ده حاجة تانية خالص غير اللي كنت منزلاهم..اتمنى تعجبكم :)


أداء صوتي : زينة قطري
 وده لينك التويتر https://twitter.com/ZeinaCoutry
و الفيسبوك :https://www.facebook.com/zeina.coutry

كلمات: ندى الشبراوى
تقدروا تتابعوها هنا 
فيسبوك : https://www.facebook.com/pages/Nada-El-Shabrawi-Fan-Club/202309503158042?ref=hl
وهنا :https://twitter.com/iMasrya

صوت مرعوش..

عاوزة أفرح بيك
لما أفرح بيكي انتي الأول
اتلم ياواد بتكلم جد
انا عاوزه اتطمن ليك وعليك
والنبي فكّك 
والله عبيط
انا يابني هاروح مش هاقعدلك 
محتاجة اشوفك ساكن بيت
هو انا يعني بنام ف الشارع ؟
ياحمار اديني عقاد نافع 
مش هتجوز انا كده مرتاح
أنا أمي كمنجة وحضن متاح 
ومشاعر معرفش احكيها
أنا متجوز أمي أساساً 
متطمن وانا عايش بيها
أنا كل ما بهرب منها واغيب 
بكتشف إن انا بهرب فيها 
الست دي حالة ماتتكررش
نتغير ..... هي ماتتغيرش
الدنيا تشيلها وتهبدها 
تطلع تنزل
تكسرها تقوم 
أنا أمي أنوثة بـ100 راجل
ورجولة بدرجة ناي مكتوم 
ساعة ماتوفى أبويا وراح 
شوفت ف نظرتها كلام وجراح
من يومها وهي عمود البيت
والآمر دايماً / والناهي 
الدوا جيبته ؟
فاكراني نسيت ؟؟
انا عارفه ان الدنيا تلاهي
احضنها تقوللي امشي يانصاب
بتغيب أيام زي الاغراب 
وتقولي مشاغل وأبصر ايه
انا أصلي بقيت شاعر معروف
قالك معروف .. بأمارة إيه 
كوافيلك تشهد يامهزأ
ف رضاكي يامزة أنا بتلزق 
واخرج على أوضتي شوية وانام 
واسمعها تصلي وتدعيلي
الواد تلفان
انما طيب .. وانت قريب
ارزقه رزق بحجم السماوات 
وارزقه بالخلفة ولاد وبنات
وتنام وتقوم تلاقيني مشيت
فتقوم تبدأ ترويق ف البيت 
أنا اسف جداً ياحبيبتي
علي سفري الدايم والاشغال 
علي كل كلام ضايقك واتقال 
انا مهما بدور وباعيش ف الدور 
باطلع وانزل واجي عليكي 
أنا راجل جداً 
ورجولتي تلخيصها ف بوسة علي ايديكي 
والدنيا ان ضاقت ف انتي براح 
وانا جنبك باتطمن وارتاح 
وخناقنا ساعات بيكون راحة 
وخصامنا كتير بيكون تلكيك 
الأم مكان لسكون الروح
وخضار من قلبك طارح فيك
أيوة ياماما ؟
عاوزة أفرح بيك

قصيدة عاوزه أفرح بيك

كلمات: محمد ابراهيم
الحان: أمنية حسن
بيانو : أحمد وجدي
صولو كمان : تامر مصطفى
توزيع وهندسة صوت : أحمد وجدي
تم التسجيل بـ استوديو 
Talents
.........................
ليه الكمانجا بقلب إسود .. عمره ما بيصفى لـ بيانو ؟! .. ليه هنفضل زى مـ إحنا .. صوره وكتابه ورهان .. ليه الشتا كان وشه غامق .. والحنين واقف مكانوا .. لسه تايه بين عنيا وبين عنيكى فـ المكان ؟! .. ليه هسيبك .. ليه هقرب ؟! .. ليه بحب ساعات أجرب .. إنى امشى فـ سكه أصلا مش باينلى ايه آخرها .. وأما فجأه تضيعى منى .. أعمل انى نسيت وأقول .. عادى يعنى زى غيرها ! .. احضنينى قبل اما تمشى .. لو ضرورى تودعينى ..وإحفرى صورتك فـ عينى .. وإبكى على كتف اللى بينا لو خلاص هتضيعينى .. وإدى ضهرك ليا وامشى .. فـ المطر ومترجعيش .. يمكن انسى ان انتى مُتى وأقتنع انى هعيش

ليه الكمانجــا (original )

كلمات : محمد ابراهيم
لحن : أمير يوسف
توزيع موسيقي و هندسه صوتيه : أحمد حبيب
عود : مروان أنور 
كمان : أحمد مختار
ناي : محمد رمضان
جيتار : أحمد حبيب

Ameer Youssef & Zahra Mohammed ::  علمني أشتاق

كُنا سبعة

ويّا بعض نروح و نيجي

أي وقت و أي حتة ...

جامعه ماشي

قهوه ماشي

أي هلس و رمي جِتة ...

بس من بعد الشهادة

كُلُه كان عَمّال يعافِر

شال هدومُه و راح مسافِر

خَد هُمومُه و سابنا سِتة ...

ساب جاكِتة لـ حَد فينا

و قالُه ذِكرى

رد قالُه عُمري ما انسا ..

شالها عندُه و يوم جوازُه

كان لابسها و سابنا خمسة ..

فات شهور و عملنا حادثة

كان سببها الصربعة ...

طيش شباب و هزار سواقه

و ضحك فاضي و مرقعة ..

و التمن كان حَد غالي

مات و سابنا أربعة ...

صدمة كانت مُفجِعة

لمّا فُقنا قالولنا مات ..

و أما واحد فينا كَمِّل

باقي عُمرُه بعُكازات ..

كان بيمشي تاتا تاتا

و الألَم خلّاه يسيبنا

للخطاوى إحنا التلاتة ...

بالمعارف و الوساطة

و الرشاوي و الهدايا ..

جالُه تعيين وجه قِبلي

راح و ساب واحِد معايا ..

و النهاية

نيجي ع القهوة و نحكي

مَرّه كُل فين و فين ..

و المسافة تزيد ما بيننا

و الشهور بتجيب سنين ..

باقي مين ؟

غير حنين الروح و دَمعه

و صُورَه كانت باقيه عندي ...

و أفتِكر لو شُفت جامعه

ولّا جمب القهوة أعَدّي ...

إن إحنا كُنا سبعة

و إني في الآخر لوحدي ...

‫#‏نبيل‬ عبدالحميد

‫#‏خالد_المصرى

كُنّا سبعة لـ نبيل عبد الحميد

عن حدوته الحب الأول .. اللى عمرها ما خلصت بالجواز .. و عن الصدفه اللى بتجمعنا بناس كنا ما صدقنا نسيناهم 


_________________________________________________________

كان يوم عادي

سبتها من ست سنين فاتو ..	
_دلوقتى انا متجوّز غيرها _ 

مبحسش ناحيتها بحاجه 
مع ذلك و الله فاكرها 
ده لإن الجرح اللى يعلم 
عمره ما بيروح ..

مشهد متعاد .. 
بصيت لمراتى و قولتلها 
" بابك مفتوح "

فتحت بابها و قفلته تانى
بس يا سيدى  
مسكت إيدى .. و قالتلى 
هنسهر فين طيب ؟!
" ودينا مكان يبقى قريب "
علشان الزحمه وضيق الوقت 
و عشان مش حابه ان انت تسوق
شكلك مخنوق ..
رديت " أبدا " .. مضغوط 
و الشغل مهوش ماشى ..
ردت ماشى .. 
ودينا كافيه نشرب حاجه 
محتاجه أحس ان انا جنبك 
_ انا نايمه إمبارح زعلانه _
جه الوقت تكفر عن ذنبك 
قولتلها خلاص قلبك أبيض 
فـ قالتلى لا أبيض ولا ألوان 
ودينى مكان ..
 ويكون هادى 
ولحد الآن اليوم " عادى "
و مكانش فـ بالى انه هيقلب 
بحنين و بشوق ..
نازلين بهدوء 
و لقيتها قصادى معديه ..
معقوله بجد تكون هى ؟!!!!

معقوله الست سنين عدوا 
وبقينا بعاد 
" مشهد متعاد " 

و انا قاعد باصص لمراتى ..
_مزيكا حزينه بصوت واطى _
تقتحم المشهد و انا سارح 
و الوقت بيرجع ست سنين 
و كأنى مودعها إمبارح 
قاعد فـ كافيه و فـ إيدى كتاب ..
تدخل مـ الباب 
و فـ إيديها إكياس فيها هدايا ..
و حاجات انا كنت جايبهالها 
_ الشك بيكبر جوايا _
مستنى تقرب و أسألها 
فـ تقرب   و انا دقات قلبى 
عماله تزيد ..
الشك بيتحول تأكيد 
و بتسحب روحى مع الكرسى 
و بتقعد و تكلم عينى 
بنظرات مقدرتش أحللها 
و بتمسك ايدى و تفتحها 
و تحط الدبله و تقفلها  
و تعيد فـ كلام معناه مفهوم 
و تقول " معلش  انا لازم أقوم "
و المشهد يقلب تراجيديا 
وسواد متغلف بكوميديا 
ودراما فـ فيلم إسمه الدنيا
وده حالنا وحال كل العايشين 
 الحب اللى بيكبر فـ سنين 
يتهد فـ جزء من الثانيه 
ومحدش عارف ايه الأسباب 
 ومحدش عارف مين مسؤل 
يقطع سرحانى سؤال ..
بيقول ..
مالك يا حبيبى سرحت فـ إيه ؟!
_ أبدا يا حبيبتى انا مش سرحان _
انا بس فصلت عشان تعبان 
و أتنهد و انا ماسك إيدها 
و أوعدها انى أفضل أسعدها
و أضحك و أسأل بتحبينى ؟!
فترد تقول " طبعا يعنى "
مع انك بتطلع عينى 
وبسببك قلبى بيوجعنى 
 
" نكديه بطبعك هعمل ايه "
و مشاكلك فـ الغالب تافهه
فتقولى اسم الله و نتعاير  
و أطلع مـ العلبه سيجاره
فتمد اديها و تخطفها 
و تقولى بلاش شرب سجاير
عارف ؟! .. 
انا عمرى ما حسيت بأمومتى ..
غير و قت ما حبيتك جدا 
من قبل ما نتجوز حتى ..
بدعيلك و الفجر بيدن 
و كأنك إبنى اللى انا بنته 
ومسنوده عليه .. وماسكاه 
فـ إيدى ..
كل الموضوع ان انا عايزه 
أتدلع و أتحب يا سيدى 
حقك .. و الله انا حبيتك 
حسيت انك فعلا بنتى 
مع انى مكنتش متخيل 
اللى أتجوزها تكون انتى 
ده لأن انا و انتى زمان كنا 
إتنين إصحاب يدوا نصايح 
يا بنمسك دايما فـ خناق بعض
يا بنمسك على بعض فضايح
ومكانش فـ بالى ان قلوبنا 
مشاعرها فـ لحظه هتتحول 
و أكتشف ان انا بعد ده كله 
حبيتك انتى من الأول  
أيوه الواقع عمره ما كان 
يشبه للأفلام يا جماعه |
لو دققنا فـ كل الناس 
هنشوف كل الناس متباعه 
واحد سايب واحده وواحده 
سايبه فـ واحد سايب غيرها 
آه الأحاسيس فـ الأول حلوه 
بس وجعها يبان فـ آخرها 
الجارح بكره هيتجرح 
و المجروح ده مسيره يخف
كلنا أدوارنا بتتبدل 
طول مالأيام دايره تلف


كان يوم عادى _  محمد ابراهيم

واخد على خاطرك م الدنيا 
مشتاق لحاجات تاهت جواك 
انا قبي معاك علشان زيك 
جوايا كلام 
وف قلبي زحام 
انا زيك خام مليان تجاعيد 
وبتعمل نفسك زيي سعيد 

ييجي الشتا يصحيك ويفوّقك لحاجات
يصحي النايم فيك وتبتدي الحكايات
أوقات وناس وطريق 
وصديق ماعادش صديق 
وحبيبه وقت الضيق رفضن تقرّب ليك 
والصعب ف الموضوع ان ف رقبتك ناس 
حتى البكا ممنوع  
مانيكان كده وخلاص 

الوحدة أقرب ليك من أي ناس تانية 
صدقني مش عيب فيك العيب على الدنيا

كلمات : عمرو حسن 
ألحان : كريم جوهر 
غناء : أحمد فوزي 
بيانو : كريم جوهر 
تشيلو : نور الشامي 
ستوديو live

أحمد فوزي _ واخد على خاطرك

قصيدة مكتبهاش نزار


جيت لي صاحب وحبيته
زقنى فى المترو زقيته 
ولما مات فيا ومُت أنا فيه 
روحت له بيته وعزيته !!

حُزن يا بقال ورا الجامع
هات بنص ريال عسل فى الكوز 
ده اللى كان عيل بقى شاعر
واللي كان ضاحك بقى أراجوز 

حبني الشارع وحبيته 
عض قلبي الليل وعضيته 
خضني الأنسان وخضيته 
لما بان من وشه عفاريته 

عدى فيا القمح سمرنى 
عدى فيا الفجر صبرنى 
عدى فيا الحزن غيرنى 
عدى فيا العمر كبرنى 

خدني م اللفة لمريلتي
خدني م التسنين لحصالتي 
خدني من مدرستي ع الجامعة
خدني م الترعة على الاسفلت

خدت م الأوتوبيس مراياته 
خدت م السواق حكاياته 
خدت م الركاب تذاكر موت 

حزن يا بقال ورا الجامع
هات بنص ريال عسل فى الكوز 
ده اللي كان عيل بقى شاعر
واللي كان ضاحك بقى أراجوز

ياللي واحشاني ما توحشينيش 
ضحكك السكر محلانيش 
خوفت م المطرة قفلت الشيش 
ليه فضل أسمك على الشبااااك؟!!!

كنت جايب دبلة وغويشة
كنت شارب حاجة مغشوشة 
شفت شبهك قاعدة في الكوشة
قلت هي ... لا مش هي 

فتشتنى الدمعة عن المية
كنت أنشف من حطب محرووووووق 

حزن يا محول خطوط سيرى 
حزن يا عطار فى باب اللوووووق 

شوف لي تحويجة لتفسيري
حط ريحة بُن لضميري
شوف لي عود أصلب من المغشوووووش

حزن يا بقال ورا الجامع 
هات بنص ريال عسل فى الكوووز 
ده اللى كان عيل بقى شاعر
واللى كان ضاحك بقى أراجووووز


ردني عالباب عطب روحي 
جاب لي ناي وزيتونة مطروحي 

جيت لي صاحب وحبيته
زقني في المترو زقيته 
وأما مات فيا ومُت أنا فيه 
روحت له بيته وعزيته

ردني عالباب عطب روحي
جاب لي ناي وزيتونة مطروحي
مُر أنا يا صاحبي لو دوقتني 
جيت أقول الآه ما صدقتني

يطرح إيه الملح غير مالح 
يطلع إيه م الجرح غير مجرووووح 

ليه ما تصفاشي لغير صافي؟ 
ليه فى عز الحوجة بتجافي؟
شوفتني غاطس ولا طافي؟ 
كنت بنده لك حلاوة رووووح 

حزن يا بقال ورا الجامع
هات بنص ريال عسل فى الكووووز 

خد سنين الجري وسنينى 
هات لي سن غزال دهب عيني 
قطَّع الأسفلت شراييني 
هات بياض القُطن شاش اللووووز 

حزن يا بقال ورا الجامع 
هات بنص ريال عسل فى الكوز 
ده اللى كان عيل بقى شاعر 
واللى كان ضاحك بقى أراجوز

سيرة أراجوز - فرقة عمدان نور

فبراير ٦٦

خارج من الحاره 
ببنطلونه الچينز وجزمته الباتا 
وعيونه طالعه من سباق لسباق
الشمس ساعة حيط ف ضهر الحي
وهو جي ما بين لقا وفراق 
كإنه دي ستيفانو / مش يحيي
وكإننا ف أسبانيا 
مش في بولاق

الصبح يخرج من شقوق الحيط 
 عيون بتحدف نفسها للساحه 
وهو يلعب كورته بالمرتاح
زي "انت عمري"
 لما بتتعزف مرتاحه
الليلة لعب ويحيي حاضر 
يبقي فيه كوره
الحي كله بيقضي اشغاله 
وبينهي حاله قبل بعد الضهر 
والناس بتحجز مكانها زي ف السيما 
الماتش لو فيه يحيي
يبقي كومبليه 
ودي مش بحيرة البجع 
دي كورة يابتوع الباليه 
الصبح نقاش 
والعصر فلتة زمانه ونجم منطقته
برضه النقاشه فيها فوره وماتش
وان كنت حريف هتعرف تدفع الديّة
الاسطي يحيي زي يحيي الكوتش 
لتنين فراودة
 والاتنين صنايعية

" العب يا يحيي " 
  الصوت بيمشي زي خيط العنكبوت 
م الشوارع
للنواصي 
للحواري 
للبيوت 
الولايا ف الغسيل 
يرموا المشابك ع الفريق الخصم 
والقهاوي تفتح الرهانات علي الاخر
موسم رياضي طويل وفاخر 
وانتعاشة لكل أرباب المصالح والمطارح 
العيال بيقلدوا يحيي ف شكله 
وف مشاكله 
ف القميص الكحلي وف شعره الكنيش
والمعافره عشان بلن جه من مافيش 
كان فتي أحلام بنات الحي كله 
يسرقوه من نظرته ويعاكسوا ضله 
كل واحدة تنام وبالها شاغله يحيي
والعيون ف الددنيا توسع بعد صيته 
النوادي كلها كانت ف بيته 
يخطبوا وِدُّه وحديته
والحياة بدآت تنور
واللي جاي باين هيضحك 
للي رجله ف راسه واصله بدون وساطه

فيه حاجات أكبر كتير بدأت تقوله 
ان فيه أوسع كتير من جزمة باتا

أغسطس ٦٨

نادي البلاستيك خد بطولة دوري شركات المناطق
والسبب هداف جديد جاي من بولاق 
ما في ماتش بدون ماسجل أو صنع هدفين تلاته 
راس فاروق جعفر ورجل حسن شحاته
الفلوس بدأت تزيد
خدله مطرح مش بعيد
اوضه اه 
بس شِرحه 
واما جاب جون النهائي
جابله خالد بيه النشرتي لادا زرقا
كل شيء كان ماشي أجمل من دخول العيد 
لحد ما قرر مدافع شركة السكة الحديد
ينهي كل مشاهد الفيلم السعيد
يحيي متشخص بكسر هيجبره
يبقي فجأة 
أمين مخازن شركة في الوادي الجديد

يا الحياة 
يا غريبة الشكل واللون المقاصد 
عمري مامشيت فيكي قاصد 
كلمتين ف الصدر خرجوا بيوجعوه 
الألم فجأة بقا أمه وابوه 
والسجاير صاحبته علي غفله منه
كان كإنه بيتسرق من عمره بونط
ادي اللي كان من ساعة شارب فرح عمره 
صار مجرد صدر ينفع تسكنه البلمونت

لما واسطه اتوفّرت علشان يعود للقاهرة
كان كإنه غريب عليها 
كان دخوله بولاق مغامرة كبيره منه 
ف المكان ده كل شيء خد حته منه 
شبّهوا الناس من بعيد 
خبّي وشه بكف إيد
وامّا روح مطّر الجرح اللي ساكنه ف حضن أمه 
كل آه خرّجها صحِت بيت بناسه 
كل دمعه غرقت مطرح بأهله
ادي صعب العمر سهله 
وادي حلم كإنه م الأول سراب 
اللي فاضل
 ان يحيي يعيش مناضل 
يمحي حزنه 
بالاغاني 
والشوارع
 والصحاب 

أكتوبر ٩٩

كوبري قصر النيل ف ساعة مغربية 
كاميرا مان ومذيعه سمجه 
بيعملوا تقرير مع بياع بطاطا 
شخص ف الخمسين مكافح 
سُمرته فشلت تداري كسرته من جرح سابق 
ضحكته ماسابتش وشه طول كلامهم

- عم يحيي .. تحب تهدي حاجه ف نهاية حوارنا ؟
كان ف باله يقول كلام متحاش ومنعه 
ابتسم وبإيد شكرها 
وبإيديه التانية دوّقها البطاطا
فات عليه تلاتين سنه من يوم ماجاب جونه الأخير
النهاردة فيه رونالدو لعيب كويس 
وفيه زيدان 
كان تملي يحكي ويّا الناس زباينه 
عن لعيبة الكورة 
وتاريخ الحكايه 
بس كان دايماً يقول 
مهما مر لعيبه ف العالم وعدوا 
مش هييجي زي مارادونا العجيب 
أوضته معجونة بصوره
ع الدولاب 
وف مراية الحوض 
جنب شباك السرير 
وحتي ع التلاجه فيه مارادونا برضه
لما مر ف يوم لبيته قبل نص الليل بساعه 
بص بعنيه شاف جماعه بيلعبوا ف الحارة كورة 
شيء ف روحه شدّه يحضر بس فوره 
واما داري وجوده عنهم 
وانزوي ف مساحه ضلمه
كورة شارده من مهاجم 
جابها حظه تحت رجله 
وافتكر كل السنين من لمسه واحده 

نص ساعه 
حي كامل كان بيتفرّج علي بياع بطاطا 
بيخلي كورة تحل ف ايديه شعرها 
خرجوا سكان العماير 
شغلوا كل البلكونات 
والبنات كان ف عينهم نظرة الإعجاب بعينها  
والهتاف بيعود لجسمه 
عم يحيي رد اسمه 
خد حقوقه كامله في عيون مشدوداله

في مدافع 
ملعون دلوقتي 
عن مُجمل غُشمه وإهماله

وفيه نجم بيحضر 
بالصدفه
ف الشارع 
ماتش اعتزاله.

#الحريف

قصيدة الحريف عمرو حسن من حفل الساقية 2019

ولآن دلعك ف هواك آتلفك ولأن طمعك في هواك كلفك ولأن زهدك في النصوص ألفك صعب إنك انت تلقى مين ينصفك.. 

قصيدة عاوزه أفرح بيك

Ahmed Fawziii