أبويا قعد معايا وقالي: أنا هقولك سر عمري ما حكيت لحد عنه، وهي دي حقيقة أمك.. عشان تعرفي أنا استحملت أد إيه.. أمك كانت كل يوم تصحى وألاقيها واحدة تانية غير اللي أنا اتجوزتها.. كل يوم كانت بتبقى ست جديدة.. 
- يعني إيه يا بابا؟ أنا مش فاهمة.. 
- ماهو أنا كمان كنت زيك كده مش فاهم.. لكن اللي حصل من 20 سنة خلاني أشيب بسبب أمك.. 
________________________ 
أنا هبة، أبويا وأمي عاشوا كتير مع بعض وكنا عيلة جميلة ومعندناش أي مشاكل، غير إن أبويا كان بيربط أمي في السرير وده كل اللي فاكراه من وأنا صغيرة لما كان عندي 9 سنين ، صحيت في يوم ومالقيتش أمي في البيت، سألت أبويا قالي وهو حزن الدنيا كله على وشه: "معرفش يا هبة يا بنتي.. بس لازم تعودي نفسك إنه خلاص، أمك مش راجعة تاني.."
قلتله: "يعني إيه يا بابا؟ هي ماما ماتت؟" 
رد بأسى وحزن وقالي: "يا ريتها كانت ماتت، لكن دي النداهة ندهتها.." 
ومن يومها وأنا ما شفتش أمي مرة تانية، كل اللي كنت بشوفه، أبويا اللي كان بيعجز بدري، وحزنه الكبير اللي كان ملازمه. 
وفضلت أنا وهو عايشين نتسند على بعض، لحد ما بقى عندي 23 سنة، وجالي العريس اللي بحلم بيه واتقدملي وأبويا كمان كان موافق عليه، واتفقوا على كل حاجة.. 
وقبل فرحي بأسبوع، جالي واحد البيت وقالي إنه جاي مرسال من أمي، وإنها عاوزاني أروحلها بيتها.. 
قلتله: "إنت أكيد متلغبط بيني وبين حد تاني، لإن أنا أمي ماتت.. ومحدش جاب سيرتها من زمن طويل.." 
رد وقالي: "لا يا أستاذة هبة، والدة حضرتك عايشة ومستنياكي تروحيلها وتسألي عليها.." 
فضلت مترددة أروح.. وسألت أبويا.. 
ساعتها ولأول مرة قعد يحكيلي اللي حصل من 10 سنين.. 
يوم ما سابتنا ومشيت.. وحكالي كمان عن اللي حصل أول ما اتجوزوا.. 
" أنا ومنى إتجوزنا عن حب، كنت بحبها وبموت في التراب اللي هي بتمشي عليه.. لكن هي كانت بتخاف من الجواز، أبوها وأمها اتطلقوا وهي صغيرة، واتربت مع خالتها اللي كانت شغالة في كباريه، ولما اترقت والفلوس بقت تلعب في ايديها اشتغلت في التلفزيون وبقت نجمة.. منى كانت صغيرة أوي ولولا إن خالتها كانت روحها فيها لإنها لا عرفت تتجوز زي أختها ولا عرفت تخلف بسبب الشغل.. كان زمان منى بقت في الشارع. أبوها إتجوز ومراته قالتله إنها يستحيل تربي بنته.. وأمها إتجوزت وجوزها كان رافض يصرف على بنت مش بنته.
فضلت منى شايفة إن خالتها الممثلة هي أحسن ست في العالم. وكان نفسها لما تكبر تبقى ممثلة زيها، وبنفس شهرتها.. 
ولما بقى عند منى 8 سنين.. حصلت أبشع حاجة ممكن تحصل لطفلة زيها. 
مها خالتها كانوا المعجبين بيقفوا طوابير على بيتها، ده غير اللي كانوا بيتقدمولها ونفسهم يتشرفوا بلقب جوز النجمة.. 
لكن خالة منى كانت عارفة إن كل دول طمعانين فيها، وإن أحسنلها إنها تربي بنت أختها، لكن فيه واحد كان مجنون بالنجمة.. 
ومطرح ما تروح كان يروح وراها ويراقبها.. ولما رفضته، حلف لا ينتقم منها.. 
وعشان كده راح وراها لحد البيت، ولما عرفت إنه دخل الشقة وهو سكران ومش فايق.. قالت لمنى تستخبى وما تطلعش مهما حصل.. كانت خايفة عليها، وكان قلبها حاسس إن الليلادي مش هتعدي على خير. 
وفعلا، رغم إنها حاولت تخرجه من البيت، وتعقله أو تفوقه عشان يرجع لعقله مكانش شايف قدامه.. وقالها يا تتجوزيني دلوقتي يا أقتلك.. ولا تبقي ليا ولا لغيري.. 
ورفضلت مها خالة منى.. وقتلها حبيبها اللي كان مجنون بيها.. قتلها قدام منى اللي كانت مستخبية وخايفة وجسمها كله بيرتعش.. لكن فضلت مستخبية زي ما خالتها قالتلها بالظبط.. 
بعد أيام الجرايد كلها كتبت عن الحادثة.. ومنى مبقاش ليها حد تروحله، وعشان كده ودوها لدار أيتام وفضلت عايشة فيها لحد ما كبرت.. 
وبعدها قابلت مني.. أمك يا هبة.. كانت جميلة الجميلات.. خطفت قلبي من أول مرة شوفتها فيها.. 
لكن مكنتش عارف إن ورا الجمال ده كله حكاية طويلة، وصدمة هي لسه ما اتعالجتش منها.. 
أمك حبتني هي كمان، واتفقنا إننا نتجوز.. لكن من أول ليلة في جوازنا، وبعد ما نمنا.. لقيتها صاحية وبتصرخ.. 
اتفزعت وقلتلها مالك؟ لكن اكتشفت إنها كانت نايمة لسه وبتحلم، وإن ده كابوس.. ورغم إن عينيها كانت مفتوحة لكنها مكانتش في وعيها.. 
استمر الحال ده أسبوع.. لحد ما فاض بيا، وقلتلها إيه الحكاية؟ أنا مش فاهم إيه اللي بيحصلك ده وسببه إيه؟ 
ساعتها قعدتني وحكتلي كل حاجة من البداية.. ولما عرفت حبيتها أكتر.. كنت حاسس إني لازم أعوضها عن كل اللي هي شافته.. 

.......

Follow me at: 
Asmaa Abdelnasser 
Youtube channel: https://www.youtube.com/channel/UCAeMdLHS23pf-4vwJ9v5-1g 
My Blog: https://storiesbyasma.blogspot.com/ 
Search with the keyword: (stories by asmaa)

Bedtime Stories

Mona

قصة حياة سعيدة لأسماء عبد الناصر

https://storiesbyasma.blogspot.com/2020/02/happy-life.html

Ziad Alzarka

Popular tracks