرِدة و متشتت 

لما خروجه منه بقتله ، ليه دخله مُسير ؟
لما كله بالترهيب يبقى مفيش مجال نتغير
يبقى حر فى إعتقاده ده الدرس اللى إتعلمه
يؤمن بيه إقتناع مش خوف و يمشى ورا فطرته 

عدت عليه عواصف مسميه نفسها أيام 
قلم رصاص بتبريه تجارب كلها ألغام 
خلص القلم متبقاش منه غير اللى إتكتب
كان جميل أو حتى وحش آخيرا مسموش إتغلب

شاب مثقف واعى ده كان رابع سيناريو 
قراءته لكم كتب كوّنت معظم مداركوا
إبتلاء التفكير أصابه و لعنة إدمان التفاصيل  
كان مُعظم وقته فراغ ، لكن حاسس بهدة حيل

أدرك إن اللى يمأأ ف شمس المعرفة تحرقة
 و النار بتاكل فى بعضها لو ملقيتش اللى تاكله
الخامس شخصية ممرتش بيارق الحب من شوارع عمرها
بس أخيراً مرت ، لعبت دور الأكسچين ف حياته و إنتهى 

قال إنها الوطن ، و نسى إن الأوطان بتتسلب 
قالتله إبعد على لسان النصيب ف بعد ، تعب 
بدده الغياب ، كان بيخدش كارت مخدوش 
سهر الليل و دعى الصبح يتأخر مستجابلوش

كانت الإنتباه الوحيد لشخص عقله كله مشتت 
الحزن غزاه لكنه قاوم ، أضمد جزء شبه مفتت
 خرج من الجحيم فالتعود إلتهم الحنين 
شكر كل عسر كان بيفصل ما بين يسرين 

عدت عليه عواصف مسميه نفسها أيام 
قلم رصاص بتبريه تجارب كلها ألغام 
خلص القلم متبقاش منه غير اللى إتكتب
كان جميل أو حتى وحش آخيرا مسموش إتغلب

منضم لحزب سياسى دى كانت تجربته الستة
ركب قطر أفكارهم لكن نزل ف نص السكة
رفض الظلم حب السلم مخضعش لحكم السلطة 
إيمانهم ده كان أضعف من قوة يقينه بالوحدة

مفقدش قواعد ضميرة ، ضد حكم قراقوش
دايرة كلبش ف إيده ، بس لفكره مقيدوش
السابع ده كان عجوز ف عقلة خلاصة تجارب 
إيمانة و حكمتة خلوه لآخر نفس فيه بيحارب

 الصدمات بتكون غالباً قاسية بس وجودها شفاه 
إعتذر لنفسه عن اللى شاركهم غرق و إنفردوا بالنجاة 
سألوا الطبيب : إيه هو سبب إنه مات ؟
رد : تناول أيام فاسدة  أكتر من المعتاد !

فى النهاية سرداب ، حاوطه من كل ناحية
عاش كل حياته بيتعلم ف إنتهج الدنيا 
إيه كان منتظرنا فى الطرق اللى مسلكنهاش ؟
كان قدر أفضل لينا ولا كان أسوأ م اللى إتعاش !!

الحياة دى مهدورة و بلطفها كان بيبين 
العالم كله قسوة ، لكن هو كان اللين 
سعينا لإحراز أهداف و هى بارعة فى الحراسة
تعبنا و منقدرش نستلقى  فى  معركة هرَّاسة


Written by : Youssef Anwer
Music :Veysigz Beats
Vocals : Youssef Anwer
Rec by : Jo studio
Master and mix : Youssef Anwer
Des. by : Mostafa Karim
©2019 Jo studio

Msh5saty | مشخصاتى

كاتب" , براب"
فيس بوك : https://www.facebook.com/eljooooooo

Youssef Anwer

Popular tracks