دبّوزة - a beer

Dépression , Quand Tu Nous Tiens

Deborah

Tetfaker - Bendir Man

قداش عندي على السنين الجوهري و خشم البندق 
عينيك زيانو و شلاغمك كي البي في زمانو
 كنت بالدنقري البالح لا جيت لا صالح لا طالح
سبادري غزالة و تصويرة تحت المنقالة و امي تراك فصالة و بابا يشوفك سيد الرجالة
 فيبالك يا مدبل حبك في جواجيا مخبل 
فيبالك الي نموت على شعرك لمغوف و لكلام الي في فمك صوف
و نحب فيك هبالك و وشامك و احلامك 
و نحب فيك السروال لمقطع و السورية لمجعبة و السيقارو البين و تخرج من فمك بعد الكفرة امين و نحبك يا منتف  يا ضعيف يا طريف يا شطر لفة يا لي دمك يقطر ضمار و خفة 
يالي رقدت بيك و صبحت عليك و قمت مفجوعة من كذبك يا كافر ملكوعة  
تي شبيك تبدلت و تحولت كيف دارت في يديك لكعب 
تي شبيك وليت تحب تشريني و تغنيني تي ويني لقصايد و امل دنقل و لا تصالح و فمك لبنين المالح ؟
و كسكروت خمج و اللعب في قهاوي لمدينة و الهرج و العجة و تحكيلي عالهجة 
وينو سروالك لمقطع و مريولك لمشلفح و من زنقة 
 لزقنة تجيني تتطلفح 
وينو الاتحاد و النضال و اليسار تي شبيك وليت قواد ؟                                                             شصار عليك بدلك عليا ملي كنت تلقى لهبالنا ثنية 
شبيني ماعادش نعجب ماعادش نوهر و معادش تقدر؟
ويني ليالينا و العرك و المعروك و لكلام المتروك و مساطتك و بلادتك و الخمسة لي شريتهالي و التاريخ لي حكيتهولي و شبابي لي فكيتهولي ؟         
وينو تاليفونك في الليل و خوفك عليا 
وينو تفلسيفك لي موش مفهوم و بدنك لي موش مخدوم  
ويني اسرارك و بوسك و هبالك و نواحك و غرادك و خراك ؟  تي وينك ؟
ماعادش فمة بوسة الجبين و تذبيلة العين و المخ الخامج و الغشة و ربحتك في الرامي باخر فرشة 
كبرت و خليتني صغيرة نتغبن ، انا كنت في هبالك نتفنن
مخيبك ملي لميتهم رزز ، مخيبها عليك عيشة لكرز ..

Music:  Mine is the Grandeur - Dark Tranquillity

وينك ؟

Lobna Noomane "Touba"  توبة كان نعود اتبعك

نحبّكْ
صوت و نص : سيرين السوسي
________________________
نحبّكْ كي تضحكْ قدّامي و إنْت هاززْ على كتافكْ حملْ جبلْ ، *نحبّكْ كي تدرّقْ عليّا محاينكْ باشْ ما تحيّرْنيشْ و إنْت هرّاتكْ الوقْفهْ قدّامْ التّعبْ ، نحبّكْ كي تحكيلي بتنهيدةْ عينيكْ قدّاشْ ماخو في خاطركْ مالدّنيا و تهربْ منْها لصدْري ، نحبّكْ كي تتواحشْني وسطْ مشاغلكْ و ما نضيعْ على بالكْ حتّى تنْفيسهْ ، نحبّكْ كي تبدّلْ سمايلكْ الواعرهْ بصمايلْ مسرارهْ و تضمّني تحْتْ جناحكْ و نطيرو من سواني محاينكْ ، نحبّكْ كي تراني الدّنيا اللي بيها و ليها عايشْ ، نحبّكْ كي يشامي عليكْ الوطى متشمّتْ و إنْت تعنكشْ في السّما و تطلعلْها و يدّي في يدّك ، نحبّكْ كي تخيّطني ليكْ بتعنيقهْ تخبّلّْ جواجيّا ، نحبّكْ كي نقلّك نحبّكْ و بغزْرهْ بريحةْ البنّْ المعتّقْ تقلّي " زيدْني منْها" ، نحبّكْ كي تغْمزْ قلْبي بالنّفسْ و تزيلْفو كالشمعةْ إذا حدّْ غلطْ و مسّها حتّى بطرْطوشهْ ، نحبّكْ كي جرْحْ الفلّهْ يتداوى على كتْفي برفّهْ ، نحبّكْ كي نحيّرْ فيكْ صغْركْ و ترجعْ في عينيّا في قماطكْ و نكتبكْ على وراقْ بيضْ ، نحبّكْ كي يفيقْ في وسطكْ كلامْ يمهمشْ اللّسانْ و الوذنْ و يضيعْ في الثنيّهْ ، نحبّكْ كي نقلّكْ تاجْ راسي و إنْت تناديني "المسميّهْ" ، نحبّكْ كيفْ تحوزْني و تمكنّي و تهفْهفْ فيّا شقاكْ المخبّي . نحبّكْ قدّْ التّعبْ ، نحبّكْ قَدْ ما تطوّحْ بالحبّْ في الكتبْ ، نحبّكْ حبّْ لعّابْ ، نحبّكْ حبّْ مبدّعْ منْ زمانْ الغفلهْ ؛ زمانْ الزّهْو و الطّربْ و تصاورْ الأبيضْ و أكحلْ ، و زلاّط المدبيّهْ ، و التّشيطينْ ، نحبّكْ حبّْ مڤدي و مڤدودْ ، مترشّقْ و مرشوقْ ، حامي و دامي ، يفحْفحْ بروايحْ الفجاري و البكريّهْ و تشيطينْ الشّميسهْ عڤْبْ عشيّهْ ..
نحبّكْ يا درّي , يا نو في الكنين مرصوص و مخبّي..

نحبّكْ

نحب ننسى 
منجمتش ننسى 
محسبتش بصحيح وبقيت حابسة
كي البونية الكابسة
النوارة ميتة يابسة
وجوه تضحك وقلوب عابسة
فكني أعتقني 
[Oumayma.A]
(مستوحى من البرجوازي الفقير)

تخلويضي

نحب نرجع مللول
خدي أحمر و ماعنديش ظوافر 
شعري أرطب و يديا صغار ما يشدوش لكورة 
نرجع لركايب المزلوعة مالطياح و اللعب في البطحة مع الذكورة 
نحب نرجع للصفحة البيضاء الي كانت في مخي
الي فيسع تتفسخ منها طريحة أمي 
و نبزة بابا 
و يتفسخ منها أول نحبك و أول محلاك
أول حل شعرك
و البس روبة ، تي هات بوسه شبيك مزروبة 
نرجع للنسخة لولة 
تحت لمطر مبلولة ، 
جابلي سحابة تغطيني ، قتلو يعيشك خلي لمطر ترويني 
نروح على سقاي و نغني الحيا حلوة بس نفهمها 
و يا ريتني ما فهمتك 
حبارك ما يتفسخش كي الوشام 
أكحل مدرغم ظلام 
كل حرف باش يعيش معايا و يموت فيا 
كل بوسة طبعتها فيا 
كل حلم دفنتو في جواجيا 
كل غنايا دندناها 
و كل ثنية بدلناها 
و قطعة نحيناها 
كل عركة و كل كلمة دونية 
و كل ما ترضيني و تقلي لا ينحيك عليا 
عبيتها تصاور و زرزقتها بدموعي 
حرقتها لهبتها بشموعي و نار كي تمسها تحرق لحمي من داخل و
تخلي أمارة 
لا لعمر يحب يرجع و لا الصفحة تحب تنضاف 
و لا حب لحمي يبرا و الحمل يخفاف 
لحيوط ضياقت و ما نجمش ندور راسي و نشوف ورايا 
و كان درت و شفت 
باش نشوف تصويرتي ... في مرايا *
ياسمين الماجري
Music : Gladiator - Now We Are Free (Piano Version)

Miroir

Lyrics and Vocalization: Wassim Amor
Background Music: Schindler's list - Main Theme
Wallpaper: Denis Forkas - Children Praying in the Dark
____________
Lyrics:
اللي الداخل مني مدفون
مردوم بسنين و عباد
سر من أسرار الكون
نفخة روح هبات
*
المخ ولى ينسى
و العينين ولت ترا معاش تشوف
فرغت حتى م الحروف
مالكلمات
لي كنت نهز بيها العروشات
نحرك القلوب
و نعنق الموجوعين

مساطت الحكيات
فناجن قهوة بايتين 
اعقاب دخان.. 
غطيان مفرتين
نوم مكسر
و جفون محوقين.. 
و الحجات الصغيرة..
لي كانت تصبيرة
بين الخنقة و الوجيعة
معاش لا تتحس لا تصبر..
*
الألوان بهتت
الأنفاس همدت
و الشعلة ولت رماد مطفية
الأيامات هي هي
نهار واحد
 مهما تبدلت فيه حجات
هو نفسو يتعاود
محسوب عالعمر شهور و سنين

فمّا حاجة في العينين..
رمشتهم فيها خريف
غزرتهم فيها برود 
النبرة غلبها السكوت
و الكلام فرغ مالمحبة و الدفا
فما حاجة غالطة هنا.. 
في صدري.. 
في بدني
ديما تاعب
يوجع و غالبو النوم

فما عُقد و هموم
خانقة الطموح
مكتفة الجموح
حابسة الروح
في أطراف البدن
*
كلامهم السم
يخثر الفن و يقتل الرغبة

اغزر لحالتك
متكور في حفرة
ميت بالحيا
تتنفس 
أما النور في صدرك طفى

محصور في تركينة
أصواتهم السكينة 
كل مرة تقص منك شوية
تحير الندوب المنسية
و الجروح لي ماتسكرتش
محبوس من وقت الحلمة لي ماكملتش

الباب محلول 
 اما انت مشلول بصوتهم يرن في وذنيك 
بنفس المشاهد لي تتعاود
كل ما تسرح والا تغمض عينيك

غارق في الظلام
تسمع في صوت ألوان البرة
تتخلق و تتشكل
أما بدنك مشكل و متكتف بيك
روحك مخدرة
صدى صوت غارق ينادي فيك
و انت تتخبط وحدك و تلاجي
لسانك معقود روحك تناجي
انا مش هكا هذا مش أنا
أنا أحلامي كبار
و عينيا مليانة
بمحبة و دفى و بتبسيمة
كنت ديما نغلب الحكايات القديمة
و كل مانطيح نقوم خير 
كنت ناخو بيد الموجوعين 
و نوصفلهم الدوا
تخنقت مالقعدة هنا 
نحب نخرج للنور 
نتحرر
 نشق سماوات و بحور

تتخبط و تفارع و تصيح
و صياحك صدى
يضرب في حيوط صدرك الباردة و يطيح

صياحك سكات 
معبي حكايات 
يعرفها كان الليل
حد مايعرف وين تسرح في شرودك
و لا سكات الليل شيعمل في حدودك
وصوت البحر و نسمة الفجر
الوجوه تتبدل عالعتبات.
و انت على كل عتبة بوجه..

*** 

اليدين لي تتمد سراب ليهم و ليك
حد ما بش ينجم يخرجك والا يحميك
حد ما بالحق بش يحس بيك 
و يفهم العقد المدفونة
 و الحكايات المخبية
  و الروح المسكونة
 بخيالات و رؤى
 بحجات عباتك 
ملي كنت نجمة شاردة في السما
 بسناريوات تكتبت و ماتعاشتش
و بوجيعة نصوص تبدات و ماكملتش.. 
*
فماتتمناش حد يجي ينجيك
اوعاك تتخيل انو الدنيا واقفة عليك 
اللي تعدا وفات مش بش يرجع
و اللي جاي مش معلوم، 
خليك في اليوم
قوم افرد بدنك
انفض خوفك
واغزر في قلب الشمس
اخرج مالحبس 
خلي قلبك يملا نور
و عروقك تنبت ورد
واجه مخاوفك و اعمل جرد
و كون انت بكلك 
بعيوبك و ظلك
بخايبك و بلي محلّيك
بالسر المدفون فيك
 حد ما عندو حاجة عندك
و حد ماو شادد السما لا تطيح عليك 
ارسخ جبل في أرضك
يا جبل خنارهم مايحوك فيك

Tetfaker - Bendir Man

Ahmed Lasmar