يوم ولادتي - الطحان

الناس اللي ماحدش فينا شايفهُم في الشارع ..
الناس اللي اتداسِت ..
لا اتحضنت مَرّة
ولا اتباسِت ..
ولا حَد عليهم يوم طبطب .. 
الناس اللي الدنيا يوماتي عليهم بتشطَّب .. 
مع ذلك صِبروا ورِضيُوا .. 

الناس اللي في أحزانهم مالقطهُمش الڤيديو ..
فماحدش ركِّب على معاناتهم أي موسيقى حزينة .. 
فماحدش شافهم فينا .. 
وماحدش شاف الهَم الناشع في اكتافهُم .. 
فماحدش فينا اتأثّر ..
وماحدش فينا على الإنسان اتحسّر .. 

وبقينا نشوف الدنيا جميلة وحلوة وزي الفل .. 
ونسينا النار اللي بتمشي تلسوَع في الكُل .. 
وضحكنا بكُل سذاجة .. 

والناس اللي ماحدش فينا شايفهم في الشارع .. 
ماتوا .. 
وماحدش حَس بحاجة .. 

وامبارح .....
كنت بعيط في الشارع من حاجة ..
والناس كلها كانت بتعيط ..
والعربيات كانت بتعيط ..
وكلاب الشارع بتعيط ..
والشجر المقطوع بيعيط .. 

وعامود النور عيّط .. والنور مابقاش بينوّر ..  

وتصوّر 
ولأول مَرَّة
كان كل الشارع بيعيط 
فماحدش صَوّر ..

...

«ماحدش صوّر»
شعر / يونيو ٢٠٢٤ 


ماحدّش صوّر - حسام ابراهيم

انا و انتى عشنا سوا...
 أيام يمكن ما تتعوضش من تانى..
 شفنا التاريخ...و هو بيتكتب ع الهوا...
 و سبنا الهوى يضربنا ف الخلاط...
 معرفش بكتبلك من الإحباط...
ولّا الأمل...
معرفش إيه العمل....
ف ريحتك اللى مغرقة ورق النتيجة...
و ف الأيام المتعلّمة بمزيكا...
 و ف الشال اللى شال دخنة و شياط و عياط
 و فوارغ المطاط...
و الحى....و الدخان....
أكدب عليكى لو قلتلك ندمان..
لاكن انا عيّان بحب الوطن...
و بذكريات المعركة الدايرة...
و بخوفى م النسيان ...
و بحُبِك إنتى كمان...

قصيدة ورق النتيجة - مصطفى إبراهيم

أنا الدرويش| عبد الرحمن الأبنودي غناء| ناصر عبد السلام ❤️

نشيد الأرض 

لو كان للأرض لسان ..
كانت تتكلم ..
كانت هتنادي عليا ..

كانت هتقوللي 
ماعدتش تمشي فوقيَّا كتير .. 
شوف لك أي سرير للنوم ..
الأرصفة مش سهل تدُوم ..
والأسفلت بيزحف يوم عن يوم على وش الناس ..
بطَّل تعمل مني مداس ..
واوعى تظن ان أنا من غير إحساس ..

أنا زي حبيبتَك نفسي في حضن
ونفسي اتباس ..

اجري و ضِل ..
أنا مش -زي الباص- بالأُجرة ..

لو ماقدرتش بُكره تبيع الضِّل 
بَلاها الشجرة ..

اقطع ..
واحفر ..
وابني عماير ..
واعمل سور ..

زَوِّد في الألوان ..
قَسِّم في الإنسان ..
واقطع نور عمدان السكك الواضْحة ..

واقرا على البساتين الفاتحة ..

وماترميش جوايا البذرة الصالْحة ..
لأني 
ماعدتش طارحة ..

وانت بتجري فوقيَّا 
تأكَّد
إن أنا وأنت في نفس الورطة ..

اللي اخترع العيش في الفرن ..
اخترع الكارتة .. 

واللي اخترع العربيات ..
عَمَل الإشارات ..
والفقرا ..
وعُقد الفُل ..

يا إنسان ..
يا وريث الذُل ..
يا ابن الطين والمَيَّة ..

الشَيْطان مابقاش يسكن تحتيَّا ..
الشَيْطان حواليك ..
لابس شيك .. 
راكب في العربية الماركة ..
دايس فوق كل الخارجين عن طوعُه ..
صورتُه في كل مكان ..

ماتصدَّقش دموعُه ..
مايغرَّكش جموعُه ..
بكره الناس هيجوعوا 
ويرجع تاني لوحدُه 
زي زمان .. 

قبل العالم ..
قبل حكاية كان يا مكان  ..

قبل ما يبقى هناك سلطان أو دولة ..

يمكن بس ساعتها مايتحداش المولى
ويسجد 
للإنسان ..

..
.

"نشيد الأرض"

- حسام إبراهيم
١٤ أبريل/ ٢٠٢٥

نشيد الأرض -حسام إبراهيم

"قوّة الشهداء"
__________
مسحراتى فى الطريق الصعب

منقراتى و كل دقه بقلب

إحنا الشعب

المصرى أول سيرة الإنسان

احنا من صخر العزيق والصبر

واحنا من طل وندى المواويل

زى ما اتعود علينا النيل

زى ما اتعود علينا العطش

يمكن خطأنا فى الزمان الطويل

كان من سبيل الرحمه والحنيه

يصعب علينا فى يوم نفارق عيالنا

 

وماجاش فى بالنا

زى العرق‏:‏ الدم يبنى البيوت

يا اللى الشقا من ست آلاف حبنا

اللى يزرع واللى يصنع خير بيعرف ربنا

واللى يعدل فى نصيب اليتيمه يعرف ربنا

واللى بينوّر طريق المدينه يعرف ربنا

واللى يضرب فى قلوب الأعادى يعرف ربنا

سجدت لله الكريم الهادى

 

والمشى طاب لى

والدق على طبلى

 

مسحراتى من جنود الأرض

منقراتى كل دقه بفرض

أطلب غنايا زى أب ضناه

القدس لاحت فى الطريق حاضناه

يا رب علمنى العطش والجوع

 

واجعل لعينى دموع

واجعل لقلبى ضلوع

واجعلنى صوت الشهيد

فى النبض والتنهيد

شريان فلسطينى شجر مزروع

فى الأرض جدر وفى الليالى فروع

يسمعنى خال فى كل بلده وعم

جرح الملاجىء عمره ما يتلم

تفنى الليالى ولا يبور الدم

ولا طيارات الأمريكان تمنع

 

النور من المصنع

ولا كل ريف تحت السما يسمع

 

طير الحمام يسجع

ولا ابن إنسان الأمل يرضع

ولا ليل شجاع يولد نهار أشجع

 

ولابد يوم أرجع

ويمد فى كل العرب حبلى

 

المشى طاب لى

والدق على طبلى

****
"القدس"
_________
اصحى يا نايم  وحّد الدايم
وقول نويت بكره ان حييت
الشهر صايم والفجر قايم
اصحى يا نايم  وحّد الرزاق
رمضان كريم
مســحـراتى يا مؤمنين
مـنـقـراتى مد الأنين
الله على رعشة الحنين
عمره ما كان الأمل ضنين
يا قدس نوارة السنين
كأن عينى فى ميتمى
يا قدس ما يحتمل دمى
الا أشوفك وأرتمى
وأبوس ترابك المريمى
أبوىَ وابنى على فمى
ما اتوهش يا قدس فى المطال
يا عاصره مهجة الرجال
سقاكِ من دمعته الهلال
يا قدس يا سبحة الشقا
الأعمى فى سجدتك رأى
والفجر من صخرتك سقى
يا قدس تتفجر الجراح
والصبر حرب وأيوب صلاح
يا أخت من مكه والبطاح
قلبى انضرب للعرب وصاح
لابد من فتح فى الصباح
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطـرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
لما تقول أجمل ما فى الدنيا، الميه للعطشان
يعرفوك عربى
أما للراوى ريحة البرتقان فى مداخل يافا
يعرفوك عربى
لما تقول ابنى اتولد لاجئ
يعرفوك عربى
لما تقول يا رب
يعرفوك عربى
لما تباشر جهادك، ترمى أوتادك
فى قلب دابح ولادك
يعرفوك عربى
اصـحى يانايم وحّد الدايم
السعىُ للصوم خيرٌ من النوم
دى ليالى سمحه نجومها سبحه
اصـحى يانايم.. يانايم اصحى
وحّد الرزاق

                              

"قوّة الشهداء" و "القدس" من ديوان المسحراتي - بصوت فؤاد حدّاد

ليه بترجع ؟ ليه بتطلع ؟
و الطبنجة التسعة ميللي ..
فـ اتجاه الراس تملّي ..

كل يوم بتعيش بتدفع .. 
و السنين ماقالتش : خلّي ..

إيه فاضلك أو فاضللي 
في الحياة علشان نعوز ..

قد يكون العوز بروز .. 
قد يجوز مفروض نقصّه ..

في الحروب علشان تفوز ..
روح لعند القلب فُصّه ..

كُلّ قلبك زي نصُّه .. 
بيدُه تماً ..
ماتطاطيش و تسيب بواقي ..

الهزيمة بتيجي ممن قد يكون إنسان هوائي ..

حد لاقي حد عكسه في كل حاجة 
بس زيه .. يا عبيط !!

رغم إني في اتجاه و انت اتجاه ..
رغم إنك لك حياة غير الحياة ..
رغم إني كنت أوفى لما بوعد .. 
رغم إن ما بينا دايما سور و حيط ..

لما ببعد كنت تعمل زيّي تبعد .. 
و أما جيت بصيت لقيتك برضو جيت .. 
و التقيتك جنب مني و زي ضلّي ..

ليه بترجع ؟ ليه بتطلع ؟
و الطبنجة التسعة ميللي 
فـ اتجاه الراس تملّي ..

و الزناد لو دُسته هسمع ..
صوت صريخ الناس عليك 
أو عليا ..

احنا ممكن أه نصنف ..
مين قتيل أو حتى قاتل ..
بس صعب بسرعه نعرف ..
مين من الاتنين ضحية ..

موت في موتة تبقى أتفه م العادية ..
موت يا أسوأ شخص دايما في الرواية ..
قد يكون دلوقتي موتك راحة ليّا .. 
موت و خد أضعف ما فيا .. خُد بكايا .. 
..

في النهاية ..
أمي دخلت فجأة .. قالت :-
إيه يا واد يا أبو عقل فالت !

إيه جرالك .. 
إيه الحكاية ! 
يعني ينفع شحط زيك 
كل يوم يكسر مرايا ؟

سبكتروفوبيا - حسام ابراهيم

في الحرب
قالولنا القادة إننا هنفوز
من قبل ما رُبع سلاحنا يبوظ
ونعوز لإعانة ..

هنفوز علشان ( الله موجود ومعانا ) ..

هنفوز من قبل ما نلبس أي بيادة
وقبل ما حتى ندوس
على رمل الساحة ..

وقالولنا كمان اننا لو موتنا فداء لبيوتنا هيبقى الموت بالراحة ..

وقالولنا إن احنا وحوش وأسود ..
مش أي جنود ..
ومعانا بارود ..
مش أي بارود ..
وجثثنا ماهيطولهاش الدود

علشان الجندي في سِلو بلدنا إن مات .. بيصير جناحات .. ويقوم ويطير ..

القادة قالولنا بإن الحرب يومين بالظبط وتدّي نذير ..
فيدوبك نلحق من دلوقتْ نفوز ع الوقتْ ..
وندهن شَحْم على الجنازير ..
..
وابتدِت الحرب ....
صورايخ م الشرق
وغصن زتون وحمام م الغرب ..

وطيور أبابيبل من عند الرب بتمحي الظالم في المظلوم ..
وف وسط الضرب
لمحت بعيني من الأعداء خنزير بيحوم ..

قنّصت عليه .. وعملت الزووم على نُص عينيه .. وضحكت عليه .. وقتلتُه ..

كات أول مرة أشوف بعينيا الشخص اللي أنا أصبحت ساعتها عليه .. ومازلتُه ..

كات أول مرة أشوف الشر بتاعي في صوتهُ وشكلُه وتوبُه ..
واكتشف ان انا في صباعي شراسة تهِد البيت وتفتفِت طوبُه ..

كات أول مرة أشوف السائد .. وامشي عليه من غير ما انتظر العائد ..
كات أول مرة أموّت شخص
وإخْص على اللي يموّت شخص بإذن القائد ..

كات أول مرة
لذلك رُحت عليه .. فتِّشت جيوبُه ..
من وسط حاجاتُه لقيتني بطلّع ورقة قديمة بقالها سنين مِتعانة ..

مكتوبة برعشة إيد إنسان بِيعاني الفَقْد و عَانا ..
..

ولقيت مكتوب ...... :-

لـ حبيبتي راشيل ..
أنا آسف جداً إني مقصر جداً جداً في المراسيل ..
وماتتضايقيش
وطلاما وعدتك إني هعيش .. والله هعيش ..
ادعيلنا كتير علشان ربنا بيحب دُعاكُم قبل دُعانا ..
وسيبي لي على الترابيظة يوماتي مكان محجوز
وماتستنّيش لو كُنتي جعانة ..
وأخيراً بس عشان الحلوة بتاعتي تفُك البوز ..

امبارح هتف القادة
وقالوا :-
إننا هنفوز ..
من قبل ما رُبع سلاحنا يبوظ ..
ونعوز لإعانة ..
هنفوز علشان ( الله موجود ومعانا ) ..

..
#بشيكل_فول_وبنص_طعمية

وثائقي عن الناجي الوحيد - حسام ابراهيم

(من مستشفى الصفا)
..
حيران ..
إيه اللي ينفع ليا في القمصان ..
مش يعني
كنت خلقتني أعمى ؟
ماشغلش عيني بأيها اختيارات
ألبس مقلم / سادة أو كاروهات ..
أو أي حاجة
ويبقى فضل ونعمة ..

حيران ..
أسمع أغاني ؟ ،، أسمع القرآن ؟
مش يعني
كنت خلقتني أطرش ؟
مفرش سرير/ لـ منير أو لـ مشاري ..
للنوم و أحيانا حاجات أخرى ..
أتحَط بعد الضُهر ع السفرة ..
قدام منير
فيغني مايسمّيش ..
قدام مشاري
يسمي مايغنّيش ..
مفرش بقى / والصوت مايشغلنيش ..
وكل همي
الشوربة ماتطولنيش ..

حيران ..
المية أحسن ولا قرش حشيش ؟
مش يعني
لو ماخلقتش النخاشيش ..
أو حتى مثلا عندها حساسية ..
جيوب أنفية / بتكره الدخان ..
كان الحشيش هيكون مخدّر سام ..
والمية تبقي صديقة الإنسان ..
والحيرة تصبح زينا / فانية ..

حيران ..
بينك وبين مشواري في الدنيا ..
مش يعني
كنت خلقتني جنبك ؟؟

أو بعتّني للأرض سفرية ..
زي المسافر كاره الغربة ..
لا حد عارفه ولا بيعرف حد ..
مشوار صد رد ..
من مستشفى الولادة ع التربة ..
ع السما دوغري ..

***

كل اللي فات منقول ..
مش حقيقة ..
والـ (مش حقيقة) طعمها مُغري ..
أما الحقيقة في دول ..

أنا يوم ميلادي بعت لك ..
رسالة من مستشفى الصفا ..
بتقول ..

يا رب
لو لسه بينا أي سابق معرفة ..
سيبني أتأخر هنا / كام سنة ..
أو علطول ..

مش عايز أجيلك بدري ..
عايز أحبي، أمشي، أجري ..
عايز أطول
شفايف الممرضة ..
اللي باستني على خدي ..
أو واحدة تشبه لها ..
أو بنتها لو بنتها قدي ..

وأدّيني دايما قد ما أدّي ..
مش عايز أبقى الدنيوي المادي ..
ولا عايز أبقى الزاهد الدرويش
عايز أعيش
معايا كأنها معاييش ..

وأخيرا
بلّغ الأطفال اللي لسه ماجاتش
تنتظر ماتجيش ..

هنا المكان غدار
أقنع الإنسان وأقنع الصرصار
يعيش ..

المُرسِل /
ماعرفش ..
لسه ماسمّونيش ..

..
#سجن_أس_اربعة
أبريل/٢٠١٧

من مستشفى الصفا - حسام ابراهيم / بصوت علي سليم

الذئب البرئ_محمد مرعي/بصوت حسام إبراهيم

الشيخ إمام - تكبيرات العيد

• شاعر عامية مصري ، مواليد 14 أبريل 1994 ، محافظة دمياط
• أنهى دراسته الجامعية في الهندسة المدنية / جامعة المنصورة عام 2019
• أصدر ديوانه الأول بعنوان "مفيشاليا" عن دار تويتة للنشر والتوزيع في يناير 2017
• أصدر ديوانه الثاني " سجن أس أربعة " في يناير 2019 والذي حصل به على جائزة أحمد فؤاد نجم في ديسمبر 2019
• أصدر ديوانه الثالث بشيكل فول وبنص طعمية في مارس 2020 ، والذي حصل به على جائزة المجلس الأعلى للثقافة 2020 (الكبرى)
• أصدر ديوانه الرابع البني أشياء عن دار تويتة للنشر والتوزيع في يونيو 2021
• قام بكتابة برنامج مش مسامح حسين الذي تم عرضه في ديسمبر 2021

نشيد الأرض -حسام إبراهيم

Hossam Ibrahim ✪

Related tracks