كلمات: احمد رامى
ألحان: رياض السنباطى
غناء: ام كلثوم
انتاج: 1952
______________

جددت حبك ليه ... بعد الفؤاد ما ارتاح
حرام عليك خليه ... غافل عن اللى راح
ده الهجر وانت قريب مني ... كان فيه أمل لوصالك يوم
لكن بعادك ده عني ... خلى الفؤاد منك محروم
يا هل ترى قلبك مشتاق ... يحس لوعة قلبي عليك
ويشعلل النار والأشواق ... اللى طفيتها انت بأديك

دانا لو نسيت اللى كان ... وهان على الهوان
اقدر أجيب العمر منين ... وارجع العهد الماضي
ايام ما كنا أحنا الاتنين ...انت ظالمني وأنا راضي
صعبان علي اقول لك كان ... والحب زي ما كان وأكتر
وأفكرك بليالي زمان ... وأوصف فى جنتها وأصور
انت النعيم والهنا ... وانت العذاب والضنا
والعمر أيه غير دول
أن فات على حبنا ... سنه وراها سنه
حبك شباب على طول

انت اللى فات بنعيمه وراح ... وفات لي طيفه فى خيالي
أسهر معاه الليل سواح ... عايش على العهد الخالي
وأنت اللى فات بضناه وشقاه ... وساب لي ناره فى ضلوعي
ان مر ع الخاطر ذكراه ... تنزل من الوجد دموعي
يا اللى قضيت العمر معاك ... أرضى جفاك واتمنى رضاك
انت النعيم والهنا ... وانت العذاب والضنا
والعمر أيه غير دول
أن فات على حبنا ... سنه ورا سنه
حبك شباب على طول

يا اللى هواك فى الفؤاد ... عايش فى ظل الوداد
انت الخيال والروح ... وانت سمير الأمل
ييجي الزمان ويروح ... وانت حبيب الاجل
وأزاي أقول لك كنا زمان ... والماضي كان فى الغيب بكره
واللي أحنا فيه دلوقت كمان ... ح يفوت علينا ولا ندري
ولما أكون وياك ... هايم فى بحر هواك
ما اعرفش أيه فات من عمري ... أن كان رضا او كان حرمان
وأفضل وبس انت فى فكري ... يا اللى بحبك زي زمان

أم كلثوم جددت حبك ليه.

3Adel Daniel ✪