ألفين تلاتة والله* جميل 🎈

حلوه بشكل مش معقول ♥️♥️

بشوفك 
في مسمار في حيطة 
و داخل لجوة 
لتحت المحارة 
في حب الحرارة 
في أسقع ليالي 
و أتقل غطا 
في حب الشتا 
في عز الصيام 
 و رمضان في سبعة 
في كل اللي سابوا 
و سابوا المتابعة 
و كل اللي لسة 
بيهتف لرابعة 
و كل اللي غاوي النزول للميدان ..

قصيدة إلخ - من ديوان مفيشاليا - حسام ابراهيم

بدور عليكي _ اشرف عبدالهادي

قصيدة «الشِدة المستنصرية» للشاعر «خلف جابر»

هندسة صوتية / مصطفى الملواني

كتب الجينرال للجينرال ..
تحديدا يوم ( تلاتين / ستة ) ..

فيه جيش ويايا و جيش وياك ..
و أنا و أنت خلاص حاطّين خطة ..

و الحرب هناك ..
و دماغي بتتعب م الصوت ..

خلينا كبار ..
مالناش في الحرب و ضرب النار ..
مالناش في التار
ولا في الموت ..

احنا الأبطال ..
و رموز الشعب و حلمه الجاي ..
سيب الأطفال تلعب مع بعض ..
و أنا وانت هنقعد نشرب شاي ..
و نشوف الحرب هتمشي ازاي 
في شاشات العرض ..

ما أجمل هذا الوهم اللي اسمه الأرض !

شوف ضيّع كام ألف ضحية ..

حبة معاتيه شايلين أسلحة / بتموّت ناس شايلين أسلحة / بتموّت ناس شايلين أسلحة ..
عاملين مروحة .. 
بتهوي على الجينرال أول .. ما الحَر يزيد عنده شوية ..

فيه فرق كبير واضح جدا 
بين واحد حر 
و التاني يدوب آخر طموحاته يشيل يافطة .. 
و عليها شعار للحرية ..

الحرب أونطة .. 
و مسيرها هتخلص و هنرفع كل الأعلام .. 
و يجوز نرفع علم الخسران قبل الكسبان ..
و نراضي الكل ..
و نجيب غلبان في البرنامج 
و نقول : كُل ..

و نخلي رموز الإعلام ..
تطلع و تقول إن القادم .. أفضل بكتير مِن ما فات ..
- تحيا القيادات .. تحيا القيادات ..
- العجلة خلاص بدأت تجري ..
- بالصبر هنقدر ع الصعب ..

آآآه لو إعلام بلدك دوغري ..
انسى إنك تضحك ع الشعب ..

احنا الحكام ..
بنشن حروب على بعض عشان .. تتخيل ليه ؟ 
حسبة أرقام ..

أسهم بتزيد 
و في نفس اللحظة سلاح بيبيد ..
ملايين بتموت
علشان فيه مصدر طاقة جديد ..
فقر و مجاعات و رؤوس المال عندها مواعيد ..

سهم الإنسان في البورصة الوقتي يجيله بكام ؟
خد لك إنسان و أعطيني بداله شوية بيض ..

بالنسبة ليوم الحرب
هناخده أجازة و نعمل عيد ..
حتى لو النصر ماجاش و بعيد ..

الناس بتصدق الاحتفالات و بينسوا الدم ..

ماتشيلش الهم يا جينرال طول ما ورقنا نضيف ..
لو عايز تبقى لئيم / يا غشيم 
ماتشيلش السيف ..
خليك كلامانجي 
الكلمة سلاح مضمون و مخيف ..
حطلهم بيها في عسل النحل شوية سم ..
و احمد ربنا إن احنا ملوك 
على شعب كفيف ..

تسريبات من منتجع كامب ديفيد / حسام ابراهيم

لو جيت تبُص لحَسرتُه .. ساعة ما خَش بشنطتُه .. باب المطار ..
هتلاقي ثورة ..

لو جيت تبُص لعين ولية بتشتري رُبع الخُضار .. بَدَل الخُضار ..
هتلاقي ثورة ..

لو جيت تبُص على السجين في المعتقل .. لما اتسأل عن تُهمِتُه ..
هتلاقي ثورة ..

لو جيت تبُص على العواطلي الأربعيني ..اللي اتنسى مع مِهنتُه .. 
هتلاقي ثورة ..

لو جيت تبُص لشيخ عجوز .. هيموت يجوز 
لكنّه فَك البوز و هَرّج .. 
هتلاقي ثورة ..

لو جيت تبُص على الآلاف 
الهاتِفِين نفس الهتاف جوّة المدرج ..
هتلاقي ثورة ..

لو جيت تبُص لجندي واقف ع الحدود بيقول هعود أو مش هعود .. بعدين يعيد .. 
هتلاقي ثورة ..
لو جيت تبُص لأمه ساعة لما مات .. و البغبغان قال ع الشاشات .. مات الشهيد ..
هتلاقي ثورة .. 
..

لو جيت تبص لكل دول مع بعض 
مش هتلاقي شيء ..

هتلاقي بس الدم سايل في الطريق ..
و الكل خايف مـ الصاروخ الأرض أرض ..
و لا حد شايف مين صديق أو مش صديق ..

ياخي برضو الناس جميلة لما بتبقَى فَرْد ..
و بتبقَى ألف نيلة لما تصير فريق ..
..
.
#حسام_ابراهيم

مش هتلاقي شيء  - حسام ابراهيم

فقدت الأوطان قيمتها
لما لعبت في المسافة و قصّرتها .. الطيارات ..

اختراعك للفلاشة
جاب لكل الناس هشاشة
في التاريخ و الذكريات ..

القماشة في دولة نامية مش هتقدر تِكْسي جتة شخص عايش ..
مش هتقدر بيها تمسح دمعة واحدة من العياط ..
بس تقدر بيها تدفن شخص ميت في المظاهرة بطلْق طايش ..

خد و هات .. ماتاخُدش .. هات ..
عوّروك و الدم سيّل .. روّقوك في الإعلانات ..

من زمان ما كنت عيل .. ركّبولك شفَّاطات ..
كل لما الليل يليّل ..
يشفطوك و يقطّعوك ..
يعملوك أحزاب كتيرة في كل نَحية ..

النهاردة كنت عيل لسه واقف في الطابور الصبح تهتف ..
تحيا بلدي .. بلدي تحيا ..

بكرة واقف في الطابور على فُرن بلدي تقول :
يا بلدي ..
ياكش تاخدك ألف داهية ..

كعب داير و الحمار مش لاقي ناهية ..
و الدينار من غير دولار ..
مابقاش فتوّة ..

رأس مال الرأسمالي في الدواير ..
كل دايرة تزيده هيبة تزيده قوة ..
كنت بقْصَر لما يشرب في السجاير ..
و اكتشفت إن الزيادة ف طولُه هوّه ..
وأما شُفت الدكتاتور من غير ضفاير ..
كنت شايف نسر برة و نجمة جوّة ..

خُفت م الطيارة أكتر لما قال ليا الخواجة (آيركرافت) ..
رَن جوة الودن فجأة صوت قنابل في الحروب ..
شُفت ناس فوق ناس بتحفر بير .. فيُخرج ناس و نَفْط ..
و التقيت الذل حاضن حضْن أخوي للهروب ..

مش ضروري أما تناديني تقول يا سُكّر ..
قول : يا زفت ..
في الحقيقة الزفت أغلى ألف مرة من الشعوب ..
..

#حسام_ابراهيم

آيركرافت / Aircraft - حسام إبراهيم

و مصر القاسية ماسابتنيش أغنّيلها ..
و سابت طينها للقارح شفط نيلها ..
و نزلت في الكُتب تهميش ..
و نزلت في المسارح قَصْف ..
و عز ما ببقى متقطّع و بنزف نزْف ..
بشوف ضحكتها يدوبكشي ..
بحنّلها .. 
وأكمّل عزف .. 
وأغنيلها في كلام معسول ..

أدوس ع الـ (لا) .. تدوس ع (الصول) ..

ابص بعين على مناضل بيصرخ ( لا ) ..
و عين ع الصول ..

أشوف الدم في الطرقات ..
أقول : أخوات .. يا حول الله ..

و هي تعَنصَر الأموات ..

شهيد عادي 
وشهيد عسّول .. 
..

#حسام_ابراهيم

و هي تعنصر الأموات - حسام ابراهيم

فُرِجَت يارب 
ومن وسع
كل الحاجات صبحت تمام
مافيش ما يدعو للزعل 
أو للملل
قلبي اللي كان ب يدق مات 
وبقيت عايشها من سكات
والناس كمان
 بقو زي كل المخلوقات
الروح بقت اسمي واخف
والكره جَف 
مبقاش في خوف
وبدأت اشوف
وابعت رسايل مبهجة
لكل من وطأ البسيطة
والليلة سيقاني القصيدة 
اقول كم
يا كل ال عاشقي الوحدة
وب يسمو الونس زيطة
وحابسين اللي حبوّهم
في برواز حلو ع الحيطة
وخايفين من مرار بكرة
ف كرهوا حتي ريحة البن
وجمعوا الذكري ب الذكري
وصنعوا جوا منهم خُن
إلي اللي ب يسمعوا قنديل 
وب يحبوا السهر والليل
ولمّا يتوهوا بيحنّوا 
ف ب يلاقوا  في ذِكره سبيل
إلي اللي عايشها ب يفكر
إليك هذا الكلام ب بلاش
"في حاجات ب تعيش ب الموت أكتر
وحاجات بتموت لمّا بتتعاش"

"فُرجَت يا رب " مصعب عبد النعيم

آكونت الفيسبوك :

www.facebook.com/ahmedsaid14

كلام هنقولُه في الذكرى - أحمد سعيد بكير

رسالة من العزل_محمد مرعي/بصوت أحمد خالد حسني

قاصر يا قلب 
أقصر يا عمر يا ورد
ما يسيبك المحبوب إلا إذا سيبته

من سيرة اللي ما جاش_ شعر وإلقاء| صفاء أبو صبيحة

• شاعر عامية مصري ، مواليد 14 أبريل 1994 ، محافظة دمياط
• أنهى دراسته الجامعية في الهندسة المدنية / جامعة المنصورة عام 2019
• أصدر ديوانه الأول بعنوان "مفيشاليا" عن دار تويتة للنشر والتوزيع في يناير 2017
• أصدر ديوانه الثاني " سجن أس أربعة " في يناير 2019 والذي حصل به على جائزة أحمد فؤاد نجم في ديسمبر 2019
• أصدر ديوانه الثالث بشيكل فول وبنص طعمية في مارس 2020 ، والذي حصل به على جائزة المجلس الأعلى للثقافة 2020 (الكبرى)
• أصدر ديوانه الرابع البني أشياء عن دار تويتة للنشر والتوزيع في يونيو 2021
• قام بكتابة برنامج مش مسامح حسين الذي تم عرضه في ديسمبر 2021

مش هتلاقي شيء - حسام ابراهيم

Hossam Ibrahim ✪

Recent comments

Reem-saleh

Rofaida Abunnaga

عبدالمجيد العسيرى

منى السباعى

Related tracks