دلقت الشمس ع الضله وداب في العتمة نور ضيك ♥️

بقيت بتخاف يا عبدالله لحد يقولك ازيك

بصوت حسام ابراهيم .. من ديوان مفيشاليا 
 و ديوان سجن اس اربعة و  ديوان بشيكل فول وبنص طعمية و قصائد اخرى

حسام ابراهيم

البنّ
			
القهوه تحبّ كنكه
والكنكه تحبّ كنبه
والكنبه تحبّ قعده
مبسوطه مربّعه
و كنّا أربعه
أنا و انتِ و انا و انتِ

و كنّا عيون كتير
و طبليّه و زير
ولا بنحبّ نبكى
ولا بنعرف نطير
أنا و انتِ و انا و انتِ

سبنا البوسطه ورانا
فى الترماى اللى داير
العتبه للإمام
كان ريقك جنبى ساكت
حبّيتك من زمان
أنا و انتِ و انا و انتِ

شمّيت لادن سعيد
شمّيته من بعيد
شمّيته من قريّب
خمس سنين حاغيّب
على الشمّاعه خايف
و باخاف على الدولاب
و بادوب على البلاط
و باحسّ الظلّه تقلت
و باسمع الوابور
و باحسّ الميّه تقلب
أنا و انتِ و انا و انتِ

الظُهر الشمس تلحس
الظلّه فى الليمان
والظُهر الشمس تعمل
سيبرتايه دهب
بصّينا لبعض فيها
و مشينا لبعض نبكى
و قعدنا من التعب
أنا و انتِ و انا و انتِ

باقول لك إيه باقول لك
حاجيب حاجات قديمه
قلبى كوره شراب
نلعب والاّ ما نلعب
فرحت لنا المدينه
و امبارح فى التراب
أنا و انتِ و انا و انتِ

و بنفرش ضيّنا 
على ظلّة بعضنا
و احنا بنبرد هناك
علشان ندفا هنا
والقهوه تقول لنا
على بال النار ما تلسع
بتبقى حنيّنه
أنا و انتِ و انا و انتِ

قصيدة البن بصوت فؤاد حدّاد

انا و انتى عشنا سوا...
 أيام يمكن ما تتعوضش من تانى..
 شفنا التاريخ...و هو بيتكتب ع الهوا...
 و سبنا الهوى يضربنا ف الخلاط...
 معرفش بكتبلك من الإحباط...
ولّا الأمل...
معرفش إيه العمل....
ف ريحتك اللى مغرقة ورق النتيجة...
و ف الأيام المتعلّمة بمزيكا...
 و ف الشال اللى شال دخنة و شياط و عياط
 و فوارغ المطاط...
و الحى....و الدخان....
أكدب عليكى لو قلتلك ندمان..
لاكن انا عيّان بحب الوطن...
و بذكريات المعركة الدايرة...
و بخوفى م النسيان ...
و بحُبِك إنتى كمان...

قصيدة ورق النتيجة - مصطفى إبراهيم

قصيدة (بابا غنوج) من ديوان ريّان يا فجل

حسابي على الفيسبوك
www.facebook.com/ramywafapoet/
حسابي على الانستجرام
www.instagram.com/ramywafapoet/
حسابي على التيكتوك
tiktok.com/@ramy.wafa

بابا غنّوج_فؤاد حدَّاد

آخر ما قال الشيخ / أمين 
في الإعتراف ..
لما النقيب / تامر أمين ..
قطّع إيديه و رجليه خِلاف .. 
..
..
جمّعت كل الشحّاتين ..
والغارمات و الغارمين ..
والفاقدين و المفقودين ..
و المكتوبين في جميع دفاتر لانصراف ..

جمّعت كل اللاجئين ..
واليائسات و اليائسين ..
والمربوطين المضروبين ..
و المتسابين علشان بقيت الناس تخاف ..

جمّعت كل المنبوذين ..
والبائسات و البائسين ..
والمُضْربين و الشبعانين ..
وصحابهم النايمين سنين نوم الخُفاف ..
..
جمّعتهم ..
وأخدت م الأوقاف خِطاب ..
وطلعت أقول :-
الجرح طاب 
والثائر الغوغائي تاب .. 
من بعد بيعُه للقضية و بيع عضامُه للكلاب .. 
مابيشتريش ..

هبدأ كلامي و هدعي للمسئول .. 
و نموت نموت 
و الغول يفوت و يعيش .. 
و إن جالُه إغما ياخُدنا في المحلول ..
و إن يُطلب الينسون 
نكون قراميش ..

يارب هات للشفّاطين السُل .. 
يارب هات للمشفوطين الحَل .. 
و أمنع سلاح الشفّاطات في الجيش ..

الخطبة ياخواننا عن ال .. و سِكِتّ
بصّيت على المُخبر في أخر الجامع .. 
هيمان ولا القاعد قصاد الست .. 
كان صاحي و مركز لنَفَسِي الطالع ..
الخطبة ياخواننا عن ال .. و سِكِتّ ..

اتعصّب المُخبر و قال : مش سامع ..
بصيت على الورقة ساعتها و خُفت ..
بصيت كما الجاهل في فَك الخط ..

بصيت على الجامع لدول و لدول ..
بصيت على القاتل و ع المقتول ..
بصّيت على العاطل و ع المشغول ..
بصّيت على المُخبر .. ندهت عليه .. 
الخطبة ياخواننا عن ال .. ما تقول !

عن نفسي مش هقدر
أقول عن إيه .. 
الناس هتتمسخر و ده المُحتمل ..

فيقوللي : شغلانتك ..
أقول : والعمل !

المُخبر أتهور و هاج و أتخبل ..
و الكاميرا طلّعها و لقط الشوت .. 
الخطبة ياخواننا عن ال .. و سكت ..

و نزلت م المنبر جريت م الباب .. 
ماقدرش أدوق عَلقم و أقول عنّاب ..
يا سيادة الباشا .. مانيش كداب .. 
لكنّي مش شاطر في بيع الجُمَل ..
ماقدرش أكون بانجو في بطن الجَمَل ..

ماقدرش أكون تاجر في بَكَر الشاش .. 
و الدم متدلدق كتير بالهبل ..


والخطبة دي كانت عن ال .. ما بلاش ! 
مش قادر أتجرأ و أقول ( الأمل ) ...
..

#حسام_ابراهيم

آخر ما قال الشيخ أمين / حسام إبراهيم

قصيدة تقرير الوفاة من ديزان " سجن أسّ أربعة " للشاعر حسام إبراهيم
https://www.facebook.com/hosamibrahimm

إلقاء وهندسة صوتية : منّه كُردي
https://www.facebook.com/mennakordii

مكتوب في تقرير الوفاة الآتي :-

جسم الضحية سليم مافيهش خدوش ..
و مفيش آثار للضرب و التعذيب ..
سم الفيران في الدرج مأخدهوش ..
و مفيش سلاح للقتل في الدواليب ..

ساكن لوحده .. الناس مابتروحلوش ..
و مفيش صحاب بتزوره لما يغيب ..

كان عنده عَجَلة معوضاه أهله ..
و بيمشي دايما بيها جنب الحيط ..
في الجري حتى بيجري على مهله ..
و يخاف أوي م الزحمة والتخبيط ..
و ساعات يخاف عربية تندهله ..

أتفه من إنه يبقى له عداوات ..
أو حد صاحب مصلحة في قتله ..
أتفه من إنه يبقى له صداقات ..
أو سيرته تيجي و حد يشتاقله ..
مالهوش آثار أقدام ولا بصمات ..
مايحبش الأحلام ولا البطولات ..
ولا له مقولة هتبقى تاريخية ..
عاش الحياة بالظبط كما هيه ..
ماعملش ويا الخلق أي وعود ..

علشان كدا لما عملها و مات ..
لا لقينا عنده جروح ولا كدمات ..
كان جسمه سالم مية في المية ..
و كأنه لسه من مفيش مولود ..

قولنا ساعتها دي سكتة قلبية ..
و فتحنا 
لقينا قلبه مش موجود ..

تقرير الوفاة - حسام إبراهيم - منه كردي

من المصري 
إلى السوري اللّي جاي لاجيء :-

هتتفاجيء !
هنا كل البشر لاجئين .. 
ماعادش في مصر مصريين ..
رجعنا لعهدنا السابق
بنتسابق
عشان نعرف دي دولة مين .. !
..

أنا السابق 
يا عم اللاحق المسكين ..
بتهرب من سلاح كيميائي ! رايح فين ؟
هربت من الحجارة الطوب
و جيت لحجارة من سچّيل ..

هناك الدكتاتور فارد 
دراعه 
بيقتل الصامد ..

هنا فيه دكتاتور فارض
صداعُه 
بيقتل الصامت ..

هناك قتَلك و أكلك نَي ..
هنا فتَنك و أكلك حَي ..

هربت من السلاح الحي 
و جيت للقتل ع البارد .. 
..

شوارد يا صديقي في أرضنا .. شوارد ..
موارد في مصانع أثرياء الكون ..

ضحايا لأنبياء جايين 
و في إيديهم رسالة من الإله البلطجي المجنون ..
" يقول شَمعون لأجعص حرب ( كُن فيكون ) " ..

ديون يا صديقي مركونة.. و حق الجيرة ع الجيرة ... 
عشان (شيكَل) يكون فارس .. 
لازم له حصان من الليرة .. 
و سِرج من الجينيه المصري ..

يا صاحبي .. العصر مش عصرك ولا عصري ..
و مصر .. لا عمرها مصرك ولا مصري .. 
يجوز في المعصرة عصرك 
يجوز عصري ..
و كوز المنطقة العربية للّي يعوز ..

بيشرب حارس الهيكل في نخب الفوز ..
ويشرب حارس الكعبة يصير أراجوز .. 
ويشرب صاحب اللعبة و يضرب بوز ..
و يضرب حارس الكعبة يقوله : كمان ..

حقوق إنسان ..
نظام للقتل بالمجان ..

بيقتل معظم الشجعان و أعظمهم 
و يعطي وسام لمقابرهم و لعظامهم ..
و بيغير مسار القصة في السيما ..

يا ساكن في الخيام و الصحرا .. خُد خيمة .. 
و مية و نور 
و ورقة و حبر .. 
و أرض جديدة قايسينها اليهود بالشبر ..

و إياك يسجنوا رؤياك ..
و إياك يسكنوا ويّاك ..
و إياك يعزموا بكونياك ..
و إياك تخدعك سحنة .. 
و إياك السكوت و الصبر ..

ساعات الصبر ع المحنة 
بيحفر لانتصارك قبر ..
يا كاظم غيظك المكبوت .. ماينفعش اللجوء و الكظم ..
يا عازم جارك الهلفوت على لحمك .. بلاش العضم .. 
و سيب في الجتة شيء متعان ..

و بكرة لقريتك ترجع .. و تشرب (متّة) في الجولان ..
و تاكل في حَلَب (ملفوف) .. 
و بكرة تشوف ..
هيفضل في اليهود الخوف ..
مادام فينا اللي خاف ع العرض ..

هترجع للوطن حتماً لأن الأرض ..
بتعرف زرعها دايماً و بتشدُّه ..

و مهما ينافق السفاح و يزرع ورد ..
بتحفر قبرها دايماً و بتشدُّه ..

شِيكَل / Shekel - حسام ابراهيم

احنا في الملعب يا عم حسين ..
و انت قاعد فين !
على القهوة ؟

انت تدفع
من جنيه لخمسين ..

واحنا في الميادين
مفيش مأوى ..

أنت قولَك (أح أو كحة)
من سخونة الشاي
و م الشيشة ..

واحنا قولْنا (الأح والأحّا)
لما شوفنا الجاي
من العيشة ..

سهل جدا تصدر الأحكام ..
وانت نايم باصص
ع الشاشة

كنّا فيها سُلام و كله تمام ..
كنا كل اتنين
في قماشة ..

احنا في الملعب يا عم حسين ..
وانت جنب الهانم و الباشا ..

جاي تقوللي نروح و نمشي منين
انت مين علشان تطلّع صوت !

عمرك انت لعبت في الميادين ..
جاي تقول دلوقتي باصي وشوط ..

تعرف إيه عن قسوة الشلّوط ..
و انت نازل جَرْي من ع الجبل ..

لما يبقى الرعب ضِعف الموت ..
واما يبقى العقل إبن الهَبَل ..

لما تلقى الناس بتعبد هُبَل ..
تهدم الأصنام .. وتعبد ناس ..

مِيت إله ومفيش إله للطُبَل ..
بس لو كان فيه ..هيبقى مداس ..

تعرف إيه عن سحبة الترباس
و انت جوة الحجز فـ النُقطة ؟؟

كان علينا الدم رِجل و راس ..
كان عليك الدم كام نقطة ؟

كنت بكتب تاري في الكرّاس ..
و انت كنت بتكتب النُقطة ..

كل واحد فينا له .. مغزى ..
كل حالب فينا له .. مِعزة ..
كل جامد فينا له .. نغزة ..
قد تكون في القلب
أو في العين ..
أو في صابع إيدك الشاهد ..
و فـ بنات أفكارك المُلعب ..

احنا في الملعب يا عم حسين ..
كورة وبتتشاط مابين فريقين ..

من سنين بنحارب و نجاهد ..

وانت قاعد عندك
وبتلعب

احنا في الملعب يا عم حسين - حسام ابراهيم

من وحي الأنبياء الجثدد (الثلاثية كاملة) : http://vimeo.com/52792066

إنى رأيت اليوم ... الصورة من بره
قلت الحسين لسة ....حيموت كمان مره 

إنى رأيت اليوم ... فيما يرى الثائر
ان الحسين ملموم .. فوق جثته عساكر
بيدغدغوه بالشوم ؛
كل أما ييجى يقوم !
و ان البشر واقفة ؛
تبكى بدال ما تحوش !
و ان العلم مصفه ؛
م السونكى و الخرطوش !
و ان الطريق مفروش... بالدم للآخر ...

إنى رأيت اليوم...
الدم ع الآيش....
و إن الحسين إحنا....
و مهما اتقتل عايش !!

فيما يري الثائر : من وحي الأنبياء الجُدد - مصطفى إبراهيم

مسكين يا عبدالله - حسام ابراهيم

شهيد الثورة - مصطفى إبراهيم

هندسة صوتية : مصطفى الملواني 
..
( الجيل الخامس )
..

دلوقتي تقدر
ع الشاشات التاتش ..

ف ثانية تحضر ماتش ..
وثانية .. تحضر غيره ..

أو تبقى جوة مُدرّجات التِّتش ..
وبرضه
جوة مُدرّجات San Siro ..
..
دلوقتي
يقدر النايم على سريرُه ..
يروح السوق ..
ويتسوّق ..
يتابع تحديثات الذوق ..
ويتذوّق ..

وهوّ على السرير قاعد وطافي النور ..
يخُش على ال Play store
يحمّل تطبيقات تقدر
تحوّل صورتُه من قهوة (حسين دَعْدور)
توديها لكافييه على حافة الإنديز ..
..
دلوقتي نقدر
عن طريق تحفيز أحد ذرات مُرَكّب ما ..
ندمّر كل ما شوفناه ..
كأنه ماجاش من الأول ..

ندوس ع التاتش
ونحوّل
مدينة بقالها ست قرون ..
في ثانية تكون
مدينة ماجَتش ..
..
نجمع ذكريات الناس ونحفظها ..
بحيث لو مات محمـد صاحبك اللي ماكانش لك غيره ..
تهرّج عادي وتهزّر كأنّه ماماتش ..

وتطلب شركة الروبوتات ..
عشان يعطُوك محمـد تاني متقفّل و ع الزيرو ..
ومتوصّل بشاشة تاتش ..
..

هنا
خَط الحقيقة بيترسم بال Hatch ..
وكلب العولمة السعران مابيفرقش بين stay وبين ال catch .. في العضّة ..

وعُقْد الإنسانية اللي انت لابسه .. من اليورانيوم
مش دهب ولا فضة ..
..
هنا قفل الحقايق صدّى ..
هنا السايق
ماهوش نفسُه اللي جاب الداغ ..
هنا السايق بيتفاجئ مع الركاب بكُل مطب ..

هنا الناس اللي بتعاند إرادة الرب ..
وبتبدّل دماغ بدماغ ..
بتاع ببتاع ...
وقلب وبقلب ..
وتلعب في الجينات علشان تصنّع جندي يبقى شجاع ..
ويوفيلهم وفاء الكلب ..
..

ووسط ده كله بتقابل بمحض الصدفة يوميا بشر واحد ..
مازال بيعاند العالم وبيصارع ..

يوماتي يخُش بلكونته
ويسقي الورد والنعناع
وينزل يشتري الجورنال من البياع
ويعمل شاي تقيل مظبوط ..
ويقعد يسمَع النَشرة ..

مصدق كل شيء لكن بيفشر كل يوم فشرة ..

لمحتُه من يومين قاعد
في قهوة في آخر الشارع ..
وجنبه من الصحاب .. عَشرة ..

..

شوية وقام
وقال : انا ماشي يلا سلام ..
ولسه بيركب العجلة وبيعافر مع البدّال عشان يمشي ..

في ثانية تدوسُه عربية
وجت له ازاي
ماتفهمشي ..

دقيقة ودمُّه ساح تِمًا على الأسفلت ..
وخَد أنفاسُه
واتشاهد
وفقد الوعي ..

وشوف سبحانه له حكمة
في خَلْق الرغبة والمقدور
وخَلْق المظلمة والنور
وخَلْق السعي ..

تخيّل تمشي طول عمرك بعيد عن أي شاشة تاتش ..

ويوم ما تخشّها ..
تدخُل
خلال آيتين
وصورة ونَعْي ..

..
#حسام_ابراهيم

الجيل الخامس - حسام ابراهيم

#جديد / ( محمود بالفراولة ) 
..
من كام سنة ..
كان فيه هنا
عامِل نشيط جدا ..
شغّال على المكنة اللي في الآخر هناك ..
( محمود علي الحجاج )
زي الشيطان في السرعة والإنتاج
وأوّل ما الأدان يدّن .. 
مَلَاك ..
..

ببساطة
كان راجل خلاصة ..
ينتج في ساعة الشغل بالميت 200 مصاصة ..
وف يوم بسجّل إسمي في الكراسة
وانا واقف هناك
بختم على الباركود
بعد انتهائي من ساعات شُغلي ..
بلمح 
لقيت محمود
هناك ع الوِنش
وبيرمي نفسُه في قلب خزان الحلاوة المغلي
وبيختفي جواه
كأنه ماكانش ..
كأنه ماسابش ولا بصمة صُباع في مَكَنته ..
كأنه ماجاش
وماتنقّلش
م العفريتة .. للبالطو ..
كأنه ماقالش ليا في يوم
( يا صاحبي الشخص في المصنع مكَنتُه مكانتُه ) 
..

بخفة وذوق
رحل من بينّا ..  سِنّه بسِنّه .. واتبخّر بكل هدوء ..
بدون ما يكلف التأمين تمن مَرهم .. يداوي حروق ..
خرج منْها 
بلا تأبين .. بلا تغسيل .. بلا دفنة ..
وزي ما خشها حِفنة ..
خرج حِفنة ..
وزي ما كان كلامُه زمان بيتحفنا
وداعُه كان عفيف جداً
وشيلُه كان خفيف جداً
ماسابش علام على كتافنا ..
..
وأذكر وقتها خوفنا اللي شالنا وحَط ..
وطيّرنا أما شافنا خُفاف .. 
ويكفيك شر جن الخوف  .. إذا خضّك .. لقاك بتخاف ..
بتوجع طبطبة لاكتاف ..  في كِتفك لو شبع م الخَبط .. 
..
وأذكر في العزا حسيت 
نزول الدمعتين العُبط ..
وأذكر يومها لما بكيت .. بكيتُه ثانيتين بالظبط ..
..

وقطع اللحظة صوت وشوشني  في وداني :-
سعاتة الباشا في المكتب بيستناك ..

سمعت الجملة وكأني .. سمعت الأولى بتزيع إن بُكرة العيد ..
دخلت لقيتني بتقابل مقابلة شخص لسّه جديد ..
لقيت الباكو والترقية والتجديد 
في إيد السيد المُختص بإدارة مصانع  (بِم بِم) ..

يا نتفاهم ! يا إما هتندم !
رمالي الكلمة راس الغول ..
ورجّع ضهرُه ع الكرسي وعَدَل البدلة واتهندم
وكمّل قول :-

خليك حَمول
وامسح دموعك .. ده اللي حاصل حَصَل ..
فَرَجَك وَصَل ..
والحزن مش مناديل مبوّشها البكا ..
لو ع البكا
ياما ناس بتبكي وهيّ بتخرّط بصل ..

من بُكرة هتعود للعمل ..
الحي أبقى 
والعيال .. بالأمل .. أوْلى ..

محمود علي الحجاج في حضن المولى .. 

لم يبق من جسمُه ..  غير دمه اللي في الخزان .. 
لم يبق من إسمُـه  .. غير ( غ ) اللي في الكراسة ..

ومشي ..
لكنّه قبل ما يختفي ..
لف وضربني سؤال في مَقتل موقفي العيّان  :- 

هل تُصنع المصاصة للإنسان ؟ 
أم يُصنع الإنسان من المصاصة ؟
..

#حسام_ابراهيم 
يناير / 2020

بم بم (محمود بالفراولة) - حسام ابراهيم

(من مستشفى الصفا)
..
حيران ..
إيه اللي ينفع ليا في القمصان ..
مش يعني
كنت خلقتني أعمى ؟
ماشغلش عيني بأيها اختيارات
ألبس مقلم / سادة أو كاروهات ..
أو أي حاجة
ويبقى فضل ونعمة ..

حيران ..
أسمع أغاني ؟ ،، أسمع القرآن ؟
مش يعني
كنت خلقتني أطرش ؟
مفرش سرير/ لـ منير أو لـ مشاري ..
للنوم و أحيانا حاجات أخرى ..
أتحَط بعد الضُهر ع السفرة ..
قدام منير
فيغني مايسمّيش ..
قدام مشاري
يسمي مايغنّيش ..
مفرش بقى / والصوت مايشغلنيش ..
وكل همي
الشوربة ماتطولنيش ..

حيران ..
المية أحسن ولا قرش حشيش ؟
مش يعني
لو ماخلقتش النخاشيش ..
أو حتى مثلا عندها حساسية ..
جيوب أنفية / بتكره الدخان ..
كان الحشيش هيكون مخدّر سام ..
والمية تبقي صديقة الإنسان ..
والحيرة تصبح زينا / فانية ..

حيران ..
بينك وبين مشواري في الدنيا ..
مش يعني
كنت خلقتني جنبك ؟؟

أو بعتّني للأرض سفرية ..
زي المسافر كاره الغربة ..
لا حد عارفه ولا بيعرف حد ..
مشوار صد رد ..
من مستشفى الولادة ع التربة ..
ع السما دوغري ..

***

كل اللي فات منقول ..
مش حقيقة ..
والـ (مش حقيقة) طعمها مُغري ..
أما الحقيقة في دول ..

أنا يوم ميلادي بعت لك ..
رسالة من مستشفى الصفا ..
بتقول ..

يا رب
لو لسه بينا أي سابق معرفة ..
سيبني أتأخر هنا / كام سنة ..
أو علطول ..

مش عايز أجيلك بدري ..
عايز أحبي، أمشي، أجري ..
عايز أطول
شفايف الممرضة ..
اللي باستني على خدي ..
أو واحدة تشبه لها ..
أو بنتها لو بنتها قدي ..

وأدّيني دايما قد ما أدّي ..
مش عايز أبقى الدنيوي المادي ..
ولا عايز أبقى الزاهد الدرويش
عايز أعيش
معايا كأنها معاييش ..

وأخيرا
بلّغ الأطفال اللي لسه ماجاتش
تنتظر ماتجيش ..

هنا المكان غدار
أقنع الإنسان وأقنع الصرصار
يعيش ..

المُرسِل /
ماعرفش ..
لسه ماسمّونيش ..

..
#سجن_أس_اربعة
أبريل/٢٠١٧

من مستشفى الصفا - حسام ابراهيم / بصوت علي سليم

الذئب البرئ_محمد مرعي/بصوت حسام إبراهيم

• شاعر عامية مصري ، مواليد 14 أبريل 1994 ، محافظة دمياط
• أنهى دراسته الجامعية في الهندسة المدنية / جامعة المنصورة عام 2019
• أصدر ديوانه الأول بعنوان "مفيشاليا" عن دار تويتة للنشر والتوزيع في يناير 2017
• أصدر ديوانه الثاني " سجن أس أربعة " في يناير 2019 والذي حصل به على جائزة أحمد فؤاد نجم في ديسمبر 2019
• أصدر ديوانه الثالث بشيكل فول وبنص طعمية في مارس 2020 ، والذي حصل به على جائزة المجلس الأعلى للثقافة 2020 (الكبرى)
• أصدر ديوانه الرابع البني أشياء عن دار تويتة للنشر والتوزيع في يونيو 2021
• قام بكتابة برنامج مش مسامح حسين الذي تم عرضه في ديسمبر 2021

مسكين يا عبدالله - حسام ابراهيم

Hossam Ibrahim ✪

Recent comments

Osama Mohamed

Osama Mohamed

abdlrhman akram

Related tracks