ابنودى

Revolution

اﻷبنودى

شعري

EL DEEB

ضحكة المساجين .. عبدالرحمن الأبنودي

غيطان الحلم .. عبدالرحمن الأبنودي

صلاة خوف
قصيدة لمحمود عزت

نجّينا م الشرّير
ارحمنا م التجربة.
المعركة _المرّادي_
مش هيّنة..
المعركة غايمة..
غربال ورا غربال
وف صفنّا الجنرال.. 
المعركة مرعبة.

ووقفنا زيّ الجثث..
باصين على المدبحة.
الدم على صدرنا..
بننتصر؟ ولّا..
فـ طابور الدبح؟
هل دا سؤال العار
ولا السكوت أقبح؟
ننزل نلمّ الغنايم..
ولا نعدّ الجثث؟
خلاص..
فتحنا الطريق؟
ولا الطريق اتهدم؟
الشهدا أخدوا القصاص؟
ولا بكوا م الألم؟
المجد للقنّاص؟
ولا اللي مخّه اتقسم؟
نبني جدار للفخر؟
ولا نافورة الدمّ؟
فيه ظلم..
آخره الجناين؟
فيه عدل..
بابه الظلم؟

خرّجنا م المحنة
لما الغيلان صرخت
غارزين في بعض الناب.
فجأة اكتشفنا ف صوتنا
ريحة الدم..
وف وشنا أنياب.
وان الغيلان احنا 

نجّينا م المحنة..
وم الهذيان..
وم النشيد العظيم
ع المارش..بالتعظيم..
بتردده الجماهير
بصريخ جماعي عنيف
يكبت صريخ الخوف..
واللي بيرفض يهتف
يبقى شق الصفّ..
خاين..فـ صف الوحدة
مش مصفوف..
نجينا م الوحدة
والصف ماتوحّدش..
لكن بيتوحّش
نجينا من رؤية
واضحة وضوح الجبل..
بين العمى والشوف
لكنها الأوهام..
خرّجنا منها سُلام..
أكتاف على أقدام..
خرّجنا منها نضاف
الدم مش ع الكفّ..
خرّجنا منها ألف..
أو ميّة..
أو واحد
ف المقتلة القايمة
ينسي سؤال الحرب
يسأل سؤال الضعيف
ويقول:
أنا خايف..
مش م الهزيمة
إنما م النصر
مفروش طريقه بالجثث
للقصر.
لا ندخله..
لا نحمي أصحابه..
نفضل نحاصره
وإسمنا مطموس
نكتب أسامي الشهدا
على بابه..
خرّجنا منها عرايا
زي ما دخلنا..
لا وزرا ولا حاشية
لا نلبس النياشين..
خرجنا منها جُداد
زي ما نزلنا
عيال كتير ماشية
من حدّ مش خايفين..

خرّجنا منها الآن..
نجّينا م التجربة..
المعركة مرعبة
نجينا م التجربة..
المعركة مرعبة. 

صلاة خوف | Prayer of Fear

خلود الملحمة الشعرية للابنودي والمعنونة " جوابات حراجي القط العامل في السد العالي الى زوجته فاطمة احمد عبد الغفار في جبلاية الفار". يكمن بما تتضمنه من عمق انساني وقيم رائعة تمجد العمل. مشبعة بحكمة الغلابة وبآمالهم البسيطة الصعبة المنال... الحميمية البالغة والمشاعر النقية.

الرسائل المتبادلة بين حراجي القط (الجُط) وزوجته فاطمة أحمد عبد الغفار (فاطنة), ديالوج ومونولوج متناغم بينهما وداخلهما... مناجاة عشاق رقيقة مفعمة بالشوق العارم... ترجمة بليغة لحكمة البسطاء وغفلتهم بنفس الوقت.

جوابات الاسطى حراجي القط - الجزء الأول - عبد الرحمن الأبنودي

إحنا ولاد الكلب الشعب - عبدالرحمن الأبنودي

حبيبتى كل ما بنسى تفكرنى الحاجات بيكى

ائنك تدمعك عينى كأنى مش هغنيكى

دمايا متستهلش تكون كحلة ليله لعينيكى

و انا الدرويش ..

انا السابح بمسبحتى .. ومبخرتى .. و توب الخيش

اغنى لك .. و امول لك مواويلك .. ماتسمعنيش ولا تشوفينيش

ومش لازم مادام عايشة .. مادمت بعيش

وياما بيكى عقلى اتجن

وانتى الأنّ .. انتى الظن

و أنتى قلمى لحظة فن

يا غنيوتى .. انا احزن اغانيكى

و انت الحلم .. اااه من حلم .. لا نسينى ولا نسيكى ..

حبيبتي كل ما بنسى تفكرني الحاجات بيكي - عبدالرحمن الابنودي

خرج الشتا وهلِّت روايح الصيف*

والسجن دلوقتى يرد الكيف

مانتيش غريبة يا بلدي ومانيش ضيف

لو كان بتفهمي الأصول

لتوقفى سير الشموس..

وتعطلي الفصول.

وتنشفي النيل في الضفاف السود

وتدودى العنقود

وتطرشي الرغيف

ما عدتي متمتعة وانتى في ناب الغول

بتندغي الذلة وتجتري الخمول

وتئني تحت الحمول

وتزيفي في القول

وبأي صورة ماعادش شكلك ظريف

***

دوس يا دواس

ما عليك من باس

واكتم كل الأنفاس.

الضهر مليئ بالناس

إللى حبيتهم دون ما يبادلوني

الإحساس.

وأنا عارف إني ما باملكهمش

لأني ما مضيتهمشي في الكراس

الناس اللي دمغها الباطل دمغ

اللي بتنضح كدب وتطفح صمغ

اللى بتحشش

وما بتحسس

واللي بتضحك كل ما تنداس

***

الجامعة طالعة رايتها ضلتها

هدارة

جبارة

صادقة في نيتها..

بتتجه..

يم الوطن والموت.

و"شبرا" زاحفة تأكد التهديد

وتجمع التبديد

وصلت ميدان الفجر..

في المواعيد…

النهر.. والضفة.

نبت هلال العيد

ومالت الكفة

وصحيت الرجفة.

مصر اللي لا لحظة ولا صدفة.

ثورة ف ضمير النور.. بتتكون.

رايات.

بدم البسطا..تتلون..

سدوا الطريق..

كيف المؤامرة تموت؟

"فلتسقط الخيانة

والقيادات الجبانة

ندّاغة الإهانة

كريهة الريحة

كريهة الصوت"

***

الغضب..

بيوالي إنشاد البيان

والوجوه الصامدة في وش الزمان.

والرحابة..

في الصدور..وفي الليمان..

غابت الأسر الصغيرة في الوطن

. استوى ع الأرض وعي.

صحيت الأمة ف هدير السعي.

الوطن.. مفهوم

وحلو

ويتحضن..

***

التفت صاحبى يقوللي:

"لسه نايم..؟

مش مظاهرات..

دي حاجات يفهمها شعبك.

إقفل العقل القديم..

وافهم بقلبك.

رقصة الزار القديمة..

الفرعونية

ع الخصيبة السندسية..

لما يجتاحها الألم.

لما تغمرها الإهانة..

والقدم..

تسحق الإنسان..

وتدهس القيم"

ابتسمت..

رقصة الزار القديمة

الحميمة

العظيمة.. لحد فكرناها ثورة

فرق بين رقصة.. وثورة.

لا هيَّ جاية فوق حصان

ولا في لحظة زمان

حتهب نابتة في الغيطان

ولا رقصة

برجل حافية

ف مهرجان.

دكهه هادية.

تيجي هادية.. وصوتها دامي

تعزل الكداب..

وتقبض ع الحرامى.

تعرف الناس..مش كتل

تعرف الناس..

بالوجوه..وبالأسامى.

تيجى..فاتحة القبر

نادغة الصبر

قابضة الجمر

تنصب محاكم الشعوب في كل قصر

تغير العصر..

إلى آخر الصفحات في سفر الثورة.

ابتسم صاحبي وقاللي:

"حاذر م الارتفاع

سيبك م الاندفاع

حفر حكومتك وساع"

ابتسمت

جفت الرقصة الحبيسة

عادت الأمة التعيسة

اختفى كل اللى كان

اختفى كل البشر

واختفى كل المكان

تحت سنوات الهوان.

***

تتعسني فكرة إني هموت

قبل ما اشوف- لو حتى دقيقة-

رجوع الدم لكل حقيقة..

وموت الموت..

قبل ما تصحى..

كل الكتب اللى قريت

والمدن اللي ف أحلامى رأيت

والأحلام اللي بنيت

والشهدا اللي هويت

والجيل اللي هدانى

والجيل اللي هديت..

قبل ما أملس ع الآتي

وادفن كل بشاعة الماضي

في بيت.

***

حاقولها بالمكشوف:

خايف أموت من غير ما اشوف

تغير الظروف.

تغير الوشوش..

وتغير الصنوف.

والمحدوفين ورا

متبسمين في أول الصفوف.

خايف أموت وتموت معايا الفكرة

لا ينتصر كل اللي حبيته..

ولا يتهزم كل اللى كنت أكره..

اتخيلوا الحسرة. 

عبدالرحمن الأبنودي - رسالة إلى القيادات الجبانه

يارفقتى مادام اتت الاحداث تقطع الانفاس وتلون الكلام
ومادام بقينا اتنين ومادام ماعدش لاحكم ولا احتكام
فلنختلف علنا امام الناس
لان فية غلطة مبوظة الخارطة ولابد مانخرج انا وانت م الورطة
لية انتو حاسين وانا مش حاسس او انتوا مش حاسين وانا حاسس
لية انتوا بايتين تشربوا نخب انتصارتكم ولية انا مهزوم كدة وبنعى
يااخوتى انا فى عشق الظلم اخيب مايكون والغدر مش طبعى
لية انتوا فرحانين وانا بنعى لية هربوا زى الموت فى وش الريح
ليييية حسوا بالقسوة اسمع انين الطفل والنسوة
هل التعاطف مع الاوطان بالرشوة القلب بيتاءجر مفروش بالساعة
والعين تطنش فى نظير ساعة عربية وووولاعة
هاتدفعوا هاتشفعوا فى الزنقة تنفعوا
تسرق اقول قديس تقتل اقول عادل
الون التدليس واحلل الباطل
اما الشعار ف اهوة نحقق الثورة ونوزع الثروة
ماهو فى سباق المصالح يبقى الا فاسد صالح
انت اداة اسرائيل وانا الكلب العميل
الامة تبقى لونين+عربيين غريميين +والاسلام+ اسلاميين
المية عذبة فى شفك وفى شفتى مالح
الحظ جاى فى سكتك من سكتى رايح
يا ابو الحذاء الميرى متبعد الجزمة دايسة على ضميرى
يامرمل الولية ياقاتل الولد
يامطربق السما على راس البلد قائد جيوش السلب ياناشر الغمة
وياقلب يابن الكلب صدقت فية امة وصدقت كلمة شعب
وادى الجميع خاسر السالب للامة مع المسلوب
وادى فجر امتناالجميل مغلوب وادى انتحار الامةبالمقلوب
وانا غريب الدارلابسنى توب العار ساكن فى وطنى بالايجار
عايش فى امة ماتحترمش الحزن جندى تعيس و بينتشىبالدم
يقتل شباب الامة لا يندم قوم يابنى من نومك
اسرق حلق امك وارض واد عمك وقفل الشارع وانقل السكان
وانهب الواجهةوبدل الالوان واعمل ولا سامع
خلى جميع المعقولات تتلخبط وان يساءلوك ساعة الجواب استعبط
يستعبطوا انت اعمل الاعبط ماتخافش عندك جيش من الا بياكلو العيش
وان عزت اللقمة جدعان ياكلو الخيييش
بيخافوا من ضللك ويقبلوا الاقدام ويهتفوابفضللك من الرعب فى الاحلام
ما اخيبك امة ما اتعسك امة لا عدل ولا همة
لا مصدقة فعللك ولا تحفظى كلمة امة تدور وتلف
تقيلة مش حاتخف بليدة مش بتشف
حماسية وحماسها بكتيروا سسسساعة ويجف
امة بتتخابط امة بتتعابط امة مالهاش لا ظابط ولا رابط
ولا كبير عيلةو لاقرابة دم وفكرة وهمية ماتورث الا الدم
ماتحل عنى ياعم احنا ورثنا كلام دة انا بقيت عربى م قبل مالقى الا يمصرنى
انا انتمائى لامتى ممسخرنى محسوبة على فى الاحزان
وفى الفرح تنكرنى ياللى انتى لا امة ولا انت ام
فى ام ماتعرفش ساعة الالم تضممممممممم
واعذرونى اذا شفتم لسانى طوووووويل
الحزن اتقل من حجارة الصبر والهم اوسع من فراغ القبر
وانا الحزين الحزين واغبى الخالدين
لكن يااخواتى انا اول المؤمنين بعودة الصغار يبوسوا باب الدارويحضنوا النهار
ومؤمن بان المعادن تنجلى بالنار وان الجديد اجمل من القديم
وان الالم يخلق انسان جميل عظيم


(قصيده للخال الأبنودي (ياقلب يابن الكلب

عبدالرحمن الأبنودي ورساله من مسجون هارب

مش باقي مني -احمد سعد- من فيلم دكان شحاته

وقف الشريط بصوت سعاد حسنى في مرضها 
-: صلاح جاهين 
دلوقتى نقدر نفحص المنظر
مفيش ولا تفصيلة غابت وكل شىء بيقول وبيعبر
من غير كلام ولا صوت اول ما ضغط الموت على زر فى الملكوت
بخفة وبجبروت فى يوم اخبر
وقف الشريط فى وضع ثابت
دلوقتى نقدر نفحص الصورة
انظر تلاقى الراية منشورة
متمزعة لكن مازالت فوق بتصارع الريح المسعورة
انظر تلاقى البلاد اجيال ورا اجيال رافعاها باسترسال
ونزيف دماء سيال على الجبهة
وفى عنفوان النضال
وقف الشريط فى وضع ثابت
خللى المكانجى يرجع المشهد
عايز اشوف نفسى زمان وانا شاب داخل فى رهج الثورة وانا غضبان
ومش عاجبنى جن او انسان
قاللى المكانجى رجوع مفيش عيش طول ما فيك انفاس تعيش
بص شوف ركن الشباب فيه الف مليون شاب
ومش عاجبهم لا وصى ولا اب
انظر اليهم وانت تتذكر
ليه ضربة صابت وضربة خابت وضربة وقفت بالشريط فى وضع ثابت
انظر وشوف ع المهل براحة
الشمس وسط القبة قداحة
والقدس واقعة والحرم منداس
صوت الجرس والاذان على قلبها حراس
وادى بطلها هل فى الساحة
قلب الحجر فى الايد بيغلى حماس
قال المكانجى بنوم وانا مكلوم
قال المكانجى والشريط شغال
مالكش تسأل سؤال
انظر وشوف الحق لما انهان
انظر وشوف الآن
بكرة بقى امبارح فى حضن زمان
وبعد بكرة فوق همومك فات
مفيش شريط مأجور ولا خوان
ولا شريط له بيبان

وقف الشريط بصوت سعاد حسنى - صلاح جاهين

‫قصيدة احزانى العادية عبد الرحمن الابنودى كاملة‬

——————-(م)——————— 

    ماسبيرو أخطر م الرصاص و القصر
    ملّى عنيك بالدم…قبل الطلوع قدام
    ما تسيبش جيشك تِقسمه الأعلام
    مش كل مين جنبك….جواه بيهتف مصر

———————(ا)———————-

    الوقفة جنب النار ..بتقلل الدخان
    - إهتف هتاف إبن المكان و الظرف
    - إضرب بعزمك … أو ما تضربشى
    إرجع بضهرك … أو ما تهربشى
    إمسك عصاية ثورتك م الطرف
    التاريخ ضمن الغنايم ..و بيكتبه الكسبان

———————(ن)———————

    نقى دايما طوب صغير حدفتك توصل بعيد
    نفترق ساعة المطاردات ..أربعات
    نشّن الباراشوت ناحية الصف العريض
    نجرى فجأة.. نردّ فجأة.. نص قوتنا المفاجأة
    ندّم اللى يعورك……..و إقطعله إيد

———————(ي)———————

    يؤتَى الحِذر من مكمنُه

    يأتِى الغبى باللص ثم يحلّفه

    يؤتَى الهتاف… رَّجاً بممن يَهتِفه

    - يؤتَى الجدع… قلبا بمما إتجَدعنُه

———————(ف)———————

    فّرق ما بين….الجرأة و القلب الحديد… و الرمى جوا التهلكة

    فتش بإيد ع المستفيد ..و بإيد عن الصاحب الجدع

    فتح اذا الناس غمضت….غمض إذا نظرك خدع

    فرّغ عياطك ع الصحاب… دم و خميرة… مش بكا

    ———————(س)———————

    سمى الحاجات دى بإسمها…الكدب… و الخوف… و الخيانة

    سجادة المسامير… تتحط ع الناصية …غطّيها بالدخان ..ولّع قصادها كاوتش

    سد الطريق لورا علشان ما تترددش

    سيب باب لجيشهم يهربوا منه

    سلّم رايات الحلم لحد من سِنُّه

    سلّم قراركوا لأكتر كفّ عرقانة

———————(ت)———————

    تبّت يدا من ساب رفاق المعركة بطولهم

    تمن القضية اللى اندفع مبقاش يجوز يرجع

    تتعب تبص ف عين.. إصحابك الطايرة….شوف مين من الآخر دفع….لو زيهم… إدفع

    تلت الرصاص نحو العدو… .تلتينه للخاين..الطعنة جاية من هنا مش من هناك

    تعب النهاردة غير تعب بكرة….الوقت مش دايما معاك.

    تحتك فيه ناس عاوزة الأمل…مش عاوزه؟… سيبهولهم

———————( و )———————

    وسّع الجبهة لو إنتوا كتير… و .ضّيقها لو إنتوا أقل

    ولع شماريخ وسطكوا اول ما تلقى الرتم قل

    وقّع لمض كل العواميد اللى كاشفة ناحيتك

    وّدى الإعاشة قبل ما تدوق لقمتك

    وجّب مع السكان و أهل المنطقة…حتى لو فاهمين غلط…فيه ناس كتير متلخبطة …إكسب عدد ….و إكسب غطا

    وزع عيونك فوق و تحت….و خاف من اللى يصورك

    وطّى و عينك باصّة فوق ع الطوب و إلا يعوّرك

    وقّف إذا سحبوك على شارع طويل

    وفّر بديل

    وافق على الهدنة إذا سحبوا الكلاب

    لو سابوا خليك انتا آخر حد ساب

    واحد بيفرق ف العدد جدا

و عشان كده….

 أول ما تلقى إن الصفوف ناقصاك …

     وسع مكانك… للى جاى وراك


Manifesto - Mustafa Ibrahim | مانيفستو - مصطفى إبراهيم

عبدالرحمن الأبنودي-إكتم أنينك

دعاء الدبابه للشاعر مصطفي ابراهيم من ديوان مانيفستو

دعاء الدبابه - مصطفي ابراهيم

يامنة - عبد الرحمن الأبنودي

مهداة إلى البطل الذي رحل بصمت، عبد العاطي، صائد الدبابات في حرب أكتوبر... وإلى كل بطل عشق الوطن وتناساه بائعو الوطن

الاسم المشطوب

عبد الرحمن الأبنودي

اكشف غَطا وجهك ومزَّع القناع

بَلا حكومة

بَلا لُكومة

بلا بطولة.. بلا بتاع.

يااسمر يابو القلب الحديد

ياللي واجهْت الموت

في كلّ اتساع.

يااسمر يابو الوجه العنيد

يامصري.. ولحد النُّخاع.

كلُّه طِلِع كلام ياخال

والحال.. رجع من تاني حال.

أتاري الحرام..

هوّه الحلال..

واتاري الهُدي هوّه الضلال.

شَمُّوا نَفَسْهُم من جديد

والمرّه دي.

بدمَّك انت يا بطل

مع الأسف..

وبْعَجْنِة اللحم اللّي تتسّمي الشهيد

ويعملو لها عيد بليد

تِعْرفْش بيه غير م الصُّحف.

وأَعْترِِفْ..

العيد بييجي..

لاجل ماتموت من جديد.

ولو إنّ موتك ريح بتغِلب الرياح

لكنُّه ما حرَّكْشِ ليه أسَنِ الحياه؟

وياصاحبي..

ماحرّكش ليه ألم الجراح.؟

راح اللي راح..

فلا انتظار.. ولا أمل

الحرب خلْصِت يا بطل

والفرحة هِّبت ع الوطن يا صاحبي

من كل اتجاه

وزيّ ما قالوا: طِلِع نور الصباح

ورفرف العلم العظيم العالي..

علي كل الجِباه

لكنُّه..

ليه من غير حَياه!؟

والنصر ليه علي رقاب كل اللي عملوه

إتكي..؟

وليه في أرض المعركة

نسينا كل اللي بَلغْناه بالمعاناة

والعرق وبالفَخَار.. وبالبُكا…

لمَّا صِحبنا يا صاحبي ع الحلم اللي ضاع

ونصرك اللي راح وماعادْلوش شهود

وما عادش داخل الحدود

غير اللي سَمْسَر

واللي قرْقَرْ..

واللي وفر.. واللي باع..!؟

اللِّي هَوَي الوطن.. هَوَي

بالعشق ولّع وانكوي

من قبل ما يفتّح.. ذَوَي

يا أحلا أبناء الوطن

تِرحَلْ عليل.. بِلا دوا

ترحل وحيد مجهول.. حزين

نرحل سوا!!

ما فضلش منه شيء يا عبد العاطي

نرحل سوا..

أنا وانت والوطن الحبيب

ونْسيبها للوطن الغريب

نسيبها للوطن المريب

لديب.. بيحرس الجياع

وِلْوَهْم إذا كشكش..

بيزداد….. اتساع.

وانت العريس اللّي بنيت المجد..

بإيديك الجُمال

وبقيت دِريس طارْ في الخيال

وكأن حَرْبِك النبيلة..

لعبة لعبوها العيال.

لعبوها ع الساكِتْ

اتْمَزَعِتِ الصفحة اللي فيها اسمك.

حدوتة..

وسْطِ الحواديت تاهِتْ.

الإسم مشطوب

والتاريخ.. باهِتْ

ما فْضلني مِنُّه شيئ يا عبد العاطي..

لَمّ العدو دبَّاباتُه بعيد عن سينا.

نَسُّونا. فَنْسِينا.

والإسم..

كان لازم في سكِّة الخيانة

يتردِم.

واللّي كتَبْ عنَّك.. نِدِم.

واللي وقِف جنبك.. نِدِم.

اضَّطَر يفضح لعبة التبديد

وحاصَرُوه.. بالوصْم والتهديد.

صبح الشريف موصوم

هوّه الشريف اللي تملّي.. يتوصَمْ

وبقي السليم مجزوم.

يستعملوا وياه يا خال

لُغَةِ الجِزَمْ.

وبقَي الجبان… صنديد.

فارحل حزين مظلوم

ارحل سفيه موصوم

ارحل مريضي ساكت

ارحل إلي أبعَد بعيد!!

مصر المهيبة بتنحدِر للواطي.

هل كنت تتخيل في يوم..

السرعة دي في الموت يا عبد العاطي

حتي وإنت..

قصاد صفوف الدبابات!؟

- سامحني أنا ما عرفش كام عندك

من الأولاد وم البنات -

هل كنت تتخيل خيانة الوطن؟

هل كنت تتخيل عبير هذا الزمن

وهوَّه صاعد للعُلا نَتَنْ..؟

وقول بحق..

إنْ كان قلبك خاف..

والآر.. بي.. چي..

مسنود علي الأكتاف

ساعْة اعتِقال «عسّاف»..؟

وهل خطر علي البال يا عبد العاطي

إن الخيانة حتسكن الآتي

وإن مِلعوب لاتّفاق ملعوب!؟

وإن أكتوبر حيتباع ويّا مصر

- لاتْنين - في سوق العصر..؟

والمؤمنين

حَيُطرَدُوا من مِيغِةِ المستقبل

ويصْعد الخاطي..؟

دلوقت إيه اللي مِضيَّق..

صدرك الوسيع..؟

وبتفهم إزاي الفروق..

بين اشْترا الوطن الأسير..

والبيع..؟

النصر تمنُه اشتروا بيه قصر

تَمَن الوطن

إذْن لدخول السَّمَسرة.

ما كانتش حرب.

ماكانش نصر.

واللي رَفَضْاه لأجل نتقدِّم

حدفْنا بعيد ورا.

ما تقولْشي زييِّ.. كان وكان

كان حيلة لأجل يموت فقيرها

في طوابير الهوان

وطنك يا صاحبي كان زمان

واللي احنا فيه..

زمن العفاريت السُّمان

أصمُد يا صاحبي.. لموتك العبثي.

باعوا الوطن يا صاحبي بالمجّان

مَجَّان لكن ما تْقَدَّرُوش أتمان

ماراح زمان «الشاذلي» و«الجَمسي»..

وشمس سينا يوم ما عِشْقتْ

صدرك العريان

غابِتْ فإنسي الحرب يا غلبان

أعداء وطنّنا.. صاروا أحبابُه

- مستمتعين بالوطن والوقت خان الوقت -

بيسلكوا.. وكأنهم أصحابه.

إنت العدو دلوقت،

إنت نشاز اللحن.

أما احنا يا بطلي الحزين

فمِّدينا لهم للحياة..

شُريان ورا شُريان.

زعيقي وِسْط الخلْق زيّ سُكاتِي

وتفاؤلي بقي جزء من إحباطي.

اتغيّرت كلّ العقول

واتبّدلت كل الفصول

واتْعفَّرت كل الشموس

واتغبَّرت كل النّفُوس.

.. وزي ما تقول قول!!

إسمَكْ بَهَتْ..

وكإنُّه عُمره ما كان.

إتْباع كإنُّه بضاعة في الدكان

في الانفتاح علي عوْرة الأوطان.

آدي الجُناة أبرار..

وإنت الخاطي.

وإنت غلطة الوطن

في صفقة الشيْطان

يا عبد العاطي!!

إنت نويت

وأتاري فيه غيرك نَوَي.

ناس عِلْيوا فوق

وسابوك بتبحث في الفُتات

عن الدوا..

لِكِبْدك اللي ما احتملش.. فانشوي!!

يا صاحبي موت أرجوك

وموِّت الغضبّ،

«الإسم».. كان هوَّه الهدف

رَفْرَف علي مَرْمي النيران..

وكإنُّه قاصد يِنضَربْ.

الإسم ضَلَّم.. واتشطَبْ.

ومصر مصرين

مصر إحنا.. وهمَّ

لِهم الغنايم.. والبهايم إحنا.

صوتهم وَجَع مسموم

بيسكن العصَبْ

ويلهب اللهب.

يا صاحبي موت أرجوك وموّت الغضب.

لعينيك يا صاحبي بانْتمي.

كإن صدرك هوّه صدر بلادي

من الهجير.. باجري عليه..

وأتْرِمِي.

وأنا قصدي أغسل همِّي.. بازّدادْ هَمّ.

عَفْوك يا عبد العاطي..

إلوطن عِمِي

ومِشِي وهمَّلنا يا إبن العم.

وإسمك المشطوب

مازال هناك مكتوب

في قلب سينا ف سرًّها الدفين

في صدور جميع المخلصين

المرض زيك بالوطن

واللي حيغلِبوا المحن

واللي حَيجْلُوا عنه عار الغبار

علشان يشعّ اسمَك كإنهُّ نهار.

الإسم ـ رمز العزة ـ

بيصيبهم بداء.

ينسوك ما ينسوك الضمير متذكرك

هِنا مش هِنا ـ صدقني ـ

بكره حافكّرك.

مِن اللي قال: يا مصر إبنك ضاع.؟.

ده احنا حنعلِن عِ المشاع..

إسم اللي باع حلمك يا عبد العاطي

للشروق أو للعرب

للأهلي أوللغُرب

ولحدّ داك اليوم

سيب الحياة تمشي لْورا بالورْب.

مين ده يا عبد العاطي

أبو جِتّة جامدة وكِرْش.؟

اللي بيحدف بالميتين مليار

ويعزّ ع الناس قرش..؟

هلي شُفته يوم الضرب.؟

هل كان معاك في الحرب.؟

أتاري دمّ الشهدا ليه أتمان.

تمن الشهيد ما بيقبضوش والديه

إنهب وصيع بينهبُه المقاطيع.

ويالله بيع كل اللي شِلْناه للزمان

ويكون شعار بلدك

«بداك ما تبني.. بيع».

هنا تكتشف إن الحزاب..

هوّه الربيع.

بيع المصانع والصحاري واشتري

آخر حدود الأرض والشواطي.

وهكذا..

مصر اللي كانت مِلْكنا

واللي حميناها بصدرك عنِّنا..

اتسحَّبت واحنا في عز النوم

اتسحَّبِت في السرّ وف كام يوم..

هرِبت كده علناً يا عبد العاطي.!!

مِشْ دي البلاد اللّي حاربْت عشانها

ولاهُمّ دول ياصاحبي.. حُكاّمها

ولا مصر دي اللّي رفَعْتِ أعلامْها

ورميت بروحك في خِضَمّ الحرب..

ونيرانها

فين احنا دلوقتي يا عبد العاطي.؟

مين اللّي وطَّي العالي يا صاحبي..

وعلَّي الواطي..؟

مين اشتري بْتَمَنَك.. الصحرا والشاطي

وطَاطَي..

فاكِرْنا وراه.. حنطاطي…؟

وصالَح القاتل.. وعادانا

وادّانا ضَهْرُه وسابنا ببلاهة

نعِدّ قتلانا

وهرب بمصر.. وخبّي عنوانها؟؟

إرحل يا إبن الطّيبين… إرحل وحيد مظلوم حزين.. أسْهَلْ

كل القِصص ماتت

كل الَُمثل.. ماعِت

كل الحقوق..ضاعِت

البياعين باعِت..

أهل القِيَم صاعِتْ..

واهل الحقوق جاعت

حتي اللي صابت

من جديد خابِت.

كُلُّه اتمسح.. والزُّور

هوّه اللي شايدْ خطوتُه

وثابِتْ.

والنصر كان ياعم عبد العاطي

أهمّ أَغْلاطك وأغلاطي

ارحل بتتفرّج علي عشوش اللصوص

المحروسين.. بِبَدْلة ظُبّاطي.!!

ياللّي كسَرْت القانون

وحاولْت وطنك يكون

مات الوطن..

ورجْعِت المية تاني تمشي في الواطي

يابَطَل.. زمانُه فات

صيّاد الدبّابات

يا مجسد الحسرة في..

أسوأ معنيها

ما عادْش غير الموت حرية

إرحل ياعبد العاطي

لا أكْل ولا ميّة

إرحل يا عبد العاطي

لا حلم بالألوفات ولا الميّه

الحسرة وطنية

الحسرة وطنية

دواها لامِنْ صبرْ ولا مِن نوم

إنت الشهيد اللي ضلّ وعاش

لحدّ اليوم

ماعادْش شيء ينباع

يامُزْعج اللّي تاجْروا في النسيان

في وطن بِشِمْ بالحمت

وما عادْش لازْمُه سماع..!!

عارفك ما مُتِّشْ عِلَّة

مُتّ تَعبْ

ما هو كام سنة يا صاحبي

يحتمل الحطب

نار الغضب.؟

وكل ما تبُرق صور في الذاكرِة

للدّببات اللي فرقْت

أو الجنود اللي قتلْت

ولماّمِ الضحك اتمزَعْت

بفرحة النصر اللي كان إبداع كل اللي ضاع منّك

مع اللي ضاع

تخمدها بكفوفك بِصمت رهيب

من غير ماتْعتِب ع الوطن

وتودّي وياَه-في الألم-

وتجْيب

كلِّمنا وأنت ع السرير عيان

عن اللي وليَّ.. وخان

وعن اللي باع النصر في الدُّكان

مش ده الوطن

اللي اتّفقت معاه ياصحبي زمان

تئن.. والأنين مرمر

وأنت بتتقلّب علي السرير

سرير فقير

تطلق زفير الحزن في النَّفَس الأخير

ولا الشاشات بِكْيِِتْ

ولا المذباع أذاع

فاكشف غطاء وجهك..

ومزّع القِناع

بَلا حكومة

بًلا رئاسة

بًلا مُعارضة

بلا بتاع!!!

2008
باريس

الإسم المشطوب ، عبد الرحمن الأبنودي

قصيدة الميدان الخال عبد الرحمن الأبنودي .. مزيكا راجح داود

قصيدة أنا الدرويش - عبد الرحمن الأبنودي

وفجأة

هبطت على الميدان

من كل جهات المدن الخرسا

الوف شبان

زاحفين يسألوا عن موت الفجر

استنوا الفجر ورا الفجر

ان القتل يكف

ان القبضه تخف

ولذلك خرجوا يطالبوا

بالقبض على القبضه

وتقديم الكف

الدم

قلب الميدان وعدل

وكأنه دن نحاس مصهور

انا عندى فكرة عن المدن

اللى يكرهها النور

والقبر اللى يبات مش مسرور

وعندى فكرة عن العار

وميلاد النار

والسجن فى قلبى مش على رسمه سور

قلت له لأ يا بيه

انا اسف

بلدى بربيع وصباح

ولسه فى صوتى هديل الينابيع

لسه فى قلبى صهيل المصباح

لسه العالم حيى رايح جى

بيفرق بين الدكنه وبين الضى

بلدى مهما تتضيع مش حتضيع

ما ضايع الا ميدان وسيع

يساع خيول الجميع

يقدم المقدام

ويفرسن الفارس

ويترك الشجاعه للشجيع

ولا باعرف ابكى صحابى غير فى الليل

انا اللى واخد على القمر

ومكلمه اطنان من الشهور

وعلى النظر من خلف كوة فى سور

واللى قتلنى ما ظهر له دليل

وفى ليله التشييع

كان القمر غافل ..مجاش

والنجم كان حافل

لا بطل الرقصه ولا الارتعاش

لما بلغنى الخبر

اتزحم الباب

وجونى الاحباب

ده يغسل ..ده يكفن ..ده يعجن كف تراب

وانا كنت موصى لا تحملنى الا كتوف اخوان

اكلوا على خوان

وما بينهمش خيانه ولا خوان

والا نعشى ما حينفدش من الباب

ما اجمل نومه على كتوف اصحابك

تنظر صادقك من كدابك

تبحث عن صاحب انبل وش

فى الزمن الغش

والرؤيه قصادى اتسعت

بصيت واحسب نفسى بين خلان

تعالوا شوفوا الدنيا من مكانى

حاشتنا اغراض الحياه عن النظر

بالرغم من نبل الالم والانتظار

اتعلمنا حاجات اقلها الحذر

ونمنا سنوات مدهشه

نحلب ليالى حلمنا المنتظر

وامتلات الاسواق بالمواكب

تبيع صديد الوهم والمراكب

وفارشه بالوطن على الرصيف

بالفكر والجياع والكواكب ومذله الرغيف

شويه فات سقراط

مسلسلينه من القدم للباط

ومتهم باليأس والاحباط

وبالعدم وبالزنا وباللواط

وبكل كافه التهم

وهو عابر للجحيم على الصراط

ينظر على الشعب التعيس ويبتسم

الى الجحيم للفلسفه

دنيا لا كانت يوم

ولا حتكون فى يوم كويسه

دنيا فى هيأة خنفسة

دنيا فسه

ما اتعس الانسان

ما اسعد الحيوان

وعبر

وصف من الزوانى وراه

متلطخين بالبودرة والمعاجين

حاصرين غطاوى الروس

بطونهم عريانين

بيغنوا طوبى لضحكه المساجين

وعيال عرايا

تفيض بها الطرقات

من القرى ومن المقاطعات

اطفال فى لون الجوع

صوت النفس مسموع

اطفال شبه وضلوع

اما انا

فاتسعت الرؤيا

وبصيت للمسا وللحياه المتعسه

وللنسايم المنعسه

وقلت ورا سقراط

دنيا فى هيئه خنفسه

ما اتعس الانسان

ما اسعد الحيوان

قبل مرورى على بعض مكان

كنت موصى يمه افوت

هجمت من الحارة مجموعه نسوان

رجعوا بالصوت

قالوا يا عبد الرحمن

وقدرت تموت

وتفوت اللحم العارى المتهان

فى المدن اللى معداش منها ريحه انسان

انا مت

ومش منظور لى جواب

متحصن بكتوف الاصحاب

ولذلك فت

عند التربه

قعد الشيخ اوصانى

وادانى كتابى بيمانى

قال لى لو جولك ملكان

قول انا عبد الله مش عبد الرحمن

ودعا لى فى لحظه ما يقوم للعدل ميزان

ينوبنى شىء من العفو وبعض الغفران

وفى لحظه ما انا متزحلق

فى قماشى الابيض

من جوف القبر

التقدم ضابط واتعرض

قبض على الجثه

وطلب الاوراق

مزع الاكفان

عدل الوش

ووقف وركلنى

وقالى بلؤم شديد

حتى فى الموت بتغش

شيلوه

ولقيت نفسى والعربيه داخله القلعه

كانت الدنيا ضجيج والشمس نيران والعه

قوم يا انسان

انا قلت

انا عبد الله مش عبد الرحمن

زى ما الشيخ اوصانى

قالى عندى اوراق تثبت انك مش مرتاح

امرك فاح

ولقيت نفسى محاصر تانى وتحت الرجلين

قلت لنفسى وبعدين

راح تفضل كده لامتى يا غلبان ؟

بتدارى ايه ؟

ايه باقى تانى علشان تبقى عليه ؟

وطنك ؟

متباع

سرك ؟

متذاع

الدنيا حويطه وانت بتاع

ويهين المعنى الضابط

ويدوس بالجزمه على الحلم

ربنا رازجه بجهل غانيه عن كل العلم

ماذا تعنى بالكون يا يساعك يا يسعنى ؟؟

رد يا جربان يا ابن الوسخة ياكلب

اظنك حتقولى تانى الشعب

وصفعنى وتنى على بطنى بالكعب

يا سعادة البيه وانا ايه؟ او ليا فى العمال ايه ؟

ما تضيع الدنيا والعمال دى تغور

يا صاحب هذا المبنى الموروث

ضل جدودك فى الجدران مغروس

انت السلطان وانا المملوك

انت السجان وانا المهلوك

انت المنصور وانا المسفوك

انا الصعلوك وامتى الصعلوك

يقدر يتجاسر على السلطان

اللى فى ايده بدل البرهان مليون برهان

رفع الهد

ماهو برضه دول يفهموا فى الكدب

اول ما اتلفت جه غارس الجزمه فى قورتى

وجيت اقعد بركنى على الاسفلت

ولقيت نفسى محاصر تانى وتحت الرجلين

قلت لنفسى وبعدين

راح تفضل كده لامتى يا غلبان ؟

ما لقتش الراحه فى الموت

يمكن تلاقيها ورا القضبان

اطلعت على الشبابيك وعلى القضبان

على الموقف

على السجن وعلى السجان

ولقيتنى طول عمرى كنت كده

كلب ..محاصر ..متهان ..منبوذ ..جربان

وانا يا ابنى الحلم اللى ما لهش اوان

معروف عشى فى قلب البستان

معروف صوتى فى زمن الاحزان

وفى اى زمان

واتذكرت سنه ما اتبنت القلعه

وكنت انا اول مسجون

وكان الضابط ده اول سجان

يوم ما ركلنى نفس الركله

يوم ما صفعنى نفس الصفعه

نفس طريقه الركل

وآخر الليل جانى بدم صحابى فى الاكل

استأذنت ارتب اقوالى

قفل الباب

واتفتح الباب

وخلاص

يا عم الضابط انت كداب

واللى باعتك كداب

مش بالذل حاشوفكم غير

ولا استرجى منكم خير

انتم كلاب الحاكم

واحنا الطير

انتم التوجيه واحنا السيل

انتم لصوص القوت

واحنا بنبنى بيوت

احنا الصوت ساعه ما تحبوا الدنيا سكوت

احنا شعبين ..شعبين ..شعبين

شوف الاول فين ؟؟

والتانى فين ؟؟

وآدى الخط ما بين الاتنين بيفوت

انتم بعتم الارض بفاسها ..بناسها

فى ميدان الدنيا فكيتوا لباسها

بانت وش وضهر

بطن وصدر

والريحه سبقت طلعه انفاسها

واحنا ولاد الكلب الشعب

احنا بتوع الاجمل وطريقه الصعب

والضرب ببوز الجزمه وبسن الكعب

والموت فى الحرب

لكن انتم خلقكم سيد الملك

جاهزين للملك

ايديكم نعمت من طول ما بتفتل ليالينا الحلك

احنا الهلك وانت الترك

سواها بحكمته صاحب الملك

انا المطحون المسجون

اللى تاريخى مركون

وانت قلاوون وابن طولون ونابليون

الزنزانه دى مبنيه قبل الكون

قبل الظلم ما يكسب جولات اللون

يا عم الضابط

احبسنى

سففنى الحنضل واتعسنى

رأينا خلف خلاف

احبسنى او اطلقنى وادهسنى

رأينا خلف خلاف

واذا كنت لوحدى دلوقت

بكره مع الوقت

حتزور الزنزانه دى اجيال

واكيد فيه جيل

اوصافه غير نفس الاوصاف

ان شاف يوعى

وان وعى ما يخاف

انتم الخونه لو يصدق ظنى

خد مفاتيح سجنك واترك لى وطنى

وطنى غير وطنك

ومشى

قلت لنفسى

ما خدمك الا من سجنك

أحزانى العاديه - الخال عبد الرحمن الابنودى



الزمان..
أيام ما كان لسه فى ناس ممكن تموت..
مش لاجل لقمة و لأجل قوت
يعنى الزمان كان من زمان
المكان..
جوه العراق..
صحرا على مد البصر ..
رمله بدون نقطة مطر
و الكوفة على رمية حجر من كربلاء

السيين يبدأ..
صوت نفس ..
مزيكا توحى بالقلق
دقات قلب بينتفض
منظر لحبات العرق ..على جبهة من الشمس استوت
الكاميرا تعمل زووم أوت
السيين بدأ..
أصوات حوافر ع الطريق..
الصوت بيعلى ويقترب
فى نقطة ع الشوف من بعيد
الزووم يزيد ..
يظهر بتاع خمسين فرس..
من لبسهم واضح بأن دول حرس..
من جيش "يزيد"
يغمس حصانه فينطلق زى الهوا
تلمح عينيهم م العفارة جريته
تلمع عينيهم..كله يجرى ناحيته
مشهد مطاردة بدون أمل ..
خلفيته.. صوت طبل افريقى اشتغل
و مفيش دقيقة ..بعدها كان سهم لحقه و إتقتل ..
ف يسيب حصانه و يتهبد..
يمسك السهم بإيديه..
و يشوف شريط الفيلم كله قصاد عينيه

الشاشة تبهت لون ضباب
علشان تجيبه بيفتكر
والذكريات دايماً بتصحى..
لما نيجى نحتضر

كنا قصاد قصر الخليفة ..باالآلاف
من كل شارع ف المدينة ..حتلاقينا
شئ مهول و مهما أحكى أو أقول ..
اللى سمع طبعاً مش زى اللى ..شاف
كان هوه جوّا بيرتعش و زى منه حاشيته
طوفانّا عمّال يقترب .. والكل جاى ف سكته
و الكاميرا جايه ع الرؤوس مع صوت ..هتاف
الصورة تعمل فيد أوت..
كل الملامح تختفى..
الصورة ترجع..الإضاءة نور قمر
و المشاعل اللى باقية نورها قرّب ينطفى
و اللى فاضلين م الآلاف يتعدوا يمكن ع الإيدين
معرفش لسة الغلطة فين ..
بس الحسين لازم خبرنا يوصله قبل ما يفوت الأوان
خوفنا خلّانا عبيد مالناش أمان
إحنا مش قد اللى عاوز يعمله
و صوتنا النهاردة جمب صوته
وموتنا موته ..
و بكرة قدام الخليفة إحنا اللى ممكن نقتله ..
صمت تام ..بعده يبدأ صوت يبان
صوت لعزف حزاينى جداً ع الكمان ..
سيين المظاهرة خلاص خِلِص ..
و سيين العقاب واضح إنه فى أوله ..
الكاميرا فجأة تلتفت ..
جايبة شكل القصر كله من بعيد ..
زووم ع الفراندة اللى طلّة ع الجنينة
من وسط ظباط حاشيته يظهر "يزيد"
زى اللى دبت روحه جواه من جديد..
يكشف سنانه و يبتسم ..
و بسيفه يشاور علينا
من غير ما ينطق كلمة واحدة ..
فى ظرف لحظة إفترقنا
كل واحد ودّع الباقيين بنظره
و هو بيلف بحصانه .. وانطلق
كل واحد فى إتجاه
كل واحد منا يجرى .. وألف كلب صيد وراه
معرفش مين فينا اتصلب
مين انضرب ..
مين فينا بالمدنة احتمى .. مين اللى من فوقها اترمى
أو حتى مين قتله العطش بعد اما تاه ..
كل الشوارع مصيدة وكل البيوت ..
الكوفة نايمة حتى من قبل العِشا..
حَطَّت صُباعها ف ودنها ..
وسابتنا بره الباب نموت ..
الليل يفوت..
و الحظ يلعب لعبته و يسيبنى أعيش .

الكاميرا قدام الحصان
الحركة ماشة بالبطئ ..
الكاميرا تعلى لفوق اوى ..الصحرا تملا الكادر كله
و الشمس ف نهاية الطريق..
ع الضُهر حسيت بالتعب ..
بطّلت جرى..الشمس حامية وصدرى من كتر العطش
عمّال يضيق ..
ريقى بحاول أبلعه مش لاقى ريق..
حسيت ساعتها إن النهاية بتقترب
ف نزلت من فوق الحصان ..
طبطبت على كتفه وسندت ..
و بنظرة بصيت للسما زى الغريق

الصورة تتثبت بتاع أربع ثوانى ..
الصورة فجأة تجرى بس بسرعة جداً..
مع صوت كأن حد بيسف الشريط ..
الصورة تثبت مرة تانى
جثة فوق الرملة نايمة ..
سهم راشق نفسه فيها ..
زى شاهد من فوقيها
الكاميرا تبعد حبة حبة ..
والإضاءة تنطفى..أصوات نايات ملو السمع
و الكادر بيلّم الوجع .. وبعدين يقرر يختفى
صورة سودا للسما من غير نجوم..
مع صوت هوا عمّال يزووم فوق الرمال..
قدام بعيد ..أشباح جِمال..أصوات خفيفة للخيول
ينزل كبيرهم من على جناح الفَرَس .. و يلف كفه ع اللجام
بعدين يقول ..
الليلادى نبات هنا ..دقّوا الخيام
ساعتين وكان الكل نام ..
يصحى فى نص الليل لوحده من القلق ..
ابنه الصغير يسأله ..مالك؟
مفيش..
هو إحنا مش ع الحق برضه ؟
يبقى تفرق إيه نعيش..
تلمع عيونه بدمعتين ..
يحضن دراع "الحسين"
و الحضن دايماً يختصر نص الكلام
يا رب مغلوب ف أنتَصِر
الظلم عمره فى يوم ما دام ..
و تفوت ساعات الليل قوام
الفجر يبدأ..يوم جديد
و ينكتب ع الشاشة بالفونت العريض ..
يوم كربـــلاء
آخر ساعات قبل المصير
و الكاميرا تتسحّب ع السيين الأخير..قبل الختام
الكاميرا جايبة صقر طاير فوق بعيد ..عمّال يلف
ويرسم دايرة مقفولة ..
كأنه حاسس ب اللى هينقتل تحته..
و إن الحسين على وش مدبحته..
و إن الرمال تحتيه بالدم راح تشبع ..
و إن الهوا حواليه حبة و حيبقى تراب ..
و حيبقى هوّه وصُحبته أغراب
و إن المدد مش جاى مش هوّه ده عَلَمهُم
إللى قالولك تيجى ..رجعوا ف كلامهم
يا حسين هتيجى تموت لمين ؟
إرجع..
كل إللى جاى عشانهم تِفدى وتناضل ..
راضيين يعيشوا عبيد ..
و المشهد الفاضل هتموت ف آخره وحيد ..

الشاشة تتفتَّح بالراحة ع المشهد ..
الصورة سودا و تاريخ بينكتب بأبيض ..
الزمان ..20 ديسيمبر
شهر و نكمل سنة ع الثورة تقريباً
الوقت..قبل الفجر
المكان.. أسفل إشارة عمر مكرم
جمب الصينية تحديداً..
و يخش آخر كادر فى القصة على غفلة ..
فيد إن ..على الكريشيندو والقفلة .
أصوات هتاف ..
و بتقطعوا أصوات بعيدة لسراين الإسعاف ..
و ساعات قريبة لضرب نار ..
الكاميرا بتزووم ع الهدوم الكاكى ..
الكادر فجأة فيه بشر ظهروا ..
صفين عساكر جيش مترصصين بالعرض ..
و بلاط رصيف الحى مخلوع و متكسر ..
و الراوى يبدأ حكايته .. وصوته متأثر

أمسِك"محمد مصطفى" ع الأرض ..
و أبكى و أنا بقلبه من كتفه على ضهره ..
و نشيله جرى فأشيله من باطه
و صوابعى حاسة بقلبه بيدقدق ..
مع كل نبضة تخف نبضاته ..
كان قلبه مش بينقّط ..
قلبه بيدلدق..
قالوا الدكاترة بعدها ..
اللى اتقطع شريان مهم..
المهم .. لفّينا وِسطه بشال
و عقبال ما جرينا للشارع ..
و لقينا عربية ..
و لحد مستشفى الهلال ..
و لحد ما استلموه طقم النبطشية..
كان هوّه متبرع بنص دمه للطريق ..
و عرفنا بعديها بيومين ..
إنه إتبرع بروحه للقضية ..
و إنه ساب لإصحابه ف هدومه وصية ..
الكاميرا جايبة شاب بيغرّق إيديه بالدم ..
و جايبه صاحبه معدى جمبه بيدمّع ..
بيقول كلام و يعيد كأنه بيسمّع ..
شيّع صحابك من معركة بِالليل..
و الصبح فرَّج دمهم للخلق
و لأتوبيسات الناس الرايحة للأشغال..
زعّق بصوت رايح.. و بحشرجة فى الحلق
و اسكت عشان مبقاش فاضل كلام يتقال

الكاميرا ماشية بالبطئ جمب الصينية ..
الكاميرا ماشية بالبطئ فوق الطريق الأحمر
يتودّع الواقفين فى الكادر و بتطلع ..
و أصحاب محمد لسة بيحاوطوا الأمل بالطوب..
زى ما يحاوطوا قَدَر الشهيد المحتمل ع الأرض..
أفتح وصيته وأقرا إيه مكتوب
الكاميرا طايرة ع الميدان من فوق ..
و الصوت يرن لوحده فى سما المنظر ..

إنى رأيت اليوم...الصورة من برة
و قلت الحسين لسة ....حيموت كمان مرة
إنى رأيت اليوم ....فيما يرى الثائر
ان الحسين ملموم ...فوق جثته عساكر
بيدغدغوه بالشوم
كل أما ييجى يقوم
و ان البشر واقفة
تبكى بدال ما تحوش
و ان العلم مصفاه
م السونكى و الخرطوش
و ان الطريق مفروش...بالدم للآخر...
إنى رأيت اليوم...
الدم ع الآيش....
و إن الحسين إحنا....
و مهما اتقتل عايش


▶ إني رأيت اليوم  -مصطفى ابراهيم

عبدالرحمن الأبنودي.. -أذكروني لما تصطادني الأيادي

عبدالرحمن الأبنودي ورساله من مسجون هارب

منّاع ☭