المألمة
ديوان بالعامية المصرية يصدر عن دار المؤسسة للنشر والتوزيع بمعرض القاهرة الدولي للكتاب
أحمد سعيد بُكير

برومو ديوان (المألمة) - أحمد سعيد بكير

الميكروباص - أحمد سعيد بكير

برومو ديوان/ إفادة للسما السابعة
ديوان بالعامية المصرية
للشاعرة/ أميرة مجدي
يصدر عن دار نبض القمة بمعرض القاهرة الدولي للكتاب 2025

هندسة صوتية/ أحمد سعيد بكير

برومو ديوان إفادة للسما السابعة - أميرة مجدي

Music : Soundtrack Series "Taraf Talet"
Lyrics : Ahmed Said Bukeir
‫‬Facebook Profile : ( https://www.facebook.com/ahmedsaid14 )
Performance : Samar Mohsen

*الجو غيّم
والسحاب قرر يثير بعض البُكا ..
نور السما بيبوش /
اللحظة دى ..
مُربكة*

ورق الشجر عَ الأرض ..
بيثور مع الأنفاس
معادتش باقية الناس .. معادتش باقية الناس ..

سألوا الرحيل مرّة :- "ماذا عن الإحساس ؟"
رد برحيل أكبر !

بسم البُكا ع الخَد ..
مهما اتهزَم يكتَر ..
بسم الفساد فِ الأرض ..
بسم المجال فِ العرض ..
بسم السفينة ..
والمدينة ..
والشوارع ..
والهوا ..
بسم الدوا ..
مليون عقار قبل الغياب ..
مليار عقار بعدُه ..
بسم إللى قالوا إحنا هنا ..
ومع الجميع بِعدوا ..
بسم اللا شئ ..
بسم الطريق ..
مليان حواجز مُهلِكة

*الجو غيّم
والسحاب قرر يثير بعض البُكا ..
نور السما بيبوش /
اللحظة دى ..
مُربكة*

النَص ده ..
آخر مجاز للحالمين
بالعوم فِ بحر المشكلة ..
آخر نداء للنائمين
جوّه إنفصام المسألة
النص ده ..
للّى لِعبوا الدنيا دومنة،
ومَكسبوش ..
كان معاهم كارت يلعب،
بس جَلّوا ..
النص ده ..
للّى ماتوا ومَنتهوش ..
للّى عاشوا ..
بس مَلّوا !

بكتب لكُم ..
من جوّه حُضن الإنطواء ..
كَم كانَ صعب الإحتواء ..
كَم كانَ كل المشتاقين خيفة ..
كَم كانَ فرط العشق داء ..
بلضُم بروحى فِ البواقى كأنما كل الخيوط إتيَتمِت ومعادش حىّ غير الفراق ..
برقص على السلم مزيج مِ الغربة والأوجاع ..
بفرد جناحى مُقيداً بالمُهلِكات ..
وبعتمة الليل والسكات ..
والخوف من الآتى الغريب ..
بفرد جناحى مُقيداً بـ فُتات باقيلى من الحبيب !

قال الطبيب :-
- يُعزَل عن الناس ، يُعزَل عن الأضواء ، يُعزَل عن اللمّة ..
وإن كان حبيبُه قُصاد عينيه / يُمنَع من الضمّة ..
يُحفَظ فِ لوح درجة حرارتُه أقل مِ الضَلمة ..
يُرفَع فى حال حَطّوه فِ محل مِ الإعراب ..
النور ..
يُؤدى لضيق المسافة ..
والشوق يُؤدى للإكتئاب ..
والمشنقة

*الجو غيّم
والسحاب قرر يثير بعض البُكا ..
نور السما بيبوش /
اللحظة دى ..
مُربكة*

أنا عندى عُقدة من القلوب المُرغمة بتحكُمات العقل ..
ومن الحنين لـ فُتات بشر مُسْتَنسخة ..
ومن السراب إللى فِ عيون العاشقين ..
أنا عندى عقدة من السنين ..
ومن البشر ..
ومن الآلات ..
ومن البنات ..
ومن الأمور الممكنات ..
أنا عندى عقدة من الكلام ..
ومن الحكاوى ..
أنا كرسى ثابت فِ القهاوى ..
وبسْتحرم قُعاد الناس على خشبى، فَـ يتجرحوا ..
بحُكم إنى مِلصّم روحى بالمسامير ..
ومستحمل يا دوب نفسى ..

أنا عندى عقدة وإنفصام نَفسى ..
وبكرَه توهة التفاصيل ..
وبكرَه Zoom على وشى ..
يبيّن كُفرى بالتأويل ..
وبكرَه كونى متحجّم ..
فِ جسم عويل ..
وبكرَه زحمة المترو ..
وبكرَه زَهر بيعاند ..
وبكرَه فجر بيساند فِ بِدء اليوم ..
وبيفاجئَك بـ غيب معلوم!

***
النَص ده ..
بالنسبة للّى شاف فِ ضيق الكون براح ..
مالوش لزوم ..
هيشوفُه فيض مِ الهرتلة ..
أو ما تبقى من فُتات شاعر ..
قرر رحيله إلى الخَلا..
***

باقيلى مِ الحياة صورة ..
بتلعَن مُهلِكات النور ..
وبتسلِّم على الغايبين فِ وِسع القدر ..
باقيلى من الفرَح عينها ..
وما تيسر مِ الصحاب ..
وما تيسر مِ البشر !

‫
‫#‏أحمد_سعيد‬

حضن الإنطواء - أحمد سعيد / أداء صوتي - سمر محسن

Music and Edit : Mahmoud Abdel Wahab
Lyrics and Performance : Ahmed Said Bukeir
Facebook Profile : https://www.facebook.com/ahmedsaid14

على بابك المقصود ..
أنوى أوَلّى الوَجه ..
يا أم القبول فِ الوَجه ..
تايه أنا فيكى ..
المفتتح لو صعب .. فـَ السهل فِ عينيكى
أبدأ بإسم الله .. ولكل نن مداه .. ولكل عاشق صوت .. وحبيب يلبّى نداه ..
وإنتى إللى لو تنطق صوتها يشق الروح .. ويرُج قلبى صداه ..
ببدأ قصيدتى وإنتى نايمة فِ حضنى خايف أقلقك ..
عينيا لم تعد قادرة فى حضرة روحك الجنّة ..
هنستنّى ..
ونطلب من حدود الكون تصيغ دنيا .. تكون أكبر وتقدر إنها تساعنا ..
ونطلب م القدر إنه ضرورى لو هنبقى بعيد .. عليه إنه يجمّعنا ..
يا بيت الشعر والمعنى ..
إنتى المدد .. وإنتى السند والمستند ..
وإنتى إللى تفرق فِ العدد .. وقت إحتياجنا لتعزيزات ..
بنت الهوى من حُسنها تضحك سما تمطر بنات ..
يُنصح بهذا النص ..
لو مرة نمت بدون ما أقولك إنتى جنّة ربى فيا ..
أو مرة زعلتك ..
أو مرة حضنك فاتنى سهواً ..
وسط المعارك والحطام والإنتقام ..
إنتى أهوَن ..
هتحكى عنّك "شهرزاد" .. لو عصرها قرر يقوم ..
"أنطونيو" .. مكانش هيحب "كليوباترا" .. ويزيد فِِ غضب الروم ..
"لانسيلوت" .. كان هيفكر قبل ما يخون "آرثر" ..
"نابليون" .. كان هيحبك إنتى أكتر ..
من حبه لـ مراته ..
"ليلى" مكانتش هتأثر فِ "قيس" ..
وكان هيكتب لِك إنتى ..
"ألبرت" مكانش هيحب "فيكتوريا" لو كنتى /
عاصرتى هذا الوقت ..
بحكيلهم إنك معشقة .. والمدهش إتصدقت .. 
يا أم العيون إنسان ..
- يا حبيبة ليه إشتقت .. وإنتى فِ حضنى الآن ..
آن الآوان نكبر ..
نكبر ونتمرّد ع الوضع لو عاكس وِجهة مسار الريح ..
أنا الميّت فى وجدانك وقلبِك كان أحن ضريح ..
أنا المجذوب ومتدروّش / بَهيم فِ العشق صوتى جريح ..
إنتى المقام والخام وتمام أنا بيكى ..
وهحاول أبقى صريح ..
أنا كنت باب موصود لـ الواردين عشاق ..
أنا تحت عينى إغْمَق من قُرب بشر الداء ..
كل القصص قبلك برضُه إنتهت بفراق ..
وإنتى إللى فيكى الربط ..
ومن الدوام أنفاق ..
فـَ دومى كمان ..
عشان بالنسبة للأوزان .. بقينا أخف مِ الريشة ..
معادش التُقل غير بيكى .. وصعبة بدونك العيشة ..
أنا مبقتش عاوز غير عينيكى تكون هنا المَسْكن ..
وقرار يُبيح شُربك .. لما بتبقى خمور ..
وعيون بديلة تقدر تبص لمدة أطول لعنيكى لما بتضوى نور ..
وأكتر من فؤاد يقدر يوصّل ربع إحساسى ..
وعقل كمان على عقلى ..
يرتّب كركبة راسى ..
وخبر إن إنتى جايالى .. وصدقتى ..
أنا مبقتش عاوز غير .. تكونى فِ حضنى دلوقتى !

‫#‏على_بابك_المقصود‬
‫#‏أحمد_سعيد‬

على بابك المقصود - أحمد سعيد بكير

Music : The first meeting - Charbel Rouhana
Edited By : Mahmoud Abdel Wahab ( www.facebook.com/hoda.king.357 )
Lyrics and Performance : Ahmed Said Bukeir 
Facebook Profile : ( www.facebook.com/ahmedsaid14 )

ببدأ ..
بغير العادى والمألوف
المفتتح إسفاف قصيدة إتسطرت
من تحت ناب الخوف ..
وأنا راسى بين الفَك والتانى
بكتب يجوز الكلمة تبقى بساط ..
تاخدُه الرياح من حضن أحزانى
أو طعم ينشل مُر ماضى أليم ..
رَش إستياء النَفْس فِ لسانى
فـَ بتكلم تملى بصوت ماهوش واضح 
بتأثير إرتجاف الجوف ..
ببدأ
بغير العادى والمألوف.

جسمي إللى لسه بيرتبك م البرد ..
رغم إرتفاع الحر فى أغسطس ..
لو كان فِضِل فى الحضن باقي من الدفا ..
كان إكتفَى ..
ورِجعلى مش ناقص ضلوع ..
شِعري إللى كل ما يتولد ..
وترد فيه الروح ..
يكتب دموع ..
روحي الكئيبة المُنهَكة من كتر سَحب الموت ..
صدري إللى ضاق مِ الندم وكثافة النيكوتين ..
إيدي إللى كانت ترتعش مع مَسك أى إيدين ..
عيني إللى نزفت بالدموع علاقات ..
قلبي إللى نبّت جوّه منُه بنات ..
كل الحاجات ناقصة .. كمالتها جوّه حاجات ..
معرفش شئ عنهم
غير إنك إنتى النَقص ..
والضلمة فِ الكادرات ..

" كل إللى فات .. إثبات " .

مش هحكى سيرتِك حدوتة قبل النوم ..
لولادي لما الليل يسقيهم القهوة ..
فيه حاجات يجوز أحسن ..
نحكيها للأطفال ..
حدوتة فى الأدغال .. التعلب المكار .. باندا الحكيم مثلاً ..
أو غنوة عن بُكرة ..
أما إنتى مش فِكرة ..
مجرد دنيا منسوجة / فى طرف الوهم مِ الإهمال ..
مجرد نوح سحاب ناوى يمطر بإضطراب الفال ..
وليل قاعد يعِد فِ كام نهار مَطلعش ..
أنا كنت قاعد فِ الصفوف الأولي بتفرج ..
بكيت مع ضِحك خلق الله على الإفيه ..

بس بصراحة إنبهرت ..
وإديتلِك السوكسيه!

بغض نظرنا مين فينا
كان المُتسبب الفعلي
فِ رَسم الدايرة ودخولنا ..
يا ريتنا فِضلنا كالأول
بدون مَ نخوض عِراك فاشل 
لا كنا جازفنا ولا قولنا ..
قصايدي الخاملة فِ عينيكي ..
بكيتي سطورها فِ الخاتمة ..
كأنك كنتي بتفُكي / قيود السجن والكَتمة ..
وطِيرتي يمامة مش عابئة بغير الطير ..
والشُرب مِ الجفن / إللى إتحفر سَهْبة ..
بضمير مناضل حَقق الرغبة ..
أو صوت مُؤثر من لسان كسبان ..
محتوم ظهورُه بـ توب ميعرفش الكآبة ..
ولا ينتصر للحَرف فِ قصايدي ..
لحظة بلوغُه لذروتُه فِ حضن الكتابة.

مين إللى وَهَب القَمع فِ أغسطس
حق إنتفاع أَبَدي فِ الفُرجة عَ التجاعيد ..
مين إللى قطع التذكرة لقطر الصعيد
مع علمُه إن الهوي كان إتجاه بحَري ..
وبرغم حِفظُه لـ أغنيات "المَغْنى خانة" ..
"دوريني غُرزة دايرة .. وإسهري الليل تغزليني .. وإخلقيني بين إيديكي .. وفي خيوطك لفلفيني"
دُورتي رافضة الإستكانة ..
وإنغمستي فِ مُر قهوة ..
وإرتضيتي بدور مُهاجرة ..
سايبة فِ الأفلام ظهورها ..
سايبة فِ الإقلام سطورها ..
سايبة حتى شُنطها برّه ..
فِ الطريق العام لنَظَري ..
سايبة نوبة عَك بَصَري ..
وإنفصام فِ السرد فيا ..
مع سيجارة .. وبعض شاي ..
سايبة نوح مسموع لضَلمِةْ /
عَزف فَردي لـ دَمع ناي.

معرفش بكتب من فراغ قاتل ..
ولا بكتب من شعور قاتل ..
ولا بنسَي وبفشل أنسَى
الظروف يا حبيبتي لِعبت ..
بعترتني فِ ظُلم كَنسة
من محيط الضرب فيا
كنتي ليا .. أو عليا ..
أو معايا ومش معايا ..
كل ظَرف ولُه نهاية ..
كل فترة وليها قَفلة
مش بنوح فِ البعد يعنى ..
فِ النهاية كلامى نافْلة
بالكتير تأثيرُه يطلع ..
دمعة إستعطاف فِ حفلة
أو هياخد من سطورُه ..
ما يُواسي دواعي حزنُه ..

فِ النهاية يا جميلة ..
بإختصار شايفِك فِ عالم ..
إنتى أسوء شئ فِ حسنُه !

#إسفاف_أغسطس
#أحمد_سعيد

إسفاف أغسطس - أحمد سعيد بكير

ديوان #صُنع_في_الضلمة
أحمد سعيد بُكير
ديوان بالعامية المصرية يصدر بمعرض القاهرة الدولي للكتاب 2018 عن دار عابر للنشر والتوزيع
تصميم الغلاف : مصطفي بكير
مدير النشر : أحمد خطاب
فكرة وتنفيذ وإخراج البرومو : محمود عبد الوهاب
إشراف عام : أحمد عبد الجواد

برومو ديوان (صُنع في الضلمة) - أحمد سعيد بكير

facebook.com/ahmedsaid14

20 أكتوبر من عام الحزن المِتخربش
كات 7 الصبح ومش طالع للشارع صوت
سكّينة في إيد أختي الغالية وغرزتها في صدري
- جايلنا مكالمة من الدكتور ، إلحقنا بسرعة أبوك بيموت.

لأول مرة
ماتمناش اقوم مـ النوم وافتَّح عين
لأول مرة الناس بتتكلم ومش سامع صوت
لأول مرة اشوف وِش الألم بالظبط

ظنّيت بإن اليوم نهاية ودي القيامة
وماردّنيش عن ظنّي غير إلّا
فجأة افتكرت ان النهاردة السبت.

حسيت الدم بيتسحّب من جسمي بعيد
رجليّا حقيقي المرّادي ، مش لامسة الأرض
وإيديّا خيوط من بَكَر الحزن المِتبلِّل
الدَمع يا ابويا اهو اتسلِّل
والضَهر كُسور وباينّي هاكمل بيه مَحني
انا كنت بقول ان انا خرسان وطلعت ضعيف
جِه موتك أكِّد وفضحني.

بالذمة إزاي قررت تفارق وتسيبنا ؟
مش كنت قايلّي "تخلص جيش وهتتجوز" ؟
مش كنت معايا بتستنَّى الأيام تمشي
عشان اجي البيت ؟
إدّيتني مُسكِّن للأحزان وانا صدّقتك
وآديك بتخالف في وعودك ،
وانت اللي مشيت.

آخر يومين
عدّوا علينا في يوليو
وأغسطس
وسبتمبر
وفي اكتوبر..
عدّوا تُقال
وكإننا أطفال في حضَّانة
بيبدلوا الألبان بسجاير السوبر.

والدي اللي خانُه الحظ من أول سبيل
مَن علَّم الألوان رَسْم الجمال بالروح
مَن كرَّم الأعوام وبشكل موضوعي
أُهدي إليكَ إنكساري وغُلبي ودموعي
أُهدي إليكَ السلام والنظرة والأحضان
فأما بعد بترجاك لو تيجي كل يومين
ونتكلم بدون ما يكون ما بينّا خلاف
من غير ما حد يخاف
وإيه الخوف قصاد انك بعيد عنّي؟
وإيه الموت ما دام واخد حتت منّى؟
جميل الموت ما دام هالمح حبيبي هناك
عِشت السنين مخطوف ومِقرر اني انساك
عِشت السنين بَلغيك وبسِد فِ وداني
أهرب من التوجيه فـَ تجيلي ازوغ تاني
وادي السنين لطشتني فوق وشي
وادي الزهايمر جِه يجيب حقك
قرر تكون فاكر كل اللي كانوا معاك
وتنساني!

سامحني يا والدي واللهِ الأمور بتسُوء
بنزل لتحت ورجلي طالعة معاك لفوق
بحضُن شجر مجزوع ومَشوفتلوش ضِلَّة
والدي الجميل اللي اتولد من باطن المِلَّة
يُسعدني أقولك من زمان اني بحبّك
يُؤسفني أقولها الآن بعد أما فات القطر
بعد أما جانا خريف خلَّى الزهور نطِّت
كل الحاجات مطرح إيديك حطِّت
لكن إيديك هىّ المِسافرة بعيد
أمي اللي كنت تحب تنشكها بكلامك
من يوم غيابك كل أما تِغرِف أكل بتنادي
- يلّلا الغدا يا سعيد!
صبحت كورال بيعيَّط الموّال مع كل عصر
وعينيها صبحت نجمتين
مابيظهروش إلا لجمالك في الصور
وبقينا مركِب من قماش ويتيمِة المقاديف ..
غمَّضت عيني يا والدي مدهون بالخطايا
وصحيت لقيت منك رسالة :
"هتيجي ضيف .. وهتمشي ضيف"

يا قلِة صبر طالب صبر مِتفتِّت ومِتكسَّر
يا حسرِة كل دخانك وألوانك وفنجان شايَك السادة
ببص لقيت حتى العامود في الشارع إتأثَّر
مبقاش ينوَّر بانتظام ومكهرب اتنين او تلاتة
لو كان بإيدي آخد رصاصِة المرض
كنت خدت
لو كان بإيدي أهزم جيوش السُكَّر الكافر
كنت احارب ..
بس المرض ملعون
إختارَك انت عشان تخوض كل التجارب
لو كان بإيدي 
ألبس تي شيرتات الزمالك وانزل ألعب
آكل نجيلِة الأرض لَجل يفوز فـَ تضحك
كنت هلعب كل ماتش ..
لو كان بإيدي أكون نفس الطبيب اللي
بلّغنا موتك يومها ببرودُه العجيب
كنت هاخرج أقول لاخويا أبوك مَماتش
لو كان بإيدي اعمل حاجات مش قد إيدي
علشان تطوِّل في القعاد وتكون معانا
كنت هاعمل كل شئ واللهِ يابا
كنت هافتح أي أوكرة على البيبان

لكن هيعمل إيه ضعيف زيّي
قليل الحيلة والحيل والحظوظ
قُدام قسَاوِة بُؤرِة السرطان؟!

يصعب عليا
كل شئ لسّه ف بدايته
جِه موتك موّتني وهَدُّه
وان ابني هييجي ويتكلم
ولسانه مايندهش يا جدّو
والفترة اللي هعيشها بدونك
ولحد ما أجيلك وتشوفني
وهاروح اتقدِّم يوم وحدي
من غيرك جنبي تشرفني
هاتفرج ع الماتش لوحدي
وان خدنا الدوري افرح وحدي
وامي تزعقلي انا لوحدي
علشان شمّت ريحِة الدخان
يصعب عليا الحزن والكتمان
ولمين هتكلم وهقاوح وهَرُد و اثور

يصعب عليا
كل يوم عدّيته من غير مابقى جنبك
من يوم ولادتي
ولحد آخر جُملة مـِ الدكتور.

متخافش عليهم
انا راجل
هاثبتلك كل اللي نَفِيتُه
هاثبتلك إن الأب ساعات
بيموت مِتطمن على راجل هيشيل الفاضل من بيته
هيصون السُمعة وتربيته
متخافش عليهم
بس ابقَى متقطعش العادة
هتمر علينا ظروف وكروب
نحتاج طبطبتك بزيادة
نحتاج الضحكة اللي بتفتح ابواب الرّاح
مانتَ المفتاح
وانت التفاح اللي بيجبر كل العابرين لجمال قَطْفَك
انا عارف ان الموت خاطْفَك
لكن متأكد بشعورك وبإنك حاسس ومعايا
وبإن الجنّة أكيد هىَّ اللي هتبقَى نصيبك وتساعَك

وده كوبري يا والدي في يوم راح اموت وأعدي عليه
وهاشوفك واقف على آخره
بتشاور وفاتحلي دراعك.

إنت اللي مشيت - إهداء لـ أبويا - أحمد سعيد بكير

قصيدة / ليلة غروب القمر
لـ / أحمد سعيد بُكير
https://www.facebook.com/ahmedsaid14

الكلمات :

https://www.facebook.com/ahmedsaid14/posts/10211156765675170

ليلة غروب القمر - أحمد سعيد بكير

Facebook Account : facebook.com/ahmedsaid14


"قُل لَن يُصيبنا الحب .. إلا عشان أزمة"

قالت :
مالوش لازمة
ولا تبكي ولا تزعل
بكرة إللي كان فاتك
هيكون أكيد وياك
وأنا برضه مش هنساك
وهسيبلَك المراسيل في معادها دون تأخير
هغفرلك التقصير
وهكون أكيد سامعاك لو جيت تكلمني
الحب ده بالذات .. علّم وعلمني
وإنت الجميل المُراد من بين رِجال ياما
معظم بنات الجيل تتمني لو تلقاك
ويبصوا عَ العالم من عينَك الشباك
ويدوقوا من طيبتَك معني الجمال والهَنا
وأكيد في واحدة عينيك أقرب لرؤيتها
لكن أكيد مش أنا !

Ahmed Said Bukeir ✪

Popular tracks