#مكتوب | محمد عباس

مكتوب عليك يا ولد
تفضل كما المطاريد
روحك صحيح في البلد
بس انت لسه بعيد
مغصوب تسيب حضنها
مع انها وحشاك
ماهي ام وانت وابنها
لانسيتها ولا ناسياك
رغم اللي كان منها
واللي بعيد وداك
يوماتي تحتاجلها
والشوق اليها يزيد
مكتوب عليك يا ولد
دلوقتي تبقى وحيد
والصبر هو السند
في غربة المواعيد
يعني النصيب والقدر
تسمع سيرتها خبر
وتشوفها حبة صور
وتحسها في تنهيد
معلش حظك كده
واهو كل شئ مكتوب
مكانش حلمك كده
انك تعيش مغصوب
حاولت بس نصيب
انك تروح وتسيب
وهتعمل ايه يا غريب
خلصو الحيل م الإيد

Maktoob - Mohammad Abbas - مكتوب - محمد عباس

Ahmed El-Mahdy