Amr Hassan

nostalgia ❤

أنا مش كداب
وقت اما رميت الدنيا ف ضهري
وجيت عندك وقفلتي الباب
كان قصدي ساعتها نلِّم دموعنا ونتّبسًِّم
مش قصدي عتاب
انا جيتلك وانا كل ما فيا
بيشوف انك كل ما ليا
ومشيت بمافيش
وحياة الحلو اللي مابيننا
لو كان فيه شيء حلو مابيننا
ماتكدّبينيش
ده انا قلبي بكل ما فيه شايفك
تايه في الرعشة اللي شفايفك بتخبيها
متفائل بيكي وحاسس انك قولتيها
بستني إشارة تكون أي بداية لبكره
وبشوفها بشارة
الضحكة اللي انتي ضحكتيها
انا مش كداب
ولا جيّ اقدّم للسايب
وجع المتساب
انا جاي عشان بس اقولك بزيادة غياب
وان كان فاضل ليا محبه
لو فاضل حب ولو حبّه
اسمعي مني كلامي وحسّيه
انا مش طالب إلا وجودك
حنًِّني والنبي قلب جنودك
عينك ومشاعرك وردودك
وافتحي بابك اللي قفلتيه
انا عمري ماخدت فرص من حد
ودفعت الاتمان الكاملة
انا عمري ماقولت ياريت لو كان
نرجع لزمان
ولا فكرت ف ايه هيكون
من بعد ماكان
بس الموضوع المره دي
يستاهل اجرب من تاني
انا مش عاوز اقدم أسباب
انا جي أقول
انا مش كداب
ف غيابك مهما مشيت ورضيت
وعملت صحاب واغاني وبيت
هفضل مكسور مهما اتلميت
هفضل شارد مهما اتونِّست
ريحتك روحي
بمشي ف أوقات والليل واسع
والناس نايمين والخوف لاسع
بتخيل ايدك مسكاني
وبشوف قفلة عينك ف الضحك
زي ماكنت بشوفها الأول
أتمنى الحاصل ده يطوّل
تتحرك مزيكا بسيطه
شبه الفستان اللي عليكي
اقفل على ايدي بلا ايديكي
يوجعني حنيني ويخنقني
دي اول مرة وعهد الله
اطلب من حد يصدقني
لو كنت اذيتك
انا اسف
اسف على قد مايرضيكي
وان عشت حياتي بقدم أسفي ومايكّفيش
هافضل اقدمه
على قد ما ربنا يديني ف الدنيا واعيش
وان كنتي اذيتي انا مسامح
انا جايب بكره اتفاوض بيه
على حصة وجعك في امبارح
باتخطى سنين ضاعت منّا
من غير ما ادخل حسبة تفاحتك والجنه
وبشوف الصح اللي انا ممكن أعمله دلوقت
اني أوقّف ماراثون الوقت
واجي لحدك واطلب فرصه
فرصه ياست الستات تاني
ليا وليكي
ربنا له حكمه يجمّعنا
وعشان كده كل ما نبعد بلاقيكي
كل مانتخاصم نتصالح
لما توافقي
هيبيع جواهرجي ف يوم خاتم
هيجيب مأذون عشا لولاده
هيزيد مشروب وهيبقى اتنين
ونضيف للدنيا اتنين عشاق
وان موافقتيش
فيه رزق هيبقى انتهى مقطوع
وانتي مترضيش تقطعي ارزاق
بزيادة العند اللي ف طبعك
بزيادة الخوف اللي متابعك
انا مش عاوزك في رهان بايخ
ولا جي ابيع سهم ف بورصه
انا جاي أقولك استاهل
اخد فرصه
صعبه عليكي ؟
فين كرمك
فين فرط ايديكي
ده انتي كريمه وقلبِك سابقك
وانا لسه حبيبك ومصمم
ياهتقبلي حالاً بيّا
ياهعيش باقي حياتي بخانقك
وهخانق كل اللي يفكّر بس يشاغلك
انا قررت ان انتي توافقي
ولغيت كل احتمالات الرفض
انتي الست اللي انا بتمنى
تغلبني التجاعيد ف وجودها
وابقى معاها
واحمي مقامها
انتي الست اللي انا مش مكسوف
انحني
او اعيّط قدامها
وانتي الانسانه اللي انا موجود
علشان تتحقق احلامها
وعشان ألحق حبل غرامها
لو تاه
أو داب
انا جي اطلب ايدك منك
يا ذنوبي اللي القلب بيستغفر
عنّها لو تاب
والله بحبك
وهحبك
وانا مش كداب.

عمرو حسن - أنا مش كداب

م الكون الضخم المتقسم بحر وديان
للقارة السمرا المليانة اشكال و الوان
لبلدنا اللي النيل ف جبينها بيزرع بستان
لمكان وسط القاهرة مأهول زحمة وسكان
للبيت اللي ف زاويته قاعدة اجمل
 واحده باجمل فستان
وبتملي مكان ف كيان الشاب التلاتيني
بهدي ل تالت المرة النص اليها
وبسيب ف ايديها جواب
ف بدايته وحشتيني
ولو كل اللي عارفينك قالولك ان خاب املي
ولو كل الظروف حالفين تفارقيني
وحشتيني
ويوحشني اللي من ريحتك
ولو ورقة
واحب الجاي من طرفك
ولو طلقة
واغير من اي شئ لمسك
ولو شعري
واسامح اي شئ منك
ولو باعني
تودعني الحياة
ومتمناش ف يوم صورتك تودعني
يا وردايه ف جبل روحي
يا اول شمس ف الدنيا
يا شئ well done
يا only one
يا زوجتي الاولي و التانية
معايا حتي ف غيابك
ومش شغلاني اسبابك
شاغلني انك لازلتي بخير
وده معناه بان الدنيا لسه بخير
وان الزهر هيفتح علي غصانه
وان النورس الشارد هيتمتع بشطئانه
وان خيالي هيطاردك باحضانه
ويطلق في سماكي الطير
شاغلني انك لازلتي بخير
ميشغلنيش سوي انك تكوني
كيف ما اقول عنك
وتبقي زي ما ارضالك
وتديني الحياة فرصة اسدد بعض افضالك
ولو كان فاضلك الاكبر بانك يوم قابلتيني
وحشتيني 
وتفضل فيا ذكراكي نسيم عابر
يا اجمل حاجه ف الاشعار
واجمل حاجه ف الشاعر
يا ست الجهر و الاسرار
يا ناعمة و الطريق واعر
بحبك مهما طال البعد
وقلبي عند نفس الوعد
وحتي الفعل من غيرك
كان بنعمله مع بعض
لا عمر نسيت تاريخ بينا
ولا ريحة ولا ذكري
بنام بالليل وكلي طموح
باني المحك بكرة
بتمحي غيابي بوجودك
وايدك تحضن الاوكرة
بقول لو حتي فات العمر
وصرت مسن ف السبعين
تساعني نظرتين عواجيز
وتكفي ضحكتين شايبين
ونسمع حاجه من فيروز
تاخدنا ليوم ما شوفتيني
وحشتيني ولو عيروني بغرامي
وقالوا عليا عايش وهم
اكون الايد إذا كيوبيد
بيطلق ف اتجاهك سهم
ولو عيروني بغرامي
ولو قالوا يعيني حرام
عشقها الواد وتاه فيها
هتبقي غصب عن عينهم
حياتي واغلي معاليها
ولو قالوا ده سحراله
وعملاله عمل بالشوق
ولو قالوا ان انا اتجنيت
بقسوة او بصنعه وذوق
فلو ده سحر انا قابل
ولو ده جنان انا قابل
ولو حبك اثر خمرا
محبش افوق
واه انتي نقط ضعفي
واه حبك علي عيوبك
واه ضلك
واه قلبي اللي فاضلك
واه ديما بطبلك
واه باشارة محسوبك
كلامهم عني مش فارق
ومش هفقد امل ف رجوع
مفيش مواضيع اقولهالك
غير انك وحدك الموضوع
وان حياتي نقصاكي
وقلبي سابني و معاكي
وان عنيا شيفاكي
فاول كرسي ف يميني
بتدي ضحكي للدرويش
عشان يلقي وحشتيني
فلو كل اللي عارفينك 
قالولك اني منفعكيش
ولو كل اللي عارفينك
قالولك بكرة تنسيني 
وحشتيني !!

عمرو حسن - وحشتيني ٣

كان نام ليلتها وام كلثوم لم تنم «جددت حبك ليه بعد الفؤاد ما ارتاح ده الهجر وانت قريب .. قريب مني
كان فيه أمل لوصالك يوم
لكن بعادك ده عني
خلى الفؤاد منك محروم»
كان النهار واسع كأنه حضنها
لون السما يشبه لقمصان المدارس
وكنا مارس
لا الشمس حامية ولا المسا بارد
فلا الصواب محتمل ولا الخطأ وارد
كان كل شيء مختلف.
كان الشيطان معترف بكل شيء عمله
وكان صباح الخير
خرج الشيطان من بيته للشارع
وكإن جسمه بُن م الفاتح
كان الكافيه فاتح
والبشر قافلين
وهى قاعدة وهما مش قاعدين
اخر لقا بينهم قتلها وقتلته
كان حبها فى غيابها كانت نسيته
فضل سنة يشربها بإرادته
وبدون إرادته كان بينسى قهوته.
ضحك الشيطان بالتالى للجرسون
ولم ورقه من على الطاولة
وقال لنفسه :
بعدين معاك طيب ، ماخلصنا م السيرة ،
هنعيد لإمتى ياعم ، ماتخلى عندك دم
وكون شيطان محترم، هتعيش وحيد بينهم
وهما بيك زايدين !
ازاى هتقدر تعجب التانيين،
هما الملايكة الغلابة وحفنة المساكين،
وانت الشيطان الرجيم المجرم الخاين،
هما الزباين هنا وانت اللى مش باين،
سيرتك جناين بترويها النميمة عليك،
وانت اللى طيب زى قاتل تاب،
خرج الشيطان وقتها ثم رد الباب،
بدأوا الزباين نمّ تانى عليه،
ثم استعاذوا بالإله منه.
الوقت جرّاح له تاريخ مضمون
يوسف نسى لاخواته مايضمرون
رغم انهم ألقوه فى بير قاصدين
(وجاءوا أباهم عشاءً يبكون)
الوقت أكتر حرفة م التبرير
ماتقولش إنك كنت كما يوسف
يكفى انهم أنكروا يوم ما اترميت فى البير
كفاية نظرة عينيهم مكسوفين منك
بيحدفوك بالطوب ف مواسم الجمرات
وانت اللى نخلك زمان رطّب لهم تمرات
وانت البسيط المُحاط بدواير الكركبة
(إذ قال يوسف لأبيه يا أبتِ إنى رأيت أحد عشر كوكبا)
قال لك أبوك ماتقولش حلمك حكيت
وكتمت دمعك م الجميع وبقيت
شلال بكا نازل لجُوَّه شديد
لو شافوا قلبك يلمحوا التجاعيد
وان شافوا عينك يفهموا ليه بكيت
مر الشيطان بالليل والدنيا مش هي
كان قتيل قاتل
و كان وتر فى القانون ضل عن أهله
كلٌ مسيّر للى يستاهله
مر ف شوارع تشبهه جداً
شايل ف ضهره ذكريات فاتت
شايل مشاعر حبها وماتت
زى البلاستيك لما يصبح ورد
اللون مزهزه بس روحه فشنك
مر الشيطان الوحيد ثم قال بهدوء :
طوبى لكل وحيد بيصاحب الدنيا
طوبى لكل الصامتين جداً
كل اللى ضحكوا من وريد مقطوع
طوبى لكل فتاة خانها اختيار الحياة
لكل صاحب حكاية عمره ما حكاها
طوبى لنفوس فيه ذكرى جواها
وتبان بتضحك ف الصور بالكدب
طوبى لكل شيطان لم يؤذى غير نفسه
والله يسامح ملايكة ما أذوش سوى الشياطين
ازاى باحبِّك كده
وازاى رأيتك أمى ف دنيا ما اعرفهاش
حضنك سرير وانا طفل وقت النوم
ريحتك مطر على أرض صيف بايرة
الدايرة لما تضمنى إنتي
والبحر لما يردنى إنتي
وانتى الحاجات الصح ف دنيا غلطاتي
انتى الحياة اللى داخلة بْحُب فى حياتي
أنا الشيطان.. آسف
على إنى ما عرفتش.. أبقى كما شئتي
انا شخص صالح ماشى بخطيئتي
باكتب أغانى يرددوها الناس
شاعر صبح شارع
سكنوه بشر تانيين
واد ابن نكتة ومغنِّى بس قلبه حزين
وشيطان ف قلبه آمين
وف ضحكته شكراً.
مر الشيطان والليل
أوشك يكونله نهار
رايح لبيته والصحاب ناموا
رايح يواصل باقى أحلامه
ويقول ياليل بكره تكون أجمل
بكره تكون أنبل
بكره البشر تحضنك حضن بصراحة وقُرب
وبكره تمشى بدون ماتخاف وجود الغُرب
وبكره ممكن افوق ألقاكى فى نهاري
والقانى طير اتكسر وطلع له بيكى جناح
كان الشيطان بينام
وأم كلثوم لم تنم
«جددت حبك ليه بعد الفؤاد ما ارتاح»

عمرو حسن_هكذا قال الشيطان

محمد رشاد - مرسال لحبيبتى

❶ - شوية حاجات في الدماغ
https://soundcloud.com/baraa-nabil2/uwtghguhmmyj
------------------
❷ - مُر الكلام
https://soundcloud.com/baraa_nabil3/nyiguzeorrd7
------------------
❸ - لا أحد يرى
https://soundcloud.com/baraa_nabil4/cazrftlqtmzw
------------------
❹ - تايه وسط حاجات كتير
https://soundcloud.com/baraa_nabil3/conflicts
------------------
❺ - كان عليّ أن أموت صغيرًا
https://soundcloud.com/baraa_nabil4/tlv3kk0okypk
------------------
❻ - لم يحبنا العالم و لم تساعدني مبادئي

https://soundcloud.com/baraa_nabil4/tlv3kk0okypk
------------------
❼ - الشيخوخة - صُبَّ دمعاً في كأسك
https://soundcloud.com/baraa_nabil5/5dqgwojpviek
--------------------
➑ - ما الذي يصنعه العقل بنا ؟
https://soundcloud.com/baraa_nabil5/tzmetez8bzqa
---------------------
❾ الي الهائمين - المشاعر الجميلة وفشل الحفاظ عليها
https://soundcloud.com/baraa_nabil1/e1r4hjn7ldw8
---------------------
❿ انت مش مجنون
https://soundcloud.com/baraa_nabil1/odzxrke6uxn2

❻ - لم يحبنا العالم و لم تساعدني مبادئي

هذا المزج لشخص أعرفه قليلاً ولا يعرفني اسمه ماجد عدنان ولكل من يخبرني انه ينتظر ما اقدمه على السحابات هنا بفارغ الصبر.. كل الحب

Track-list

- مقطع من مسلسل واحة الغروب
- Tahar Soliman - The Prophet
- يا فجر لما تطل - وعد بوحسون
-  امال مثلوثي - مالقيت
-  Michał Ziółkowski - Acceptance
-  رباعي منير بشير - ودّع الصبر
-  Arabic Circus - Karim Baggili
- الليل ملاح - كلمات احمد فؤاد نجم بصوت مصطفى ابراهيم
-  Mono - Nostalagia
- Dhafer Youssef - Tarannoum

للذينَ يتصرفُ ليلُهم بغرابة

شاب بسيط بيحلم انه يبقي حاجة
من منطقة  شعبية فيها ناس كتير محتاجه
زمان قبل ما نعرف التمييز والطبقية
زمان قبل تفريق الناس طبقات بعنصرية
مش هقارن ما بين زماننا والحال أيامه
دلوقتي قيمة الشخص بفلوسه مش باحترامه
سافر الولد برا البلد علشان يأمن مستقبله
واتقي ربنا في شغله ورزقه من اوله 
عدت سنتين واتجوز احلى بنت شافتها عنيه
من اول مرة شافها دعي ربنا تبقي  ليه
وبدأوا بيت صغير طوبة طوبة واحدة واحدة
كانت هيا سنده في برد الغربة والوحدة
وقوام ربنا رزقهم بأحلى بنت في البنات
والرزق زاد بعدها بتلات اخوات ولاد
والبيت كبر ودفي والغريب نسي غربته
بقي في وطنه حضنهم وفي لقاهم فرحته
غلطته انه نسي ان الفرحة مش بدوم
المرض عرف طريقهم بقي بيزورهم كل يوم
الموت قرر يختار اكبر ولد من ولاده
مابيتأخرش عمره بيجي في وقته وفي معاده
ويادوب قدروا يفوقوا من الصدمة اللي كانوا فيها
والموت خطف الصغير في الزيارة اللي بعديها
والحرب قامت في الخليج سنة تسعين
راجعين بكفايانا نعيش متغربين
 
الغربة حال مابينتهيش
 بنتولد و فيها نعيش
مابين غريب جوه بلادي 
وبلاد كتير ماتخصنيش  
 
 
بداية جديدة في مدينة محدش فيها ساكن
سموها نصر صحرا واسعه وشوية مساكن
حاول وعافر دور بس الفرصة مش متاحة
ماليش مكان في بلدي قالها لنفسه وبصراحة
اتغرب تاني وساب حبيبته للأولاد
في كل سبت كانت مكالمة طويلة في المعاد
يطمنهم عليه ويحكي ازاي بيوحشوه
ويرد عليه ولاده يقولوا نفسهم يشوفوه
الغربة مش اختيار لما يكون مفيش حلول
عمر الفراق ما بيقصر دايما بيزيد يطول
وبنفتكر الهدايا راح تعوض الحبايب
مين قال الهدايا تحل محل الغايب
 مرة جواب في صورة مرة شريط في قصة
كل دة مش كفاية اصلك واحشهم لسه
والعمر بيجري طاير زي جري حبيبه ابنه
ورا تاكسي رايح عالمطار زي التاكسي اللي قبله
كان كل مرة يبكي لما ابوه يروح يسافر
وينام في حضنه لما يرجع ايوه انا لسه فاكر
انا فاكر كل كلمة كل تفصيلة وثانية
اصل دي حكاية ابويا مش اي حكاية تانية
تشبه في الحكاوي ياما ناس كتير متغربين
اللي سافروا من شهور واللي هاجروا من سنين
والقصة مش بتخلص أصل الغربة في دمنا
جيل بيسلم جيل واكيد حنسلم اللي بعدنا
 
الغربة حال مابينتهيش
 بنتولد و فيها نعيش
مابين غريب جوه بلادي
 وبلاد كتير ماتخصنيش  
 
قبلنا ومننا ياما حلموا ناس كتير
 حلم بأرض خضراء واسعة وخير في الكون ملوش مثيل
ولما صحيوا من منامهم لقيوا كل الأرض بور
 فتحوا عنيهم في الضلمة ضلمة العقول
اللي في الصخور يكسر واللي منهم قال يقصر
 اللي قصر قام مسافر واللي حاول بعده حصل
 في النهاية دي رسالة كلها تقدير لوالدي
 عاش حياته بيفني عمره علشان اقول عندي وعندي

الغربة - زاب ثروت و ساري هاني و امير عيد 2018 | Al Ghorba - Zap Tharwat ft. Sary Hany & Amir Eid

ريمكس رومانسي

ماحبِتش غيرها 
برغم السنين اللي فاتت عليا 
بيفضل حنين منّي ليها ف عنيا 
وتفضل كإن البنات بعد منها 
نسخ باهتة منها 
وكل الشموس اللي تبعت غيابها 
بتنعي انسحابها 
كإن الشوارع عجين لما مرت 
فنحتت اثرها 
وحفظت كلامها وخوفها وهزارها 
ومشيت جماعه مامشيتش مفرد 
عشان غاب معاها مِساها ونهارها
بتسألني عنها برودة ايديا 
ورعشة سلامي 
ويسألني عنها سكوتي وكلامي 
وحتى كلاب الشوارع بتسأل
وجندي الإشارة 
ويسألني قلبي وكلبي ومرايتي 
وتسألني ساعتي ف معاد الزيارة 
بتوحشني زي العيال ف المدارس لعين امهاتهم 
وتوحشني زي ارتباط الملابس بايد شماعاتهم 
وسايباني زي اللي ماتوا وفضلوا 
بيمشوا ف حياتهم
تشم القلوب كل يوم زهر فايح 
وتتبقى وردة ويفضل عبيرها

ماحبتش غيرها 
وليها مكانه مخليّه قلبي بيسلك دروبها  
خدتني لدرجة تخليني اشوف المزايا ف عيوبها 
وصوتها 
وايه زي صوتها 
نزول المطر فوق خشب بيت قديم 
نعومة نجاة وبحة حليم 
وضحكتها تشبه دخول النسيم 
على ارض طالها الخريف من زمن 
ف يوم ما اتقابلنا 
ماكنتش باشوف الحياه ليها معنى 
وحسيت كإني عارفها لزمن 
كإن النصيب كان بعَدنا وجمعنا
وسددت تمنه وقبضت التمن
بسلم عليها كإني سايبها ف غربة ورجعت 
وسكتت ف لحظتها لكن سِمعت 
وغمضت عيني عشان املى روحي
قمر غاب ف ليلكم ونوّر سطوحي
وصالحتني كل السنين اللي فاتت
مجرد ماعدّت 
وقفنا ف مكاننا وخطاوينا مدِّت 
وفجأة انفجر سيل طويل م الأغاني 
كل ده كان ليه 
ياللي بتسأل عن الحياة 
بعيد عنك 
وسيرة الحب 
كبر الغرام 
بهواك 
حيرت قلبي معاك 
وقولت هاقدر ايوم انساك
وكل ما انساها افتكرها 
ماحبتش غيرها 

ماحستش عمري باحساس مشابه تجاه أي واحدة
كإن الغرام اللي مكتوبلي كامل 
خرج غصب عني وعلى دفعه واحدة 
كِبر فيا معنى 
وصار بيننا لعنه 
بدأت معانا ف يوم ما اجتمعنا
وانا كنت اصغر سنين من كده 
ماكنتش مأمِّن ليغدر زماني  
وعايش مآمن وواقف مكاني 
وشارد ف لون الحياة البرتقاني 
وتارِك بيبان الغياب مفتوحين 
ففاجئتني ضربة على غفله مني 
وسلمت راية ف أول كمين
وفاتت سنين 
واديني كإن اللقا من ثواني
لكني بقيت للأسف حد تاني 
خانتني الظروف واتسجنت ف غيابها 
ولساني ايد ع الاكر عند بابها
وبعد اما كنا شباب ف البداية 
كبرنا سنين جوه شرح الرواية
واصبح مابيننا جبال من جليد 
بلادها بعيد 
وارضي ملاها الحداد والحديد 
وتجاعيدي مرت شقوق الغيطان جوه طمي الوريد 
وأصبحت اكبر 
وأصبحت اعدي الطريق ف الإشارة 
باتقل هدومي وبلبس كوفيّه 
واحس بجروحكوا واوجاعكوا فيّا 
وأصبحت اعقل 
واهدى وأتقل 
وهي كمان حاجه فيها انطفِت 
وعاشت ظروف متعبه واختفِت 
لكن لسه نفس الصبيه الجميله 
وصاحبة ليالي الغرام الطويلة 
ولسه عيون ممكنه مستحيله 
وست البنات كلهن ف عنيا 
ومهما ايدين ناعمه مسكت ايديا 
ومهما عيون ثبتتني ف مكاني 
هتفضل رجولتي وطفولتي عشانها 
مايملاش مكانها ف يوم حد تاني 
ولا واحدة تربط مصيري بمصيرها 
ماحبتش غيرها 

ومايأسش ابداً 
ولو حتى قالوا الحكايه ف اخرها 
ولو صوت صحابي ف وداني محاصرني 
ولو طول غيابها خانقني وعاصرني 
ولو حتى عدت سنين تانية بيننا 
هاقول انه وارد 
وجايز وممكن 
وامنّي خيالي باجمل نهاية 
وهي معايا 
وجايه تعوضني لحظة بكاها بلحظة بكايا
وراجعة بكل الورود اللي دبلت 
والاقيها قبلت تكمل معايا 
ولو ساعه واحدة 
ولو حتى نظرة 
هاحس اني مرة مشيت وانتصرت 
واني جنيت قد لما انتظرت 
فسايب مساحة ف بيتي لخيالها 
وسايب مساحة ف قلبي لعيالها
وسايب اوضتنا ترتبها هي 
وسايب مخدة زيادة وكوفيه 
ومختار اضاءة تلائم عنيها 
وعامل حسابي عليا وعليها 
واقول بكره اجمل وهاقدر وهاكسب 
رهاني ف حاجات كان خيالي خسرها 

ماحبتش وافخر بكونها ف حياتي 
واني ف حياتي ماحبتش غيرها.

لـ princeps 💛👑

محبتش غيرها _ عمرو حسن

محبتنيش
بلاش اكدب على نفسي 
ولا ابرر ولا اصوّر لروحي الوهم 
هيفرق ايه سبب موتي يكون برصاصه ولا بسهم ؟ 
مراية الحب مش عميا
مراية الحب كدابة 
وكان لازم تغيب عني ياسايبه يا اما متسابه 
وكان لازم بنفسي احس 
كان لازم بعيني اشوف
اقابل وشها البارد 
بقلبي الشارد الملهوف 
واغنيلها 
واعيش ليلها 
واقدّف مركبي ف نيلها 
واراهن بالورق كله على اخر رقم كسبان 
دخلت علاقة وانا مستور 
وخارج منها وانا عريان 
وخارج منّها شاكك 
ومش شايل لحد أمان 
ماحبتنيش 
برغم اني وكتاب الله ماقصرتش 
ويوم ماقالتلي عايزه اعرف ما أنكرتش 
ويوم ماقالتلي زعلانه 
مابررتش 
معاها كنت انا التاني وابدّيها 
بنقص من حياتي حاجات وبدّيها 
ولما تمدلي ايديها 
امد ايديا ماسحبهاش 
ماحبتنيش وحبيتها 
ودايرة تقول ماحبتهاش 
غريبة القلب وعمايله 
ده انا لو كنت بعاديني ماكنتش هامشي ناحيتها 
ولو جوايا بكرهني ماكنتش برضه حبيتها 
مافيش عندي سبب واحد يبرر نظرتي ليها 
رسمت سيناريو جوايا وصدقته 
وقولت لنفسي بتحبك وعينها عليك 
ياواد قرّب 
ياواد جرّب
دي لسه ف دنيتك داخله ولسه خيالها متغّرب 
لحد ما مرت الأيام وانا بخسر ف كل قرار
وعشت حياتي بـ اتنازل وتغلط والتمس اعذار 
وكنت حمار 
مفكّر ان لجل الحب نفرّط عادي ف كرامة  
اشوف نمرتها ف موبايلي 
احس شعور غريب جايلي 
وصوتي يتقلب اهدى واطوّل ف الكلام وارغي
وكل كلامها كان منهج مذاكره حتى بالملغي 
وشايف انها كوني وشمسي وضلتي وناسي 
وبتأسف لاكون غلطان ف حاجه عملتها وناسي 
اكلمها عن الحاضر وعن بكره 
وعن بيتنا 
وباخد رأيها دايماً ف علاقتنا 
وهي كلامها كان اخره خلاص وتمام 
صباح الخير 
مساء الخير 
ويلا سلام 
بطلّع منها الكلمة بطلوع الروح 
وكنت باقول وايه يعني في ناس بتحس مش بتبوح 
لقيت افعالها زي كلامها بالواحدة
وبمشي ليها ميت خطوة 
ماتمشيش ليا ولا واحدة 
انا زعلان على نفسي 
عشان شكّيت كده ف نَفسي
ودوست عليا بالجامد عشان واحدة 

ماحبتنيش 
انا يمكن فراغ عادي 
بديل القعده ف النادي 
رواية بس ليها ايدين 
ويمكن كنت توصيلة 
ونقطه بُعد لعلاقتين 
ويمكن كنت بالنسبالها تكفيره 
وعرفتني تسدد دين 
ويمكن أي شيء تاني اكيد عارفاه 
ماسألتشِ وهي بترتكب حبي 
وايه ذنبه اني ابقى معاه ؟
ماحستش بذنب ازاي 
وعاشت تتهم فيّا 
وترميني بتهم ظالمة 
بتطلب مني اطفي النور وتتخانق عشان ضلمه 
وطول الوقت بتشكّك 
وبتفاوض
وبتخانق 
وبتراود 
وبتعاير 
وبتندّم 
كإني باجري وانا واقف 
وفاكر نفسي هاتقدّم 
واديني جريت لحد ماشوفت وضعي ازاي 
ماحبتنيش 
وسايباني شعور ميّت  
بشوف ايه ف الحياه يتعاش 

بـ اعِّد خسايري وانا خارج 
دموعي وخوفي ومشاكلي 
وايامي اللي راحوا بلاش 

لكني باقول انا راضي 
واحط الجملة دي قصادي 
" ده ذنب وجايلي م الماضي بدعوة واحدة مابتنساش "

عمرو حسن_هكذا قال الشيطان

Ahmad Hmada