مفتتح ..السيرة اطول من العمر يا هواي .
"حمدان"
وشال حمدان علي كتفه.. 
شوال بيه تبن والتاني  .. بقلبه صباي
ووقف بغلته العرجا ..ودلا التبن ..وحط  بجيبه دنياي
وناح ف الجو غراب إسمر علي حيطنا..
فصبغ الدم بهمومه حيطان  بيتنا..
فراح حمدان ..وإللي ف جيبه راح وياه..
وراح يجري غراب حرّاب..وعامل بندقه حمياه
وجوا البيت أنا نضراه
حمدان!
_مبيردش ..منيش سمعاه_
حمدان ؟!
_مجيشي ..مفيش ع الأرض صوت لخطاه_
حمدان؟!!
_مهوش واقف .. منيش شيفاه_
فرد شاله لإمزهر إللي أنا غسلاه ..
سكوت إحمر علي طرفه..
ف وشي خراب..
مصدقتوش ..ممن قبله مصدقتش نواح لغراب
-ميخدوكشي..
وخدو من داري كل الدار!
ميخدوكشي..
وتركو نهاري بلا نوار!
ميخدوكشي ..
وسابولي ..
حمار إعرج ,وشال إخرس ,وتبن حزين .
ومصبرشي..
وخت الصبر جوا جيوبك ورحت لفين!
وتاركني ..
أنا وحدي ..ف وسط الليل هجالة
وتاركني ..ف طين همي أنا شيالة حمالة
 يا ساكن جوا ف وريدي
يا مخلوق من ولد عيني
يا لامم دنيتي ف كفك..
تجيني ناس تعزيني ..
وسارقين طوب حيطان بيتنا..
وسرقو الفاس والبرويطة من غيطنا
وسرقو هدمتي السودا..
من علي حبلي..
وسرقو الحبل ..
والوتد إللي ف حوشنا من قبلي
مسيبني ..تعازي الناس تعذبني
ومين غيره ..يجاوبني!
وتاركني ..ومين وياي!
وتاركني..وتارك بعضه جوا حشاي..
عشان يجي ..
ويتركني ..
ويلبس توب كما الغربان
عشان يجي ..
ويتركني..
وياخد من وسطهم ..حمدان !

السيرة اطول من العمر يا هواي_ أسماء الأصيل

Abo Elzeek D