صحيح انت استشهدت و خسرناك 
لانه ما عاد فينا نشوفك بعد اليوم 
صحيح يمكن متل ما عم يقولوا كتار انك رحت رخيص 
بس لا 
شو بدك 
انت اساسا ما عرفت شو عادوا عملولك من بعد ما متت حقيقة يعني 
هلئ شو بدك ..
خدني انا من برا عم احكي 
الحقيقة يعني عملوا كيف بدي قلك عملوا شي بعد ما نعمل هيك 
هلئ حقيقية ليش ليجي الواحد ما تواخذني يجقجق انه يا با راح على الفاضي 
و منشان شو استشهد و هال الاشياء هايدي ..
لا 
مش هيك القصة ..
انت استشهدت من هون و الله العظيم استنفرت كل الاقسام بكل المناطق
ما عاد استرجى حدا من العباد مد راسه اساسا من الشباك 
و جو رعب ... و صمت ... و وجوم 
هايدا الوجوم يعني اقوى من الصمت 
هايدا صمت بس 3 نجوم 

و خود بقى لحق كيف ما فتلت بكل وسائل العالم تبعهم 3 اذاعات 
نعت ... يعني نعت .. مين عم ينعو .. بعدوا كله لالك 
بعدين نكسوا اعلام الحزب .. كلها كلها اعتبر 
يعني انا عملت فتلة صغيرة كله منكس 

و انطلقوا من حد المركز الرئيسي مسيرة شي فظيع 

ووصلوا فيك لقدام الكنيسة و ساعتها شوف الوجوه 

هادا يالي بيقولوله التاثر البالغ ..سامع عنه انا بس ما عرفت شو هو لحتى شفته 

تأثر بالغ السن القانوني 

ايا تأثر كيف بيقولوله يعني

يعني مفجوعين انت الصادق 

وقفلوك صفين عسكرية على الميلتين .... و عسكرية مش حيا الله يعني ..

ووصلوا بقى رؤسا الاقاليم .. رئيس الشرطة العسكرية .. و المجلس .. و النجدة

وحدات الاشارة .. شو بيعرفني كلهم كلهم كانوا موجودين ...

و لحق بقى على كشافة اسراب كشافة لا عارفة و لا شايفة ليه عم تنشد ما عارفة 
بس عم تنشد و المدرب تبعهم ضرب ولد كف كان قتله لانه شافه ساند على شجرة قال ما عم يمشي
كل الاولاد عم يغنولك يعني ... ما منيح ؟

و اجى وفد من المخاتير .. المخاتير بعدهم طيبين تصور و انت استشهدت 
قليلة هي ... لا مش قليلة ... عظيمة

و الخوري عم يأبنك بالداخل و رئيسك برا ... رئيسك اجى شخصي .. تصور 
وواقف بهي الصقعة اي والله ... واقف و يخطب ما خلى كلمة فيها بتبكي الا ما قالها .. ما منيح 
و فجأة طلع ضرب انئزنا يعني ..لفتنا تاري بلش المدفع 21 طلقة 
يوه وين صاروا 31 طلقة 
شي بلش مدفع تاني من حده 
شو هالدبابات يعني كلهم 
طيب يزتوهم عالضاحية فرد مرة

اساسا هو كرمالك الضرب بس ما حنقلك انو كله كرمالك 

منه كرمالك و منه على اعدائك

ما هنن حلفوا ... بخطاب .. رئيسك قال راح نمشي على دربك ... 

راح نضل اوفياء للوعد و اعدائه و اعدائك 

بلشو بالدفن ينتقمولك 

صار وقف اطلاق ناري 

بعد أخد وعطا

و طلعلك زغلول الدبور 
طلع طلعية انا بعد قديه انا سامع للزغلول بعد ما قايل متلها بحياته 

الله اكبر 

و الشباب طبعا موزعة السطوح حتى ما يصير اي شي يعكر هي الدفن 

هيك لازم يكون الدفن 

هيدا  الدفن

بشرفي يا ريت تكون موجود بدفنك لتشوف لانه الحكي مو متل الشوفة 
هايدا دفن من الاول 

شو بدك 

موت ! 

موت بس .. و خود نتيجة 
..

العقل زينة

زياد الرحبانى | صحيح أنت استشهدت

أنا والقلق وغنيّة ترارارا

هاي قصص عن الناس الي مش كل ليلة بحياتهم إلها قصة

.سأُُعيد تَرتيب المساء بِما يليق بخّيبتي

إياك و ان تسترق السمع .. فقط أمعن ♥️

أدق الباب يا قلبي على قلبي، يقوم الباب والشباك والإسمنت والأحجار.

Anghami: https://open.anghami.com/7dGNWbxe1Sb

“Some people have lives some people have music.”      John Green

AbdalRahman ElGendy Space

زياد الرحبانى | صحيح أنت استشهدت

Eleutheria ἐλευθερία Gendy